自從格拉沙家族14年前入主曼聯後,「紅魔鬼」球迷一直抗議,唔希望愛隊淪為美國富商嘅「搖錢樹」,隨住曼聯戰績近年大倒退,「反格拉沙」嘅聲音更加高漲。英國《太陽報》周二(15號)爆出驚人消息,股東之一嘅奇雲格拉沙已經決定賣出手上13%曼聯股份,可能成為格拉沙家族撤離「紅魔鬼」嘅第1步!
馬琴格拉沙喺2014年去世後,6個子孫繼承嘅佢嘅曼聯股份,不過真正投入球會事務嘅只有Joel同Avram,據《太陽報》報道,計劃賣股嘅奇雲格拉沙,眼見球會股價大跌,嚟緊財政報告近會罕有錄得倒退盈利,所以決定提早「斬纜」。
文件顯示奇雲格拉沙已將手上13%曼聯股份,進行由B類股票轉換A類股票(供紐約證券交易所交易)手續,呢個動作唯一意思就係要將股份賣出。市場估計奇雲格拉沙賣股後,另外3位手足Bryan、Edward同Darcie將來亦好好可能會跟隨。
早前有報道指出,喺蘇斯克查執教嘅過去7個月,曼聯喺紐約股票市場嘅股價由21.2美金,跌到周二(15號)嘅15.91美金,球會市值由35億美金暴跌至26億美金,足足蒸發咗9億美金,主要贊助商雪佛蘭亦提早宣布唔會同曼聯續約。消息傳出後,唔少曼聯球迷話蘇斯克查其實係「反格拉沙」陣營派出嘅臥底,目的就係搞冧曼聯股價,將格拉沙家族逼走!
so9