台灣環島-烏龍遊

最緊要安全為上
我成日上斜都推車
BTW好天真係要踩下蘇花
因為真係好靚

加油
踩完身心健康

加油 踩完既經歷
夠你回味一世

我去果次 咁岩落雨
我會再去騎蘇花
不過下次係電單車

巴打幾月去

支持
2年前暑假同你一樣路線逆時針環島，起點一樣係租車瘋，好多回憶，好懷念

我上年8月中
熱到叭街 又落雨 SOSAD

睇黎好多巴打都係
去租車瘋搵鳥哥

大概5點幾左右 我同阿光就分開左
阿光係台中book左酒店
而我就繼續向前踩 追進度
踩左陣 我去左間7仔買野飲
順便book埋今晚青旅
決定今日要踩到去鹿港
一個幾古色古香既小鎮
好可惜只可以停留短短一晚
無時間欣賞下e個咁有特色ge小鎮
距鹿港大概仲有20幾km
咁我預計7點左右就會到
踩踩下 日落西山 幾有feel

頂 禁錯制
好 book完青旅 啦啦聲出發!
8月既台灣 大概6點幾就天黑
唔踩夜車既我 緊係比行油踩
終於7點半左右 我就到左鹿港
去到間青旅 諗住check in
點知個老闆去左食飯
e點我係幾佩服台灣人
係香港絕對唔會遇到咁既人
台灣人係生活 香港人係生存
所以我係on狗狗係到等
等等下 有2-3個人客黎到
大家係到你眼望我眼咁
終於等到8點到 老闆終於返黎
我啦啦聲check in沖涼 擺低野
就狗沖出去搵野食啦
因為除左台北 其他地方都好早收檔
9點基本上已經差唔多收哂皮
正當我諗住自己一個嘆下泰菜
我係馬路遇到岩岩一齊呆等既男仔
我就同佢搭訕 問佢食咪食飯?
跟住佢話係 咁我就話不如一齊食啦
跟住我就跟左佢去附近市集食飯

佢叫宜楷 係一個地道台灣人
岩岩輔仁大學研究生畢業
佢都係黎環島 話畢業散下心
不過佢係用電單車環
大家一齊談天說地 論盡天南地北
佢請左我食碟青菜 我亦回敬他章魚燒
就係咁 我認識左我第一位台灣朋友~





DAY3 完~

幾好咁喎

推下

DAY4 鹿港 > 嘉義

琴晚同宜楷吹水吹夜左
訓晏左 朝早8點先起身
佢會留係鹿港多一日
因為佢電單車環
時間好充裕 唔似我
一日平均踩成10個鐘
所以我決定下次再環島
一定會揸電單車算
單車真係太攰
係永和食個早餐就出發了


臨走前係間青旅影返張沙龍就出發了


踩左陣終於出返公路
今日d路比較多分支
攪到瘋狂盪失路
要單手拎電話google map搵路
最大敗筆係無買到電話架
架係單車到用導航
攪到行下停下 咁搵路

踩到11點到 今日都好曬
見到間紅茶冰 忍唔住飲返杯
順手食條蕉 30台幣大大杯 爽哂

食完繼續上路 點知...
又遇到我環島最大障礙
又爆軚啦 DKLM
今次又爆後軚 我落車推左一段路
終於搵到間機車行 借架生攪
一次生 兩次熟 今次已經第三次
換完繼續上路 踩到1點到
搵午餐食 求奇搵左間野
台灣好多小店都係2點收皮午休
5-6點再開 做晚市
所以去到已經好多野賣哂
求奇食左個便當 食完就上路
離嘉義仲有45km左右

食飽2點到 繼續上路
今日進度唔錯 應該6點前到
點知...我炒L左車
其實最易炒車反而係平平無奇既位
落斜 高危位 你會好集中同小心d
今次我就係到炒左
因為條路剩係容納到一架車過
我想讓一讓佢行 失平衡就炒9左


