【100%真人真事】我在ASSO被陷害的日子(二)

第三十一章 踢出我天地（二）

其實距離下一場得返一個星期，加上果時臨近mid-term，所以咩重點訓練，其實都係格硬抽一至兩個鐘襯球場未熄燈落去練下傳波、角球、死球處理。由於今次真係全民皆兵，所以要求所有正選後備都要抽時間出黎，講到明一次都唔黎就肯定無得踢。

咁岩丙朗唔係聽日要present就係要midterm，唔係就阿媽生日，終於係踢比賽之前最後一次練波果晚，食完飯再施施然打埋鋪FIFA先落黎踢波。其實我地已經對佢好不滿，因為睇得出佢只係搵藉口唔黎練波。

結果當晚都不出我地所料成場根本無心機，只係不停散步、射波，射走左個波又唔執，點其他人執執，嬲到我地紮紮跳。但係我地都只係敢怒不敢言，佢係個hall屬於老屎忽，雖然話人人平等，但係都唔想特別同佢有咩衝突。

係比賽之前果晚，我地又例牌開左個戰術會議，點知Dickson一黎就話要擺丙朗去後備，要由啊輝頂上。我地一齊用好驚訝既目光望住佢，原因唔係認同佢呢個構思，而係佢咁做無疑同緊丙朗宣戰，好似兜口兜面摑佢一巴再同佢講係呀，我唔妥你阿！吹咩！

講返少少背景資料先，我地呢隊老人院，樂仔、丙朗、Dickson、阿風都已經final year，仲要一齊由year 1一齊住起。只不過樂仔又同丙朗friend底，Dickson又同樂仔不和，阿風就一向中立不問世事。所以今次既戰火係由Dickson大戰樂仔丙朗，可以話新仇舊恨一次過清算。

嘭！
丙朗隨手將手上既水樽掉走，係Dickson身旁飛過，然後撞牆反彈落地。我地果時真係O撚哂嘴、呆若木雞、成班集體hang機。駛唔駛咁大反應先？！
丙朗都知自己太過激動，係Dickson未反應得切，即刻大聲講左句：

「哎喲，掉唔中垃圾桶添！」

我地再望一望個垃圾桶，根本就係丙朗後面，你掉乜撚野唔中啫，點掉都唔會反彈返轉頭架喎。我地當時真係抱住食花生等睇戲既態度，望實Dickson有咩反應，只見佢好淡定企起身，擰轉頭烏低身執返個水樽，以拋物線掉走，繞過丙朗直插入垃圾桶，過程毫不含糊，散發著一種大將之風。

「唔黎練波就天皇老子都無得踢。」Dickson斬釘截鐵咁講。

「我有黎架喎！」丙朗自知理虧只係講出對自己有利既內容。

「算啦，丙朗都FINAL YEAR，唔好獨執著練唔練波啦，佢都係有緊要野先黎唔到姐，咁做對佢好唔公平。」樂仔好無奈咁講。

「咁樣對啲HALL FRESH好公平咩？對唔對得住練齊波既兄弟呀？住足四年踢足四年都要霸住個位？有心唔會黎行行企企啦。」Dickson開始動怒。

「讓返個位出黎啦，無心踢不如算鳩數啦。」柏洋語帶譏諷。

「佢無得踢，我都唔踢喇！」樂仔語氣強硬。

「不如算啦話曬今場丙朗無功都有勞，最多到時佢踢得唔好先換佢走囉！」
阿風希望動之以情。

Dickson無講野，直接轉身返左房，呢場談判睇黎不歡而散。

「咁究竟聽日點啊？邊個做正選先？」我細細聲咁問。

「Dickson唔出聲即係繼續原班人馬囉！」向來沉默既羊仔都忍唔住開口。

「好喇！聽日我地早一個鐘一齊出發，早啲落場熱身，今晚早啲訓喇記得！」
阿風講野總是有大哥哥的風範。

雖然淨係贏左一場，但係第二場已經係準決賽，即係話再贏多場我地就可以入決賽大炒友堂之後捧杯剷草剷走埋粒lin頭。

今次既對手已經唔再係上一場果班粉餅，有一個雲佩斯同埋四個識踢加多兩個exchange，一個踢中場；一個踢keeper。就咁睇牌面已經知道十分難纏，當我地收到風對面keeper既家鄉係祖雲達斯既時候，我地塊面已經綠得鐵青。

今次連作戰會議都可以唔駛開，基本上有咩講得既上一場已經講哂，除左鬧下柏洋唔好再發白日夢之外，都希望大家第一分鐘已經當最後五分鐘咁踢。

係喇！未講點解雲佩斯叫雲佩斯，本身佢係A堂既宿生，但第二年比左B堂既offer佢，咁以佢高超既球技，當然受到B堂既賞識。咁佢都好識做，幫B堂係舊年大炒A堂，仲係A堂啦啦隊面前慶祝歡呼，真係差在無剷落個石屎地到。其實又唔怪得人既，你地無心留，去左人地果度，都無可厚非。但係呢條友真係好勁，除左係Uteam既必然正選之外，當然以前仲代表過唔知港隊U17咁上下啦。所以可以話九死一生，淨低一成唔係佢食物中毒就係我地食物中毒唔駛踢。

今次唔駛等其他隊踢完先到我地，所以一去到已經可以係球場入面熱身，對面既身體質素令我地大吃一驚。除左平均米八左右，特別係兩個鬼佬都好高好大隻，踢中場果個似基奧特，keeper就似迪基亞，啲女女見到佢地真係成口一滴滴。其他人都絕非等閒之輩，全部人都控得幾腳，球感同默契都好唔錯。相比起我地，簡直係相形見拙，平均身高比中場羊仔同丙朗拉低曬，都唔知有無170。左閘柏洋又瘦猛猛成個打撚死你咁。

連上場話較為大隻既前鋒樂仔同中堅Dickson，拍落去都係差一截。話就話足球踢技術既，但係我地連技術都欠奉，唔知係咪見到佢地比對面嚇親，射傳控完全都唔係路，keeper眼見對面下下勁bang，更加失誤頻頻，擘大個口得個窿。

就算我地幾唔想場波來臨都好，球證都照樣開波。今場阿風擔任正選右閘，但睇得出佢仲緊張過上場既我，一直係禁區頂發呆。

喂！咪發夢啦！開始左啦場波！我向場邊方向大聲呼喊。

阿風先如夢初醒咁回神，但對面前鋒已經帶波到佢面前，阿風絕不猶疑地落腳，一腳踢左落個波...同埋落隻腳。對面前鋒立即摸一摸腳眼，露出痛苦的表情。但因為視線問題遮住左球證，因此變成我方的界外球。

好波！靚tackle呀呢球！場邊莊員叫喊道。

一腳踢落去都叫好波？你打開MMA嫁？友堂老鬼不忿反擊。

我地有苦自己知，阿風繼續唔在狀態我地遲早比人吹罰。其他人都打醒十二分精神，但係對面基本功實在太好，好少失誤位同埋好識善用球場上既每一個空間，務求用最少既氣力黎逼我地主動防守。第一個受遭殃既當然係前鋒樂仔，體力同速度一向都係佢既弱點，特別係對面既防守密不透風，應出則出，包位補位都做得毫無破綻，樂仔想撕開佢地防線，自然要走動更多。

而防守方面更是苦不堪言，因為對面鬼佬基奧特實在太大份，係搶點爭身位我地都交比Dickson，後面得返柏洋同阿風，佢地習性係一有波就會推上前，搞到後防極之空虛。

話口未完，基奧特係中場組織攻勢，將波分比雲佩斯，雲佩斯又即刻彈比另一個中場，然後中場控定個波，望住走位既雲佩斯，以一條清脆利落既直線突破左中堅Dickson，左閘柏洋仲未黎得切回防，後面就淨返阿風一個。
當一個前鋒單刀帶波前進既時候，最後一個守衛比龍門既心理壓力更大，一黎你會唔知出唔出腳好，因為一出腳，一係攔截到，一係就比人過。但係唔出腳既話，又好大機會敵方有其他隊友上前接應，呢個時候，阿風選擇出腳防守，我地已經心知不妙，因為佢落腳剷中波既機率一隻手都數得哂。只見雲佩斯連日帶波比佢剷左上天，無誇張，真係成個人比佢炒起左，凌空翻騰一周再落地。

