第九十七章
時至十月中下旬開始秋涼
唔係講笑真係好撚舒服
無論返學定係放狗甚至係食飯都好
都真係爽過夏天好多
之前我講過啦
晏晝食飯嗰陣我同芊靈多數都係喺學校嗰個園林休憩處度食
上年增設咗之後一直維持到依家
除非有時真係約咗人又或者落大雨,
如果唔係都唔會變
甚至依家放學見天氣咁舒服
都唔係成日搭巴士
慢慢行返屋企都算順路,
特別有時佢話想飲野,
而我同佢都係一個良好市民
從來都唔會違反巴士飲食條例
咁就話一路行一路飲啦
費事一啖氣飲晒
咁樣十月尾有一日放學,
芊靈無啦啦同我講咗啲野
芊靈:「今個禮拜五得唔得閒 」
我:「做咩呀
嗰日放早喎梗係返屋企打飛機 」
芊靈:「變態無聊
真係要將你個腦淨化先得 」
我:「唔係呀我講緊嗰隻game呀
你諗咗去邊 」
芊靈:「點知你講咩呀
咁樣得唔得閒呀 」
我:「你想做咩先 」
芊靈:「我有海洋公園萬聖節飛
一齊去玩嚕 」
我:「你搵michelle佢地啦 」
芊靈:「你都傻嘅梗係一早問咗啦
點知佢地個個都話驚鬼
有啲就要陪男朋友
咁你知啦我咁識做
點會做電燈膽呢 」
我:「咁你搵老豆老母啦 」
芊靈:「邊度得閒喎 」
我:「屌你啦我真係好驚鬼
乖啦靚女唔好咁啦 」
芊靈:「嚟啦嚟啦一次咁多啦
我幾時求過你啫係咪先 」
我:「下
你成日求我架喎 」
芊靈:「咁唔爭在應承多一次啦
我有多一張飛呀 」
我:「真係識人好過識字
乜撚野著數你都有 」
芊靈:「去一次咁多丫
我都驚呀就係想搵人陪 」
我:「屌唔好咁啦 」
芊靈:「真係一次咋
唔該你丫你咁靚仔又咁好人 」
我:「今次真係冇得傾 」
芊靈:「一次咁多真係一次 」
我:「唉好喇好喇
去呀去呀去死佢 」
芊靈:「好野 」
我:「講明先呀到時我嚇到大叫你唔好話我嘈呀 」
芊靈:「得啦你估淨係你驚咩 」
其實我嗰日原本就約咗Cyrus
不過見佢咁想去就破例一次啦
好彩Cyrus真係好撚明白事理
肯放人話我同佢可以下個禮拜再出,
真係夠老友冇得頂