《解結者 走藍走甜走偽黃》

推

十七、交心

當心扉被打開後，很多時自己就會很容易無意間關心了人，但注意，這不是情侶之間的感情，只是朋友之間的友情。有一種朋友可以很久才見一次，但一見面就很多話題，或是只要一方有事，大家就會義無反顧地幫忙。另外一種就是會不停地聊天，基本上對方一天的行程都從對話中得知。這兩種朋友的相處都與情侶有點相似，所以有些人會有錯覺，以為想進一步發展。

錯覺，做成誤會、煩惱，很多的時候，若然不提早說清楚，誤會就只會不斷圖添。還能與天秤女聯絡下去，主要是因為我們很早就有共識吧，大家都不會走多一步，能維持著心靈的交流，排解大家情緒，就已經很足夠了。在此之前其實發生過一些事情，幸好，跨過了，才會有曾經這種交流。

這個對話前，我們每天都會談天說地，但有一次無意間談到了感情事，這不是一個好的先兆。

發生的時候，自己也沒有太在意，始終人與人之間終有一天會相別，差別就只在於時間而已。

我問︰「你覺得我咁樣對人好唔好？」
天秤女說︰「你對我唔好，所以唔算好啦。」
「吓，我幾時得罪你？。」
「唔知呢。」
「傻瓜，我對你太好係唔得㗎，要保持一啲距離。」
「點解咁講？」
「你冇見有啲人嘅自介咩，又話沉船又放唔低。」
「我知道底線嘅，我都好驚依賴人。」
「其實每個人都想有個人可以依賴下，但我知唔可以。」
「係㗎，如果被我依賴嗰個人突然間消失，我會好傷心。」
「係㗎。」
「我好易好易喊，但我知喊解決唔到問題，更加冇人幫到我。」
「所以要學識同人哋好好相處嘅同時要有適當距離，其實我有時都想有個人可以比我依賴，但我知唔可以。」
「知道。如果有一日你攰嘅話，想抖一抖，或者想搵人呻，我都會喺到。」
「為咗公平，你都可以同我呻，雖然我唔識自我安慰，但我安慰人都唔差。」
「有時候我會寧願自己一個。」
「自己一個冇問題㗎，最緊要自己開心。」
「我都唔知自己想點，我好想搵一個人陪我，喺我需要嘅時候係我身邊。」
「你想呻就搵我啦，我唔介意去安慰人，我只係小王子入面嘅狐狸。」
「男仔的確有好多個選擇，但係當中冇我想要嘅人。」
「有時候又唔一定要搵另一半嘅，好似小王子入面嘅狐狸咁，佢都只係喺小王子失落嘅時候陪住佢，令佢開心返，當小王子離開嘅時候，狐狸都冇困住佢，就好似一個過客咁。」
「啊，好想喊，狐狸就好似一個知己咁。」
「係㗎，有時候有一個知己好過拍拖，大家只係心靈上嘅交流，唔會影響到對方嘅生活。」
「唉，我都好想有個知己。」
「你想嘅都可以同我傾嘅，我試下開解你，但要記住我只係一個普通人，唔好對我上心。」
「知道喇，成個啊媽咁。」
「我唔係一個吸引嘅人，亦都知自己性格扭曲，可能咁樣，對大家都係一件好事。」

交心是一件很愉快的事，尤其當對方明白自己內心想法，感覺像遇見了一位老朋友，但實際可能只是認識了一段很短的時間。

很多人的一生就只是想找到那位另一半，付出自己的愛，同時感受對方的愛，這是一種很理想的關係，但不同人對愛的定義又有不同，有些人會著重於性，流於軀體外，而有些人會著重於心靈，心神之間的交流。這兩種愛沒有高低之分，可惜當側重在肉體上，其中一方的心靈或會空虛，而相反，當側重在心靈上，其中一方或會覺得對方的表達不足夠。拿揑一個好的平衡，永遠不是易事。而我，可能永遠只能停在心靈上的交流。

十八、面具

我很羨慕另一個我，他擁有著不近人情的理性，很多事都能順著邏輯，將問題拆解，從根本上解決，學業上、工作上，很多時都靠他負責，雖然身體會有點不適，頭會有點痛，但他的確能把事情好好處理，在別人眼中是一個優異的存在。但當要處理感情的時候，他就會識趣地離開，因為他很喜歡理性，而且不想脫離理性。

了解一個人的想法不容易，就算你找一個博士去做這件事情，答案可能也是不清不楚。了解別人，看的都是緣份，緣份到了，自然會了解到對方，或許這就解釋到為何到最後我和她的結局，雖說有點牽強，但我想不到一個更好的解釋，只能歸究於緣份。

