道地檸檬綠茶
2019-12-06 14:50:55
【隨時宣佈得】
據David Maddock引述,利記及Nike嘅合作呢個公開嘅秘密係隨時可以正式對外公佈,只係正等待雙方認為一個最佳引起最大迴響嘅時機。
消息指Nike希望利記未來一、兩個轉會窗內簽入一名超新星或大牌球星製造更多聲音及話題,有助刺激銷量,但David Maddock特別提到唔好對麥巴比有太多幻想。
而Nike旗下名氣冒升緊有多蒙特嘅辛祖,呢位英格蘭新星傳出希望短期內離開多蒙特,假若轉會,重返英超嘅成數極大,不過多蒙特要求天價轉會費又唔知會唔會成為交易障礙。
另一邊箱,有網上某利迷(較為可靠嘅消息源)指,利記肯定會成為Nike喺英超嘅一哥,產品款式及數量一定會遠超車路士及熱刺,佢本人指之前無想像過呢個合作嘅整體配套加加埋埋係如此龐大,絕對係雙方互惠互利嘅天作之合。特別提到訓練系列(款式?設計?種類?)一定會同其他Nike贊助嘅英超球隊唔同。
而一般估計,連同所有分紅後,利記每季球衣上實際帳面收益將會冠絕全英格蘭球壇。
#LFC #YNWA #WeAreAnfields12th #A12LFC