【史詩】【同人】《周公Online》

Ch.4


瑞克一直在沙發休息之餘，心裡亦仔細地打量著自己的部下們－一個會使用神奇力量的殘疾少年、五個小孩子....

「主帥大人，飲杯橙汁先啊。」靜香將一杯加了冰塊的橙汁放到瑞克面前。

「唔該。」

瑞克起玻璃杯品嚐著冰涼的橙汁，欣賞著愛德華與大雄等人之間的小打小鬧。

「好喇喎你哋！我最憎就係人哋屈我係矮仔啊！」

「咁你真係矮啊嘛！矮之鍊金術師！」

「哎呀！你隻死人肥老虎啊！你信唔信我將你鍊成一條肥肉腸啦喇！？」

大雄、小夫、出木衫在胖虎身後偷笑著。

「咩話你死個矮仔啊！你睇吓我－」

「夠喇！玩還玩，但唔好郁手郁腳！」

在瑞克的命令下，愛德華和胖虎即時剎停自己。

「不如我哋宜家玩一個叫做『傾吓計』嘅遊戲－諗吓我哋點樣先可以喺安全嘅情況搵晒所有嘅隊友？好無啊？」

眾人馬上走近瑞克，全都坐在地板上。

「唔駛咁嗰啵，想坐沙發咪坐上嚟囉。」

「你係大人，我哋係部下，點同呢？」出木衫答道。

「但唔代表你哋要坐地板、而我自己就霸晒成張沙發，ok？」

「大人講得啱，大家都係人，只係身份上唔同，唔代表基本權利嘅唔同。」愛德華走向沙發，重重地坐下去。

「好喇，如果我無估錯嘅話，史佛貴應該係你哋最先見嘅隊友，係咪？」

「無錯，佢由一開始就已經喺安全室嘅樓下。」愛德華一邊回答瑞克，一邊檢查自己右手的機械鎧。

「史佛貴佢負責四出搵人，你哋就喺度等佢帶人之後就照顧佢，係咪？」

「無錯。」

「咁嘅話....」瑞克望向愛德華，續道：「我宜家想你同我一齊出去搵人，咁會快好多。」

「吓！主帥大人你親自出馬！！？」

「我相信喺呢隻遊戲裡面除非自己佈露身份，否則就只有所屬嘅部下先知道邊個係自己嘅主帥或將軍，所以只要我同愛德華唔自爆嘅話根本無人知道我哋嘅身份。」

「咁即係話....黑軍都係一樣。」

「無錯，所以我哋宜家都係擔心出面嘅示威同埋防暴警察仲好過啦....事關已經有一個自己友俾人搭咗返差館。」

眾人都陷入沉默之中。

「大家放心，我相信佢最多都只會俾人扣留一、兩日到就會放番出嚟。」

「如果警察裡面有黑軍咁點算啊？」

「你頭先有無聽主帥大人講嘢㗎！？」胖虎輕輕敲打小夫的天靈蓋一記。「唔好意思啊主帥大人！佢份人就係無咩記性㗎！大人不記小人過，願諒佢一次啦！」

「總之你哋五個就留喺安全室，我同愛德華會出去做『磁石』吸人，點都快過、安全過佢哋自己嚟呢度。」

說罷，瑞克便站起身來。

「靜香你哋聽住，除咗我把聲之外，任何人叫你哋開門都唔好應，明白啦嘛？」

「明白。」

「好，愛德華，我哋行！」

「收到。」

二人走到樓下，正好碰到史佛貴一行。

愛莎和哈利向瑞克行禮後，瑞克便將剛才說過的話重複一次。

「收到喇，我哋會全力配合大人你。」

「咁我哋宜家即刻出發啦，除咗搵齊其他人之外，仲要將附近嘅地形搞清楚去。」

「等陣先，防暴警察喺附近清緊場，我哋會唔會－」

「我哋遠離示威區就得，即刻行動。」

瑞克領著眾人走出街口時，防暴警察們卻將防線推到來自己面前！正當他們調轉方向時發現自己已經被防暴警察們前後包抄....

