內裏有舊post嘅Google Doc，RedDragon1會員嘅詳盡「顛覆過程」新翻譯，仲有卷殘會員嘅Edward Griffin與Yuri Bezmenov interview嘅翻譯
=======================================
孫子兵法有云：「不戰而屈人之兵，善之善者也。」中共入侵香港，就係想儘量用計不戰而勝香港人。而呢啲計，就係令到大家接受僞真理嘅政治宣傳伎倆。
政治宣傳，亦即控制思想，控制輿論。市儈啲講，唧係思想病毒。人類嘅基因如果叫genes，咁社會思想嘅基因就係memes。
今日講嘅伎倆，個淵源歷史悠久，任何古文明都用過：分而治之，Divide et impera，將敵人搞到內亂，漁人得利。
但係香港承受緊嘅，係一個共產主義特有嘅version：文化馬克思主義，Cultural Marxism，係馬克思主義傳承落廿一世紀嘅最大產物。大家諗吓近十年有冇係輿論見過以下嘅非黑直白分壘：
港女vs港男 （性別）
直vs孿（性向）
廢老vs廢中vs廢青（年齡）
xx後vs yy後（年齡）
有錢有樓vs冇錢冇樓（經濟）
勞工vs文書（工種）
追韓劇vs追日劇vs追美劇vs追英劇（興趣）
高學歷vs低學歷（學歷）
名校vs非名校（學歷）
HKUvsCUHKvsBUvsUSTvsEdU（學歷）
已移民vs未移民（國籍）
黃絲vs藍絲vs綠絲（政治取態）
好多分完再分嘅政治陣營，互鬥（政治取態）
香港社會，因爲仲未係完全極權統治，所以仲有思想多元嘅空間，可以容納唔同嘅意見。文化馬克思嘅手段，就係將社會中嘅各種多元簡單化，變爲非黑直白，產生感性嘅內鬥，耗損整個社會嘅政治力量。
==「文化馬克思」嘅歷史淵源==
講起馬克思主義，一定會有好多人入嚟屌我話「你講嗰啲唔係真正嘅馬克思主義」，所以宜家講明我係用「歷史實踐」嘅角度講馬克思，唔係「書本理論」嘅角度。
馬克思主義 Marxism，實踐出嚟嘅精髓就係「階級鬥爭」Class struggle，簡單嚟講唧係話「工人階級」（勞工）鬥贏「資本階級」（boss），奪回屬於「工人階級」嘅「means of production」。好簡單嚟講，就係無權嘅階級鬥有權嘅階級。
原本馬克思嘅Plan係等資本主義自己倒冧，或者工人階級自發推翻資本階級。但係兩者都無實現，所以就衍生出第二代嘅馬克思主義：史太林-列寧主義Stalin-Leninism，同埋毛澤東主義Maoism。兩者個宗旨一樣：既然班「工人階級」唔想發起「階級鬥爭」，所以就由一班研究過馬克思主義嘅「中產階級」成立「先鋒」Vanguard，去幫啲「工人階級」發動鬥爭。Stalin-Leninism係用工廠工人鬥工廠boss（industrial class struggle），Maosim就係用農民鬥地主（agrarian class struggle）。
當然，第二代馬克思主義都係失敗，因爲當班「先鋒」奪權之後，係唔會想下放權力畀班「工人」。所以冷戰時期，第三代馬克思主義就誕生：係西德，法蘭克福學派Frankfurt School將當時嘅歐陸哲學同馬克思主義撈埋，演變出critical theory，最後形成文化馬克思主義Cultural Marxism，將「階級鬥爭」嘅套用對象放大，唔止係經濟階級，而係社會上每一個可以一分爲二嘅層面。
==「文化馬克思」嘅精髓及實施==
文化馬克思主義Cultural Marxism嘅精髓，就係將原本馬克思個套「階級鬥爭」，擺落社會每一個文化差別，將佢兩立化，繼而「階級鬥爭」。得出嘅結論，就係社會係每一個層面上都完全撕裂，內在敵對，摧毀一切嘅傳統同埋團結。呢個理論，可以話係人類歷史上最徹底，最有效嘅「分而治之」方法。
由於佢馬克思嘅淵源，Cultural Marxism嘅實施通常都會涉及「爲弱者發聲/平權」呢讓嘢：
藍絲：所有警察都被社會欺壓
廢青：所有年輕人唔捱得，淨係識怨，蝦大人，整亂香港
廢老：所有老年人恃老賣老，蝦細路
重點大家到見到，係個「全部」，係以偏概全，因爲Cultural Marxism要work，就要簡化個社會變成2-3個完全對立嘅positions。只要嚟啲identity一成立，就好容易好多人自我分組：因爲多元思想嘅社會，一定會有媒體炒作嘅情況發生，而每每令到最多人click入article嘅方法就係簡單化+極端化社會上嘅矛盾，再加上network effect+羊羣心理，大部分人都會輕易被歸邊。
呢個就係文化馬克思主義嘅恐怖之處，因爲佢嘅成功，正正就係寄生於自由經濟社會嘅思想多元之上。好諷刺，一個社會嘅思想越係自由放縱，加上自由經濟嘅傳媒，兩極化嘅「文化階級鬥爭」就越容易出現。
==抵抗「文化馬克思」方法==
一如以往，由於共產式subversion(顛覆)嘅手法都係psychological warfare(心理戰)嘅伎倆，所以抵抗方法亦就係保持頭腦清晰，同埋要明白呢種操縱思想嘅方法背後嘅原理。敵人可以做嘅，只不過係建立一個有利於你畀人分化嘅環境，最終係咪真係被分化，係呢個人意志嘅選擇。
