我喺沙漠度墜咗機，之後就遇到佢......

3

我用咗好多時間先諗得明佢係喺邊度黎。小王子問咗我好多問題，不過我問嗰啲佢就扮聽唔到。有時候，由佢亂噏嘅嘢，就可以慢慢咁了解到佢多啲。佢發現咗我架飛機（因為太複雜所以我唔識畫）之後，佢就問我：
「呢嚿係咩嘢嚟？」
「唔係嚿咩嘢，係用嚟飛嘅，呢架係飛機，我架飛機。」

我好得戚咁同佢講咗好多我喺天度飛嘅嘢畀佢聽。
之後佢就喺度大嗌：「咩話？原來你係喺天上面跌落嚟㗎！」
「嗯……係啊……」
「吓？咁得意！」
小王子笑到 gap gap 聲，好似好開心咁，但係我就好嬲。我發生咗啲咁不幸嘅事，我希望佢可以認真啲對待。佢繼續講：
「咁，你即係喺天空上面嚟㗎啦！你喺邊個星球度嚟㗎？」

我見佢嘅出現咁奇怪，於是我就問佢：
「你喺第二個星球度嚟嘅？」
但係，佢冇答到我。佢擰轉頭去望我架飛機。
「原來係咁，即係你唔係由咁遠水路過嚟嘅……」

之後，佢就好似喺度唔知諗緊咩咁，一路就係咁過咗好耐。突然之間，佢喺個袋度拎咗我畫畀佢嗰幅羊嘅畫出嚟。佢望實呢件寶物，好似畀佢吸咗入去咁。

你可以想像到，佢咁樣講會令我想知道更多關於「第二個星球」嘅嘢。我就 chok 吓佢：
「小朋友呀，咁呢，你即係喺邊度嚟㗎？你屋企喺邊㗎？你…會帶我隻綿羊去邊㗎？」

佢諗咗一陣之後答我：
「你畀我個箱都幾有用，夜晚可以畀佢當屋用。」
「梗係！同埋呢，如果你乖嘅話，我畀條繩你添吖！咁你日頭就可以綁住佢嘞。仲有，畀埋條木樁你。」
「唔係掛，綁住佢？咁嘅嘢你都做得出！」
「但係你唔綁住佢嘅話，佢會唔知走咗去邊㗎喎……」
條友仔又試笑到 gap gap 聲咁。

「但係，佢去得邊喎！」
「邊度都會，總之有路就會行……」
小王子之後好嚴肅咁同我講：
「其實，唔緊要呀，好細㗎咋我住嗰度。」
佢仲好似加添咗份傷感咁講：
「就算真係有路就行啊，都唔會行得去邊啦……」

推

留名

留名

文呢

好期待！

我每次講粵文發展嘅talk，都會用小王子做例子。人口少到好似冰島話噉，都有自己嘅譯本，而人口過百倍嘅粵語，居然仲未有。好希望你嘅譯本可以出版。

正評
留名
F5

文呢

樓主幾好睇

4

我就係咁發現咗第二樣好重要嘅嘢：小王子住嗰個星球只係大過間屋少少！

不過我就唔會覺得好驚訝。因爲我知道，除咗一啲比較大嘅星球，例如地球、木星、火星、金星呢啲會畀個名佢之外，仲有其他幾百個細小嘅星球，連用望遠鏡都好難睇得清楚。當有天文學家發現到個呢啲星球，佢會畀個冧吧佢做名。例如，個星球會叫做「325號小行星」。



我有合理嘅理由相信，小王子住嘅星球就係 B612 號小行星。呢個小行星係喺 1909 年由一位土耳其天文學家用望遠鏡發現嘅，當時只係得一次觀測記錄。



佢之後就去咗國際天文學聯會，將佢嘅發現展示畀人睇。不過，啲人因爲佢嘅衣着而唔信佢。啲大人就係咁㗎啦。

好彩，因爲 B612 號小行星太過出名嘅關係，土耳其嘅獨裁者就用死亡嚟威脅佢哋，逼佢哋一定要着到好似歐洲人咁。個天文學家喺 1920 年再將佢嘅發現展示畀人睇。不過，今次佢就着得好光鮮。就係咁，今次全世界都同意佢喇。



