《解結者 走藍走甜走偽黃》

六、理想型

交友大忌就是付出太多感情，或是太多期望，玩交友程式亦一樣，不是說不應該付出，而是付出前先要在意自己，但很可惜，很多時候我們都忽略了自己，這與年齡完全沒有關係，只要遇上一個合適的人，自然就會掏心掏肺。但年紀大了，就學會了好好分辨是否合適的人。找對的人，從來都不是一件易事。有些人一擊即中，而有些人經歷過無數段感情，仍在尋覓中。

「一個接一個 也沒有結果。」

適當的了解對方的思維，是一個必經的過程。

我說︰「係呢，你玩交友程式有冇見過啲好特別嘅人？」
水瓶女說︰「唔……有啊，我之前識咗個係好有趣嘅人，不過之後就冇再傾落去。」
「點解嘅？」「我都唔知啊。」
「可能佢搵到個好歸宿了。」「可能啦。」
「話說佢點有趣法啊？」
「成熟得嚟搞笑，姐係佢認真同搞笑嗰陣完全係好似兩個人咁。」
「既然你識咗佢一排，得閒過兩招嚟，我有機會都想學下。」
「咁呢個我又教你唔到，總知就係超好笑啦，每一刻都好似搞緊笑咁，當然佢認真嘅時候就好認真啦。」
「我識著襪，但我唔識幽默。」
「唔係呢種搞笑啦。」
「我唔係搞笑啦，我係搞冷笑話，冷場嗰隻。」
「都夠啦。」然後加了一個手指公符號。
「你有冇話鍾意咩類型嘅人？」
「嗯……我諗下先。突然好似好認真。」
「好認真咩？我見你頭先都講緊男仔咪問下。」
等了一陣子。
「一、有自己嘅諗法，唔會隨波逐流；二、細心（唔係監視嗰隻）；三、成熟；四、唔會怨而係解決咗問題先。嗯，你問我我都唔可以即刻講到晒，但如果嗰個人身上有，我會留意到。」
「哈哈哈哈哈哈哈哈，咁你都幾似M底喎。係呢，咁依家有冇人對你有意思啊？」
「都有㗎，不過我對佢完全冇意思。」
「咩人嚟㗎？」
「大學同學嚟嘅，我比咗好多暗示㗎喇，但佢有時都會傳啲嘢過嚟，社交平台都限制咗佢㗎，但佢冇醒水啊，仲死纏爛打緊。」
「點死纏爛打法啊？或者佢做過啲咩令你咁反感啊。」
「佢依家仲有煩我㗎。佢做啲咩令我反感啊？佢學業上幫過我啦；試過我病嗰陣煲嘢比我啦；我冇同人講電話冇電嘅時候比咗個尿袋我；仲有有一次只係輕輕帶過我整親，連我自己都唔知有講，第二日佢比咗支藥膏我。」
「吓，佢好細心喎，符合到你講嘅特徵喎，如果我係女仔，比人咁樣縱，我一定會心動囉。」
「唔係！咁首先佢外表同身高都唔係我鍾意嘅類型，其次就係，雖然佢好好，我都有同佢講佢好好，但我唔鍾意佢逼我接受佢嘅好囉。佢對人好係佢嘅事，但願唔願意接受係另一回事，我覺得佢做得太多了。」
「哦，原來你都係外協嚟嘅。」
「佢仲有無啦啦捏我塊面同搞我頭髮，如果係我鍾意嘅人就話鍾意姐，但佢唔係囉。」
「咁呢樣佢又真係過份咗啲喎。」
「但最主要都係佢唔識保持朋友嘅距離囉。」
「吓，我對朋友好好㗎喎，話說試過中學有朋友打架，我即刻沖去鎮住個場㗎喎。」
「你好清楚講到朋友係咩啊嘛，佢唔係囉。」
「吓，咁到時我哋真係做朋友，你會唔會講話我唔需要我嘅好？不過是但啦，我平時對朋友都係咁，咁做佢哋開心，我見到嘅時候我又開心。」
「唔好過咗囉。」