自從上次與水瓶的對話，基本上每天都會與她保持聯絡，我一有空便會回覆她。

那一天，水瓶女的暱稱改成了一個兔仔符號，加上她頭像是龍貓中的妹妹，我為她改了一個花名。

我說︰「你個名轉咗做兔仔嘅？」「係啊。」
「咁你咪變咗兔仔妹？」
「哈哈，有新花名。」
「唔係啦，咁啱諗到。話說尋日愚人節，有冇啲咩特別事發生。」
「話說之前咪同你講過有個男同學對我好好嘅，你記唔記得？」
「我記得，好細心嗰個，又煲嘢又比藥膏嗰個嘛。」
「佢尋日同我講我愛你。」
「好正常姐，嗰時中學愚人節，我哋班係會玩到癲。」
「我嚇死囉，好彩我記得尋日係愚人節。」
「你算好啦，我咁多年嚟都冇人試過喺愚人節同我講。」
「咁我都係第一次呢日收到。」
「你睇你，你幾有吸引力，屈機。係呢，其實你住邊頭㗎？」
「我住……㗎。」
「我返學會經嗰頭喎，有機會我放學一齊食個飯？。」
「你返學會經？乜依家仲有人未停課咩？」
「我成日都要返去做實驗啦，要砌好多嘢，所以要返啊。」
「食飯好似好急喎，咩啊，你好急咩？」
「唔係啦，我係怕好似以前咁慢吞吞，最後搞到自己食咗個惡\後果。」
「咁我要重申，我唔係啲玩玩下嘅人。」
「所以想了解多啲，有時食飯可以睇到好多嘢。」
「都係㗎。」
「咁你覺得時機到嘅時候，你再同我講啦，再約。我係唔係好傻瓜？」
「唔係嘅，你唔蠢。」「點解咁覺得呢？」「個感覺。」
我說︰「人總要帶著面具生存。」
「咁呢個真嘅，但係嗰啲面具唔一定係壞事。」
「可能你只係睇到我嘅面具，真實嘅我，我都唔想再見。」
「咁每個人內心都有啲比較敏感或者脆弱嘅地方，唔會比人睇都正常，所以話，搵另一半，就係要搵個唔介意睇到你面具下嘅人。」
「搵另一半好難，你要吸引對方之餘，又要佢知道你嘅缺點後又唔嫌棄你。如果技巧唔夠，好難會有人想深入了解。」
「Exactly，但我又唔覺得需要技巧嘅。」
「唔係㗎，如果一嚟就打開心扉，人哋會覺得大直接，或者根本唔洗咁。所以要一步一步，就算唔鍾意咁，係呢個世界就要遵守人性嘅特質。唉可能你覺得我咁諗好怪。」
「咁我又冇覺得你怪嘅，可能每個人性格唔同，所以個諗法會唔同，咁冇話邊個怪唔怪。」
「係啊，所以都係好好戴住面具，到有一日有個人接受到又值得為佢去除嘅時候，先再放下啦。」
「希望你會搵到啦。」
「我都祝你會搵到。」
「多謝。」
「茫茫人海中尋覓愛，邊有咁易。」

人與人之間的關係，最初都是由一個又一個的謊言建立，直到關係改變前，或許大家都被謊言蒙蔽著，但當謊言一點一點被拆穿的時候，兩人的關係要麼變得更親近，要麼變得疏遠。能接受到對方缺點的人，慢慢就會越走越近，變成密友、知己，有些甚至會陪伴對方一輩子；不能接受的，慢慢就會疏遠，由朋友變成陌生人，這已算是好了，有的甚至反目成仇，憎恨對方一輩子。

不是大家不想真誠，而是大家無法真誠，在社會生存，總要戴著面具吧。

推

推

推

推

十九、工作

每個人對工作的看法的大有不同，有人只求糊口，有人興趣主導；有人得過且過，有人精益求精；有人實現夢想，有人貢獻社會。每人的看法和選擇都不同，同事之間也一樣。公司，某程度上就是自己的另一個家，有人每天面對同事的時間比家人還要多，不難推斷，同事之間的磨擦隨時比家人間還要多。

但為何面家人間的爭執，大家可以退後一步，而同事之間又不可能呢？我不是推崇墨家說法的人，但人與人之間保留一點兼愛，真的這樣難嗎？任何人工作上都會出錯，要人承擔責任是應該，但是否要用一副討厭的嘴臉，大吵大鬧，或用詞尖酸刻薄，才能達到目的？大家都是人，為何就要將你的優越感建立在別人身上？

天秤女說︰「今日返工好燥。」
我說︰「點解啊？」
「個負責人真係好煩，啲嘢又唔係我做錯，但佢將啲脾氣發落我度。」
「嗯，佢又幾無理喎，比著我實同佢講返問題嘅根本。」
「佢睬你都傻啦，頭先仲成個手術袋車過嚟。」
「痴線，乜啲人咁低情商㗎。」
「唉，佢做又做得耐過我，可以點啊，鬼叫我細咩。」
「冇計啦，返工好多老屎忽。唔好比人搞到發脾氣啊，傷自己啊，你由啲低等人發脾氣。」
「好啦，唔發脾氣。老屎忽真係好煩，我診所個醫生仲癲啊，日日都搵嘢嘈。」
「佢係唔係失戀或者炒窿股票啊？」
「佢唔會失戀啦，佢成七十歲喇。」
「咁佢嘈啲咩啊？」
「依家少咗人睇醫生，少咗啲生意，就係到賴班後生仔搞亂個社會導致。」
「哇，佢都幾好笑喎，又唔見佢話自己把口臭趕走啲客嘅？」
「哈哈。不過最嬲係，佢針埋我一份，我返工都唔講政治啦，佢就因為我年齡玩針對。」
「我仲以為專業人仕啲修養好啲啦，點知都係有敗類。」
「係啊，好煩㗎，唉。」
「話說你依家人工幾多？」
「唔算好高咋，得萬零咋。」
「吓，咁唔做都罷啦，人工又唔係高。」
「係㗎，不過呢個時勢邊到咁易搵到另一份啊。」
「咁又係，但係都要試啦，咁樣屈住屈住好辛苦。」
「同埋做得耐都有感情啦，唔係話走就走到。」
「我覺得唔應該咁樣限住自己，有啲事如果預計到將來唔會有好結果，就唔應該繼續。」
「我有咁嘅決心就好了，始終都想有個錢旁身。」
「唔緊要啦，你試下騎牛搵馬。」
「壓力就嚟爆煲，今晚搵班朋友飲下酒先。」
「減壓好重要啦，但記住如果餉環境唔合適，你要嘗試下改變環境。」
「知喇，知喇。」
「話說我知你間診所叫咩名。」
「吓，你跟蹤狂嚟㗎？」
「唔係啦。間診所應該係叫陳落山醫生診所。」
「點解？」
「你試下將個英文拼音嘅第一個字母攞出嚟。」
「C……L……S，CLS診所。哈哈哈哈。」
「笑下就好。」

家人，情侶的問題或許會因大家的關係而容忍，即使再無理，有些人還是會死忍到底，這或許情有可原，始終與他們的感情不是一朝一夕，而人又是一種感性的動物，很多時都不願意忍痛一割。但工作上呢？如果工作上遇到無理的人，而一次又一次受氣，那我們是否真的要忍下去呢？

