【100%真人真事】我在ASSO被陷害的日子(二)

第二十章 吹水大王

相信大家身邊都會有一個吹水大王，記得以前有一個中學同學話自己屋企係福布斯排行榜係有排名嫁，生日佢DADDY會帶佢去小型賽車場到賽車，為左要返學所以先近近地買左學校附近既別墅，仲話咩管理費都貴過你出面租層樓呀。

果時真係會真心膠信佢真係咁有錢，後尾當然得啖笑啦，到依家間唔中都會拎出黎講下抽下水。但你會發覺人越大，吹水既空間越黎越細。周不時都會見到兩登巴打揾啲人出黎鞭屍啦，通常佢地都係想得到既係虛榮心，同埋果種萬人景仰既感覺。

但講還講，唔該你講真啲啦，話說呢個層友H成日話自己打波好叻，足籃排皆精唔入UTEAM係因為無時間練埋啲無謂波，我地當然唔信啦，次次佢講開呢個話題佢都話下次大炒你地班冚家產到時唔好喊。仲話自己其實日日都有練波，不過係朝早果陣練，夜晚就會留時間溫書，所以都好少時間同我地玩。

有一次我地有個大隻仔係走廊拍緊波，聽佢講返當時層友H成隻狗咁衝埋去搶佢波，完全係外行人到不得了。自此之後，個大隻仔就知佢原來一直都係9UP。跟住後來仲有佢話自己踩單車時速100KM，部車幾萬蚊連職業車手都用緊架。當然仲有話佢加入左某某政治團體話比差佬勾線監控住，後尾要退黨保平安。我就知道條友真係幾誇張都講得出口。

不過撇除呢種吹水唔抹嘴既性格，平時佢都幾有我地心既。例如佢會去完旅行買一大堆手信比我地，有時上下連登見到啲丁圖同埋波馬料都會開心share比我地。或者我地有咩需要幫手，佢都會好樂意企出黎，可能見你唔掂會幫你頂酒，平時會幫你做下跑腿。咁點都好過平時講就天下無敵，話咩你今次幫完我下次我會幫你點點點，最後真係有野搵佢幫手就阿媽今晚結婚呢種藉口都講得出果類人。

不過據聞佢都幾鍾意話人廢，踩低人地黎抬高自己果種人。本身佢有個朋友同佢一齊pair up一間房，佢地同一科同本身識既，最後因為成日比佢屌，串下佢gpa低呀，條女好樣衰呀。屌到佢個frd都頂佢唔順不停求人同佢換房，最後當然反目成仇啦。睇住呢種由一入黎有共同願景，去到後來大家炒車。好似好好笑，睇人仆街最開心，但係係我眼中，係一件好可惜既事。

人越大，就越想捉緊以前啲朋友，但係你既圈子只會越黎越窄，以前既同學，摯友都有自己既新生活，要約齊人簡直天荒夜談。日日對住個MON，返工放工，唔知為乜，放假又放得唔開心，成日掛心工作既事。

好想返到果種無憂無慮既時間，但係你發覺自己已經認同左社會既價值，以前睇落好荒謬既大話，依家竟然會變真，我又買左隻錶喇，我架新車靚唔靚呀，供樓好辛苦呀，不過有個自己既空間係開心既。望住自己個肚腩越黎越大，我會寧願返去以前吹下水鬥下波就好開心既時光。

第二十一章 偶像包袱

係大家身邊應該都會有個成世人都揹住偶像包袱既人，但實情根本無人當佢係偶像。大佬呀，你估你係謝霆鋒咩，見到女就chok住個死人樣，木住個嘴係到玩肢體動作，唔講真係以為你痙攣。

呢個層友S就係我想講既大專謝霆鋒，佢會呢頭同你講果條女係死八婆，臭貨，狗也不屌。轉個頭會同佢一齊食飯，一齊會扮狗，同埋會成日係人地個IG留言以為我地睇唔到。

總之佢要日日係唔同人面前扮演唔同既角色，係啲細個佢既人面前就要扮大哥哥好關心佢地呀。係啲同輩面前就要顯示出佢最玩得，最YO既一面，係班女面前又要突出佢既突點，例如會約女食飯之前叫佢地黎球場睇佢打波啦，會成日著走我地啲衫褲鞋襪然後好似潮童咁周圍去啦。