或許她就是一個被虐狂。以我對朋友的好，或許早就注定我們終須一別。

推

推

推

推

推

推

推

七、溫情

英雄難過女人關，女人難過賣酸攤。

有人說，女人最大的武器是美貌，但我覺得最大的武器其實是女性的溫柔。原諒我有少少性別定型，女性的溫柔的確是比男性的溫柔來得更吸引，更有魅力。每個人一生都只是想尋找一個可以明白及愛錫自己的人，不論男女，都想有人能令自己卸下平時的堅毅成熟，不需思考、顧慮及擔心地相處，情景猶如小時候躺在媽媽的懷裏一樣，那麼平靜無憂。

溫柔是一種武器，但它傷不了人，但它卻能停止干戈，平靜心中的怒火。

那一天，電視播著經緯線。我看到後很不舒服，不是因為節目本質出現問題，而是看到一幕幕揮棍、開槍的場面，我很害怕，我不明白為何會變成這樣，難道這就是小時候所學的正義？還是世界上已經再沒有正義。

那夜，我睡不到，我打開手機回覆天秤女。

我說︰「我今晚應該好難瞓得好。」
「點解啊？你飲咖啡奶茶嚟？」
「睇完經緯線，睇返早排社會發生嘅事，個心好唔舒服。」
「冇事㗎，傻瓜，已經過咗去啦。有咩唔開心就同我講啦。」
「好嬲，好燘，但除咗生活上嘅堅持，我就乜都做唔到。」
「傻瓜，冇人想㗎。你唔開心有我係到。」
「我係唔係好廢？」
「一開始成件事就係唔公平，你已經盡咗力。」
「我覺得我好似隻豬，只係做到分享文宣、幫襯同路人。」
「每個人都有佢嘅崗位同責任，盡力就好。」
「我差唔多瞓喇。」
「瞓醒覺搵我啦。」
「希望我今晚唔會發惡夢啦。」
「有咩搵我，我永遠係到。」
「早抖。」「早抖。」
那夜我夢到了電視所發生的畫面，感覺很真實，每一下揮棍，都感受到痛楚，那種痛我不知道是否當事人所感受到的痛，如果可以，我只希望受傷的是我，我這種碌碌無為的豬。最後，在深夜裏，我痛醒了。
「我到最後都係發咗個惡夢，個感覺好真實，好痛。我唔知我以後會唔會好似電視啲人咁。或者我唔知會唔會有一日被人消失。」
直到她看到的時候，已是日出的時候了。
「唔準你咁講，我嬲㗎。」
我看著窗台的日光，沒有回應。
「我會喊死，唔想任何人有事。」
一個好人，會為身邊的人帶來陽光，或許有些人會覺得，別人對你好，總有一些企圖，但是否世界上再沒有純真無邪的好呢？
即使她有企圖，我又有甚麼事可以被她騙走呢？無可否認，那一刻，我被她的溫柔融化了，我說︰「你好識比到人溫暖。」
「一起身就整喊人。」
「你份人咁溫暖，平時識唔識到男仔㗎？」
「少啊，工時長又全女班，少識到男仔啦。」
「但你咁樣應該好多男仔鍾意㗎。」
「我又唔係對住個個都係咁，暖爐咩？」
「太陽得唔得？」
「唔會囉！」
「咁點解要比溫暖我？」
「可能因為夾掛。」
「你見過我嘅陰暗面，你就會怕。」
「有咩好怕，你又唔係人型狗。」
「唔怕就好。」

我不是一個正常人，或許因為我自覺自己真實的性格有點扭曲，我很害怕被人知道後，其他人會離我而去。這是一種自我保護機制，或許就是大家所說的冷漠。

與他人相遇，有些人會表現得很熱情，而有些人則是高冷，但他們有沒有分別？沒有，這些表現都是為了令人不知道其內心想法。你記得那個很熱情的人嗎？他有沒有說過自己的感受啊？他們是否把話題帶走？記得那個高冷的人嗎？你問他內心想法，他會如何回絕你？