我主張人與人之間需要尊重，無論對方是誰，只要沒有尊重過自己，就不需要跟他們客氣，即使職位再高，錢財再多，不懂得尊重的人，與暴發戶又有何分別？我討厭這些人，總覺得世上很多的紛爭都由他們挑起。

這些人雖說可恨，但若然自己沒有嘗試改變環境，讓這些人一直折磨自己，我想問，你的說話有意思嗎？只懂怨天怨地的人，不嘗試改變的人，很遺憾，你是一個不會進步的人。雖則你的作為未必立竿見影，但可預見的是，你的嘗試會為你帶來一條新的路，未來是好是壞，很多時都掌握在自己手上。

二十、勤奮

刻苦耐勞，從來都是一種被標籤為好的個人特質。我不知是對是錯，但我一直都讓自己勤奮做事，每天都要自己改善，每日一點，積少成多。如果你數學不太差，懂得計算複式利率的話，你可以試計算一下，每天進步1%，三百六十五天後會變成多少？或許不用複式，用簡單利率，這個改變也是很可觀的。

失戀也好，迷失方向也好，嘗試每天逼自己進步一些，可能只是一些很細微的習慣，例如抽少一支煙，跑多半分鐘，思考多一步。幾年後，可能戒了煙，跑到馬拉松，做事更有計劃。開心的時候要做，正常的時候要做，失落的時候都要做，堅持勤奮，是一種很難的事。

水瓶女說︰「好多人都因為好感而一齊，但真係鍾意而一齊嘅好少。」
我說︰「同你傾咗一排，我諗你係真係鍾意先會一齊嘅人。」
「都係啊，我冇拍拖好耐喇。」
「係好事嚟，寧缺勿濫。希望你嘅等待會幫你搵到一個真心愛你嘅人。」
「希望啦，時間過得好快。」
「呢啲時間可以好好裝備自己啦。」
「如果我有你咁勤力就好啦。」
「你又知我勤力？」
「同你傾偈都知你好勤力。」
「其實有時我都唔覺得勤力係好事，自己有時會好辛苦。」
「咁係值得嘅，辛苦完會你會得到回報嘛。」
「你想唔想知我啲動力喺邊到嚟？」
「想啊，請講。」「你聽完之後唔好覺得我奇怪就好。」
我續說︰「我以前細個都係一個懶懶閒嘅人，持住自己有小聰明就唔溫書，覺得求其讀得啦，直到我知道我細嗰陣發生過嘅事之後，我就成個人變咗，勤力到我班主任都話我變咗好多。」
「我信你好努力，咁其實係發生咩事？」
「你覺得咩嘢係令到一個人會堅持到底？」
「屋企支持？朋友支持？」
「我嘅童年好扭曲，因為我身世嘅問題，我啲親戚好多都唔鍾意我同埋我媽媽，睇死我大個唔會成功，仲叫啲仔女少啲同我交往，嗰時我唔知，我以為只係大家唔夾，直到我大個，我明白成件事之後，我好嬲。自此呢件事成為咗我嘅精神食糧，我覺得，我每日都要提升自己，直到有一日，我可以當佢哋螻蟻咁對待。係唔係好負面嘅世界觀？」
「一啲都唔負面喎，我覺得你好犀利。」
「唔會覺得恐怖咩？份人咁記仇。」
「唔會啊，完全唔覺得。」
「吓，點解？你係第一個咁講。」
「你揀咗自己想行嘅路，你知自己想點就得。」
「正常啲人會話，你唔洗因為班垃圾而咁辛苦自己，記仇有咩為等等，但你完全唔係。」
「我冇將個重點放喺記唔記仇呢樣嘢，我淨係見到你有自己嘅目標，你好清楚自己做緊乜，好過乜都唔做，放棄人生，同埋你好愛你屋企人。」
「你睇嘢好正面，好似個太陽咁。我好愛我屋企人啊，以前我都好愛我前度，可惜。」
「你同你前度好似都只係分咗幾個月咋喎。」
「但我做過好多嘢。」
「你唔會覺得好可惜咩？你咁愛佢。」
「當努力過，付出過，都挽回唔到，佢冇企係我嘅角度諗下，我就知就算仲有愛，我同佢嘅將來都唔會有好結果。愛一個值得愛嘅人，比愛一個一直愛的人更重要。」
「值得唔值得，好難判斷。」
「要用時間去判斷，雖然會需要時間，但我諗，我哋仲細，未來我哋都有時間去判斷人哋值唔值得。」

每次提起自己的過去都會有一點惱怒，但又無可奈何。我身邊的人對我都不是特別好，有些甚至對我造成的傷害很大，但我沒有氣餒，每一次我都得到一點經歷，不知道我是否扭曲，有時候我反而慶幸有這些人的出現，才令我有動力成長。被割傷的一刻很痛苦，但傷癒後，所留下的疤痕，除了是一個印記外，還可以提醒自己，如何避免歷史重演，以及如何好好提升自己，要不要復仇，就由自己決定吧。

二十一、生病

新年的時候，總會祝福別人壽比南山，希望別人長壽，但我總覺得，做人不能太長壽，我只希望自己可以身體健康，若然死亡來臨，我只求自己可以痛快，不想受太多折磨。有一段時間，我進出醫院的次數也頗頻密，不是我自己病了，而是親戚病了，最後也過身了。每次進出醫院，看到病人躺在床上，受盡折磨，自己也會想，將來我會怎樣死去呢？是否受盡煎熬而死呢？

幻想著躺在床上的日子，受著病魔折磨，靠著機器維生，不能離開三尺之地，每當想到這裡，我便希望自己未來可以痛快地離世。我不知世上是否有靈魂，若然有，我的離開，最起碼能讓我的靈魂自由。我希望我的軀體不會限制著靈魂，它也有它的自由。

