發現好多人都期望有一間類似社企的非牟利企業，能夠聘請義士嘅同時提供價廉物美的產品或者服務。
我想講咁樣係唔work。
無得賺錢嘅應該叫NGO或者慈善機構，而唔係經濟圈。經濟圈一定要有錢賺。
你自己睇返而家香港existing嘅社企，有邊間真係好成功、做得好大？
唔好停留喺文青式的社企幻想，要有利潤先run得長遠。
如果搞非牟利機構，咁老細、員工應該袋幾多錢人工？袋得多又比人鬧，袋得少又搵唔到有經驗、能力嘅人去做。
琴日見到有人想寫一個黃絲版的foodpanda程式。講到寫apps嘅開支，有連登仔竟然答搵啲黃絲IT人寫就搞掂，跟住仲可以叫YouTuber免費宣傳，當比個機會YouTuber歸邊。
咁樣同搵人做義工有咩分別？
依幾個月的抗爭活動入面，有好多人都免費貢獻咗好多嘢，例如designer設計文宣、IT人整hkmap.live。
但係大家要記住，依啲服務係值錢嘅。Designer、IT人始終都要考慮自己的生計。
唔可以因為有人願意做義工，就覺得所有嘢都應該係免費。
靠熱情去運作始終有一個極限。黃色經濟圈要搞得成，唔可以淨係靠義工，一定要比錢有付出嘅手足。
黃色經濟圈應該係獎勵有相同價值觀的商人，而唔係剥削佢地、喺佢地身上R折扣。