真係全場鴉雀無聲，連球證都愕然左幾秒先識吹，即時拎左張黃牌出黎。其實一對一你咁樣剷起人，比著英超，老早已經紅左你，但鑑於呢類比賽有慣例唔會直紅同埋甚至唔會比紅，所以球證捉走左阿風傾左兩句，內容大致上係同佢講再犯規就要離場，希望比到阻嚇性佢。

鏡頭一轉，雲佩斯係地下典左一陣之後，起身主射罰球，位置大概係禁區對出少少。佢好淡定咁放低左個波，有幾個隊友圍埋一齊幫佢做掩護，但係我地知主射既一定係佢。全場既人都屏聲靜氣等待球證發號施令。

靜到果時聽到場邊有人問：「頭先越位都唔吹？」
又有女觀眾附和：「係囉咁矛架！」
然後細細聲問：「咩係越位呀？」

首先，七人場多數都無越位。第二，千祈唔好嘗試挑戰女人識唔識越位。我問過無數自稱話識越位係咩既女人，得出既結果係都係唔識。自由球都當越位我都聽過。所以當同女人討論到越位呢樣野既時候，大家自己醒水啦。

球證哨子聲響，雲佩斯就以迅雷不及掩耳既速度用腳面大力一射，就如子彈既波剛剛好係人牆之間穿過，因為射得太正，所以龍門都可以即時伸手掂到個波，但奈何呢球重炮射得太應，撲到都照入。

比數1:0，友堂開賽十分鐘已經領先。

呢次應該係我地第一次落後，雖然上半場都未完，話就話仲有得追，但我地已經好似自判死刑咁，一個二個木口木面成個苦瓜乾咁。今次亦都無人再出來安慰大家，只係希望進快搵到進攻板斧。

我地失左一球之後成隊波好似失去左活力咁，慢慢由半守半攻變成全守鐵桶陣，對方踢落左一陣之後，竟然放棄原有打法，係唔知係驚左我地粗野攔截定點，已經好少帶波入禁區，一猜空就起腳。但唔知話係我地負碌定食屎食著豆，對面呢套打法正正就係我地針對過黎研究點樣應付。

對面雖然好識一有空位就起腳，但係好彩我地都唔係省油既燈，對於呢套打法，我地已經練習左無數次。點樣可以係佢起腳之前用身體擋住佢既射波路線，同埋不停練習變速跑同來回跑，都係為左應付呢類無球打法。所以我地士氣雖然係好弱，但係慢慢我地信心又係防守方面建立返，到球證吹半場哨子前，我地依然力保不失，KEEPER今日都好似上左身咁，救完一球又一球，完全無比第一球既氣勢壓倒。

係氣勢慢慢返黎果陣，Dickson係未完半場前已經叫我熱定身，大家係全場緊逼既時候已經開始出現少許疲態，我係下半場既調動應該係戰術上既考慮。下半場我同阿風擊掌互換，如果要講上半場我地係挨打，咁下半場應該就係我地既收成期。因為大家都無乜強力後備，都係繼續原班人馬落場，鬼佬踢左半場好明顯速度已經減慢，雲佩斯反而就無乜大影響。見佢臉不紅，氣不喘，應該以前跟操練落一身好體能，呢個相信都係業餘同職業最大既分別。

我地既節奏已經慢慢開始有互動，唔只係對面一味死攻，前鋒樂仔同中場羊仔都偶爾有一兩球射門，唔算太有威脅，但係已經開始搵到對面既漏洞而唔係好似一開波咁樣滴水不漏。而球霸丙朗亦由半場隱形，開始搵到少少存在感，會拉返後個人接應傳球、搶波，可以減低我地既工作量。就係呢個士氣如虹既時候，中場羊仔假裝傳球，引開對方守衛注意，冷不防射出一記冷箭，球直飛死角。正當我們以為能夠逼和的時候，球的弧度剛巧與門框碰撞。

「嘭！一聲撞柱彈出。」
場外的人都大叫可惜。

「比心機啊！仲有十五分鐘！」場外的人提醒我們。

我知道係時候要發揮我後備上場的作用，要知道剛落場對方因為唔太熟悉你既踢法，所以一般都唔會太過激進，踢落之後會慢慢摸清你既踢法，最常見既例子係發現你係單蹄馬，咁就可以封死你既慣用腳，又例如知你好少會上前進攻，所以會直接走到閘同中堅之間，封鎖傳球路線，咁樣就就確保你唔會進攻之餘，又可以獲得最大效益－－逼你犯錯然後偷波。

而我正正上場後都一直無過半場，一直留係右閘位置，而踢法都非常保守，永遠都不會出腳攔截，以免犯錯或失去重心被輕鬆突破，因此雲佩斯慢慢發現這個現象，就一直企係我同Dickson中間，等我唔可以第一時間點傳給Dickson，要自己帶波進攻。
的確，我既組織能力不及其他隊友，所以一直都沒有刻意帶波上前，但是對面太少看我了，因為雖然我既傳球組織非常一般，但係我一直隱藏住我既變速同突破能力，當大家既注意力都唔係我到既時候，我既速度往往會成為我既殺手鐧。

一球不經意既龍門球，我慢慢走前，雲佩斯同對面中場顯然見唔到我既推進，因為大部份進攻係上半場一直都策動係左閘柏洋既左路，而右路一直都係對方忽略左既地方。龍門見到一條完美既軌跡，便以一記直線球直接傳到我跟前，對面反應也都好快，但係我已經係中場地帶。

我望一望，對面有三個球員在我方後防，中場有兩個，後場只得一個，而我既位置一加速足以令中場望塵莫及，中場羊仔同前鋒樂仔都好快走到入對方心臟地帶，依家既局面係三對一，我地有著極大既優勢，我知道呢球係千載難逢既機會，我都唔敢輕舉妄動。我不斷加速，轉眼間已經黎到禁區頂，中堅亦都顧唔到三個人，只係僅僅守住我既射門路線。眼見中間樂仔同最左邊羊仔已經準備好，我亦都無時間思考，淨係好大聲講左句：

「阿BEN！！！！！」呢個係羊仔既英文名。

樂仔聽到我講呢句，就明白我既意思，我係想對面係唔太認得我地既時候，唔知我呢球會由邊個射。對面龍門迪基亞都毫不猶疑上前封住樂仔，點知樂仔一下跳起避開個波，個波轉眼間已經到左羊仔腳下，羊仔眼見龍門已經失位，輕描淡寫咁用掃把腳將波射入球門。

「Shit！」迪基亞好憤怒咁鬧佢地隊友。

「1:1」場外開始迎來歡呼聲。

樂仔同羊仔即刻走過黎攬住我，樂仔摸一摸我個頭：

「好波啊拉坦！幾驚你走左上黎之後比人反攻。」

「屌鳩你呀！我叫阿KEN，乜春阿BEN！」羊仔笑笑口咁屌我。

「聽得明咪得囉！」我無奈地側一側膊頭。

但係我立即執起個波，跑返中場線，因為我知場波仲未完，我地既野心唔止係和波。

我地越踢越順，之後五分鐘既攻勢都由我地策動，但係都搵唔到再次入球既方程式，對面亦都開始發現我既存在，所以我都逼於無奈繼續龜縮。機會其實真係得一次，所以頭先如果我地無把握好個機會，應該呢場波我地去到完場都唔會有咁好既機會。其實係淨返既十分鐘入面，我地淨係想好好咁守和，因為其實場波真係好惡踢，個基奧特真係無人夠佢撞，一次又一次既強行突破已經令我地無辦法再好穩定咁守住佢。

「非常時期用非常手法」，所以我開始要人唔波，例如佢帶波係我前面我就加速係佢隔離撞開佢搶身位，雖然係好矛，但係真係無辦法，只要唔太過份唔係成部猛牛戰車咁撞埋去。其實呢種推撞未必會吹，但係我已經聽到場邊啲人已經屌到媽媽聲。

「衝鋒廿一啊依家？進清十郎啊？」

「我睇緊Inter－Hall定香港七人欖球賽呀？」

「咁都唔吹，殺人都唔駛坐監啦！」

我懶理一切流言蜚語，我既目標只係要力保不失，如果要做一個君子而令隊友身陷險境，呢個君子真係做唔做都罷。時間隨著我既兇狠攔截一分一秒咁去，對面好明顯對我非常唔耐煩，好幾次甚至想走黎開我波。

最後一分鐘，丙朗無啦啦大嗌：「兄弟，今年我最後一年喇，我地要守好佢呀！」
佢講完已經有少少尷尷尬尬，因為佢知道其實大家都唔係咁鍾意佢。
點知我地一齊同步咁講左句：
「好！！！！！！！！！！」

明明係一件好老土既事，點解我會眼濕濕，我抹一抹眼角既淚珠，希望係餘下既一分鐘可以用盡所有氣力。

「四十五秒！」
雲佩斯企圖係中場突破，但係好快比中場羊仔同丙朗夾擊，好快咁搶走佢個波。

「三十秒！」
基奧特係空中攔到龍門斬出黎既波，但係未落地之前，丙朗、Dickson、柏洋已經封鎖左佢傳球路線，佢無奈地回傳。

「二十秒！」

樂仔係佢回傳既時候用盡吃奶既力氣去追波，成功盜走，但係前場已經無人接應佢，佢一個爆左落底線之後，格硬窄角度射近柱，迪基亞好輕易將波撲去底線。

「角球呀！仲有角球呀！」羊仔又一次鼓舞我地。

同樣地，同上場一樣，羊仔都係負責開角球，大家都走上左前，逼哂係小禁區對出，希望混亂之下可以搶到先機。同上次唔同既係，今次羊仔斬既係一記直線球，佢企圖係禁區內制造混亂。同樣既位置，樂仔又係同一個位置跳起左......