天秤女說︰「唉，今日要出旺角。」
我說︰「行街唔係一件好事咩？我都好耐冇行過街喇。」
「唔係行街啦，係我隻狗病咗啊。」
「吓，冇事啊嘛，佢點樣啊？」
「佢又嘔又痾，唔知佢咩事，所以帶佢去睇醫生啦。」
「希望佢冇事啦，你快啲同佢去睇醫生先啦，唔好覆我住。」
「好，睇完醫生再搵你。」

對寵物的緊張，除了因為牠有生命之外，還有的是與牠的經歷、每一個開心的回憶，由這些經歷、回憶所建立的關係，總令人不想失去。

天秤女說︰「依家醫生睇緊，好擔心佢有咩事啊。」
我說︰「唔好咁擔心先啦，醫生會幫佢醫好㗎。」
「佢陪咗我好耐喇，唔知佢有會有咩事。」
「係啊，你要諗下，其實佢都帶嚟咗好多快樂嘅回憶。」
「係㗎，佢冬天嘅時候會走去我張床到同我瞓，平時想食零食又會走嚟合手拜拜，佢真係好精靈㗎。」
「係囉，佢好精靈㗎，點會有事呢，就算有，佢都識打低個病魔啦。」
「都係啊，佢咁乖仔咁醒，點會有事呢。」
「係囉，所以你唔洗擔心。」
「嗯，多謝你。」
過了一個下午。
天秤女說︰「醫生話應該係普通腸胃炎，不過要留底幾日觀察。」
我說︰「佢喺到會比人好好照顧㗎，你當比佢休養幾日。」
「嗯，過幾日接返佢返屋企，到時佢就可以健健康康咁同我玩。」
「係啊，呢排又凍咗啲，佢實會走去你張床同你瞓姐。」
「嘻嘻，諗起都開心。」
「依家仲有冇咁擔心啊？」
「聽完你講個人舒服咗啲，冇咁擔心。」
「嗯，咁就好。」
「遲下佢好返，你要幫佢梳下毛，佢啲毛好得意㗎。」
「好啊，不過到時係咁打乞痴你唔好怪我喎，我有鼻敏感。」
「哎呀，咁唔好喇，廢事你打乞痴傳啲唔知咩病毒比佢。」
「你係唔係讀護士㗎，鼻敏感同細菌或者病毒冇關喎。」
「我緊係知，我同你講下笑。」
「哈哈，睇嚟我轉數有啲慢。」

這一次以後，天秤對我的依賴慢慢多了，每次有不快都會找我傾訴，我就像一個解結者一樣，開解她，解開她的心結。那幾天，她訴說了自己很多的過去，而我亦一直傾聽著。我不知這是一個好事或是壞事，但我知道，我與她之間是有一道界線，如果任誰觸碰了，或許，這道橡筋就會斷掉。

她是一個很好的人，她還保持著小朋友般的思想，喜歡依賴人，喜歡令人開心，但我知自己是一個壞人，我可以開解到她，但這或許是一種禍害，如果她對我有更多依賴，我怕我不能給她一個相應的回報，長時間下去，事情就只會走進死胡同。

被人依賴的感覺可能很好，但長久下去，只怕害己害人。

二十二、外表

何謂美，何謂醜，每個人也有不同的定義，有些男人喜愛高窕，有些喜愛矯小，有些喜歡長腿，有些喜歡大胸；有些女人喜愛鋼條，有些喜愛壯碩，有些喜歡腹肌，有些喜歡胸肌。以科學角度來說，大自然物競天擇，人作為動物的一種，當然希望後代可以出生就有先天優勢，所以會靠軀體外表來選擇另一半。

我也許是一個低俗的人，我也會看明星的樣貌身材，羨慕他們的外表，但當你問我，希望另一半有甚麼特徵，我無法回答。自知天生的外貌不討好，沒有六尺高，在很多外協當中，或許我連被評選的資格也沒有，所以我沒有很介意自己的另一半會是怎樣。若我必須回答問題，那麼，我只求不肥不矮，五官端正，若然有一個甜美的笑容就更好。

到現在，我還記得她的笑容。

我說︰「聽人講，你間大學啲人都好識打扮。」
「都唔一定，我覺得有啲極端，如果係主園區就分兩種，一係就運動型，一係就好商業，如果係醫學院，因為多人住宿舍，所以就會頹或者樸素啲。」
「咁你哋嗰邊啲人有冇話會踢拖，短衫短褲就走去上堂？」
「真係好多，特別醫學院，但當然唔係全部，護士啲人都貪靚嘅。」
「你哋護士有幾貪靚啊？有冇話化個妝要幾耐，搞個頭要幾個鍾咁。」
「咁又冇你講到咁誇張，以我做例子，我係可以好極端，可以極頹著普通宿衫就上堂，但冇再住宿之後就打扮好啲，因為始終學校同屋企都有段距離，不過又唔會著到太露肉。」
「其實女仔點界定露唔露肉，我見有時啲女仔著啲裙啊、熱褲啊，短到好似就嚟走光咁，或者如果有上連登，啲人會叫佢哋做摟屌裙摟屌褲。」
「其實你講咗個重點就係長同短係男同女嘅觀念上係唔同嘅，你頭先話短嗰啲，係我哋女仔眼中會唔明白點解係短。」
「吓，熱褲唔會太短咩？我嘅經驗係我曾經見過啲女仔著熱褲之後走光，我禮貌咁提一提佢可能要坐好少少。」
「咁嗰啲係有啲短但又未去到會走光，其實著衫係睇比例嘅，有啲著咗上身就唔覺得短，不過你頭先講嗰啲係真係短到我都接受唔到。」
「咁你呢，你覺得你自己可以接受到幾短？」
「我又冇話喎，其實市面上啲褲係有標準比例嘅，但高嘅人著呢，睇落去又會短喎，有時買衫都幾煩惱下。」
「睇嚟你都係幾識襯衫嘅人，有機會教下我。」
「我對於嘅男仔嘅打扮又冇乜研究喎，淨係得順眼唔順眼。」
「話說咁你嚟講覺得最露嘅打扮係點？」
「我覺得係一字膊，仲要露腰嗰隻，或者係緊身連身裙。」
「吓，一字膊露又露唔到啲咩，點解你覺得露。」
「成個膊頭喎，可能男女個睇法唔同。」
「可能同男人平時好少留意膊頭有關啦。」
「咁留意咩啊？」
「我會留意眼，有啲人會留意胸，有啲就留意腳，咁你哋女仔呢？」
「咁緊係會睇晒全部啦，最直接同最快嘅就緊係身高同個樣啦。」
「慘，呢啲都係先天嘢。咁染髮呢，你有冇染髮㗎？」
「深啡，我比較鍾意啲自然嘅顏色。」
「你覺得灰色算唔算自然？」
「我覺得呢啲嘅冷色呢，其實好睇你本身嘅衣著，如果唔係就有啲奇怪。」
「呢排試緊皮褸加灰髮，不過髮色有啲難保持。」
「認真咩，我覺得皮褸唔可以隨便著，同埋著得唔好就好MK。」
「得啦，時尚達人，好有興趣想睇你出街會點著，有機會不如食個飯。」
「熟啲先啦。」
「好啦，你婉轉咁拒絕咗我喇。」

