有無人幫手執個介紹
#1 清酒介紹+Q&A
#2 買酒地方+清酒bar推介
清酒係用水、磨左既米(精米)、酒麴同酵母釀成既酒。而家香港愈來愈容易搵到清酒，酒精濃度多數係15-20%左右，有時會加入釀酒用既酒精提升酒香。清酒味道多變，粗略可分為爽、薰、醇、熟四類去表示，口感就大致分為甘口/辛口(Dry)
(轉載自日本清酒文化交流會)
有好多人可能會覺得清酒感覺好老舊，但其實而家有好多清酒都包裝得好前衛好吸引，味道亦都唔再係只有米香，主力推廣年青人市場
放幾張做例子先
新手Q & A
Q: 如果想入門又唔識揀點算好？
A: 最好當然係搵飲開既朋友帶住你飲啦
如果身邊無人飲日本酒，都可以去酒鋪或者Citysuper睇下，同Sales講下你鍾意咩口味/Budget。清酒唔一定愈貴愈好，更多係釀酒師功力，好多時$180-300已經有質素好好既選擇 ，甚至好過唔少$500以上既款如果信唔過Sales，可以介紹幾間易搵又岩我心水既酒廠，巴打有建議不妨加落黎：
純米酒：田酒、赤武、田中六五、七田、大七
平靚正入坑吟釀：作、雅山流、天壽 鳥海山、勝山 献、
中價吟釀(多數$300起跳)：鳳凰美田、くどき上手、東洋美人、榮光富士、寫樂
貴野($800起跳)：十四代、磯自慢、而今
新派清酒 - 一般帶微碳酸口感，通常檸檬/瓜果味道突出：醸し人九平次、新政、紀土、風之森
Q: 揀酒時有咩要注意？
A: 睇製造日期！好重要亦都好多人忽略
清酒唔似紅白酒威士忌，好講求新鮮，所以見到製造日期長過6個月既，就盡量唔好買啦
過左期既死酒經常會有陣鹹魚味或好辣似火酒。而製造時間有時會用平成29/30年表示(2017/2018)。同埋清酒見光死，如果見到支酒擺係陽光直射或者射燈下既話，好可能會變質，幾靚既酒都盡量唔好買啦Q: 啲酒有時寫住大吟釀，有時就寫純米吟釀、純米、本釀造，究竟有咩分別?
A: 清酒係用精米去釀，精米磨得愈多就愈「高級」，而精米既比例叫「精米步合」
(轉載自知乎)
上圖見到大吟釀係最高級。至於有標明純米既酒，即係支酒無加釀造酒精落去。 不過大吟釀係咪一定好飲啲呢
我覺得品質相對上係穩定啲，但酒廠技術、米品種同水影響較大
純米係咪又好飲啲呢 我都覺得無咩關係，歡迎大家都討論下 Q: 清酒點樣存放最好？
A: 最好一定係買完番黎即刻擺雪櫃，開瓶後幾日內飲完。如果雪櫃唔夠位，可以擺係陰涼既地方，但開瓶後飲唔曬一定要擺雪櫃
Q: 有時見到D酒寫住生酒生貯藏生詰，其實係咩黎？
A: 釀完清酒後通常會加熱殺菌2次，殺死酒入面微生物。釀好既酒搾取後，會殺菌再儲存等佢熟成。熟成完就入瓶，呢個時候就會殺多次菌。
「生貯藏」即係無做第1次殺菌；「生詰」就係無做第2次殺菌；「生酒/本生」就完全無殺菌。
https://i.lihkg.com/540/https://pbs.twimg.com/media/CNaEUK3UAAEDZ3n.jpg
個人最愛就係呢類酒
通常飲落比較Fresh，口感較澎湃，但因為唔放得耐，而且必需長期冷藏，買左最好盡快飲 Q: 咁原酒又係咩黎？
A: 清酒約80%既成份係水，通常釀造期間都會加水，而無加水既就叫原酒。由於無加水，所以通常重味啲，酒精度都高少少。
Q: 有無咩杯推介？
A: 如果飲純米酒或者熱酒，傳統既陶酒杯或瓷杯係好選擇。但如果想多啲做品飲，就建議買番隻吟釀杯
啲香氣同味道既層次會細膩好多，一般幾十蚊既吟釀杯都夠做，而下面介紹兩隻：
松德硝子 吟釀杯
Riedel 吟釀杯