球沒進，迪基亞以異於常人既雙臂一手接實個波，球證亦都緊接其後，鳴笛完場。
球證表示即時進入十二碼時間，再一次擲公字決定射球次序。

同一般射十二碼既比賽差唔多，都係五球以內以入球多寡決勝負，打和就進入黃金入球，自身射入，對方射失的一隊將直接淘汰。

我地既射球次序分別係樂仔＞羊仔＞DIskson＞柏洋＞丙朗＞我＞Keeper

對方既射球次序係雲佩斯＞基奧特＞迪基亞＞其他人

七人場既十二碼其實大概係七碼至九碼咁上下，基本上捉到路都救唔到架啦，只係睇下有無柒頭皮飛機、中柱、射中個龍。

結果係我地隊射先，樂仔好淡定咁一腳抽爆左網仔。
跟住到雲佩斯，佢球波快到我地龍門只係睇住個波入而做唔到任何反應。
之後Dickson、基奧特都係毫無意外咁入波。反而最令我地意外既係，迪基亞會放係第三個射，因為係一場好高風險既博奕，射得入固然信心大增，但係一但射唔入，就會有一種心理壓力。所以好考驗龍門與龍門之間既心理質素。

迪基亞射之前指一指左手邊，即係龍門既右手邊，示意佢會射呢個方向。呢個明顯不過係一個挑釁，睇得出我方龍門唔知迪基亞究竟諗乜。

「唰！係足球掛網既聲音。」

之後既結果都唔需要多講，總之丙朗射埋最後一球之後，對面成個Hall既人都衝左入球場。
睇住對面歡呼慶祝，我都再忍唔住，淚水好唔爭氣咁湧出。

真係好唔甘心...明明只係一步之遙...好似要將成場既委屈都宣洩出黎咁，慢慢一個又一個，都開始破防，成場既男人都係到流馬尿，但係無人會覺得可恥。

收拾心情後，我見到遠處有個人望住我。

係Ella。

我走過去，懶係活潑咁同佢講：「做乜你會黎既？」

「無野做嘛，咪黎望下你踢成點囉！」

「我輸左喇...嗚嗚...」我又再一次攬住佢。

佢無出聲，今次亦都無推開我，每一次最傷心既時候，佢都好似我既支柱，默默支撐住我。

呢個係就係我第一次，亦都係最後一次既Inter－Hall，「人生若無悔，那該多無趣啊。」我地既人生就係由一次又一次既遺憾建構出黎，到依家，我已經忘記左當日既唔甘心，但係我仲記得，當日究竟自己為咩而喊。

第三十二章 祕密天使

「Secret Angel」相信大家都有玩過，個遊戲就係你有一個人要守護，同樣你會被另一個人守護住，通常玩既係一班人，可能係同學、可能係同事、可能係朋友...但今次唔同既係，其實呢個都算係半個緣份遊戲。

因為我地係共同玩一個Instagram，然後互相關心，傾計，點解會玩呢，就係其實HALL果邊會定期搞一啲活動比唔同層、唔同HALL既人，由於我地同第二個HALL傾好左會玩呢個遊戲，所以佢地有幾多人，例如佢地有二十個女仔玩，咁我地亦都要揾返二十個男仔玩。咁起初其實我係唔想玩既，因為大家都無諗過會係呢個遊戲得到啲咩，而我就抱住湊人數同埋撚下人既心態去應戰。

其實首先好簡單，就係我要開一個全新既IG，其實個過程都好簡單，只係登記左個GMAIL，然係再用GMAIL去登記個IG帳戶就得，當然唔好柒到用自己Fackbook connect去登記啦，因為其實個遊戲最好玩既地方就係大家都唔知大家係邊個既時候，果種估估下既心態。不過其實都係唔好擺咁多心機同時間落去啦，因為你係得HALL玩，就預左無祕密，試過有人係IG到示愛然後第二朝個帳號比人公開傳閱恥笑。

所以我當時都係抱住你玩人時人玩你既心態，都唔會投放任何感情落去，咁同樣地，就算係班搞手，都唔會知到底你地邊個打邊個，因為你開左個AC又無記認既，所以只要你一日唔去相認，基本上對方唔會知到底邊個先係你。

仲記得果陣我有同ELLA略略提過下呢個活動，佢都覺得好有趣，仲諗住係自己枝莊玩，不過最後都唔成事，因為其實隻GAME最需要既係絕對既神祕感，同普通Secret angel唔同既係，可能本身你地極有可能完全未見過或者只係萍水相逢。

因為我唔知佢幾時先會收到個AC，所以我都只係一路開住無出POST。直至到大約一個星期左右，佢出左我地之間第一個POST，入面係一張圖，寫住「lets do something wonderful」再加句HI，相信呢個係最普通不過既開場白。

為左試探佢係一個點既人，我貼左一張可口可樂罐既相，不經意地問佢:

「喜歡飲可樂嗎？」

「喜歡！」

「大鑊肥婆先鍾意飲可樂！」

1:0 我先贏一仗

同一天，記得那天是情人節，她又發一個POST問我:

「今天你開心嗎？」附上一張happy valentine's day的黑白照。

「還好吧！那你快樂嗎？」我當時正與室友外出吃飯。

「快樂！」她貼了一張在學校內的相，應該是剛剛下課。

慢慢我們便開始了這種互相調戲的日子，可能我會閒時發貼問她。

「你覺得你既糖分有無呢罐糖咁多？」附上一張糖罐圖。

「咁你又覺得你麻唔麻甩過呢枝麻麻地既麻油？」這次是一枝李錦記芝麻油。

當時只覺得這個女孩子很有趣，每一次都可以完美化解很多刁鑽難堪的問題。

我們會在日常生活見到很多有趣的事就不自覺出POST，有時是故意，有時是碰巧。

有日新地紅豆脆買一送一，我問她:

「有無興趣，我食兩個雪糕，你食兩個批。」沒想過為難她，只不過不喜歡紅豆批而已。

「係咪買外賣比我食先？」她回覆的時候已經好幾個鐘後了。

「係呀，你想食我叫麥麥送囉！」其實只是拋下佢。

「食呀食呀<3」又隔了幾個鐘。

「食屎啦你，天光啦都！」我沒她好氣。

記得元宵的時候，佢又問我：

「食唔食月餅？」圖是一個美心雙黃白蓮蓉。

我屈指一算，屌你老味，農曆八月十五到正月十五足足成五個月。

「可以呀，拎返屋企餵狗。」

「你都有養狗嫁？我都有喎......」佢之後就成日同我講狗經。

但係我想講，我根本無養狗。但係為左唔好破壞佢既雅興，我一路都無講出黎。

佢有時會問我一啲養過狗先識既問題，例如狗唔食得咩，我每次都是靠google大神蒙混過關。

慢慢發現，原來佢都幾有愛心，每個週末回家都是為見隻狗一面。

後尾係越傾越多既時候，我地既話題開始越黎越無厘頭。

「想養隻芝娃娃黎食，有咩要注意？」我在網上找來一幅芝娃娃圖。

「注意安全。」總覺得這句說話很有意思。

總覺得這段時間有一些有趣的事都會分享給她，但是唔開心既時候就會揾ELLA傾訴。

慢慢出現了失衡，原本這些有趣的分享和對話是屬於ELLA的，但現在只剩下負能量，導致大家很耐無展現過笑容，同樣地每當我每一次和她分享那個妹子的有趣貼子時，ELLA好像慢慢沒以前有耐性。

