一向無神論嘅我，竟然落法令男朋友回頭

呢件事應該算係我人生中嘅黑歷史，今日寫出黎當係了一個心結，我4月就結婚喇，從此呢個經歷會埋藏喺我心底，唔會再提起。

我以前以為兩個人相愛到白頭係一件理所當然嘅事，我同未婚夫係大學同學，相愛6年基本上係模範既一對。但係我無諗過原來我最信任嘅人會背叛我，果種痛就好似跌落一個無底深潭。我更加無諗過我會去落佢法，靠鬼神去做佢番黎。確實佢依家同個出面個女人係斷左，對我亦好好，甚至係比以前更好。但係你問我係咪開心，我真係唔知。

回想起過去六年，我只可以話自己太天真太傻，將戒心放到最低，甚至係零。因為我係大頭蝦，我嘅所以密碼都會俾佢知道，相反佢既，我從來都唔過問。佢好好仔，高大細心，事業亦起步中，對我同對我屋企人更加係好好。以前朋友講笑話佢係筍盤，叫我睇緊啲，但係我真係當係講笑，我曾經覺得我地之間嘅感情係無人能夠理解。我地亦答應對方，一世都唔可以去judge對方嘅忠誠。

可惜，一切承諾只係喺當刻有效，所有諾言都會被時間推番。

勁

你落左咩法

其實大家可以當故事聽下就算，每個人緣份深淺唔同，我有效果亦唔等於大家有效果

繼續講，事情發生去年8月，佢係公司既中層，手下黎個兩個fresh grad trainee，一男一女。其實佢異性緣旺我一早知，只係我好信任佢，而果個女仔細佢咁多，我驚都驚佢其他女同事先。

由於果時係佢果行嘅旺季，佢成日OT，不過係成team一齊O。有時我會等佢一齊晚飯，不過好多時都等到變宵夜。漸漸我開始喺佢口中提起呢個小妹妹，原來係我地同一間大學嘅師妹。有時會讚佢好勤力好抵得諗，肯捱肯做，比另外一個trainee男仔好好多。諗番我真係好岸居，果時我竟然仲讚埋一份，叫佢唔好留人做咁夜，始終係女仔，(苦笑)。

而我同呢個女仔係有一面之緣，有次我等男朋友收工，佢同呢個女仔一齊落樓，大家有傾有笑。當男朋友介紹我嘅時候，係用朋友！無錯，佢話約左朋友食飯，即係我。。果時我真係一啲一啲感覺都無，我無諗到原來一切都係有徵兆，原來男人講大話係咁自然。

留名

講下我點發現佢地吧，其實由發現到佢同我講分手，只係十日間嘅事，六年情，真係可以話玩完就玩完。

佢手機嘅密碼我一向知，因為就係我地嘅紀念日。但係果晚食飯，我發現佢密碼改左，比著平時，我可能會直接問，可能真係女人係有直覺既，我睇到新密碼頭三個字，然後默默記住。果晚去左佢度，佢沖涼嘅時候，我開始撞佢蜜碼，撞左三四次，我登入到。我睇佢whatsapp，最頂係一個女仔樣嘅對話，名只有一個單字，係佢女下屬嘅英文名開頭。以前嘅對話記錄全部都del晒，最新嘅只有一句: B, 尋晚你舒服嗎？

