每星期五，日罷買，罷買救港運動
https://lihkg.com/thread/1436025/page/1?post=1
byebuyday投票結果
對於罷買運動，我個人覺得可以昇華去大型商場嘆冷氣，但唔消費既活動，而且活動持續性可以好高。
我既諗法係唔止一日，係以後往往既每個禮拜五，又或者如果遊行被發出反對通知書既考量。
雖然好多人提起過。但次次都無發起。
當然亦有人講不合作運動會影響民意，所以我先作出一個投票。
個人覺得可以去大型商場，例如新城市，裡面大多都係連鎖店，無小店，唔會造成迫死小店既影響。而且我個人係相信嘆冷氣，就算係依家呢個極權政府底下，都好難以砌得入。
另外，以下係我對運動既睇法。
宜：靜默，舉牌，輸出訊息，放映會，交流意見(包括藍絲)。
忌：嘉年華，歡樂，叫無意義口號(例：錫春袋)
原因：我認為我地係呢一種地方要俾人睇到既係我地既一個理念，宣傳我地既訊息。但嘉年華式既方法，再加埋係一個私人地方，俾人感覺係擾民，歡樂，變相俾人睇到既係一大班人霸佔左人地既地方耍樂。(當然，叫番五大訴求，缺一不可。光復香港，時代革命等認真口號，個人絕對唔反對。)
宜：人少時流動，人多時開始做自己想做既野，向受阻人士講明自己做既原因。
忌：人少就立即坐低，阻塞通道。
原因：少人做任何事都好顯眼，多人做就會變成一種信念輸出。同時間亦可以大規模宣傳因近日多個示威活動被發出反對通知書，我地無可奈何先係一個合法既地方大家交流自己既意見。
宜：一星期挑選星期五一日。(或者被發出反對通知書既時候考慮增加日數)
忌：因成本低而每日做。
原因：好老實，人地打開門做生意，都係要生存，真係一星期揀選一日星期五，盡量唔好斷哂所有路，俾人地抖啖氣，同時亦發出一個訊號，你唔俾遊行，我就去嘆冷氣。
支持而且可能會參與=
不支持=
以上為個人覺得需要注意既地方，亦希望其他人想發起同類型運動時需謹記。
而選址我覺得需要選擇大型商場，盡量無小店，多連鎖店既地方，將所有輿論壓到最低，同時間唔好迫死人。
如果能夠推行，當日我會去到新城市，著黑衫，貼上宣傳星期五，日罷買既文宣，去響應運動。
以及可以於活動帶上我地既文宣圖，以幫助我地宣傳呢個訊息。
以下係我個人仲考慮緊若果成功推行應否到時作為一個活動發起人所諗如果到時有記者問我會點答。
(又或者搞唔成，但我點解會有呢個諗法既原因。)
問：點解我地會係到聚集？
答：因為現況我地申請唔到不反對通知書既環境下，我地既意見無法表達。所以係迫不得以之下我地只能夠係到涼下冷氣，同時間又遇到志同道合既人，大家互相發表下意見，同埋想宣傳下星期五，星期日罷買既呢個訊息。
問：政府話咁樣會影響經濟民生，你地點解要咁做？
答：個人選址係呢個商場係因為覺得香港未富裕到名牌作為民生既地步。
成個商場都係名牌，我諗未必係民生影響。
而至於經濟黎講，個人覺得，如果無送中條例既誕生，今日唔會有咁多人出黎響應。
如果我叫佢地走，無人會理我。
我叫大家唔好再出黎，無人會理我。
因為呢個係各位自發既行動，大家亦有行街既權利。
而如果今日林鄭宣佈回應五大訴求，仲有冇人會出黎？無。
所以影響經濟既並唔係我地，而係政府，唔好將個責任推番係我地身上。
同時間，佢作為一個特首，經濟問題佢唔去自己做好佢，反而要求其他被佢迫害既市民停止反抗去解決佢應該本身自己要做既事，真係非常可笑。
而我亦想講。
經濟唔好既時候，97，03年大家都經歷過，有冇餓死過一個人？
但係今日爭取自由，乜都未爭取到既時候，就已經死左起碼六個人。
錢可以再搵，人命，永遠都番唔到黎。今日我地停止左，未來會有更多人可能會犧牲，可能犧牲果個會係你眼前見到果一個。
自由當俾佢收窄左既，就永遠要唔番黎，大家應該要去作出取捨，去揀邊樣。
呢個係若果我當日只決定要做一個響應人士，而我希望我既概念可以宣傳到俾大家知道，又或者經由大家被訪問既口中可以俾人知道我所諗既諗法。
希望大家，響應，以及記起初衷，我地要一齊黎，一齊走。