總不能讓一個人無止境分擔你的憂愁吧。這是我後來的體會，終於有一天，ELLA因為一些事，而封鎖我的聯絡方法。叫我一個星期不要找她，我望著螢幕久久不能說話，那天我整晚都沒有出聲，晚上帶著無數個問號入眠。

記得室友問我：「做咩呀拉坦，唔開心咩？」

「諗緊野，唔好嘈住我。」這是一個最差的回應。

之後幾天我都沒有說話，室友都沒有再理會我，我獨自喝酒、吃飯、到外邊走走。就是沒有跟別人相處，訊息也沒有覆，堂也沒有上，每天只是靜靜一個人過著一點枯燥乏味的生活。

為了ELLA，我在那幾天寫了日記，日記的內容如下，但只供會員觀看：

記得那幾天，我的Secret angel都有找我，但我壓根兒沒有心情回覆，後來她也沒有繼續頻繁出POST了，大概以為是我覺得悶了吧。

我一直嘗試過著一些沒有ELLA的生活，其實佢都唔係咁常係我既生活出現，但係自從OCAMP之後，我地一直沒有間斷過聯絡，我不知道，這到底是不習慣，還是不捨得。一個人最無助的時候並不是犯下彌天大錯的時候，而是他根本不知道錯在哪裡的時候。

我嘗試用自以為感動、細膩的語言去打動她，但她沒有理會；到我嘗試用其他途徑去找她，她依然沒有理會；我嘗試去做一些未兌現的諾言，但她不知道。

卒之到了第四個定第五個晚上，她回覆了：覺唔覺幾日過去，我地好似打回原形，無左習慣、無左衝動，好似返到未上莊之前既我地咁。其實我真係好想你自己諗下，你做緊啲咩，你每一個決定我都支持，但係唔好將責任放係我身上。

我應承你！我會...

夠了！第一次聽你講我會信，但唔係兩次、三次、四次！但成日轉個頭就無左回事。她截斷了我的話。

我無言以對，一年下來，都不知有幾多個承諾尚未兌現，說到嘴邊的一句話都吞掉了。

原來女人注意既唔係你講得有幾動聽，而係你講既野有幾多野係真係做到。你既嬉戲之言，可能你自己都唔記得，但係原來一直有人默默記得你同佢承諾過啲咩、對自己承諾過啲咩。

「其實..你有無少少唔捨得？」我鼓起勇氣問。

「你覺得呢？」佢將個波推返比我。

「我..唔知呀..但係我一路覺得我地啲時間係偷返黎，我真係好珍惜好珍惜好唔捨得。」

「唔好咁肉麻得唔得？」

「……」

「今晚收工打比你傾計好無？」

「好掛住你。」

一直都無同佢講，自從佢block左我snapchat之後，我一直都無再用，因為唔容許有人佔據我地既小天地。

記得第一次同佢玩snapchat，我同佢講左句，呢啲app真係女人先會玩，有賓周應該都唔會鍾意玩。豈料，最後沉迷的是我。它與她也成為了我生活的一部分。

有時候，真的搞不清楚自己習慣一個人，還是習慣一個人。這種心靈悸動的感覺，一去難再遇上一次，我希望會再遇到；亦都希望不會再遇到。

果晚傾左啲咩，我已經無咩印象，大概都係閒話家常，今日經理點點點、同事點點點、做野點點點......每一次我都好比心機去聽，每一次都講到唔願收線。

成日話你似一個人，你話你怕我地好似同佢咁失去聯絡，我無語。

「點解果陣你地會唔再聯絡既？」

「因為佢搵到男朋友。」

「咁係你唔搵佢定係佢唔搵你？」

「大家都無搵大家。」

「咁你果陣有無flirt佢？」

「……………」

「咁你會唔會好似filrt佢咁filrt我？」

「唔會。」

「點解？」

「唔知。」

「可唔可以睇相？」

「唔可以。」

「嬲左架啦已經！」

其實玩世界盃又好，心事台又好，我一直都無講，其實你已經超越哂所有人。可能你會話，因為我地係天秤座，所以先咁夾，但我會稱之為緣分。我從來都唔信星座，因為我相信人與人之間係可以互相改變。雖然未必係一件好事，但係我會懷念如此接近。

講返我個Secret angel，自從果次之後，我地都無以前咁熱情，可能佢感覺到我開始唔係咁想玩吧！

「喂！請你飲盒QOO，lift口自已拎！」

「幸福！！！」

「平時你地HALL有咩做架？」

「都係果啲囉，打機打牌做運動傾下計又一日。」

「今日QOO特價，請返你飲！放左係lift口。」

「嘻嘻，多謝！」

到後來開始忙，就越覆越少。

「做緊咩？」

「仲以為你唔玩添！」

「我以為你唔玩咋！」

到差唔多要公佈相認既時候。

「你想唔想相認？」

「無所謂呀！」

「咁我果日唔到架啦！」

「喂啊！乜你咁架！！！」

到左果日，我真係無出去相認，揾左我朋友仔清泉去幫我講聲。
佢返黎既時候拎左盒QOO返黎，我就知佢地見左面了。

「點啊，係咪大肥婆黎架？」

「唔係呀，細細粒幾得意架！」

「哈哈，佢仲有無講咩？」

「有呀！佢以為你係我囉！」

「我仲比左你IG佢添！」

「屌你老母仆街仔！」

其實我係諗住留番個回憶比大家，回憶總是美好的，咁樣白白比佢破壞左。
到依家我都唔知個女仔係邊個，但係係我心目中，佢都係依然係果個好有趣好有趣既女仔。

第三十三章 控制狂

唔知你地有無遇過一個控制狂朋友，其實說穿了呢個人跟本就係病態，唔發作既時候好地地，一發作上黎真係一個痴撚線公司既存在。

呢類人永遠都想掌握曬你既所有野，當你同佢熟少少既時候，例如佢會係咁撩你講心事。

「拉坦，你最近有無唔開心呀？」

「無呀，咩事？」

「我好唔開心啊....琴日呢...」明明好細既事都足夠佢講一個下午。

「咁你呢，你有無野想同我講？」

「無啊！」

「你明明同kay好熟架，不如講多少少佢既祕密比我知啦！」

「唔係咁好既講人啲野......」

「我講咁咁多野比你知，你都收收埋埋，係咪唔當我係朋友......」已經想喊咁口。

「下..真係唔係同佢咁熟咋喎...」

「你呃人，你根本唔當我係朋友.....」個眼眶已經開始紅。

「佢上次去完廁所無洗手。」

「仲有呢？」

「佢仲差我錢未還。」

「仲有呢？」

「無喇！」

「咁佢有無鍾意過啊B？」啊B係佢條仔。

「我點知啊，你唔問佢？」

「哦！仲唔係作賊心虛，係咪啊B叫你瞞住我架！」

「.......」

「嗚...都話佢呃住我架啦....」

「無呀，上次kay話佢地平時連計都唔會傾。」

「係咪架？」佢開始露出滿意既笑容。

其實個答案佢一早就知，我都聽佢問過其他人，但係佢係都唔信，係都要係好多個人既口講出黎先會信，總之佢要控制到塵世間既所有野，包括你同我。

佢平時又會有意無意咁睇你部電話同邊個chat緊啦、同其他人傾緊計既時候又借啲意加把嘴埋黎，最離譜果次都係有一次我同啊B(佢條仔)打緊機既時候，佢見kay無喇喇PM我講心事(莊員)，然後就話不如借部電話比我玩丫，我好悶呀！當時既我當然不虞有詐咁講左個密碼比佢知，後尾先知自己蠢左，自己用touch id幫佢解咪得。

咁初頭都見佢無乜野，都係上下FB，碌下IG咁，正正常常好似無乜事咁，知後就開始黎料。佢問我:
「拉坦，不如我幫你覆KAY啦好無？！」

「下，唔駛啦下話，我陣間自己覆啦！」我答個陣語氣都幾堅定。

「廢時要佢等啦，我都可以答到既呢啲問題！」

果時大概KAY就係問我一啲感情上既煩惱，我望左一眼既時候其實都已經心目中有個答案，殊不知啊B條女竟然走去chok佢做咩事，係咪鍾意左人地男朋友。(我都係後尾先睇返，屌佢老尾，搞到KAY嬲左我一個星期。)咁我打機既時候當然好順理成章咁望下佢做咩啦，好死唔死比我望到佢係到set緊手指膜落我部電話到，我當然無即刻截停佢啦，但大佬，知唔知咩係禮貌，知唔知咩係尊重。

