【花開花落自有時】我係窮郵差，專門幫陰陽相隔嘅人送信（DLC）

#376 好似係

絕對不可以相信凍忌廉。

今晚呀
推返你個感情post上水呀拿

「范統」的生存手冊：第一則　千萬別相信凍忌廉的說話。

今晚完呀

文呢

要走的都要離開

今晚係咪會有好多篇 所以完到

絕對不可以相信凍忌廉。

今晚呀
推返你個感情post上水呀拿

即刻幫你推
你出文先

今晚其實係咪完唔到

趁種未出文推番2下先啦

傳說中既文呢？

有了

喺哩個時候，細妹已經不經不覺繞到佢背後，我警覺到，就喺佢郁手嘅同時，我亦撲向阿龍！


「阿龍！」


阿龍冷不防我咁突然嘅偷襲，慌咗手腳，同時細妹趁亂成功救返王胤瀅，佢拖住王胤瀅就走。


「咪走！」阿龍想上前追，我拼命拉住佢衣領，佢反手掙脫，一腳踢向我胃部，我個胃翻滾不己，痛到忍唔住即刻跪低。


好快咁，阿龍已經追上佢兩個，三兩下手勢就制服咗兩個女仔，然後強拉佢哋上一架古老舊式汽車。


「今次就要你兩個重視嘅人都失去埋。」


佢奸笑咁帶住佢哋開車走咗，車嘅身影越嚟越遠。


唔可以⋯⋯唔可以！


我企返起身，已經無理身上嘅傷，爬上我哋嚟嘅時候用嗰架馬車，開車追阿龍佢地。


「唔好走呀！」


我唔知可以去到幾快，淨係不停咁揮鞭，用盡全力咁加速！


馬都用盡全力咁飛奔，成架車快到震到好似就散咁。


終於，我再次見到佢哋架車！

我將馬車靠近啲佢哋，但阿龍將佢哋綁埋一齊，佢哋根本就過唔到嚟。


我無諗太多同後果，駛近佢哋之後，一躍咁跳上佢哋架車頂，竄入車箱。


揸緊車嘅阿龍驚覺嘅時候，我啱啱好將佢哋鬆綁。


「走啦你哋！」我急忙咁話。


「咁你呢？」王胤瀅問。


「我仲有嘢做⋯⋯」我答，然後由袋中拎出一個細細隻嘅米妮公仔畀細妹。


佢只係一臉茫然咁望住我，我話：「算唔住⋯⋯如果將來有機會，我要送返隻大嘅畀妳⋯⋯哩隻⋯⋯當頂住先⋯⋯」


「阿哥⋯⋯」


「走呀無時間啦！妳搵隻黑貓，帶胤瀅返人間呀！走！」我催趕佢哋。


「但⋯⋯」


「走呀！」


佢哋被我逼到往車外一跳，直落喺草地上。


知道佢哋無事之後，我對阿龍講：「你咁鍾意我留喺度嘛。放心！我會陪你留到最後！」


「你想做咩呀？！」


我跨上車前，伸腳擋住阿龍，然後全力踩落油門，架車開始瘋狂加速前進！

「你痴咗線？」


我同佢互搶軚盤，架車曲折迴旋咁走，終於到咗關鍵一刻，我再踩油門，我同阿龍連人帶車猛然咁撞入政府大樓，玻璃漫天而飛，直鏟到巨柱前，強大嘅衝擊力震到我個腦眩暈眼花，幻影不斷。