我覺得自己配不上她的溫情。

推

推

推

推

八、話題

談話，有時候就跟賭博一樣，能夠估中對方有興趣的話題，這段對話就能維持很長的時間，但沒有興趣的話，敷衍兩句也已經很好了。

或許，這其實與話題無關，一個人有興趣交談時，甚麼話題都能促膝長談，但若然沒有感覺，也許一句說話也嫌多。

我不知道我是否幸運，初初與水瓶女交換聯絡方法之後，我們的對話很多，有時候甚至深夜一兩點也想繼續聊下去，要不是大家明天都有事要忙，可能就會通宵達旦。

一個小技巧，如果對方是一個大學生，你可以嘗試了解一下對方的大學生活，上莊的人趣事多多，當中必定有人際衝突和處理的話題，可以當故事聽之餘又可以了解對方更多，更何況，求學時的大小事大家都很喜歡討論，以我作例，每次見到中學同學，都一定會回憶以前的瘀事。而勤力讀書的人多半心靈都比較空虛（我是一個例子），關懷一下，了解一下，對方都會容易感受到，但若遇上書蟲，我想，你自己懂得抉擇吧。

我問︰「話說你讀邊間大學㗎？」
水瓶女說︰「我讀港島嗰間啊。」
「嗰邊啲人點㗎，係好勤力定係都幾多嘢玩㗎？」
「佢有兩邊嘅，主校區嗰邊都多嘢玩嘅但醫學院係另一個世界嚟，嗰邊係淨係讀書嘅地方。」
「咁咪好多學霸？」
「唔係呢個意思，係醫學院嗰幾座大樓得課室，冇地方比你做其他活動啊。而主校區就大好多，有好多社團啊，例如話劇、音樂嗰啲。咁因為我讀護士啦，除咗第一、二年會去嗰邊上核心課程之外，之後都冇咩去嗰邊，長期匿喺醫學院。」
「咁聽你講，你都幾勤力喎。我仲以為得少林寺先會咁勤力。」
「都睇咩科嘅，醫科入面護理係最唔讀書㗎喇。」
「咁又唔同嘅，佢哋醫學、藥理嗰啲好多中學嘅時候已經培養咗個習慣，同佢哋冇得比啦。」
「唔係㗎，我之前住宿舍都見有啲醫學生，雖然佢哋應該都係高分考入嚟，但係佢哋係勁懶，唔上堂囉，因為佢哋每一年淨係計合唔合格，所以佢哋都唔會好在意啲功課。」
「原來係咁，不過都真嘅，唔計分我都求其啦。我有啲奇怪，點解你把聲咁嘅？你唔舒服啊？」
「我啱啱起身，把聲係咁。」
「仲以為你病，準備捉你睇醫生。你知啦，依家武肺好嚴重。」
「唔係啊，我冇唔舒服，只係未瞓醒所以先咁。」
「咁好啦，注意身體。」

如果去到這裏，正常都會覺得話題就到此完結，或是很快就會完結，但只要細心留意，其實對話中有一個詞語可以用來開下一個話題，是哪個？等下一章水瓶女的文再開估。


與人交流有時候頗無聊的，但若然沒有好好了解到一個人的背景，很難建立到更高層次的交流。小時候學會食物金字塔，中學學會馬斯洛金字塔，而相處金字塔或許沒有教過，但自己也要學習一下吧。若然當時我懂得這個金字塔，或許我就不會失去一個可以促膝長談的人。是一個心結嗎？不是吧，自己做錯了就要承擔自己的責任。最起碼我是這樣的一個人，總比一些裝作沒發生，推卸責任的人好吧。

人啊，總會跌過碰過，有些人會成長，而有些人就停下了。

推

推

推

推

推

九、半關？半開？

石頭很硬，但也不是毫無破綻；刀很鋒利，但也有切不斷的事物。但很可笑的是，很多人都忘記了這個道理，很多事情都要勉強自己、勉強他人，最後換得一個慘淡收場。

很多人都嘗試過執著，若然是執著在一些好的事當然是好事，但若然執著在不好的事，這就是固執。可惜，很多人，包括我，都做過這樣的傻事，用錯的方法去對待他人，奢望自己會得到回報。