我借得部電話比你用，代表我信任你，但係你走去偷雞摸狗咁做啲唔知乜撚野去激嬲我，最撚嬲就係有啲whatsapp我特登唔讀，佢就幫你禁左入去睇，唔好同我講話你好心幫我清緊啲訊息呀，不過見你係啊B條女，我都算。

後尾我有同返啊B講返呢件事(當然係佢地分左手之後既事啦)，佢同我講我已經唔係第一個受害者，佢話人與人之間最重要係信任，但係偏偏佢條女就做唔到，成日check佢電話，幫佢block人，成日揾陳年舊事黎講，佢仲話佢敢發誓自從同佢拍拖之後，都無主動揾過任何女仔啦。如果因為唔夠安全感而分手，咁其實一開始就唔應該拍拖，因為由第一日開始，你已經知佢係呢種人，佢唔單只為你而改，仲要將大部份既時間比左你，都唔夠，仲要比你不停翻舊帳。我好記得啊B問左我一句:

「拉坦，點樣可以令控制狂收手，我已經無哂私隱。」

「分手囉！」我諗都無諗就咁講。

因為我知道，令控制狂真正收手既最好方法，就係同佢無任何關係，如果唔係佢一日都係咁多疑，一日都係想掌握你既一切。

「我唔想...」

「所以我都係講下姐...」

「唉...」

仲記得佢當時愁眉苦臉既樣，我就知佢地應該行得唔遠。

結果係點？就係啊B被分手囉！無喇喇有一日佢條女暴走，首先係BLOCK哂佢所有聯絡方法，即係電話、Facbook、Snapchat、WhatsApp，淨係BLOCK淨Instagram，日日比佢睇STORY。詳細唔講啦，我節錄少少：

「唔夾就係唔夾，係唔夾就應該分手....」

「我並非衝口而出，趁未有負面回憶，不如早早了斷。」

「和平分手，心好痛...」

我想講啊B完全係被分手，既無做錯事，又無激嬲佢。純粹係條女覺得自己唔係咁了解啊B，覺得啊B好多野瞞住佢、會出軌、會好快飛左佢。其實一切既不安都係源自不信任，有人話「一次不忠，百次不用。」繼我話係女人眼中其係實係，睇你唔順眼已經係不忠。希望巴打又好，絲打又好:「己所不欲，勿施於人。」人同人既相處之道就係，永遠唔好用自己把尺去度人，但係偏偏度漏左自己。

係你懷疑同覺得另一半比唔到安全感你既時候，你又何嘗唔係係佢心目中變成一個好陌生既人呢？控制狂就係一個樣樣野都好想去控制，到頭來先發覺其實所有野都控制唔到。想控制一個人既行為動作舉止生活其實唔難，最難既其實係思想，因為你永遠都唔會有一個讀心器，因為只有你先可以控制到你自己。

第三十四章 小器鬼

大家仲記唔記得踢波個撚人丙朗啊？同Dickson嗌交果個呢？話說我都曾經同佢一組過，當時已經係佢最後一個SEM了，所以佢都帶住打死罷就既心態去讀我同佢一齊修讀既一科。我到果時先發覺，原來一個人可以公私不分，私怨上腦。

其實我都唔係咁想同佢一組架啦，相信佢都係，但無奈唔係個個教授都咁好可以比你自己揀，今次就係透過抽籤將我地拉埋一齊。佢係果種由Year1開始就立定決心要First hon畢業既人，所以一到某啲時間佢永遠都會唔見人，練波唔出席係其中一個例子啦，總之佢係果種自己唔到就理直氣壯，人地唔到就成日有意無意話你兩句咁樣果啲賤種。


話說Inter-Hall之後我同佢係GROUP都有少少爭拗，內容大概係我睇唔過眼佢果種老屎忽心態，即係又係果種永遠把尺唔會度到自己果種人。我都無諗過佢會將呢啲恩怨帶落學業到。首先，我知道佢同我一組既時候，我已經心知不妙，因為以佢咁高既GPA，一定係果種要求好高，非A不取，務求要集合天時地利人和去完成佢呢個一級榮譽畢業既頭銜。

首先佢係好主動咁做哂一個Leader應該要做既野，揀題目啦、開WhatsApp啦、借參考書啦、約教授傾下條題目啦......其實係責任上佢係無可挑剔，但係好明顯佢會因為你激嬲過佢而抹殺你做過既所有野。最簡單既例子就係，佢成日係個GROUP到比說話你聽，即係又話你唔聽書呀，特登拎出黎講呢度可以點樣做好啲！(其實有少少雞蛋挑骨頭)佢想做到既目的就係係其他人面前刻畫你係一個無能力既人，再從而係呢方面拎到佢個人既優越感同埋令到其他人改變對你既睇法。

不過其實我都係相信一句「路遙知馬力」，其實如果透過人地三言兩語就令你形象化左一個人，未免太過主觀，所以後來GROUP MATE都由當初既不信任到後尾都叫做無條件咁撐我，個轉變的確幾感動，因為好似話緊比人聽，其實我都唔係咁差姐。

「喂！拉坦！記住做報告唔好好似你踢波果時咁霸道呀！」呢句係佢同我係組既第一句對話。

「你唔好成日遲到就真！」

「點都好啦，雖然你GPA唔高，不過你唔駛好明嫁，跟住我做就得架啦！」

佢講野真係童叟無欺，句句有骨，真係有邊日你踩中佢條尾呢，佢真係十年未晚總會有機會乘機踩你一腳。

大家分好工啦，佢就會揀左一PART最易做既比自己，然後係大家埋頭苦幹既時候，佢又會TAG你問:

「拉坦，你做唔做得掂呀，如果唔識做可以隨時問喎！」

「哎呀！你呢到唔應該咁做架，個TUTOR上堂果時係咁講，都叫左你上多啲堂架啦！」

啲說話小家到連啲組員都忍唔住私訊問我究竟我地之間係咪有血海深仇。

「無阿，串左佢兩句之嘛！」

「唔講以為你殺左佢全家添！」

「哈哈！」今鋪真係有苦自己知。

最煩係呢種小器種，好鍾意係Peer Evaluation懶係持平咁寫低你，但絕對絕對唔關能力事，因為其實大家都知我雖然唔係CARRY，但都真係做到一個組員應該要做既野，應該出聲既時候出聲，唔應該出聲既時候收聲，基本上其實佢都挑剔唔到我啲咩。大家其實叫做平平安安做完一個報告，最後成績做唔錯，但係做得唔開心囉！為乜姐？你好想係人地面前表現你係一個叻既人，到頭來咪做到犯眾憎，個個聽你講野都當你發嗡瘋。

真心講句，小器既人最好唔好同人合作喇，自己做哂佢問無眼屎乾淨盲囉！廢時你谷住谷住條氣又唔順，仲要無仇報成世人都耿耿於懷顫書果時點樣比人串，點樣比人當狗咁撚。我從來都唔係一個大愛既人，但係我從來都係一個恩怨分明，永遠唔會好似個女人咁將啲野撈埋黎講。希望唔好係職場上聽到丙朗點樣公私不分啦。

都有聽過其他人點樣評價佢，基本上都係得出一個結論—佢係一個好努力既人。上堂會上齊，會jot齊notes，唯獨是group project，唔知佢係力有不逮定係知而不為。佢永遠都會避重就輕揀哂所有輕鬆部分，然後細細聲係背後話你呢樣做得唔好，果樣又做得點衰。

其實可以印證到，球品差，其他野都好唔得去邊，永遠覺得人地欠左你，甚至有種寧你負天下人果種心態。仲記得踢波果時，永遠有攻勢佢都唔會傳，到扭到去死位，先識格硬比返個波你，你拎又死唔拎又死，根本成件事可以做得更加好，佢都知，但係就係永遠覺得咁樣係幫你比著數你，而完全無諗到背後既事。