「前面嘅示威人仕請你哋立刻放低手上嘅武器並且投降！否則我哋會使用武力將你拘捕！」

「弊喇....」

「弊條撚咩四眼仔！嗱嗱淋殺出血路啦！」語音未落，史佛貴已經動身衝擊防暴警察的防線！

「小心後面－去去武器走！」哈利突然褲袋中抽出一根幼細的木條，指向身後的防暴警察們，一道紅光便木條的尖端疾射而出！

被紅光射中的防暴警察登時倒地不起，身上的裝備、武器、長盾亦在同一時被擊飛！

愛莎咬緊牙關，用雙掌噴出冰霜封住其他防暴警察的雙腳！

「走啊！！！我清咗條路出嚟喇！！！」

史佛貴已經將前方的防暴警察打倒在地，於是眾人趁機突圍！他們一口氣跑過了數條街口，確保附近沒有任何警察、普通市民才停下來。

待續

Ch.5


「今次麻煩喇，我哋惹到班警察喇....」

「打咪打囉！反正我又大把力水、你哋兩個又識魔法！怕條撚咩！」

「記住，我哋嘅敵人係黑軍，唔係香港警察，只可自保唔好主動攻擊佢哋。」

「但佢哋頭先已經想主動攻擊我哋喇喎！咁都唔算係敵人！？」愛德華一臉不屑。

「所以我哋要盡快搵番晒所有人，然後離開呢度。」

「咁我哋紅軍一共有幾多人啊？」

「計埋我500個。」

「吓？咁多人！？真係有排等喎，只要其中一個出咗事咁佢都真係喺咁先囉....」

「所以我哋更加要行出嚟。」

「不過麻煩咁多位男士可唔可以換晒啲衫褲同埋除晒眼罩、口罩呢？咁咪唔駛俾警察攻擊囉。」

接著，愛莎從背囊裡拿出多套衫褲分派給瑞克等人。

「咁啱得咁巧，轉個彎就有間公廁喇。」

當眾人都更換好衣物、丟棄口罩和眼罩後就在公廁門口集結。

「好，我哋繼續吸自己友同埋－」

此時，瑞克發現自己的褲後袋傳來震動，他伸去摸，發現有硬物，於是便將它拿出來－原來是一塊印有「帥」字的紅色玉牌。

「嘩！」玉牌居然可製造全息投影！介面上有「通話」、「訊息」、「通訊錄」這三頂功能，正好瑞克現在就有個未讀訊息。

瑞克按下訊息，發現是一位名叫錫法斯的部下發給自己的。

「你好主帥大人....請你現時唔好亂咁郁住....返番去安全室先....我已經搵到至少10位隊友....宜家直接去安全室....到時見....」

「呢個遊戲真係犀鳩利....連咁高科技嘅嘢都有....」

「咁我哋嗰啲有無呢個功能㗎？」愛德華馬上拿出自己玉牌。

「咦，真係有喎！跟住聯絡人...499個聯絡人....掂！」

「咁即係我哋可以用呢舊嘢聯絡其他隊友？」

「無錯，我哋宜家返番去安全室先啦。」

「唉屌，早知就唔駛咁麻煩啦！」

眾人按原路返回安全室，發現安全室樓下已經被防暴警察重重包圍....

「前面嘅人聽住！如果唔想上面嘅隊友有事，就快啲叫你哋主帥出嚟！」

更糟糕的是，原來靜香他們已經被警察拘捕了....

眾人只能舉高自己雙手。

「放咗班細路先，有事慢慢講。」

一名身穿白色警察服的男督察走出防線，將一部手機遞給瑞克。

「喂，你好啊主帥大人。」是一把女聲，瑞克推測她有六十多歲。

「妳係？」

「我叫謝月娥，係香港特區嘅話事人，我知道你哋個個都身手不凡、杰出過人。所以我想請你幫我一個忙。」

「唔好意思謝女士，我無嘢可以幫到妳，妳最好就快啲叫妳手下班警察放走啲細路！如果唔係－」

「唔係點啊？你唔係真係認為我會俾一筆蝕本生意你做嘅咩？放心，就你哋肯幫我打敗呢座城市裡面所有嘅示威者嘅話，事成後我一定會向你哋提供財力、物力、兵力，等你哋可以有足夠嘅力量去打敗黑軍。」

「我點解要信妳啊？就因為妳挾持住呢幾個細路！！？」

「你可以唔信我，但你都應該好清楚喺一個城市裡面只能夠有一個勢力存在....你好好咁考慮清楚啦。」

「喂？喂？」原來月娥已經掛線，接著防暴警察們開始將靜香等五人逐一押上警車。

「喂！你哋－」

「冷靜！宜家衝過去係救唔到人！」愛莎馬上拉住愛德華。

「屌你哋老母啦死黑警！！！！細路都恰！！！！」

「主帥大人，情況如何！？」哈利上前關心呆若木雞的瑞克。

「佢要我哋幫佢哋手去鎮壓示威者佢先肯放人。」

「居然咁卑鄙？」

此時，那名男督察來到瑞克面前取回電話後說：「上頭有令，叫你哋全部去晒灣仔會展中心裡面，嗰度只有你哋紅軍成員先可以出入。考慮清楚之後隨時可以嚟灣仔嘅警察總部見『一哥』，亦即係警務處處長。」

