唐玄宗先天元年（712），有個毒撚出世。佢好細個就死左老母，由姑母撫養長大。細個多病呀佢，佢同皇帝講自己「少小多病，貧窮好學」。（《進封西嶽表》）係搏人同情定點，真係無人知。
多得香港垃圾教育制度，我地對古人既認知通常都停留喺好悶同埋好撚悶。跳出個框框睇，可能佢係一隻病嬌，好似佢自稱：
「七齡思即壯，開口詠鳳凰。九齡書大字，有作成一囊。」（〈壯遊〉）
嗱，七歲就識作詩，九歲學寫字，仲有可以裝滿一個背囊既作品。表面睇好似好勁，但係實際就唔係。用香港既情況黎睇，七歲係小學二年班、九歲係四年班。佢四年班先學寫字，好可能連弱能人士都不如。
去到十四五歲，佢既弱智程度加劇。佢自己話：
「憶年十五心尚孩，健如黃犢走復來。庭前八月棗栗熟，一日上樹能千回。」（〈百憂集行〉）
一日上樹能千回？連登仔單手游出公海啦。十五歲？MK妹做左人阿婆啦。嗱我地睇人寫野要細心。十五歲健如黃犢？你岩岩先話自己細個多病咋。
唔單止咁，我估喱種人無咩朋友。又係佢自己話：
「性豪業嗜酒，嫉惡懷剛腸。脫落小時輩，結交皆老蒼。」（〈壯遊〉）
十四五歲，開始扮大人，扮中意飲酒，係正常既。不過「嫉惡懷剛腸」，即係正義撚、報警撚啦，實在不可以饒恕。
我諗咁上下年紀既人，好可能集體杯葛佢，所以佢既朋友都係六七十路以上。
禍不單行，佢仲有少少中二。又係佢話：
「往昔十四五，出遊翰墨場。斯文崔（尚）魏（啟心）徒，以我似班（固）揚（雄）。」（〈壯遊〉）
讚佢既崔尚，係武則天久視二年（701）進士，大中大夫，行尚書祠部郎中。魏啟心，則係中宗神龍三年（707）進士。當時崔尚係鄭州刺史，魏啟心係豫州刺史。都唔算係細官啦。不過咁，喱件事有無令你諗起一個人？
張如城在2000年的廣東省吳川市中國五四青年運動節歌唱比賽，被中國市府人員邀請做表演嘉賓，獲市委書記和公安局長頒發《最佳榮譽獎》和《最佳勇氣獎》，被稱為「亞洲神童」及「亞洲最年輕音樂創作人」。
大唐鄭州刺史+豫州刺史 VS 本朝廣東省吳川市市委書記+公安局長
似班固、揚雄 VS「亞洲神童」、「亞洲最年輕音樂創作人」
你覺得邊個勁？好明顯，喺十五歲黎講，張如城完勝。