佢都係一個少數quit左hall之後我唔係咁想見到既人，但係正正因為佢，我先會定時定候問自己，有無做左第二個丙朗，有時留點尊重比別人其實同樣留點尊重比自己。

第三十五章 不同時區

以前中學有個去左英國讀書既朋友，佢既生活永遠比你早七八個鐘，你起身返學，佢差唔多要訓；你夠鐘食晏，佢熟睡中；你放學啦，佢岩岩起身；你食晚飯，佢岩岩食晏；你訓教喇，佢終於放學。任憑你同佢有幾熟都好，時區係一段關係既死症，你地永遠搵唔到一個適合既時間聯絡，慢慢你地個圈子開始唔同，慢慢你地開始搵唔到話題。

而我住hall既第二年，同Ella分別踏入左不同時區。因為住hall乜野時間都會推遲，起身會遲幾個鐘、食早餐會變左食tea、上早堂會變左上下晝堂、夜晚訓教會變成清晨先上床。偏偏佢又要返intern，生活規律到不得了，六點起身，十點要上床。佢一日既開始係我一日既終結，佢一日既終結係我一日既開始，基本上，惶論見面，連傾下計都就唔到大家個時間。

「早晨」

「我差唔多訓喇！」

「好啦，唔好成日咁夜訓。」

「我又比個老屎忽蝦我喇！」她在放飯時的悄悄話。

「下！咩事啊？」收到訊息時太陽差不多落山。

「無野喇。」

「我放工喇！做緊咩？」

「打緊機，陣間覆你！」

「我食完飯喇！做緊咩？」

「就訓喇！早抖！」

「晚安。」

可能你會話，星期六日大家有時間啦掛，但可以話你聽，你絕對想像唔到我地既星期六日可以有幾忙。

「Ella」

「？」

「我地好耐無見喇！」

「係啊Wuwu」

「掛唔掛住我」

「Um…你呢？」

「掛啊！」

「嘻嘻！」

「你都未答我！」

「唔話你知！」

「咁...星期六食個飯好無？」

「星期六要返PT，星期日你得唔得？」

「星期日到我返PT，星期五晚呢？」

「星期五晚我有野做。」

「咁...點算....」

「平日夜晚囉！好無？」

「你得我實得架！就聽晚好無？」

「聽晚約左人...」

「Oh!咁再約？」

「唯有係咁啦。」

由上莊果排差唔多每日都見，到一個星期，兩個星期先見一次，坦白講，個落差真係幾大，要維繫一段關係好難，仲要係一段凋淡緊既關係。其實坦白啲黎講，大家都敵不過時間，時間正在侵蝕我們的一切。

雖然係咁，但係可能好短既一次通話，就已經夠大家互相叉電。平凡是福，你比老細讚我會鄧你開心、同樣地你有唔開心，我又會想聽你訴訴苦，一齊陪你唔開心。

於是我們玩了一個遊戲--為當日的自己評分。係就係好無聊好嬌情但好有用。十分滿分，五分表示當日心情一般般無咩特別。大家一開始都好守規矩每日都打好多野講好多野分享彼此既經歷，之後大家又開始忙又開始hea覆淨係掉低個分就算。多好玩的東西，早晚會放低，做好多野都係，只要你失去左熱情，其實就好難繼續維持落去，唔係唔得既，不過真係堅持堅持幾多錢一茶匙丫！

慢慢我地已經初步有默契大家幾時會唔開心，幾時會好大壓力，基本上已經去到唔需要開口對方已經知，大家都會唔想對方為自己憂心而有些少隱藏，但係每一次都逃唔過對方既法眼。

「Ella，你唔開心咩？」

「無呀，返工有啲攰咋！」

「仲有呢？」

「無喇！」

「一定有，快啲講！」

「岩岩同屋企人嘈左兩句囉！」

有時候其實真係唔太睇得出，但係因為相處得耐左，純粹feel到對方有少少問題，硬係同平時有啲唔同，有啲生硬，有啲唔自然。

「拉坦！你今日做咩唔出聲！」

「我有少少唔舒服。」

「真係無事？」

「無呀，返去食粒藥就得架啦！」

「唔係問你有無病，你真係無野想講？」

「無啊！」

「咁我陪你行返去！」

「……」

「好啦，一路行一路講。」

「都話架啦！」

有時唔知呢啲叫做第六感定係默契，總之係一種長年累月既累積，你會特別敏感於對方既變化，亦都可能係，彼此了解真的太多了，多到連自己都怕。

仲記得那天我們一直吹著海風，互相擦掌取暖，明明可以去一個暖和的地方，但是我說：這裡最有感覺。明明已經冷得牙關在震，但是你說：「啤酒唔凍唔好飲！」每一次我都懶有情調咁播起歌，你總會說：「又黎啦又黎啦！」

你問過我：點解咁鐘意呢首歌，我答不出來，可能它不是最注目的一首歌，但是卻是我最愛的一首歌。

你應該不知道，每次感觸時聽到這首歌，我都會偷偷落淚。

和你也許不會再相擁，大概你的體重，會抱我造夢......

https://www.youtube.com/watch?v=S5gQ32O_6p0

第三十六章 黑獄斷腸歌

如果學校係社會既縮影，咁宿舍就係最體現權力同當權者既地方。首先，其實聽聽埋埋咁多舍堂生活，其實都離唔開有小圈子同埋堆既出現，其實簡單啲黎講，未必係最好玩既一班人話事，但一定係最有Power既人話事，大家概就係我地所講既權力使人腐化，大學生成日話要當家作主，但係又邊個人真係做到一視同仁、人人平等呢？

首先第一個權力結構係黎做junior同senior，junior就屬於第一次住hall既人，而senior就屬於非第一次住hall既人啦，可能係上年住過、可能係前年住過、可能係Hall莊、又可能一層既Hall Tutor。咁佢地之間其實唔應該存在高低之分，其實因為大家都係交咁多Hall Fee、大家拍冷氣都係咁多錢、甚至離開左宿舍就乜野都唔係。但係永遠會有人以老屎忽姿態自居，覺得自己係土皇帝，要高人一等，甚至會用自己既權力去做一啲令人髮指既事。

我自己就好好彩住左去一個好既層，識左一班好既兄弟，但係亦都聽過好多住hall好慘好不愉快既經歷。

啊sam係我組仔，以我觀察佢係一個比較靜同慢熱既人，佢亦係我住hall其中一個遺憾。首先未有層之前其實就已經有組，我地會係Ocamp過左三日兩夜然後等你熟悉同熟習住hall既生活，不過好坦白講有人鐘意玩層、有人鐘意玩組，其實個取態就係你覺得邊邊好玩就投入邊到。而我其實就一般般玩組，因為成件事太假鳩，又要扮熟扮好扮關心，到頭來做埋啲吃力不討好既野組仔女又未必領情，所以我一向都將注意力放係層入面。無他既，一班男人有乜講乜，想做乜就做乜，又唔駛太顧對方感，對我而言係有一種兄弟既情意結係入面。

Sam係一開始既Ocamp入面都同我有講有笑，會主動搵我傾計，問下我有關讀書既野，總之唔係一個奇怪既人啦。但係最不幸既係我地分別係唔同既男層到住，明顯佢既呢種性格同我地層比較夾，但大家都知，宿位就定左，基本上唔會再有改變既空間，除非有人肯同你調房啦，但係我自己就未聽過啦。

有一晚組仔Sam就無喇喇PM我問：

「上黎搵你OK？」

「Sure！」

「飲咩？」

「蜜瓜奶。」

隔左幾分鐘佢就上左黎，一開始都係寒喧幾句閒話家常，但係我其實知佢有少少唔開心，因為佢好少會直接PM你，二來佢臉色都有少少凝重，好似有一萬件心事纏繞住佢咁。佢唔講我都無特別去問，大家都係打下機吹下水咁去到差唔多一兩點。

我忍唔住開聲問佢：

「你有無野想講，無就要落返去架啦！」唔係想逼佢走，係因為果排有樓層之間既比賽，大家之間其實都幾忙下。

「我就係唔想落去。」佢欲言又止。

「點解？玩得唔開心？」我開始追問。

「有少少啦，唔知係咪我果次激嬲左佢地。」佢開始娓娓道來。

話說開sem有一次佢第二朝有野做，所以要早訓覺，佢都已經唔係住頭房，而係住中間位置既房，同層既人係hall tutor間房玩fifa玩得好開心，時不時鳩叫，拍枱同埋歡呼。組仔比佢地一路嘈到四點鐘，終於頂唔順去入去同佢地講：

「唔好意思，可唔可以靜少少？我聽朝有野做。」

我組仔係一個好有禮貌既人，亦都好就得人，相信冰封三尺非一日之寒，原本以為佢同hall tutor講聲，件事就得到解決啦，殊不知呢個先係噩夢既開始......