係呀，著完又唔會幫我地洗返直接掉係你張床就算數，好彩佢生得矮，借唔到我好多野去用姐，不過講開又講，佢拎人野係從來都唔會同人講架，你只係會係街撞到佢然後先知佢著住你啲野同條女出街。最仆街既係，唔係佢野，佢求遠唔會同你錫住黎用架，佢會著住你件白色襯衣去打邊爐，會著住你對炒價波鞋落街打波。

我真係心諗，邊有偶像好似佢咁厚顏無恥架。如果有日佢行步路都氣喘，我諗佢連腎都借埋你去用。

最重要都係周圍差人街數但係永遠身光頸靚追牌子然後同你講好慘自己連飯都無錢食喇，你借多五舊比我，我月尾一次過還返比你啦。有時我都唔明雖然我都係果種餐揾餐食旅旅清果種人，但係都唔會去刻意買貴野，追名牌，有錢寧願食好少少，去多一兩次旅行，可能每個人追求既野都唔同啦，我只係覺得，你周身名牌都好，都會比人有一種著龍袍都唔似太子既感覺囉！

我都有一次中伏既經歷，就係佢無啦啦笑淫淫咁走入我房同我傾計喎，我心諗你條仆街仔會有咁好死？初頭都係果啲九唔搭八話就黎Inter-hall喇喎，記住多啲練波，到時齊上齊落。

之後佢就慢慢開始訴苦大會，話自己返工老細拖佢糧，屋企人又每個月比得好少錢佢，所以今個月啲卡數都唔知點算好。

我聽到呢到已經知道佢想問我借錢，但係我無直接回應佢，我咪話，係囉係囉，我今個都好似唔記得有幾多卡數喎，等我睇下先，嘻嘻。然後佢又話其實我可以卡冚卡既，不過要收啲手續費咁囉，我又唔想比，都成舊水架，因為老細就出糧比我......

我果陣真係好想同佢講不如我比一舊水你，你唔好煩住我啦好無。但係我既側隱之心累事，比佢說多兩說，氹多兩氹，終於落左佢搭，問佢你差幾多錢呀。

佢毫不猶疑咁話兩千姐，你借比我先，我下個月月頭即刻比返你，好簡單姐。

大家留意返，果陣時係1月尾，佢應承左話2月頭會還，咁我都信佢，然後比佢一日催兩次之後第二朝就去左禁錢比佢，最後係點？財到光棍手，你仲撚想有？

經過我二萬五千里長征追數之後，過左一年，我終於收返我本金既七成，大概千四蚊左右啦，啲人問我，你明知佢唔會還錢嫁，呢幾個月黎佢又換鞋，又換電話，又換耳筒，根本無諗過一有錢就會找數，點解你當初仲會借比佢。

我其實一早已經知，借錢如送禮，還錢如乞米，只不過我覺得每個人係我心目中都值一個數，一個我自已定既數，講真，我借錢比你，就預左收唔返，其實呢條數就代表我同你既交情，你今次唔還，唔緊要，但係下次我唔會再借比你，我當呢個係我地之間既信用額。

一生人總有一個半個你會值得為佢付出一切既人，如果佢會問你借錢，我諗我會願意同佢做擔保人，同佢一齊承擔起呢個責任，但係往往你珍惜既人都唔會捨得問你借錢，即係坦白講，其實我地之間既信任度好似一張信用卡咁，你每一次準時還錢，我就會係心目中加你分，你每一次拖住條數，我自自然然會將你既信貸評級降低。