如果我要同你講 B612 號小行星嘅嘢，我就會講一啲關於佢嘅數字。咁做係因爲啲大人。啲大人係好中意數字嘅。當你同佢哋講，關於你嘅新朋友嘅嘢嗰陣，佢哋永遠都唔會問啲重要嘢。佢哋唔會問：「佢把聲係點㗎？」「佢中意玩啲咩？」「佢有冇儲蝴蝶？」

佢哋會問：「佢幾多歲？」「佢有幾多個兄弟？」「佢幾多磅？」「佢爸爸搵幾多錢一個月？」淨係咁，佢哋先會信你係識佢嘅。如果你同啲大人講：「我見到有間屋外牆係用玫瑰紅磚砌嘅，窗口放咗啲天竺葵喺度，屋頂仲有啲白鴿喺度……」

佢哋咁樣係想像唔到間屋其實係點。你要同佢哋講：「我見到間屋係值十萬法郎。」佢哋就會大嗌：「嘩！間屋好正喎！」

同一個道理，如果你同佢哋講：「小王子存在嘅證據，就係佢好得人中意，佢笑過，同埋佢想要一隻綿羊。當一個人想要一隻綿羊，咁就證明佢係存在嘅。」佢哋都費事睬你，仲會當你係小朋友。但係如果你話：「佢來自嘅星球係 B612 號小行星。」咁佢哋先會信，同埋唔再追問落去。佢哋就係咁。唔可以對佢哋咁高要求。小朋友要多啲包容吓啲大人。

惟有飲者留其名

Keep going

不過，當然啦，清楚人生係點嘅我哋，就會不屑去用數字！唔係我就會好似童話故事咁寫呢個故仔。我會話：
「從前，有個小王子，佢住喺一個好細嘅星球，個星球淨係大過佢少少，佢想要個朋友……」清楚人生係點嘅人，就可以得到更多資料。

不過我又唔想睇我本書嘅人睇得咁求其。寫低呢啲回憶搞到我不知幾傷心。由我朋友帶走佢隻綿羊到而家已經六年喇。我要喺呢度講吓佢，係因爲我唔想忘記佢。將朋友忘記係一件好慘嘅事嚟，因爲唔係個個都有朋友。唔係嘅話，我就會變到好似啲大人咁，淨係對數字有興趣。

所以我去買咗啲顏料同幾支鉛筆。喺我咁嘅年紀，係幾難重新去畫返畫，仲要講緊呢個人係除咗條大蟒蛇嘅入面同出面之外，就乜都冇畫過，嗰陣仲要得六歲！我之後當然就試吓去畫啲肖像，盡我能力畫到最真。但係我唔可以肯定我有成功到。有一幅都畫幾好，另一幅就畫得唔似。我成日都畫錯高度。呢張小王子太高，嗰張又太矮。我又唔係好知佢啲衫應該油咩色好。我就試吓呢樣，試吓嗰樣，有好嘅，都有唔好嘅。有啲重要嘅細節都畫得唔係幾好。但係應該要原諒我。我朋友咩都唔同我講清楚。佢可能以爲我同佢好似。但係，我其實唔識得望穿個盒入面去睇隻綿羊。我可能更加似大人。我已經變老喇。