原來佢講完呢句之後，全場靜左一秒，然後無理佢繼續大吵大鬧，有人仲出到聲話你理鳩得我姐。咁你知群眾既壓力係Hall tutor都控制唔到既，所以件事都只不過係不了了之，你有你投訴，佢有佢繼續嘈。人從來都係欺善怕惡既，試過同樣情況出現係大隻鬼佬EXCHANGE身上，班契弟完全無聲出，靜左幾秒之後即刻曬冧講哂對唔住下次唔會。

從果次之後，SAM就受到層仔既欺凌，例如拎佢條沖涼毛巾當抹地布、成班人打完波唔沖涼直接攤係佢張床到、同埋緊係成日明嘲暗諷咁串佢啦。

例如大家一齊係COMMON裝水飲水，佢地會話:

「行路唔好咁大聲啊，會比人投訴架!」

「我好驚驚啊，唔鐘意咪同舍監講囉!再唔係咪Quit Hall囉!無人逼你住架!」

「咁又係，駁唔到，哈哈!」

組仔SAM都係敢唔開心不敢言，因為佢連憤怒既本錢都無，同埋佢根本唔明，當日一句善意既提醒，會換黎咁嚴重既後果，經此一役之後，基本上成層佢都無哂朋友，本身同佢有兩句既都礙於朋黨既壓力之下，大家都慢慢咁疏遠佢。

佢講完呢件事之後，我先發現原來一切野都過左好幾個月，而佢一路玩組既時候都無好好咁表達出黎，我地都睇唔到佢有啲咩異樣，只係覺得有個組仔突然間好鐘意玩組咁而已。盡為組爸，我坦承同佢講左聲對唔住，因為咁耐都無發現佢一路都唔開心，二黎我立即同佢講:

「Sam仔，不如你今晚開始搬上黎訓啦!」有住過HALL應該知道，二人房中間係可以放多張床。

「唔喇，唔想佢地講太多閒話。」睇得出佢唔想打擾我既生活。

「咁你諗住點啊?!」

「唔知啊，可能佢地過多排就唔會係咁架啦...」

「一係我落去幫你講聲，叫佢地唔好搞你。」

「唔好啦，你咁樣出聲，大家以後仲尷尬。」

經佢多番拒絕之後，我都唔知究竟可以做到啲咩，只能做到既係，將組成為佢既避難所，見佢每一次都好開心咁走，我都無再為意呢件事。

估唔到下一次見佢，會變成一張卡。

「拉坦，我要走喇，因為我發覺住Hall真係唔係咁岩我，可能我係一個內向既人，唔係好識點樣同其他人表達我心入面既感受，同層友係咁，同你都係咁。可能呢個時間走係對大家最好既事，一直都好想體驗下住Hall係點既一回事，我試到啦，好多謝你一直做我既樹窿，一直係背後做我既聆聽者，一路都咁支持我。半年既住宿生涯裡面，坦白講，我最唔捨得係你。我一直係到諗，如果當初你地層收左我，我依家係會點呢?不過講真丫，邊有咁多如果，我唔住Hall都可以返黎REU架可?期待下一次同你既見面。我執走哂啲野架啦，留左少少日用品比你睇下岩唔岩用?我一路都無講係因為唔想你地一齊送我走，我驚走果時我會喊。」

除了後悔，就只有內疚。我望住貼在門上的卡，心中的怒火不斷上揚。

我無直接走落去找佢地悔氣，反而我走左去同我地HT(Hall tutor)講返呢件事，問佢有無機會阻止佢quit hall然後我地層收留佢。點知我去到都未講完，我地HT已經同我講，唔得喇兄弟，佢地一路都有預謀做呢樣野架。

因為除左SEM1可以Return之外，SEM2同樣可以有人返黎，不過要取決於自己層有幾多個位同埋本身個人夠唔夠分返黎，當然有無位係重點啦，層多出既位往往只有SEM 2既exchange少左，或者中途有人退宿。以一般情況黎講，往往都係得2-3個位比人返黎。佢講到呢到，我開始明白，既然Exchange既多少無得控制，咁可以掌握既唯有係本身係呢一層既local。

「佢地一早已經睇準邊啲人要走架啦!不過都要當時人肯自願走先得架。」
原來啊SAM個位一直已經比佢地MARK住左，以前啲人話宿位有價有市，唔通Hall既唔同位置價錢都唔同。果時我都唔信，依家我信了，有人為左宿位竟然可以做出呢種下三流既事，果然SEM2都未開始，佢地啲嫡系子弟就check-in左喇!可憐既啊SAM就成為左呢個唔公平制度下既犧牲品。

亦都聽過其他Hall為左最多人返黎無所不用其極，例如改地址、用啲古怪既原因等自己可以排第二條隊，例如:精神病、家暴、自殺傾向......最撚離譜都係自己開個學會，永久世襲，藉上莊之名黎屈宿分，搞到有人住長洲可以住一年就玩完，有人住學校隔離都可以住足四年。

啊SAM只不過係冰山一角，住Hall真係可以完全滿足一部份人既權力慾，例如有好多老屎忽會鐘意玩階級鬥爭，HT同層仔有條界線，無法僭越;同樣地Returning同Hall fresh一樣都有條鴻溝;當然最大既就係莊員同宿生既關係啦。

有人話過，你既舍堂生活開唔開心，其實在乎於你既HT同埋你既RM。因為佢地基本上直接影響你既活動範圍，所以話其實根本唔會有最好玩既地方，只會有最岩自己既地方。你都唔會無緣無故對一個地方產生感情，只會對一班人產生感情，呢個其實就係所謂既歸屬感。

亦有聽過有啲例子係Returning同freshmen係有尊卑之分:見到面要打招呼啦，要負責出去買日用品啦，當然都唔少得食飯要霸枱，一齊沖涼要讓路。可能你會話，你都戇鳩既，人講你就要做嫁咩，大學生有自由意志架嘛！我唔知係咪大家奴性重定係點，基本上班老屎忽開宗明義同你講不平等條約，大家都係默默接受同埋幾乎唔會有人反抗架喎！

當你接受左一套價值觀或者比一套價值觀影響之後，就算你本身有幾唔認同呢樣野都好，當你成為既得利益者既時候。你受既委屈越多，之後既報仇心態就越重，呢個根本係一個惡性循環。我見過一班HALL莊當試莊既人好似狗咁屌，真係踩到佢地一棟都無，然後仲話呢班垃圾最好唔好上莊，搞撚臭哂成個HALL個朵。

結果人地咪真係受唔住屈辱齊齊QUIT莊，果時現莊先識驚，即刻戴頭盔話其實話你鬧你都係想你進步啫！結果係點？試莊果班人最後尾都肯留低，亦都無留低擊傷你的石頭，從錯誤裡吸收。上莊之後依然下莊照屌，理撚得你。不過唔同既係，當年屌佢地果班現莊，下年一件不留，全部可以返屋企訓覺，無一倖免。明眼人一睇就知係私怨，繼我話，其實係君子報仇，十年未晚就真。

私怨既例子其實比比皆是，正常黎講HALL莊最需要做既野係，比最多既人返黎做Returning，因為保人既位置有限，通常都會用黎保住上莊同埋住得近但係一定要返黎既人。通常既慣例就係咁，而每一年既評分其實都係交由HALL莊(YEAR1)同埋每一層HALL TUTOR(YRAR2-4)去傾，視乎既就係果一年邊一邊牙力夠大，其實就可以取決到第二年有咩人可以返黎。

聽過一個友堂既做法就係，將所有曾經得罪過佢地既人踢走，連朋結黨就少不免架啦，其實要揾個藉口黎憎一個人其實唔難，欲加之罪，何患無辭。如果一個人睇你唔順眼，根本連你呼吸都係罪。

第一個例子:組媽偏心其他組女，所以要KILL走佢。根本呢類人就係心理唔平衡，人地對你好又話人地因為你係HALL莊而刻意對你好、人地對你無咁好，又話人唔鐘意你，偏心呀，乜乜柒柒。呢類真係典型既養狼狗咬心口，個世界唔係圍住你黎轉架，人地為你做左千千萬萬件窩心事，但係只要有一件唔合你心意，就已經可以成為恨你既理由。