眾人只能夠眼巴巴地看著警方帶走自己的同伴。

待續

Ch.6


「就快到㗎喇！大家支持住啊！」艾倫領著瓔珞等三人一口氣跑過兩條大馬路，終於來到紅軍的「基地」－香港會議展覽中心。

中心已被層層高達兩米的「水馬」包圍住，所有的出入口均有大量警察駐守，以檢查進入中心的人到底是否紅軍成員。

「終於都可以見到主帥大人喇....」

「但嗰啲...著住淺藍色衫....黑色長褲嘅人似乎唔係我哋嗰邊啲人....」瓔珞還未回好氣。

「我估嗰啲應該就係警方掛。」

艾倫一行來到其中一個出入口並且當場接受警方的安檢，然後就被放行。

「麻煩所有嘅紅軍成員請上展覽廳5BC，你哋嘅主帥大人就喺嗰度等緊你哋。」

他們很快便找到「展覽廳5BC」的所在位置。

當艾倫一步入展覽廳時，廳內的燈光突然熄滅，只留下一道燈光照射著演講台。瑞克就從紅色的布幕後走出來，拿著麥克風對台下眾人打招呼說：「大家好，我叫做Rick，係你地嘅主帥。」

眾人當下第一個反應，就是驚訝。他們沒想到居然會由一位容貌滄桑的中年男人來統領自己。只要看到他滿臉的鬍渣以及那似是很久都沒有打理過的卷短髮，就不禁聯想起街邊的流浪漢。

「我諗大家都清楚呢次係一場真正嘅戰爭，由呢刻起你地已經係一個軍人，所以喺做任何嘢之前一定要知道晒所有嘅軍規。」

瑞克吸了一口氣後說：「第一，全部人暫時都要留守係大營入面真到我另有通知為止。第二，無論有咩事都好都要同我講。第三，嚴禁同隊內鬥。第四，唔準騷擾平民。請問大家仲有無其他問題？」

台下的人們開始議論紛紛，當中有人舉手發言。

瑞克很快便注意到他：「請問你點稱呼？」

「我係凱文.安泰。請問我哋宜家有咩做？無理由坐喺等黑軍到。」

瑞克頓時說不出話來。

「如果我無估錯嘅話，大人你應該有啲嘢隱瞞緊我哋。」

眾人一片嘩然。

「不如講出嚟睇吓大家拆唔拆得掂？」

「有無一啲唔怕事又或者比較擅長同人談判、諗計嘅人？」

凱文指著自己，眾人又再一次嘩然。

「好，咁你陣間散會嚟台前搵我。宜家....我宣佈散會。」

凱文在眾人的目光下走到演講台前，瑞克將靜香等人被捕以及謝月娥一事告訴給凱文知。

「騎虎難下啊....！騎虎難下啊....！」

凱文沉思了一會後說：「不如咁啦，我哋－」

「等陣先，等我睇咗個訊息先....」瑞克從褲後袋拿出玉牌。

「咦？又會咁得意嘅！？」

「多謝你啊凱文，你可以去休息吓先。」

瑞克將一個名為「我已經救晒班細路」的訊息轉發給凱文看。



「咩話！？俾班細路走甩咗！！！！？」

警務處處長巫為聰的心情可以說是差到極點；先有大量部下在與示威者的衝突之中受傷之餘，與紅軍交涉的「籌碼」亦終告丟失，他恨不得馬上就殺光所有的示威者以及紅軍成員。

「我同你講啊！如果搵唔到佢哋嘅話你準備帶你自己個人頭嚟見我啦！！！！！！」

為聰狠狠地將手機拍在桌面上，連螢幕也拍爆，不過三秒後他就後悔了，因為這次打給他的，是謝月娥。

「啊聰，佢哋走甩咗哦可？」

「係....sorry啊我－」

「唔駛同我講呢啲....睇嚟紅軍嗰度有一位高人....紅軍嘅事我哋暫時唔好理住，叫班細嘅撤退、專心對付啲暴徒先。反正佢哋遲早都會俾人迫出嚟....我就睇吓佢哋可以縮幾耐！」


「報告大人！出面嘅警察已經開始撤離！」

這一消息令瑞克鬆了一口氣。

「睇嚟大人你今日行大運喎，啲好事接二連三嘅。」凱文望著手上被自己玩弄中的石塊。「大人，佢哋已經到咗。」

靜香一見到瑞克，便馬上衝去他的懷中哭泣。

「多謝主帥大人派人嚟救我哋....如果唔係我哋已經....」

「多謝主帥大人！」大雄他們也痛哭流涕。

「雖然人就唔係我派嘅，但我想見一見佢，事關我都差啲以為第二日先見到佢。」瑞克一邊輕撫靜香，一邊說道。

「又見面喇主帥大人！」原來此人正是為義！

「咁都走得甩之餘仲救到人，你真係好有本事。」

「哦，我喺現實世界裡面當過兵嚟，所以都有番兩三下嘅....」

「當兵？邊個國家？」

「遊擊隊，唔屬於任何一個國家。」

「好，我好多謝你救番佢哋，好好休息吓先啦。」

「係嘅。」說罷，為義便離去。

「大家都攰㗎喇，快啲去休息啦。」瑞克似乎注意到凱文用那一雙感到驚訝的目光望著遠去的為義。

「凱文？」

「哦、無嘢，只係好好奇佢係點做到姐....」

「嗯，我相信佢有佢嘅辦法，所以去休息先啦。」

「係....」


待續