正皮

5

每一日，我都會知道多啲關於佢嘅星球，佢點樣出發，同埋佢嘅旅程。關於佢嘅嘢我都知得好慢，佢都係無啦啦諗都就講咁。所以到咗第三日，我就係咁知道咗關於巴歐巴樹嘅問題。

今次真係又要多謝隻綿羊，因爲小王子突然間問我：
「係真㗎可，係唔係呀，綿羊會食灌木㗎？」
「係啊，係真㗎。」
「啊！我好開心啊！」

我唔明點解綿羊會食灌木呢樣嘢係咁重要。但係小王子再講：
「咁所以，佢哋都會食巴歐巴樹？」

我就提小王子，巴歐巴樹唔係灌木嚟，而係成座教堂咁大嘅樹嚟。就算佢帶一班大笨象去，班大笨象都搞唔掂一棵巴歐巴樹。

一班大笨象呢個諗法引到小王子喺度笑：
「咁要放一隻上另外一隻上面先得……」



不過佢之後好醒咁講：
「啲巴歐巴樹，喺長大之前，係由細細棵開始嘅。」
「啱啊！但係，點解你想你嘅綿羊去食啲巴歐巴樹苗嘅？」

佢答我：「好！就係咁！」好似講緊啲一定係真嘅事咁。即係我要自己，用我嘅智慧，諗掂呢個問題嘅答案。

咁其實，喺小王子嘅星球上面，會好似其他星球咁，有好嘅植物，亦都有壞嘅植物。所以，咁即係會有好嘅種子同壞嘅種子。但係啲種子係好難搵嘅。佢哋匿埋喺泥土嘅深處度瞓覺，直至有一粒發完好夢瞓醒。佢之後伸個懶腰，怕怕醜醜咁，向太陽嘅方向伸出嫩芽。如果係蘿蔔或者係玫瑰嘅嫩芽，就由得佢想點生就點生。如果係壞嘅植物，一見到就要即刻掹咗佢。而家呢，喺小王子嘅星球上面，有一啲好恐怖嘅種子，就係巴歐巴樹嘅種子。星球上面嘅土壤就會畀佢哋用曬。巴歐巴樹嚟講，如果太遲掹走嘅話，就永遠都整佢哋唔走。佢會霸曬成個星球，佢啲根都會整穿個星球。個星球太細，而巴歐巴樹又太多嘅話，個星球就會爆開。

「呢個係紀律嘅問題。」小王子之後同我講。「當朝早清潔完自己之後，就應該好小心咁幫個星球清潔。要定期掹走啲巴歐巴樹嘅幼苗，仲要係喺認到佢唔係玫瑰之後。開頭佢哋嘅幼苗其實都幾難分。係好厭倦嘅工作嚟嘅，不過就好易做。」

有一日，佢建議我要畫啲畫，等唔同嘅畫面可以進入我屋企啲小朋友嘅腦海入面。「如果佢哋有一日去旅行，」佢同我講，「會對佢哋幾有用。有時有啲嘢遲啲先做都冇咩問題。但係，巴歐巴樹呢樣嘢嚟講，遲啲先做就會好大鑊。我知道有個星球，住喺嗰度嗰個人好懶。佢冇理到三棵幼苗……」

根據小王子畀我嘅資料，我畫低咗嗰個星球。我唔係幾中意好似站喺道德高地上面講嘢咁。但係，冇咩人清楚巴歐巴樹有幾危險，呢個風險好大，後果可以好嚴重。只此一次，我破例咁講：「小朋友！小心啲巴歐巴樹！」咁講係爲咗警告我嘅朋友有危險，唔使好似我咁，長時間喺危險嘅邊緣，所以我畀心機畫咗呢幅畫。

我得到嘅教訓都係值得嘅。你可能會問：「點解喺呢本書入面，其他嘅畫 都冇巴歐巴樹幅畫咁壯觀？答案好簡單：我已經盡咗力，但係其他畫真係畫得唔係幾好。當我畫巴歐巴樹嗰陣好緊急嘅思緒影響住我。

6

啊！小王子，我逐少逐少咁，了解到，你呢種憂鬱嘅生活。喺一段好長嘅時間，你嘅娛樂就係觀賞日落。喺第四日嘅朝早，我就知道咗呢樣嘢。你同我講：
「我好中意睇日落㗎。我哋去睇日落吖……」
「但係要等陣……」
「等啲咩啊？」
「等太陽落山囉……」

你初頭好似好驚訝咁，之後你就喺度笑自己。又同我講：
「我成日以爲自己係喺屋企！」

事實上，全世界都知道，美國係中午嘅時候，法國已經係黃昏。一分鐘內飛到去法國嘅話，都仲睇得切日落嘅。不過唔好意思，法國真係好遠。但係如果你喺一個好細嘅星球上面嘅話，只要拉一拉張凳就得。你想睇幾多次黃昏就睇幾多次。

「有一日，我睇咗四十四次日落！」
過咗一陣，你再話：
「你都知㗎啦，當一個人好唔開心嗰陣，就會好中意睇日落。」
「睇咗四十四次日落嗰日，你係咪好唔開心？」
不過小王子冇答到我。

全靠巴打一推我先可以睇到

多謝你成日都幫我推

留名

推