但她是一個很好的人，她會得到她的回報。

天秤女問︰「你同前度點解分手嘅？」
我答︰「好多原因喎，好難一時三刻講得晒。」
「你慢慢講，我想知啊。」
「你覺得，做一啲冇回報嘅事有咩感覺？」
「緊係唔好受啦，有付出冇回報嘅事做嚟有咩意思？」
「我諗我同佢就係呢種狀態掛。」
「有冇詳細啲啊？」
「以前嘅我同佢好親密，可惜時間一耐，我就比時間磨去咗耐性同關懷，可能因為已經變成咗親人，變成咗習慣。」
「所以最後佢覺得冇回報，就離開咗？」
「都係啊，不過之後我有盡力挽回，可惜。」
「冇辦法啦，心死咗就係死咗。」
「如果係心死還好，問題係件事唔係咁簡單。」
「佢做咗啲好錯嘅事？」
「可能同我嗰時處景有關，嗰時好多事發生咗係我身上，學業、家庭、生活，都有唔同嘅事發生，再加上愛情嘅問題，我一下子打沉晒。可能就係駱駝身上最後一根稻草吧。」
「咁依家你冇事啊嘛？」
「如果有事你就唔會係到同我傾計啦。」
「你嗰時做過啲咩啊？」
「我試過好多方法去追返佢，我試過比驚喜佢，試過買花，試過寫心意卡，但最後佢冇一個好大嘅決心同我重新建立所有嘢。」
「你嗰時係唔係覺得唔可以冇咗佢啊？」
「係啊，我嗰時覺得自己唔可以冇咗佢，但原來……」
「咩啊？」
「我唔講太多了，我怕嚇親你。」
「無論點我都會係到，有咩唔開心就同我講啦。」
我沒有馬上回覆，並不是因為我不想回覆，而是我知道我不是一個好人。
隔了一會兒，天秤女說︰「對唔住啊，我唔應該提起你啲傷心事。」
我說︰「唔好對一個人太大依賴。」
「嗯，知道啦。」
「可能人真係要受過傷先會成長。」
「失去過先會更加懂得珍惜。」
「但可能會變得更加不敢擁有。」
「我明啊，但唔應該因為一次挫折就唔再嘗試㗎。」
「我諗我唔可以再依賴到人，呢個係我嘅問題。」
「點解會咁諗啊？有人可以依賴其實係一件好開心嘅事。」
「唔係嘅話，就會好似我幾個月前咁。記住啊，可以好鍾意、好愛一個人，但前提係，你要愛自己多過愛佢，我唔想見到人受傷，行我舊路。」
「你早幾個月發生咩事？」
「我有抑鬱。若然你怕咗我，我唔介意你唔再同我傾，始終，唔係每個人都接受到。」

說這一句的時候，我就跟自己說，如果她真的介意，我也無能為力，始終，這個世界，不是有人都接受到我這種人。不能怪別人，只能說人與人之間的配對並不是總能相伴最後。人生中總會遇上不同的過客，這些人或會在回憶中留下深刻的痕跡，但這些事已成過去，能夠的話，就將它們放下，背負太多回憶的路，太難走了。

若然到最後她選擇了繼續下去，我會很感激。人與人之間總有不同的難關要過，能夠捱過一關又一關的，走到最後的，或許未必是陪伴一輩子的，但必定是一個生命中重要的人。

推

推

十、上莊

有趣的靈魂不多，能夠詳談的靈魂少，而能一直詳談的更是少之又少。
不知道是否我當時的錯覺，水瓶女可能是一個不錯的話伴，她的經歷不是十分特別，但她曾經很願意說她的經歷，或許只是碰巧，我說的話題都吸引到她吧。