這樣的拒絕其實無傷大雅，最起碼大家還可以繼續傾談。當時自己還未知懂知足，一次又一次的試探著她，而她一點都不蠢，她每次都很婉轉地拒絕了。直到那一次，可能她真的覺得不能再這樣下去，她再沒有婉拒，就如一開始說的一樣，「有啲人會話我似冰山，有啲又相反。」看著這座冰山上的踏痕，有時都覺得自己有點可笑，懂的把關係比喻為橡筋，但不懂得如何好好拉橡筋。

二十三、依賴

這幾天，我一直擔當著解結者的角色，她訴說著自己的過去和生活煩惱。而她的煩惱，大部分都圍繞著她的工作，她的同事，她的上司。我承認我是一個耐性欠奉的人，同一件事重覆幾次，我會不耐煩。我已努力提升自己的耐性，但面對一些鑽牛角尖的人，我會嘗試迴避，而避不到後，就只能忍痛一割。

離不開工作的對話，很無聊，很煩厭。

天秤女說︰「痴線，一返去就勁燥底。」
我說︰「搞咩啊。」
「話說今朝幫佢醫生斟水，斟七成比佢，之後佢就發晒脾氣咁話，『邊個幫我斟到咁滿』，然後我認咗，佢就話『你斟咁滿我點加嘢去沖啊』，之後就係到嘈嘈嘈，大佬之前都伙3咁斟又唔見有問題，自己有脾氣就發落我到。」
「走，劈炮，人工又唔係高，搵過份。」
「呢個時勢難走啊。」藉口。
另一天。
天秤女說︰「啲同事自己甩漏又喺到發脾氣，發咗成朝。」
「你由啲低等人發脾氣啦。」
「揼我嘢啊，大小姐咩。」
「做得唔開心唔好逼自己繼續做啦。」
「唉，搞到冇心情食嘢。我就嚟出實習，呢間診所嘅時間算係就到㗎喇。」藉口。
另一天。
天秤女說︰「呢排好多負能量。返工返到個人好忟好燥，成日想發脾氣。」
「因為你需要休息，要離開一下個環境。」
「我都想休息，但冇得休息。」
「個環境唔適合你，唔好逼自己太多。」
「就嚟抑鬱喇我。」迴避。
另一天。
天秤女說︰「今日放假都收四個公司電話。」
「慘，唔理佢咪得。」
「冇得唔聽啦，所以我覺得好煩。」
「放工都做，傻㗎？」
「有個病人出錯咗糖尿病藥，唔關我事又打過嚟。」
「你細，乜都會搵你食。」
「真係唔想做喇。」
「走啦，咁樣好辛苦。」
「哪有錢？」藉口。
我覺得自己耐性很好，至少在寫這篇文的時候，我們還有聯絡。但之後發生了些事，我們就很少再找對方了。
天秤女說︰「頭先醫院打嚟，話聽日要去睇一睇狗狗。」
「幾好啊，醫生有冇話佢依家情況係點？。」
「佢冇講啊，不過原定係聽日接走佢，我諗都係驚我唔記得姐。」
我的第六感告訴我，這個電話，並不是她想像中簡單，很大機會有些事發生了，但我沒有告訴她，可能我不想她太擔心吧
「聽日就可以接佢返去喇，咁你地就可以有排玩啦。」
「係啊，好期待聽日啊，今晚瞓個靚覺，聽日接狗狗。」
「早抖。」「早抖。」

依賴是一種無形中的感覺，在工作上、家庭中、朋友間，都很容易發現。依賴是一種習慣，不是無緣無故存在，日積月累而成的關係。很多時產生了依賴，自己也未必知道，但當那個人離開的時候，才會發現自己一直都依賴了別人。離別是一種痛苦，離別也是一個常出現在電影和小說的題材，雖然結局都一樣，但為何大家都愛看？因為離別著重的不是結果，而是大家曾經相處的過程，大家之間的依賴。

這一刻，我的感覺是，她已經依賴了我，如果我再不做一些事情，這個雪球只會越滾越大。我不知道，到最後我有沒有做錯，或是時間有沒有錯，但我知道，如果我不這樣做，將來她和我都不會好受。

二十四、冷淡

事情轉壞之前總有一些先兆，就如戰爭前，總有一連串的孤立和挑釁。我和她之間的先兆，或許就是那一句「熟啲先啦。」這一句話之後，不知道是自己的直覺還是感覺，總覺得與她開始有點疏遠，那時以為，只是自己錯覺，但到事情最後，就知道自己雖然不是女性，但我的第六感也不是太差。