成架嘅車頭都凹到不堪入目，阿龍喺車入面，頭破血流⋯⋯


我跌跌爬爬咁走出車，車上面嘅汽油正係不斷咁湧流出嚟。


生死簿就係眼前。


「做咩事呀！」


著白色西裝嘅義律由大廳走出嚟，見到成個大樓畀撞得混亂不堪，就憤怒咁問，優雅氣質唔見晒。


「又係你？南門亮？」


我慢慢企穩腳步話：「你知唔知我生平最憎邊種人？就係你哩啲自以為上流但只係用金衣美服包住醜陋嘅自己。」


「你講咩？係咪撞傻咗你？你到底又嚟做咩？」


「我⋯⋯我係嚟還孽。」


佢忍唔住嗤笑。

「點還？我講過啦，哩啲係佢哋嘅命運，係注定咗，係生死簿所定。」


「所謂嘅注定，堂皇冠冕，其實揭穿咗，只不過係你喺簿上所寫，憑咩由你去決定人嘅命運？」


佢微微一笑，無任何否認咁話：「人生就係咁唔公平㗎啦，我係陰間嘅官，自然有權力去決定。唔通你認為人生係自由？我講過啦，好多嘢已經決定咗你嘅一生，包括你嘅家世。」


「的確係唔公平，亦好多嘢都唔到我哋決定⋯⋯但哩樣亦唔係你去決定。」


「咁應該邊個去決定？」


「現在、未來，應該係由自己去創造同決定，無限嘅可能性亦都應該係在乎自已去決定⋯⋯而唔係你嗰本嘢。」


佢聳聳肩，無數嘅守衝緊入嚟。


「李繁生！」我大叫。


「咩嘢呀？」佢問。


「李繁生唔係我救，我無影響過佢，但佢最後都無自殺到，證明你哋唔係操控晒所有嘢㗎！人⋯⋯都可以有佢嘅自由！」


「講得幾好聽呀，」佢嘲笑咁拍手講：「但點都好，你走唔到㗎啦，我放過你咁多次，你都唔識珍惜，係要自掘墳墓⋯⋯今次你死哽。」


守衛正諗住衝過嚟時，卻忽然後退返轉頭。


「唔好諗住捉郵差先生呀！」、「係呀！我哋唔會畀你咁做！」、「郵差哥哥係好人嚟！」


孟太、吳先生、張文生⋯⋯好多其他唔同嘅居民，用身體擋住守衛，將守衛逼返出去。


「受過你恩惠，今日當係還返畀你。」張文生同其他人講。


「多謝⋯⋯多謝你哋⋯⋯」我感動到有啲想喊。


「傻啦。係你幫咗我哋就真。」


居民一個一個攬住守衛，將佢哋拉返出去。

「作反啦！」


「你知唔知⋯⋯我嚟得⋯⋯就從來都無諗過走。」我望住生死簿，慢慢由褲袋拎出⋯⋯


大叔送畀我嘅打火機。

「打火機？」


「遲啲你就會知道㗎啦。不要問，只要信。」佢咁樣同我講。


大叔，我可能而家先明白。


義律見到我手中嘅打火機，面色開始轉白，驚訝咁問：「你想點？」


「如果哩度一切就係因果鎖，咁我嚟⋯⋯就係打破因果。」


「你放低你手上嘅嘢先！」佢急忙叫人嚟捉住我，但已經無人。


我猛然將打火機扔向汽油⋯⋯火迅速咁點燃，烘烘火光如煙花耀目散開，剎那間，撲天紅焰而出紅焰貫通整幢大樓。


閉上眼一刻，腦海全部都係媽咪同細妹。


「對唔住⋯⋯」


原來人生到咗最後，先發覺最重要嘅係乜嘢。


好掛住呼吸嘅空氣⋯⋯好掛住藍天白雲⋯⋯好掛住屋企嘅爭吵聲。


到底我嘅人生係點⋯⋯


可能同好多人一樣⋯⋯


精彩不亮麗，起落是無常。




再見⋯⋯




轟隆！轟隆！

-----------------------------------------------------------------------------







繁忙嘅郵局裡面，娟姐正係忙過唔停咁處理信件，有寄去唔同地方或者外國各地嘅，每一封都代表住一個心意，代表住聯繫。


雖然換咗局長之後，係忙咗好多，但大家都因為郵局正改革緊，服務越嚟越方便市民同商戶，慢慢變得更好更有效率而覺得值得。


咁先真係更近郵局所講嘅口號，傳心意，遞商機㗎嘛。


忽然，一個啤酒肚嘅男人入咗嚟郵局，走到娟姐面前。


娟姐抬頭一望，有啲吃驚咁話：「你放完假啦？」


「放完啦。」大叔話。


「咁你已經知道咗阿亮⋯⋯」


「嗯，當然知道。」大叔講。


「唉⋯⋯」娟姐嘆一嘆氣然後話：「老實講，你係咪一早佢會⋯⋯咁⋯⋯」


「有時有啲嘢，唔係我可以決定⋯⋯但我只能講佢好好，佢做得畀我想像中好。」


娟姐嘅樣又露出愁雲慘霧嘅樣。


「唔洗唔開心啵，睇開啲啦。」大叔講完，由袋裡面拎出一份好簿嘅嘢。


「你幫我送畀嗰個女仔啦，喺阿亮屋企搵到。」


娟姐拎上手，感覺好輕，好似輕到係相咁。


大叔交低完之後，轉身打算就走。

「喂，咁你幾時返嚟呀！」


「拜埋我個女就會返㗎啦。」


「女？」


「長旅行就係搵佢嘛。衰女偷咗人嘢，要佢畀返人。」


「咁佢還返未？」


「已經還返啦。」大叔轉頭，背住揮揮手就話：「記住幫我畀佢呀。」


小巴急速咁移動，陽光穿透玻璃窗，落曬喺座位上同娟姐身上，娟姐望住大橋外嘅碧海籃天，
覺得心曠神怡。


小巴嘅收音機正喺讀出新聞：警方表示，自殺嘅人數統計數字明顯回落，相信自殺潮已經過去，有社會學學者表示，經過今次自殺潮，打破唔少關係上嘅隔膜，人與人之間多咗彼此關心，關心自己家人同朋友，了解到原來一句問候嘅威力都好大。教育局都表示，收到不同團體嘅聲音，了解現有學制對學生嘅壓力，會盡快檢討現有學制同定立標準學時⋯⋯」


