【十年結局＋外傳＋後記】《女朋友全家變咗隻蛋》（１１）

賓穎女傭安心聘用 2020-03-08 17:52:40

日本，名古屋。

某間小小居酒屋內。

只有兩張細檯嘅店鋪內，一對男女正促膝長談，由夜深傾到朝早，檯上擺放住兩杯啤酒同一碟唐揚炸雞。

「一大早飲咩啤酒，食咩炸雞。」沅彤諗唔明白，點解要咁唔健康。

「咁無生雞蛋撈飯，唯有叫下其他嘢。」政偷偷掩嘴細語：「無理由坐成晚唔幫襯。」

沅彤打個呵欠：「我估唔到自己居然願意用成晚時間，去聽你講點樣殺隻紅神目......又咩召喚業火、戰神上身、咩咩成身發出聖光，都唔知你講真定講假。」

「我已經覺得世上無我對付唔到嘅生物。」政說。

「前題係要靠我把刀。」沅彤補充。

話到一半，一個灰衣戴帽嘅男人正欲離開店鋪，喺經過沅彤同阿政嗰陣，佢將一份文件放到兩人張檯上，不帶一點交流咁離開。

佢兩個都愣咗一愣，望住佢遠去嘅背影。

「邊位......你識？」沅彤問。

「唔識，但我知道佢係咩人。」政嘅一雙眼無意中發動咗能力，輕易睇穿咗對方身份：「東武製藥？......點解讀落去，個名好似咁熟。」

「你最近返嚟可能唔知，東武勳佢搶咗西品集團嘅主席位。」有留意下新聞嘅沅彤，同佢解釋：「西品製藥」改咗名，依家叫「東武製藥」......講起上嚟，啱啱嗰個人好似著住灰色風衣？咁似東武勳班採蛋獵人......」

政一聽完，就即刻跑出店外想搵嗰條友喺邊，但對方一早已經離開。

沅彤拎起份文件，行埋出去：「試下睇咗份嘢係咩嚟先。」

「嗯。」

兩個人原本放輕咗嘅戒心，心情一下子又好似重回十年前嘅緊張咁。

文件一掀，即刻知道個大概。

係關於，其中一隻兔子人嘅事，名為──「神子」。

內容大意係，約莫好多年前，某隻初生兔「神子」嘅出生。

初生兔，即係人類同兔子人雜交生出嚟嘅混種。

入面仲記載住，一般初生兔活不過十歲，因為隨住佢哋長大，就需要吸食更多靈魂蛋去發育，否則就會餓死。

所以，產量不嬲就少嘅靈魂蛋，令大量初生兔吸收唔到足夠嘅營養，自然咁死去，當中唯獨一隻叫「神子」嘅初生兔，渡過咗呢個階段。

因為佢係「重生會」主教同西品盛個女，所誕下嘅愛情結晶。

西品盛為咗唔將家族出咗隻半兔人呢段消息洩露出去，將「神子」嘅存在列為最高機密。

面對呢隻半人半兔嘅生物，西品家家族嘅後人，西品盛佢嘅取態係將佢封藏。

因為西品盛女兒嘅哀求，神子無被殺死，更加被養育成長，但就必須永久封藏，唔可以曝光喺外人面前。

如今，西品家將佢存藏喺一個維生儀器入面。

西品盛每年都會親自檢查一次，並且重新輸入密碼，令維生儀器繼續運作。但當西品盛只有一年無去輸入密碼，維生儀器就會自動失效，到時神子......

將會被解放。

睇到呢一頁，沅彤同阿政嘅神情已經隱約感覺到唔對路。

「我明明喺嗰幾年殺死哂全港所有兔子人......」沅彤說。

「咁你記唔記得，嗰一隻西裝兔子人。」政腦海中，仍存在住十年前嘅畫面。

「嗰一隻？」沅彤亦都逐漸記返起：「工廈見到嗰隻......」

「照道理西品盛死咗之後一年，神子應該解放咗出去。」政望向沅彤，問：「嗰幾年你有冇遇過西裝兔子人？」

沅彤搖頭：「無，我都想遇到。」

「西品盛設定自己冇輸入密碼就會解放神子目的係咩？」政不禁細思。

「應該係想，確保自己仲繼續延長緊壽命，否則......」沅彤講到一半無講落去。

政嘅眼睛突然滲出血淚，一顆血珠滴到文件上：

「否則神子嘅解放，就係幫西品盛復活。」

「你......」沅彤有啲隱憂咁望住阿政。

「嗯，我睇到當時親手打依份機密文件出嚟嘅西品盛......」政撳住隻泛紅嘅眼睛：「佢嘅真相。」

「依十年，你仲有冇收到其他消息，喺消滅所有兔子人之後。」政問。

「無。」沅彤簡而直接咁回答。

「咁我諗，神子唔係一般嘅兔子人。」

「我又有返少少感覺......」沅彤莫名揚起嘴角：「十年前嘅感覺。」

「你都唔細，廿四變三十四。」我拍一拍沅彤個頭。

「哼。」沅彤雙手插袋，冷笑一聲。

「兩位你哋未俾錢呀！」突然，居酒屋嘅老闆跑出嚟。

「咦，個老闆係咪講緊粵語？」阿政問。

「嗯，我帶你嚟呢間係香港人喺日本開嘅居酒屋，咁樣易溝通。」沅彤說。

「好彩你哋未走，總共三千円呀！」嗰老闆莫名咁擺出咗泰拳姿勢：「唉！估唔到喺特登嚟日本開鋪，諗住唔會有咁多痴線客，大家會禮貌啲，但結果原來問題係出自我喺到，成日都差啲唔記得收客錢！」

「你係......」阿政望住老闆。

「噫呃！你係......」老闆望住阿政若有所思。

「ここで払っていい？」沅彤向老闆唔知講咩。

「係！」老闆用半咸半淡嘅日文定唔知中文回覆。

然後，沅彤就埋完單，我哋就走人。

感性老母(有鳩) 2020-03-08 17:56:24

返黎啦