我說︰「你話你之前住過宿舍？」
水瓶女說︰「係啊我之前住咗年半囉，原本係諗住近返學，嗰時上堂五分鐘都唔洗就去到，超方便，但係因為我實在太唔鍾意嗰邊個宿舍文化，同埋又唔係住得開心，所以我冇再住喇。」
「你嗰邊宿舍文化係點㗎，我以前都住過一排，不過後尾連有得屈蛇都唔想屈。」
「唔係不嬲得我嗰間先有宿舍文化咩？你哋唔係齋住咋咩？」
「千祈唔好睇少少林寺啦，你繼續講下你嗰邊係點，好有興趣。」
「我嗰邊其實每間都有唔同特色，不過仙制呢樣嘢就咁多間都有啦，姐係高年級會有較大嘅話事權，有啲會比較嚴重，佢哋會要你必須參加一啲活動啦，因為會計分嘅，當再申請嘅時候就會大啲機會住返。」
「咁樣好攰喎，讀書都用唔少時間啦。」
「都係㗎，所以基本上我第一年都冇上過堂咁濟。」
「燃燒成績分，哈哈。咁有啲咩活動要用咁多時間？」
「基本上所有嘅比賽無論自己有冇參加都要出席啦，然後就係各式各樣的活動啊，迎新營，樓會，宿舍節啊。」
「你嘅大學生活好多姿多彩啦。」
「但係我一啲都唔享受囉。佢哋好刻意咁話你知佢係住得耐過你啦，姐係佢哋態度係極差，又好多奇奇怪怪嘅規則，咁啱我個層係出名比較差嘅，不過好彩，我平平安安咁度過咗我嘅第一年。」
「例如有啲咩奇怪規則啊？」
「我嗰層女層啦，佢哋話為咗令大家似一家人，我哋嗰層係唔可以閂門，同埋出入大堂要大叫，我返嚟喇。」
「吓，咁其他男層嘅人咪有機會過嚟睇嘢囉？」
「咁換衫嗰時都會閂門嘅。咁之後呢到我升第二年，佢哋就要我同佢哋一樣蝦新人，但我真係好唔想咁做，然後佢哋又搞好多嘅小動作，到最後我同另外兩個人就冇再住。依家比我簡多次，我諗我唔會住囉。」
「咁你哋三個依家咪變到好熟囉？」
「都係㗎。早幾日其中一個仲腥咗張嬰兒沖涼嘅片比我，仲有隻好得意嘅沖涼鴨，仲話遲啲要買一隻比我嘅小朋友。」
「係唔係嗰隻吱嗚吱嗚叫嘅鴨仔？」
「係啊，不過我嫌棄咁同佢講，相入面隻鴨仔咁核突，隻眼得個兩點。」
「咁高要求㗎你。」
「咁鴨仔啲眼係應該要畫到好靚㗎嘛。我個朋友話要買就緊係買隻最靚嘅比你啦。」
「你朋友真係好甜蜜，好錫你。話時話你好鍾意小朋友㗎咩？」
「係超鍾意，我最想就係遲啲畢業之後可以派去兒科，對住啲小朋友。」
「你咁似啲戀童癖嘅。」
「唔係啦，係佢哋陣奶酥味好正，超鍾意聞。」
「你買支奶酥味香水，咁你就可以日日聞到。」
「試過去睇，不過好多時隻味都留唔得耐。」
「始終係化學嘢，人本身產生出嚟嘅嘢，好多都取代唔到嘅。」
「啱啊。所以大個希望可以生到小朋友。」
「小朋友好得意啊，不過我都唔知係香港生係唔係一件好事。」
「我會想生，不過係一件好矛盾嘅事。」
「苦惱。」「係。」

她很喜歡小朋友，但現實社會中，或許負擔一個小朋友不是問題，只要有另一半可以一起負起責任，生活也不會太拮据，但最大問題是令人害怕的是，讓小朋友在這種環境中長大，對他或她來說，又會否是恩典？還是只是折磨？

連讀大學，住宿舍，都要被人用權力威逼，「我係高年級，所以我話事。」，制度使他們有權主宰別人的去留，只要有一點不順從，就被小動作纏身。但當捱過了，某部份人又會沉迷權力當中，或許，錯的，不是社會，錯的，是人的腐化，軀體的敗壞，思想的沉淪。

我不知道未來她有沒有生小朋友，但我想，她必定會生一個小朋友。希望她的小朋友可以幸運一點吧。

推

推