娟姐隔離嗰個年輕人，聽歌好大聲，耳機不停漏音，大到佢唔係幾聽到收音機。


本來想話佢⋯⋯但又發現首日文歌幾好聽，雖然聽唔明。


好快咁，佢已經嚟到門前，按下門鐘，但無人應，直到禁多咗幾下，隔離屋先有人開門話：「你搵王小姐呀？佢出咗去呀。」



「出咗去？」

「好似話⋯⋯同人去旅行。」


娟姐遠望住窗外嘅藍天。


藍天白雲下，大叔正喺墳頭為佢嘅女送上鮮花。


「記住呀，唔好再亂嚟啦，唔係妳嘅嘢就唔係妳嘅嘢。」


大叔再擺上另一束花喺隔離嘅墳頭：「如果我哋可以一齊教女，或者就唔會咁多事發生，妳話係咪？」


墳上相片中嘅女生正微笑住，大大字寫住「佟」姓。


大叔嘆一嘆氣，再講：「唯有將來再教啦，係咪呀？老婆。」


「一定係嘅。」


一陣風吹動墳頭嘅花，再遠走離開，吹到遠遠嘅他方，捲走一頂草帽。


「啊！我頂帽呀！」南門澄伸手拎返自己頂帽，

搭住貢多拉小船，穿過嘆息橋，明鏡嘅河水同蔚籃嘅天空互相映照，船緩緩飄過一座座有歷史嘅建築物，古色古香又浪漫。


「嘩⋯⋯好靚呀！果然威尼斯係唔同啲。」南門澄對住哥德式建築風格嘅總督府讚嘆。


「所以啲人叫佢做最美麗嘅人造都市⋯⋯妳知唔知點解點解哩條叫嘆息橋？」王胤瀅問。


「點解？」南門澄搖頭話。

「因為以前啲死囚喺總督府審完之後，就會由總督府經哩條橋去死牢，喺橋上面嘅窗口望最後一眼嘅威尼斯，當然唔捨得咁嘆氣，所以哩條橋就好似人間通去陰間⋯⋯隔絕生死嘅橋咁。」


「嘩⋯⋯咁⋯⋯都唔需要再嘆氣啦。」南門澄語帶含義咁講。


王胤瀅笑一笑話：「都係。」


嚟到總督府唔可以唔參觀入面嘅名畫，包括非常著名嘅Jacopo Comin，被稱為威尼斯畫派「三傑」之一。


慢慢行入總督府，有一種皇室氣派感覺，同時間好似由現代穿越緊返古代咁。


總督宮嘅大議會廳，就收藏咗佢其中一幅最出名嘅畫、亦係世界上最大嘅壁畫之一， 畫高 10 米，寬 25 米，畫咗 700 幾個人物，名叫「天堂」。


「好似好勁好靚⋯⋯但我唔識欣賞⋯⋯」南門澄好快就行開咗，只係王胤瀅一個企喺畫前，一個人望得好投入。


「喂⋯⋯」旁邊突然出現熟悉嘅廣東話喺度傾電話，令王胤瀅唔自覺咁偷聽落去。


「係呀⋯⋯我收到信啦⋯⋯佢話⋯⋯佢會好好咁祝福我⋯⋯我無諗到會收到爸爸嘅祝福㗎。」


傾緊電話嗰女仔，講到喜極而泣，王胤瀅轉頭望一望佢，係一個短頭髮嘅少女，身材線條好好，睇嚟係做開運動。


雖然王胤瀅唔知點解收到爸爸嘅祝福信係一件咁開心嘅事，但見到個女仔嘅快樂樣，佢都會心微笑咗一下。


「走未呀？」直到南門澄喺遠處大叫，王胤瀅先依依不捨咁離開。


「神不守舍咁，又掛住阿哥呀？」

「我諗緊下一站去邊度玩好啫。」


「真係？」佢調皮咁望住王胤瀅講。



「即使見到佢，我都會話我唔掛住佢。」


「哼哼，放心啦，我相信佢一定過得好好。」



出到戶外，南門澄望到個籃海，又好興奮咁衝咗去影相，乜嘢都唔記得晒。


「喂你唔好走太遠呀！」王胤瀅大叫，但南門澄已經跑到唔知去咗邊。


哩個時候，陽光特別耀眼，一陣清風吹爽，忽然有一個人，唔知幾時行到王胤瀅身後，拍一拍佢肩膀。


王胤瀅轉身，只係見一個笑住嘅男人，嗰個人將一封信交畀佢，然後話：「你好，我係嚟自天堂嘅郵差，帶一封信畀人間嘅你。」


「同埋⋯⋯」嗰男人再喺袋入面，拎咗一隻大大嘅米妮公仔出嚟，話：「可唔可以幫我交畀我個妹。」










王胤瀅笑起嚟，笑得好似陽光咁溫暖，眼淚卻唔受控咁流出嚟，然後話：「當然可以⋯⋯郵差先生。」








我唔掛住你呀。

《我係窮郵差，專門幫陰陽相隔嘅親人送信》
全文完

以後多啲返黎亂up
等你

唔知你仲記唔記得由小白開始睇你故既無彎轉呢

咁就完左 好空虛