幾天後，我魯莽地做了這一件事。
我說︰「今日有樣嘢想做。」
「有咩想做啊？」
「想攞你Instagram。」
「點解？我Instagram冇嘢睇喎。」
「好啦，你再一次婉轉咁拒絕咗我喇。」
「係真㗎，自從上年六月之後，除咗文宣，我就冇上載其他嘢。」
「睇下你舊時嘅相都好啊，不過唔緊要啦，我放低我Instagram，你有興趣就加啦。」
「你會唔會覺得我好衰，你問咗幾次我都冇比。」
「唔會啊，你對陌生人或異性謹慎冇問題㗎，係你嘅優點。」
她沒有回覆。過了大約半個小時。
我說︰「或者你有冇時間？我有啲嘢想講。」
「我溫完書再搵你。」
再過了一個小時。
水瓶女說︰「溫完喇，你想講咩啊。」
我說︰「我覺得同你相處嘅呢段時間，雖然我做主動比較多，但其實我好享受同你溝通嘅過程，我覺得好舒服，好似大家好夾，雖然我唔知你係配合我，抑或我錯覺，還是真係夾，可能我有意無意都會試探下，但當然你好識避，其實咁樣冇問題嘅，始終可能我嘅方式唔係每個人接受到，或者係你角度你覺得我哋唔夾抑或要多啲時間，我唔知。水瓶座多數係慢熱嘅人，所以你拒絕我，其實我都預計到，始終 你哋係希望有一個好夾好夾嘅人做朋友。唔洗覺得自己衰，只係我未熔化到你姐，或者其實你心裏有數，你知道我同你最多只係做到朋友，不過我都大諗頭嘅，想了解多啲你甚至約你食飯。」
「或者咁講，我唔係隨便嘅人，係感情方面好認真，所以我無話要去迎合你，定係點，我會避係因為我唔想比人過多嘅幻想，我都講過幾次，我覺得咁樣好唔負責任。目前，我的確係當你朋友，其實你個人好好，性格方面 都係。」
「多謝你讚我。」
「我無同你講過 我從來無係交友程式約人，某程度上我係無期望過係可以搵到幾認真嘅關係，加上我有時都覺得交友程式好無聊。你覺得我同其他人唔一樣 我係開心嘅，至少你係有在意我係個點嘅，而唔係在意我外表。」
「其實好吸引，其他人會可能覺得你可能係矜持，但對我嚟講，我係好想另一半係一個好認真嘅人 ，可能因為我之前嘅經歷。我初初都冇期望過，但世事真係咁巧合，我覺得同你傾偈真係好舒服，唔知點解 每次收到你訊息，就有種好想覆嘅感覺。可能初初我係比你嘅背景，身型吸引咗嘅，但傾耐咗，就有種魔力吸住咗。」
「我知道你想搵到另外一半嘅心情，但係目前我哋真係只可以做朋友，如果你想我比更加多回應你，我真係做唔到，好誠實咁同你講。我亦都唔想傷害任何一個人，所以你可以自己選擇要唔要繼續傾落去。」
「再靚嘅女仔，冇一個好嘅內在 又有咩為呢。更何況我又冇諗要一步登天，我原本係打算加Instagram了解下你嘅過去係點。」
「我Instagram真係好無聊。」
「咁唔緊要啦，人同人相處，最緊要係尊重，所以我唔會逼任何人，尊重人哋嘅選擇。到有一日你覺得可以加嘅時候就同我講啦，我唔問喇，我怕羞。」

這一次之後，她的回覆越來越少，這已經不是先兆了，已經是過程。我不想失去一個能談天說地的朋友。

我說︰「慘，呢幾日你冷淡咗，如果你有嘢想表達就講啦。」
「冇啊，唔想你浪費時間。」

過了幾個小時，我說︰「如果你想繼續呢個話題，我諗我都有啲嘢想講嘅，但如果你唔想，我哋可以轉個話題。」

是我不夠成熟嗎？還是我得罪了她？或許，由配對那日開始，就注定了最後的結局。

「軌跡改變角度交錯，寂寞城市又再探戈。」這兩道軌跡注定相交後就會分開。

二十五、老人的離別

我不知道這時候說這種話是否過份，但我再也想不到一個好的機會。講清講楚是我最喜歡的事，雖說保留空間，令大家至少不會關係破裂，但令人有遐想，從來不是好的作風，否則事情只會拖拖拉拉，難以了斷。

這一天，是狗狗離開的日子。

天秤女說︰「今日去接狗狗喇，買咗好多零食比佢，等佢返到去就有得食餐飽。」
我說︰「咁多嘢食，佢實好開心姐。」
「佢點止會好開心，一定係超開心。」
「哈哈，你快啲去接佢啦。」
「好，等陣搵你。」
這一等就等了半天。或許我的第六感再一次應驗。
我說︰「狗狗依家點啊？」
沒有回覆。
我說︰「有咩事都好，同我講啦，我會係到開解你㗎。」
天秤女說︰「狗狗佢啱啱過咗身。」
「吓，咁突然？佢發生咩事啊？」
「醫生話……佢之前腸胃炎……抵抗力差咗，搞到比其他病毒入侵咗。」
「狗狗嘅離開好可惜。」
我續說︰「我唔知你同狗狗之間有啲咩經歷同回憶，但我知道一定係一啲好開心好溫馨嘅事，冇錯，依家你同佢唔可以再相見了，但係你諗下，其實離別唔可怕，最可怕嘅係你唔記得咗佢，只要你個心仲有佢嘅存在，佢任何時候都喺你身邊。」
「我同狗狗相處咗十年喇，佢初初嚟嘅時候好怕人，我走過去佢會吠，但之後我用耐心同時間令佢放低咗戒心，之後我哋就好多趣事發生咗。我唔會唔記得佢㗎，我會好好保留我同佢之間嘅回憶。」
「要好好記低。狐狸同小王子講過︰『好多謝你馴服過我，雖然你要走，但你留低咗你嘅髮色，每當我望到麥子時，我就記得我同你嘅快樂回憶。』」
「狗狗嘅啡色，以後我再見到嘅時候，我就會諗返起同佢嘅快樂回憶。」
「係啊，我諗如果狗狗識講嘢，佢都希望比你知，佢係想你開心㗎。」
「嗯，狗狗好錫我，佢都會想我開心嘅。」
「更何況，依家你哋嘅相聚，再唔受時空限制喇，只要你諗起佢，佢就喺你身邊。」
「你真係好好，你好識開解人。」
「多謝你，你開心返啲就好。」

