呢句一開始出嚟嗰陣都只係一啲詼諧嘅味道，少少似黑色幽默，通常用第三者嘅角度講，果陣都叫做會冷笑下。
到到以家連登時代，呢句好似真係認真講，而且好多人係第一身嘅角度講呢番說話，怪自己父母窮但係生左自己出嚟，要佢地捱。
OK，我明白出生於草根階層，讀完書出身之後無家庭幫助，難上樓難結婚，甚至係要比好多錢屋企做家用，儲唔到錢生活好辛苦，但人生就係唔公平架啦，唔通真係個個有錢先生？可能咩？
與其喺度怨天由人，不如諗下點樣改變啦。窮唔等如一定係做失敗者，其實窮人好多時唔係因為家境而做窮人，窮人真正係窮思想，往往就係呢種負面消極嘅態度令你一世窮。
記住，成功嘅人遇到挫折嘅時候係搵解決方法，失敗嘅人遇到挫折嘅時候係搵藉口。
我覺得絕大部分嘅父母，都係發自內心愛自己嘅子女（當然我唔排除真係有啲生完就唔理，但絕對係少數），當我地考慮佢地嘅經濟能力而比到咩資源嘅時候，係咪應該諗埋精神層面？十月懷胎好輕鬆？佢地一直對你地嘅愛，你地嘅照顧，雖然係老土啲講，呢啲真係無價架喎。
對於我來講，可以擁有呢份生命我已經好感恩，就算佢地無留啲咩比我，因為以家先係人生嘅序言，無論之前係幾艱難都好，之後可能好多精彩野等緊你。
90後公屋仔一個，想盡少少力令呢個香港多啲正能量
窮人生咩仔