我睇到之後眼淚不斷不斷咁流，但係喊唔出聲。我放好佢部電話，坐喺佢張床度，我好想扮無事，但係眼淚係咁流係咁流。

呢個時候佢沖完涼，我努力扮鎮定，但完全鎮定唔到。佢一拍我膊頭，問我咩事，我淨係識對住佢喊，喊到不停震，不停震。。

佢都無我辦法，然後佢睇左一睇自己電話，可能發現左個女仔發俾佢嘅whatsapp變左已讀。然後佢同我講，佢有啲事要處理，不如我走先。

我果刻開始就好後悔，我喊住話我唔走，唔好叫我走，佢淨係話今晚唔適合見面，叫我冷靜，番屋企先。我唔肯走，大叫大喊，問佢點解叫我走，點解要咁對我。。

最後我冷靜左小小，自尊心又作祟，話係你叫我走。。。唉，我一上車又後悔，我text佢，佢無睇亦無覆。。

之後幾日，我嘅心情真係好複雜，我好嬲，無主動搵佢，但亦無再喊，表面好似好冷靜。我以為佢會好快搵番我，但係無。一日又一日咁過，去到第六七日，佢都係無搵我。

好吧，我當自己認輸，我想心平氣和搵佢傾，解決件事。而我亦高估左自己，我以為我一搵佢，佢就會氹番我，好似以前鬧小矛盾咁。。。點知，一切都只係我自己嘅幻想。我扮平常咁問佢做緊咩，佢回左兩個字，番工。我再問忙唔忙呀，食左飯未，唔好餓親，不如今晚見個面？佢亦只回左我一個字，忙。

我開始忍唔住，我喺公司但完全做唔到野，我衝左出公司門口打俾佢，我打俾佢，佢就cut線，我發左癲咁打，打到佢關機。我再打佢公司，迫佢聽電話，佢問我，可唔可以唔好再搵佢。

真係好心痛，我問，究竟係指今日唔好再搵，定以後都唔好再搵。。佢話唔知，叫我唔好迫佢

直至真係分手果一日，我每日都會關心下佢，發我地嘅合照俾佢，希望可以令佢諗起我地之間嘅回憶，但佢一律無回，或者只回emoji。。。

打左兩次分手果日都無啦啦無左。。。講左大家比較有興趣嘅，我嘅做法之路

我一共做左三個師傅，歷時三個月。第一個係泰國阿贊，我飛左去泰國做，對我身體做成反應，但係無效果。第二個係正統道家師傅，我俾錢去天津做左三場和合道場，只可以話個師傅算準左一啲事情嘅發生，但係對關係改善都係無用。最後一個係我快到放棄嘅時候，朋友介紹嘅大陸民間師傅，用嘅係陰法，其實唔係大家想像咁恐怖，到呢一刻我覺得係呢個法幫我做到佢番黎。

其實我知道呢件唔係一件光彩嘅事，有得揀我一定想靠自己去復合，但係當我所有所有努力都盡晒，都一啲用都無嘅時候，呢條路係我最後最後嘅唯一選擇。我講出黎係了自己一個心結，唔係鼓勵大家去做。只係呢個經歷真係好難忘，我亦唔能夠同現實中嘅朋友分享，忍左好耐，想搵個地方宣洩下。

我逐個逐個師傅去講，講下呢條不歸路

首先講下泰國情降，果時覺得人生好無意義，不斷上網搵一啲回心轉意嘅方法，然後就搵到有啲泰國佛牌，例如女大鬼，狐仙果類。但自己又有啲驚，但係真係覺得係最後一步，所以最後都係膽粗粗，去左旺角一間佛牌店。

入到去，成間店密密麻麻好多泰國佛牌，尤其係地下一尊尊五顏六色嘅像，之後問店主係鬼仔，令到我感覺好窒息，有可能係心理作用，但係真係暈暈地。店主係一個中年男人，幾nice，佢聽完我嘅情況，推薦左一個骨灰女靈體俾我，我15 16，但係最後都要左，盛惠8000幾。店主話供白飯，鮮花，化妝品，"姐姐"就會搵我入我男朋友嘅夢，令佢每日都諗起我，唔會再搵小三。

其實俾完錢之後我馬上後悔，因為真係好驚俾屋企人發現，於是我折返佛牌店，同老細講。佢聽完我個情況，話不如我直接個做強力嘅法事，一次見效，之後只要戴住聖物，就可以49日內令男朋友回頭。我問係咩法事，佢話係「情降」，如果係以前嘅我，我一定唔會相信，但係到左果一刻，覺得係一根救命草。

店主問我想唔想親身去，因為果時真係唔想留喺香港，每個地方都有同佢嘅回憶，所以就一口話好。其實回頭諗番自己真係非常大膽，一個女仔跟人地去異地。

最後我碌卡離開，一共30000，自己再另外負擔自己嘅機票。價錢的確係一個十分痴線嘅數子，係我個幾月人工。但係果一日，我俾錢嘅時候係無比無比咁開心，因為我覺得真係幫到我，我每日都想快啲出發，早一日出發，男朋友就早一日番黎。

