林淑敏（Mandy）和許家傑去年憑住《愛‧回家之開心速遞》的「大小姐」和「送水輝」人氣急升，不但工作量大增，Mandy更封「最佳女配角」，絕對是豐收一年。踏入豬年，這對銀幕情侶望角色長做長有外，仲笑言唔介意再忙啲拍住搵真銀，他們更大爆兩人角色之間會出現「第三者」，劇迷要留意啦！撰文：杜淑霞 攝影：李維隆
其實Mandy和家傑拍《愛‧回家》前已合作過兩次，因冇對手戲所以拍該劇時，確實需要更多時間磨合。Mandy說：「好記得第一日開工，收工後佢傳訊息畀我話，『好多謝同開心今日同我合作』，咁識得感恩係好難得。我工作好追求完美，好奄尖，難得佢肯陪我癲，為場戲喺canteen傾幾個鐘。」
大爆有「第三者」
Mandy覺得好對手難求，所以坦言相對於得「最佳女配角」，更想攞「最受歡迎電視拍檔」獎，「講真我嘅演出要對手配合好先得，唔係我一個人功勞嚟！」家傑更大爆去年公佈提名時Mandy完全唔在意，「佢話冇理由會提名多一年，到準備頒獎前，佢又唔肯拉吓票。」Mandy就解釋，「真係冇諗過可以提名兩次，同埋我覺得有支持，出街聽到人叫我『大小姐』係最大滿足感，獎項真係錦上添花。」《愛‧回家》已宣佈加碼，他們這一對至少可合作多一年，家傑就大爆劇情，「之後點發展要睇編劇安排，但暫時知『大小姐』同『送水輝』嚟緊關係有啲變化，因為馬蹄露同楊玉梅會加入。」問到兩人豬年願望，他們繼續好合拍話，好想拍住上搵真銀，Mandy說：「雖然之前有啲一齊搵錢嘅機會，但係仲未夠，我哋仲可以再忙啲都得㗎！」
司徒獨孤明珠仲未死
