【真結局篇】《女朋友全家變咗隻蛋》（１０）

真結局篇

每一日都過得快樂，就好似大家都喺西貢鐵皮屋到生活，無任何包袱。

原本仲談笑得好開心，但坐我隔離嘅泉叔突然同我講咗一句。

「政，係時候走。」

「走？泉叔......」我愣然。

「你已經喺到好耐。」宋文德都咁講。

「宋文德......」

「門口喺嗰邊。」泉叔指住鐵皮屋門口。

「咁你哋......」我望住佢兩個。

「記住我哋就得。」宋文德說。

「唔好要沅彤一個人咁可憐。」泉叔輕笑。

我企起身慢慢咁行去門嗰邊，慢慢咁憶起沅彤依個人。

推開鐵皮屋對門之前，我再轉頭望一望佢泉叔同宋文德，佢兩個安然咁向我道別。

我深一深呼吸，將鐵皮屋對門推開。

一眨眼，我從自己嘅幻覺之中，返到嚟呢片虛無嘅世界。

依舊係個片緋紅嘅天空，同無際嘅海平線。

我冇印象，計算過，因為我早就放棄咗思考。

喺被困呢個空間嘅第三年，我甚至諗過拎八赤刀自殺。

但最終都係放棄咗，慢慢就陷入咗鐵皮屋嘅幻想入面，諗起泉叔、又諗起宋文德，一切一切都好似真嘅一樣。

但的確地，呢種胡思亂想陪伴我渡過咗唔知幾多個秋與冬。