多謝大家支持 T-T 其實我好多時寫寫下都會喊

講下我去泰國做情降嘅事，果次親身去做嘅得我一個，另外仲有一啲，就係俾材料，然後中介帶過去俾師傅作法嘅。所謂材料，就係頭髮、指甲，或者對方著過嘅衣物。好抱著，我一樣都無。。。好失敗。(為左以防萬一，我復合之後都keep左佢頭髮，唉)

果時我咩材料都無，問師傅點，師傅話我親身去就得，另外要做完之後再供一樣法物，當然，又係錢。

阿師傅叫阿贊x玉，大家上網搵應該好易搵到。佢個壇好多好多像，同埋有好多好亂嘅白線，問翻譯，佢話果啲係做結界用嘅經線。等左一陣，終於到我，師傅示意叫我跪底，低頭。其實成個過程我好辛苦，大約跪左成四個鐘，唔旦止雙腿麻到不得了，個頭好痛，不斷耳鳴，好似飛機降落有氣壓咁，成個頭好漲。

果時我覺得呢種就係所謂嘅有感應，覺得咁樣係好猛好勁，所以我做完之後，即使成身非常唔舒服，但係我都係好開心嘅，因為我覺得自己受少少苦根本唔算咩，佢會番黎一切都係值得。

當然結果係無用，如果唔係我都唔洗之後繼續我艱辛又痛苦嘅和合之路。

不過呢個情降，對我真係做成反應，我可以同大家分享下。做完第一晚，我仲喺泰國，喺酒店訓果晚我就開始發夢，但係夢到嘅唔係我男朋友，而係我初戀男朋友。夢境內容係大概一啲拖下手仔咁。其實我無咩在意，但係好奇怪，到我番左香港，個情況都係咁。個情降話係49內會有效，超過49日就叫失敗。而其中30日以上，我晚晚都發夢，但係問題係，發黎發去都係一啲其他異性，好無厘頭，例如中學同學，中學老師，以前曖昧過嘅男同學等等，但係淨係夢到我男朋友一次！而晚晚都會有啲親熱行為，不過全部都係發乎情 止乎禮果種，即係無上床，但會錫下，擁抱。

我果時精神狀態非常唔好，因為我以前一般好少發夢，依家夢黎夢去又唔係自己男朋友。我問佛牌店，佢都答唔到我，淨係話係好嘅反應，因為法已經喺我身上生效。

要補番講下我地分手嘅事，如果唔係之後嘅事大家會好難理解。但係其實我唔係太想詳細回憶番，因為對我黎講真係太痛。

大概就係佢不停避我，到我去佢公司樓下等佢，要佢講清楚，佢都唔肯落黎。最後我地連一面都無見，佢張所有野都喺一個19分鐘嘅電話入面交待晒。真係唔係好想回憶，大意就係佢厭了，唔想再一齊，佢搵到比我更適合嘅人，希望我放過佢。

咩叫希望我放過佢？其實呢句係令我最難受嘅說話，一開始係佢追求我，6年關係入面我地相處得好和平，我亦好努力做好一個女朋友嘅角色，無數次我地傾起未來，結婚，買樓。但係到今時今日，佢一句叫我放過佢。

講番個情降，我日日好虔誠按聖物，幾乎日日都發怪夢，而師傅分咐，呢49日我係絕對唔可以主動搵對方。我好聽話，每日都好想搵，但每日都忍住，到忍唔住嘅時候，就開whatsapp睇佢online offline，其實佢一到夜晚就會不斷online，我估係同個女仔chat吧，到佢唔online嘅時候，我又會諗，係咪同緊個女仔一齊。

結果，呢49日當然無任何事發生，我好嬲個中介浪費左我49日，因為我每日都係希望滿滿咁醒，好失落咁失眠直至入睡。個老細由一開始話我呢個case好易成功，去到過左一個月之後，話我呢啲情況一般都好難，當初只係幫我試試，問我洗唔洗再請多啲聖物，令佢地快啲分手。之後到到期，佢再張個責任推落我度，話係我唔專心，所以先會夢到其他男人。但我點唔專心？我全副心思都放落呢件事，呢個男人身上，每日都幻想佢番黎嘅情境。我會同佢講，唔緊要，番黎就好。最後佛牌店老細仲勸我搏多次，俾個7折我，即係21000，叫我去做多次！好過分！

