【8月及9月份最有價值球員】- 理文 | 尼迪利
憑著喺新球季的一連串入球,理文前鋒尼迪利成功當選由香港足球總會及香港體育記者協會攜手選出嘅,2019/20年度中銀人壽香港超級聯賽8月及9月份最有價值球員。
雖然只係季初階段,尼迪利狀態勇銳無比,於理文今季首場比賽已經個人連中三元,亦都喺之後嘅兩場賽事之中攻入三球,腳風大順。
「能夠贏得8月及9月份最有價值球員嘅獎項當然令人感到高興,但如果冇隊友嘅通力協助,以我一己之力亦絕對唔可能取得咁多入球。」另外,尼迪利亦指出,上季季中加盟理文之前,自己曾經有足足三個月冇比賽,因此經過今夏嘅季前集訓,對其提升個人狀態當有莫大幫助。
現年35歲,來自法國嘅尼迪利亦不諱言,對於理文於季初階段能夠迅速進佔聯賽榜前列位置感到喜出望外。「球隊一開季就取得唔錯嘅成績,確實係意料之外。不過其實喺泰國季前集訓嘅時候,球隊已經展現出非常好嘅能力。事實上,理文上季已經擁有甚具潛力嘅班底,亦能夠捧走菁英盃錦標,所以今季喺球員更趨成熟嘅情況下,再加上引入咗合適嘅援兵,戰績自然有所提升。」
談到理文喺新球季嘅目標,尼迪利直言球隊當然會在聯賽及盃賽之中有一番作為。「開局咁順利,當然會為球隊上下注入唔少信心。請相信我,理文喺今季餘下嘅時間必定會創出更多令人驚喜嘅成績!」
#香港超級聯賽 #HKPL #Breakthrough #LMFC