這個時候還未算是一個好時間。再等一等吧。這幾天，我都扶持著她，讓她心情好過一點。

幾天後，天秤女說︰「多謝你呢幾日安慰我，我已經好返好多了。」
我說︰「咁就好。我有啲嘢想同你講。」
「好啊，你想講咩啊？」
「唔好對一個人太大依賴。」
「有人可以依賴唔好咩？」
「依賴人太多就會好似我早幾個月咁，我太依賴我前度，最後分開嘅時候，自己就會好痛苦，好痛心。」
「但你真係好識開解人，你就好似我嘅解結者咁。」
「但我知道，再咁落去，你對我嘅依賴只會越嚟越大，我唔想再有人行我舊路。」
「所以你決定咗了？」
「呢個世界，唔會話冇咗邊個唔得。」
「知道。」
「我想問，我似幾多歲？」
「你似三十幾。」
「以後，你會搵到一個可以全心錫你嘅人㗎，我只係一個過客。我哋，就此別過。」

就這樣，我們就很有默契，不再找對方，過了一段時間，我們之間的對話也消失了，我們之間再沒有聯繫了，不知道她現在有否轉工，還是仍受著上司同事間的壓力；不知道她有沒有另一個解結者，為她排憂解難；不知道她有沒認識男朋友，很好奇他會是怎樣的呢。

她是一個很好的人，但我不是一個好人。

「痴線，一返去就勁燥底。」這是她的不快。
「聽完你講個人舒服咗啲，冇咁擔心。」這是她被開解後。
「C……L……S，CLS診所。哈哈哈哈。」這是我的笑話。
「我知道底線嘅，我都好驚依賴人。」這是她的擔心。
「唉，呻完就算，鬼叫佢係我啊媽。」這是她的懦弱。
「順其自然啦，唔強求。」這是一個希冀。
「得喇得喇，你係唔係男人嚟㗎，成個啊媽咁，依依哦哦。」這是我的嘮叨。
「你早幾個月發生咩事？」這是她的關心。
「我又唔係對住個個都係咁，暖爐咩？」這是她的性格。
「有咩好怕，你又唔係人型狗。我想要嘅係大家嘅真誠姐。」這是她所喜歡的。
「係啊，又得意又可以攬住嚟瞓。」這是她的寵物。

而最後，我都未能請教到這一位老人家。

二十六、定義的差異

有些人即使曾經詳談生活，了解到大家的過去，但注定無法成為朋友。

大家說的字眼都是一樣，但對該字的界定不同，足以令一段普通的關係產生裂痕，慢慢就會越走越遠。有時候像小朋友一樣無憂無慮，也許已成為一種奢侈。大人的世界十分執著，即使只是些微的不同，也已有很大分別，朋友一個字詞，原來已經可以成為了一個疏遠的原因。

「如果你想繼續呢個話題，我諗我都有啲嘢想講嘅，但如果你唔想，我哋可以轉個話題。」

這一句話以後，水瓶女表現出她的冷淡，下一個訊息，已經是兩日之後。

水瓶女說︰「你講啦，我覺得係要講清楚嘅。」
我說︰「不如你講咗你嘅感受先？」
「我覺得我哋唔適合。」
「可唔可以講多啲啊？」
「個感覺問題，所以我先話唔想你嘥時間。」
「你唔適合嘅意思係男女朋友之間定朋友之間？」
「都係，首先我哋嘅相處模式就唔係朋友。」
「唔似朋友？」
「朋友嚟講，你做得太多啦。」
「咁可能我哋對朋友嘅界定有差異，或者你講下你點界定？」
「有適當嘅距離。」
「點為之適當？因為每個人把尺唔同，我想知你嘅睇法，或者我講下我對朋友嘅定義？」
水瓶女沒有回覆。隔了一會兒。
我說︰「可能我做嘅嘢令你誤會啦，如果你唔想再傾落去，我會尊重你。不過，希望你唔好因為我而唔開心啦，我講過，我只係想身邊嘅人開心。」
「咁我都唔想你唔開心。我好清楚自己係點諗，所以我先唔想你再放時間係我身上，因為冇必要。」
「我點解唔開心，我識新朋友喎。」
「因為我冇好想傾落去。」
「嗯，冇問題㗎。」
「咁就好。」
「其實都感覺到，不過我都係鍾意講清楚。話說我呢幾日做咗解結者。」
「咩係解結者？」
「解開心結嘅人。你有心事或者唔開心就搵我啦，我會試下開解你。」
「點解你覺得我唔開心，我冇唔開心」
「我唔係覺得你唔開心，我係話如果。」
「好啦，多謝你，希望你遇到個值得你放時間同心機喺佢身上嘅人。」
「唔會遇到啦，我知自己嘅問題。」
「唔好咁快打沉自己住。」
「我能醫不自醫，安慰人開解人還好。」
「我做嘢先啦，希望我已經講清楚啦。」
「嗯，加油。」

這次對話後，我就再沒有與她對話過，或許這就是大家的不適合吧，不是朋友之間的不適合，更不是男女之間的不適合，而是思想上的不適合。同樣是朋友，有些人可以與之交心，而有些人只能夠點頭別過，這大概就是我與她之間的距離。她說︰「有適當嘅距離。」或許並不是指朋友之間距離太近，而是思想上的距離太遠。