有姊妹pm我傾泰國佛牌，我奉勸大家一句，千期唔好！因為真係無用！喺我身上係活生生嘅例子，而且香港好多中介都係食水好深，唔成功只會叫你加錢再做再做！而且，我走上和合之路之後，對呢方面多左了解，明白點解情降對我一啲用都無。因為法不過海，有啲事，泰國嘅鬼神根本管唔到咁遠。

打番呢段經歷出黎其實好奇妙，見證左我從一個無神論嘅人，慢慢變化。當然我係唔鼓勵大家迷信，只係有啲野，原來係真實存在。依家我初一十五都會食素，發誓從此唔再食牛肉，多謝上天俾我嘅一切。

其實我男朋友唔係賤男，如果佢以前係對我唔好我都唔會千方百計想佢回頭，可能每個人都會有迷途嘅時候，只要佢依家好好對我，唔再搞三搞四，我就願意原諒佢。。

---

為左多謝大家嘅支持，我再分享多少少有關情降嘅事，然後先進入我搵第二個師傅嘅故事

其實做左情降係有好多禁忌，唔同師傅唔同人會有少少唔同，但大同小異。首先係唔可以主動聯繫對方，呢個其實我一直諗唔通，但係我第三個師傅都叫我咁做。其實反正我搵佢佢都唔太理我，如果仲可以正常溝通，我仲點會做法，唉。

另外，唔食得生肉，以見血為一個準則，即係食扒都要嗌全熟，唔可以食魚生。仲有一個，我覺得係個泰國佛牌店自己加嘅，就係唔可以問咁多。佢話係犯口戒，會令個情降失效，但係回頭諗，講真我覺得只係一個令我唔好問長問短嘅藉口。。

其他我聽過一啲仲離譜，不過唔係我呢個情降師傅，包括唔可以過橋，連搭車都唔可以。。另外仲有唔可以喺衣架下面經過，唔可以俾人摸頭等等。。

多謝大家咁熱烈嘅討論，回覆，同PM
不過其實我係睇唔晒嘅，如果無覆實在唔好意思，統一講聲sorry

趁依家放break，又講一講，其實大家就當一個愛情故事去睇吧。來來去去相愛都係一見鍾情，日久生情；分離都係因為經了解而分開，由愛生恨，或隨時間變淡；重聚只不過係回到起點，發現最適合自己嘅原來早已出現。世界上嘅情節往往都係重重覆覆，但從來無感同身受呢回事。

確定情降徹底失敗，係因為我見到個女仔喺ig嘅一張相。果一排好興玩Pokemon go，我本身見男朋友Facebook換左張卡比獸頭像，我淨係知佢有玩。但我一直無個女仔嘅資訊，而且因為我send過一封inbox去男朋友facebook之後，我已經俾人block左，睇唔到男朋友同咩人有互動。

果時我地分手嘅事唔係太多人知，得2個好frd嘅大學同學都知，大家都好錯愕。其中一個佢好幫我，當男朋友facebook同ig有咩update，或者有咩人like就會話我知。有日，佢話搵到疑似係個女仔嘅ig，但係加左private，根本睇唔到。皇天不負有心人，我叫一個男仔朋友幫我加，終於睇到。其實都係吃喝玩樂相為主，仲有啲自拍，嗯，眼大大嘅一個女仔。

直至其中有一張，佢用另一部電話影住自己部電話個mon，係玩緊Pokemon go。個背景…係我男朋友屋企嘅一角，背景係影到少少床單同地板。。其實真係到你好熟悉一個人嘅時候，佢家裏嘅一格瓷磚，你都會認得。床單，係灰色間條，係我喺無印買嘅。