第二個例子：情侶唔可以一齊return，所以是但一個返屋企訓啦。呢樣又係一種極之弱智既一個標準，佢地既理由就係一齊return會掛住拍拖影響表現。
首先我想講returning既準則唔係由你地把尺去度人，而係有好多種唔同因素，對學校既貢獻、對宿舍既貢獻、住既遠近、同埋有無一啲過人之處可以對成個舍堂得益，而唔係你講一句我唔鐘意你拍拖就抹殺哂前朝既所有野。我想講，你都係人，你都會拍拖，他朝君體也相同既時候，記住唔好怨。

第三個例子：當returning係工具人，大家有睇踢波果part都知inter-hall係全年比較矚目既一個hall function。基本上每個hall為左贏都會各出奇謀，由打從一開始就搵打波好叻既人。但係有啲hall 就仆街既，獎又要位又要，明明人地夠宿分返黎，上年表現都唔錯，但係竟然sem1比勁低分佢話sem2比佢返黎都未遲，嘩屌你老母都未見話有人咁撚賤打完齋唔要和尚。

你話你唔care啲飛機盃，我唔要你，ok fine咁咪好黎好去，但又唔係喎，你唔係唔重要，不過唔係sem1囉，有人比你更值得sem1返黎。我想講第一，大家返去住係計總分，就算你整低左自己hall既人，競爭既都係咁多個hall既宿生，所以其實係唔存在因爲你返黎而其他人無得返。呢樣野，你知我知，單眼佬都知，佢地只不過係想同你講，唔住咪

唔好住囉！柒頭！sem2要唔要丫，唔要罷就！

第四個例子：自己圍爐小圈子然後就殺哂其他大堆。講真一層咁多人，無理由成班都好close好岩玩既，講真大家有活動既時候當俾面派對出席下咪算。但又唔係架喎！係hall既世界原來就係咁非黑即白，你active，不過我同你唔岩玩，byebye！你串過我，我覺得你性格夾唔到其他人，byebye！
根本呢一種做法就係權力遊戲，我唔鐘意你，你有幾多票，幾有民意授權都好，DQ，byebye！宿舍簡單啲黎講就係做緊同樣既野，只可以講，沒有誰比誰高尚，香港既前途同希望其實就落係呢班人手上，功利社會同你講感情講實力？戇鳩！

基本上我覺得你要去到咁盡唔緊要，但係你始終要知道，凡事太盡，緣份誓必早盡。試過比佢地侮辱過、背後講過、出post鬧我、隔絕我同hall既所有關係，到最後竟然問我會唔會幫手做helper。

係你地立場黎講，多一個朋友不如少一個敵人；對我而言，你唔夠人幫手，關我撚事咩！我就唔想人前聽你唔該前唔該後，人後比你屌到反皮，然後仲要比你當係飛機杯咁用完即棄。

只係可以講，大家都係大學生，好多野合則來不合則分，有啲野唔鐘意唔習慣唔需要刻意配合，做返最舒服既自己，住hall其實都係貪玩姐，與其活係其他人既世界，倒不如襯一年時間認識下自己。

有人話住宿舍係一種舍堂教育，你會學識點樣同戈相處，點樣互相遷就，我諗我咁多年學到既野就係，個世界唔係圍住自己轉架！呢種感悟，就算你讀幾多書，返幾多工都未必體會到的。

第三十七章 恨鐵不成鋼

如果作為一個莊員，我唔係一個稱職既莊員。咁作為一個上莊，我諗我更加係一個失敗既上莊。其實上緊莊同做人上莊都係一件好難既事，處理莊務既時候你會唔識點樣去平衡你既生活、你既學業、你既一切一切。但我都係落左莊先知，原來先係真真正正需要平衡既時候，原來你對一個地方有感情，你係唔會識得點樣去抽離，你會唔知點樣先係對你既下莊最好，最舒服。

要搵一個下莊已經難，近呢幾年大家相信已經發覺周不時會有斷莊、冧莊既情況出現。咁可以同你講，搵一個稱心既下莊係難上加難，又要有心、又要有時間、仲要話頭醒尾有責任心同埋大家可以相處到。個概率肯定係細過你讀左四年大學科科都有人Carry你同埋無人Freeride你。基本上，由Ocamp開始已經開始左呢場欺詐遊戲，你話功利又好、賤格又好，你唔盡早準備只會有兩個情況。
第一：啲高質下莊會比其他Dept/Soc搶走左

個後果就係你搵唔到下莊要做多次莊務，然後下一年你都係要同一時間開始搵下莊，唔係又會比對手既下莊搶走一路無限Loop到你畢業為止。

第二：到最後先搵人你會發現好多人根本無上莊既準備或者根本無得揀

最後揀揀埋埋淨返一堆籮底橙食之無味棄之可惜分分鐘佢仲一野起你飛腳然後你最後都係搵唔到下莊要做多次莊務，然後下一年你都係要同一時間開始搵下莊，唔係又會比對手既下莊搶走一路無限Loop到你畢業為止。

好幸運既係，我有一班好既下莊，我承認我擺係佢地既時間係遠遠長過自己上莊既時間，我都唔知點解，可能自己從來都唔係一個行動派，又或者睇人做野最開心。我仲記得IN莊果排我可以有一本筆記簿去寫低邊個好邊個唔係邊個性格係點邊個能力同特質又係啲咩。

記得聽人講過，湊下莊就好似湊仔咁，心力係無限，但係永遠都唔求有啲咩點報。佢地慢慢就好似仔女大個走有自己生活咁慢慢遠去，又會有自己既家庭。到時真係目送佢地一步步遠去，你亦會漸漸明白不必追既意思，因為你將會連車尾燈都見唔到。

或者可能下莊就係唯一一樣野令你有藉口留低，有人話真正既上莊係兩年，到你下莊都落莊既時候，你就真係要同呢個地方講拜拜了。往事只能懷念，望見下莊係同一個地點做同一樣野，你做既野其實就好似琴日先發生咁，原來咁就一年了，同時你都會發現，當年靠一鼓蠻勁橫衝直撞既你，依家都不復當年勇淨係識講我老喇，咩都玩夠啦。

仲記得ocamp之前成班下莊係到喊住同我地講，真係好辛苦，覺得樣樣野都做唔好，大家又唔係想像中咁夾，同埋為左上莊真為犧牲左好多好多好多野既時候，我承認果一刻真係好心痛佢地。睇住佢地，我再望一望Ella，果日喊到妝都甩哂到依家笑容可掬拍住下莊背脊同佢地講挨過就好既神情。其實真係唔會想像到我地都都有一樣既過去。
我一路都知道，自己對下莊既感情將會止步於佢地搵左下莊既時候，雖然你可能會對所有野都好不滿好唔順眼，但係你始終要接受，自己係時候要退落黎了！

諗返起自己由freshman bb到試莊到上莊到搵下莊再幫下莊搵下莊，個情境依然好新鮮，好似琴日先發生咁，當初有人同我講四年大學將會過得好快好快，我果時都唔信，直至到你收到email通知你幾時要影畢業相既時候，你先發現原來當初好想係大學揚名立萬既你，離開既時候卻係一條腳毛都留不低。

有人會問你都唔知上莊為左乜，又吃力不討好、有咩事又比人屌、又爛gpa、仲要無錢收、寫落CV到就更加WFC啦！其實到依家都好，我都唔知上莊有咩好處，基本上讀大學就係一個又一個選擇，從來唔會有人逼到你做任何野，不過，做咩唔做咩都好，唔好後悔同埋後果自負就得。

你會見有人為左上莊而爛左gpa最後比心quit u。
你會見有人會為左溝女食女最後變過街老鼠聲名狼籍。
你會見有人為左讀書拎first而放棄哂所有ulife。
你會見有人為左將來係呢幾年好好裝備自己。

It’s all about priority. 呢句野係我住hall咁耐聽得最多最密既一句說話。講真果句，你逼唔到人走你自己條路，同樣地人地都唔可以。大個仔大個女，做既每一樣野唔需要再由屋企人幫你決定，無錯係好Free，不過自己承擔返個後果唔該。

落左莊之後，先發現自己原來一直將priority擺係呢到，呢個世界唔會有兩個薩拉坦，如果比我再揀多次，我都係會再揀你地，與其要同其他人比較，不如諗下點樣唔好令自己後悔，上莊真係唔知為乜，但係每日知自己為乜而努力而生存既人，相信會有另一種痛苦！

仲有冇

推下先

留名

強帖留名
利申：asso仔

新post冇文？

皮已正，文呢