好彩只係左右腳膝頭位擦傷
我用d水沖一沖 貼塊藥水膠布就算
一陣踩入市區 去藥房買野消毒
希望今次係最後一次炒車
攪掂再上路 踩左個零鐘到
發覺有d唔對路 右腳膝頭果位
有d腫起左 禁落去有d痛
我開始有d擔心 今日先第四日
唔通我要因傷而停止環島
唔理了照踩 一口氣踩去嘉義再算

終於踩到7點 我到嘉義啦
今日又多災多難 又爆軚 又炒車
但都可以7點到 算係咁啦
去到旅館 沖個涼 擺低野
處理埋傷口 就狗沖去食野
買奶茶果陣 問店員附近有咩推介
佢就推左兩間雞肉飯比我
原來嘉義雞肉飯 有咸有甜兩款
我就鐘意食甜 叫碗飯 湯 菜
都係100台幣到 又好食
食完雞肉飯 再去夜市掃街
買返青旅慢慢嘆
順便搵下阿光去到邊
原來阿光都係嘉義
間青旅仲要距我好近
我緊係叫阿光過黎吹下水

你一日做咁耐運動都淨係食咁少野 夠唔夠嫁

推下

DAY5 嘉義 > 高雄

琴晚係青旅同阿光吹左成晚水
都係講返E 2日我地分開行既路程
原來阿光聽日就踩返高雄 完成環島
而我都會經過高雄 所以我地同路
好順理成章 我邀請阿光一齊踩返高雄
咁我地就約左8半出發 各自返去休息
點知阿光第二日一早send msg黎
話佢有d頭痛 叫我出發先 再會合

咁我都拖到9點先出發
諗住踩慢少少 方便同阿光會合
路經關帝廟 咁緊係拜下關二哥


踩到11點左右
阿光好快追上黎同我會合
點知e個時候竟然落大雨
大雨就完全踩唔到
我地唯有去搵個油站避一避雨先

等雨勢細d 我地就著雨衣出發
冒住雨趕路 因為今日要踩過百km
所以都要爭取時間踩
大概2點 我地先求奇搵間7仔食lunch
食飽飽又再次出發了
個天都係落下 停下咁

同阿光踩有樣野好 就係佢負責帶路
因為佢有個電話架放係架車到
可以邊睇導航邊踩 我跟住佢踩就得
完全唔洗用腦
點知我地跟住google map條路線踩
踩踩下 發現有一段路維修緊
攪到我地兜黎兜去搵先出返大路
天氣又時好時壞
一時就勁大雨 一時就出大太陽
我地濕完又乾 乾完又濕
屋漏偏逢連夜雨 我地仲行錯路
踩左落田野 即係人地耕田d泥地
直頭好似玩緊越野障礙賽咁
踩到成車 成腳都係泥
幾經辛苦先搵得返條正確ge路
朝住高雄進發!
一路上同阿光冒住雨邊踩邊吹水
苦中作藥
享受我地最後並肩而行既最後一段路
因為阿光踩返高雄就環左一圈
而我就要繼續努力 完成我既環島
歡樂ge時光真係過得特別快
踩到8點左右 終於望見家鄉 達陣

今日既路程都好多阻滯
又成日落雨 又行錯路
同埋路程又比較長 成百km
所以攪到成8點先到高雄
咁我同阿光影多張沙龍就分開了

佢就去搵表哥 我就自己去青旅
阿光 係e段咁枯燥ge旅程能夠
遇到你結伴同行實在太好
雖然只係短短兩日 就係咁
我又認識左第一位澳門既朋友!
多謝你! 阿光!

去到青旅沖個涼 擺低野
狗沖出去搵野食 周圍行
諗住入去間野食燒肉
佢竟然同我講無book位無得食
無得walkin 心諗你係咪咁好生意
結果我係附近夜市掃蕩完一輪
就返左青旅休息了 攰到一個點
DAY 5 完~~

文呢

好似無人睇

你出文唔應該睇有幾多人睇，做人唔係應該有始有終咩，無人睇都可以出晒成個旅程，當有人要去做同一件事既時候，搵到你呢篇文可能幫到佢，我5月尾都會出發，機票都買埋😳

lm

留名支持

同意
利申7月出發

今晚出文

Lm 支持