然後我又開始後悔，後悔一開始拆穿呢件事，後悔去尋根究底，依家俾我睇到，咁又點？分手嘅痛，被背叛嘅痛，加上做完情降日日帶住希望，然後一剎那落空嘅痛，感覺好窒息，好難過。我會幻想，從前我訓嘅半張床，依家訓喺上面嘅再唔係我，我為佢屋企零食櫃添滿嘅零食，依家係俾第二個女人享用緊，甚至佢地訓醒沖涼，用嘅沐浴露，味道都係我揀嘅。

如果我話一啲恨都無，絕對係呃你嘅。最恨最恨大概係果個時候，終日沉迷神神鬼鬼，個人亦因為個情降變得好神經質，小小事就會喊。

中間我搵到好多算命，都遇到好多奇人同神棍，可以日後慢慢再講，直至我搵到第二個師傅。我係花左唔少錢都無成功，但我完全無怪佢，因為佢幫我解決左情降遺留落黎嘅問題，同埋佢係正統道家法事。黎緊就講我點搵到呢個師傅，同埋喺天津道觀做左三場道場嘅事。

報復啦，你唔係天真到以為乜都唔做佢就會返黎你身邊下，攞啲錢去整容，隆胸乜都好都好過落降頭下哇

有，之後講，因該係好細碎嘅事，幾個巧合串埋一起，好似佢事業上出左小意外，個第三者對佢講大話，我地偶然遇番，到佢媽咪約我…全部野係好巧合。如果係期待好玄巧，好多神神鬼鬼野，是無的。

依家嘅我…整體黎講係知足而幸福嘅。一個男人回頭，無論係自然定法事，其實作為佢伴侶都要有心理準備，我係喺恨同原諒中作出選擇，既然番左黎，我同自己講就唔好再提起，唔好翻舊帳。當然扮無事發生過係無可能，經歷左咁多，我都成長左，唔再係當初嘅小女人

講到點解要搵第二個師傅，其實部分原因係因為泰國情降有手尾，唉，我知道係自作孽，所以我講過經歷出黎，等大家引以為戒，泰國野真係唔好掂，唔好人財兩空，甚至影響埋自己

其實情降失敗後，除左個店主叫我再做我唔肯，我都有嘈佢叫佢加持。就係有一日佢同講加持完之後，我喺香港番番下工，個頭又係好漲痛，開開下會我都要中途出房抖抖。當晚開始就嚴重失眠，係輾轉反側果種，好唔安樂，同之前傷心，喊，掛住果種唔同。結果維持左幾日，我對紅已經佈滿紅絲，同埋左眼咁岩又因為戴con發炎，個樣好似拍劇啲妖精咁。

到左周末，同屋企人飲茶，我媽咪有個朋友外國番黎香港，佢修左佛好多年，佢話因為自己長期唸地藏經，對呢啲事好有感覺。佢見到我，問我係咪出夜街，暗示我身上有野。不過我屋企人喺度，我唔可以講自己去左泰國，屋企仲供左牌，所以我死撐話無事，只係工作忙唔夠訓。事後番屋企，我媽咪話個auntie話我身體有堆影，注意，唔係一個，係一堆。

果時我先意識有問題，於是我問一個學算命學法嘅朋友，見佢facebook成日post呢方面嘅野。當然唔敢講全部，結果佢介紹左第二個師傅，即係喺天津做道場嘅師傅俾我，係正統道家正一派，做左三場法事，其中一場係處理情降嘅手尾。

唉，之後發現，原來果個泰國阿贊放出去嘅鬼仔，根本唔係干擾對方，全部都係干擾我。

其實大家講嘅道理我都明，道理嘛，往往係知易行難。所以我講，人與人之間，永遠無感同身受。你喺我字裏行間感受到我嘅傷感同無助，其實連現實中嘅一半都無。

好多謝大家花時間勸我，但係到左呢刻，我選擇嘅，只會係好好生活落去，好好地珍惜眼前人。如果唔信有鬼神嘅人，何不當呢個帖，睇成一個守得雲開嘅故仔去睇？

同埋年尾我都要OT，有時又同佢一齊唔方便，會儘量抽時間寫完，唔係有心講啲唔講啲

多謝大家咁熱烈嘅討論，回覆，同PM
不過其實我係睇唔晒嘅，如果無覆實在唔好意思，統一講聲sorry