若這件事能發生在小朋友之間，相信兩位小朋友都會快快樂樂地相處，只可惜她不是小朋友，而我亦只好配合她演好這齣因定義的差異而起的劇，結局就是女主角以為自己很為人設想，而男主角不失風度地配合了她，讓她好過一點。有風度地離去，大概就是狐狸對小王子最後的祝福吧。

她唱的回到過去，到現在，我還有保留著，是一種留念吧。

對人好，有些人會感恩，亦有些人會拒絕。

「冇啊，唔想你浪費時間。」這是她的決定。
「熟啲先啦。」這是一個先兆。
「人總要帶著面具生存。」這是我現在要做的事。
「咁你覺得時機到嘅時候，你再同我講啦，再約。我係唔係好傻瓜？」這是一個幻想。
「希望唔好咁快完。」這是一個魔咒。
「好！多謝大佬，下次有事搵你。」這是一個不會再發生的事。
「始終係化學嘢，人本身產生出嚟嘅嘢，好多都取代唔到嘅。」這是一個事實。
「咁好啦，注意身體。」這是一個無聲的祝福。
「唔好過咗囉。」這是一個警告。
「有啲人會話我似冰山，有啲又相反。」這是一個經歷。
「黑暗已在空中盤旋，該往哪我看不見，也許愛在夢的另一端，無法存活在真實的空間，想回到過去，試著抱妳在懷裡，羞怯的臉帶有一點稚氣，想看妳看的世界，想在妳夢的畫面，只要靠在一起就能感覺甜蜜。」這是一句歌詞亦是一個結。

二十七、她們

異性的溫柔，很動人，動人在於它能讓人感到溫暖。以前我很喜歡看到父母親，他們的懷抱，有一種靜，可以把一天的苦惱平息。或許這解釋到，為何每個人都想找一個溫柔的伴侶，不是因為他們成熟，而是他們無私的溫柔。

甜美的笑容，很吸引，吸引在於它能融化他人心靈。以前我很喜歡看到小朋友，他們的笑容，有一種甜，可以把一天的不快帶走。或許這解釋到，為何小朋友之間的爭執很快就完結，不是因為他們成熟，而是他們無邪的笑容。

剛認識新朋友的時候，大家都可以很熱情，恨不得可以聊個通宵，把對方的背景、性格、思想都了解一遍，但慢慢，或許是三分鐘熱度，又或許是懶惰，大家總不能長此下去，慢慢就會找一個適當、舒適的距離，延續大家相遇的緣，而大家的份能到哪個階段，全靠雙方的心態和造化。很多只是普通朋友，有的能夠交心，而很少能夠成為伴侶。

相處的方法，或許大家都能夠從人生的經歷中學習，而越年長的人，經驗就越多，這或許解釋到年紀大的人有一種韻味或格調，是年輕人中很難找到的，是由歲月時間歷練而成的。

價值的觀念，是由經歷和環境長時間影響，部分人的大方向可能都是一樣，但當了解越多，大家就會發現到彼此之間的差距。大家若願意磨合，或許能將差距收窄，但有些人不懂得何謂磨合，只懂一直包容，埋下計時炸彈，到最後，只會炸傷雙方；若其中一方不願溝通，作再多嘗試，也只是徒勞無功。

她們是兩個很豐富的人，跟她們聊天，話題可以一個接一個，不間斷，不悶場。而最後落得這結局，也只能怪自己性格問題。自從上次分手之後，就從未感到自己是一個好人，或許自己有一點知識，有一點思想，但想一想，自己也只不過是一個腐壞的軀體。

與天秤女的相處，最初她打開了我的心，把我馴養了，作為回報，我也時常傾聽和開解她的煩惱，從她的話中，我或許是一個稱職的解結者，最少，那時候她的心情得到抒解，她亦打開了自己的心，將自己所思所想，訴說給我。只是我知道再繼續下去，她只會浪費時間。不是她不好，而是我太差，一個受過傷的人總怕再一次受傷。我決意離去，不知是好是壞，但最起碼，她可以去尋找屬於自己的玫瑰，那一朵可以陪伴她一輩子的玫瑰。

與水瓶的相處，最初她的歌聲，深深吸引著我，不知道她有沒有故意馴養我，但那段時間的確有不少快樂，相處時了解到她的知性，令到自己更不能自拔，加上她在夕陽下的笑容，我想，我動心了。可惜的是，自己的對她的好太明顯，橡筋拉得太緊，最後斷了。幸好的是，即再不願意望見與她離開，最後的離別，自己也沒有失態，保持著應有的風度，配合著她演出了這齣劇。狐狸與小王子離別時，也沒有哭鬧，既然大家好好相遇，就不要讓離別時帶著難堪。

告別這兩位女孩後，我就把自介改為︰「解結者 走藍走甜走偽黃」這是為了紀念我對天秤的好，以及與水瓶的相遇。我不能繼續對天秤好，那我就將這份好帶給他人；我不能再遇到水瓶般的人，那我就讓他人遇到一個類似她的人。

改了這個名字後，我就成了一個傾訴者，傾聽別人的故事，開解別人的煩惱。起初以為是解開別人的心結，而最後，被解結的人是我，曾經的傷，曾經的遺憾，亦慢慢癒合和消除。

不知你們會否看到，但我要對你兩位說聲多謝。生命有很多契機使人轉變，而你們兩位是我生命中其中一個契機，令我成長。

「多謝！多謝！多謝！」

出埋呢一篇 我諗我都要等下個契機先會再寫 或者如果你哋有心想我寫 就正皮下 留個名啦

P牌仔無得留正皮唯有留名
睇完之後唔小心喊左 唔敢話好似
但有共鳴 同 代入到個情緒係真嘅
有種有人幫手整理好到自己思緒再講出黎嘅感覺
多謝你

多謝你同呢個故仔有共嗚啊 你係第一個讀者比feedback 我