簡單啲黎講，唔好我當你兄弟，你當我只係一個幫過你既契弟先得架。

第二十二章 少爺仔


講真呢類少爺仔真係可遇不可求，港孩就聽得多，廿鳩幾歲既港孩真係第一次見。雖則佢唔係啲咩大奸大惡既人，但係亦都無阻我地之間對佢既憤怒。

首先，我真係想講同佢一齊住真係慘過食兩舊屎，好似乜都要衣來張手，飯來張開咁。無廁紙佢從來都唔會換嫁，用哂啲沐浴露咁我地就習慣左可能四個人用一個廁所，可能大家一人買一次咁樣，佢就覺得咁樣有問題，總之佢買果次就要收返齊大家啲錢，我地覺得咁樣好麻煩，因為一人買一次咪得囉，次次買完又要收錢真係自己揾自己搞。

佢亦都因為呢件收唔返每人幾蚊既事，有一次大家一齊食完飯，佢好小心翼翼又帶點口疾疾咁公開拎出黎同全層講，希望大家可以為佢討回公道。但係最後當然比人強力恥笑啦，話咩你唔好咁小氣啦，幾蚊都要計住，咁我用多左格廁紙下次夾錢係咪又要夾多幾毫呀？

佢聽完咩都無講，只係嬲爆爆咁走左，我唔知係佢覺得係我地咁樣笑鳩佢唔岩丫，定係覺得我地有心逼害佢，想屈佢錢。

又有一次，我地有人係出面返黎，順便問下有無人食麥當奴啦，咁就有個留名list，咁少爺仔就留左麥樂雞+豬柳強，初頭大家都無為意啦，心諗唔會有人咁戇鳩單買麥樂雞掛，所以就幫佢買左個麥樂雞餐+單買豬柳強返黎。咁大家食完之後就逐個逐個收錢，咁佢個餐就係廿三蚊+十蚊總共三十三蚊啦(當時未加價)。佢突然就話，下我無叫餐喎，我唔會比餐錢架，薯條同汽水都仲係度，你收返我單價就得。

我地真係聽到O哂嘴，一黎先唔講你有無講清楚係咪單買先啦，二黎人地好心幫你買野，你仲要為個幾蚊要人貼錢出黎，你好唔好意思呀。第三，就算人地真係買錯，你都唔會咁樣拎出黎講下話，仲要好似益左我地咁話收返單價就得架啦。
我聽到果時真係把鬼火起，如果個餐未食佢咁講，我一定會同佢講無買你個餐喎，自己出去買啦。

到後來，無人再同佢買麥當奴，佢又會好騎呢咁打比你，同你講話「咦！拉坦你係咪係麥當奴買緊外賣呀？可唔可以幫我去隔離茶餐廳幫我買個飯呀，你去到影張餐牌比我睇下我再同你講我食咩丫唔該。

我想講，我唔會咁撚蠢同你特登行去第二間鋪仲要等埋你揀食咩之後等個飯慢慢出黎我先走得。仲要屌你老母隔離係隔兩條街呀，陣間返到黎你先同我講話明明飲熱奶茶我叫左凍奶茶要比返三蚊你我咪自己捉蟲。所以我明明買緊都即刻同佢講話，下，我走左啦喎，你要食你自己出黎買啦。

同埋唔該唔係大哂架，你要食宵夜，可唔可以唔好咁麻煩，我地無賺你錢嫁，屌！！！！！！！！！！！！！！

我地每星期都會有清潔姐姐黎幫我你倒下垃圾，還原下廁所咁樣。我同我roommate每一次都會發現每逢星期四姐姐清潔完之後都會有屎漬，好似車胎痕咁留係到一個星期，仲要係沖極都唔走，姐姐每星期幫我地清完之後我地都未用過個廁所有會自自然然出現番。因為我同roommate都否應左呢件事，所以矛頭就自然指向隔離房兩個人，其實我地心目中都有答案又係少爺仔架啦，但係我地為免冤枉好人，所以都循例係個GROUP到問下，內容大概係：

「邊個次次去完廁所唔清返自己啲屎漬，無理由要我地幫你地清下話，無人話想日日去廁所就對住你地啲屎嫁，拿下次去完自己清返啦。」

而少爺仔個roommate都好有默契咁即刻出黎話，唔係我，我每次都有清返嫁。

咁我見佢已讀不回，應該都知我地講乜架啦，但係點知下個星期同一時間又會出現果條賽車跑道。有一次我真係頂唔順，走過去同佢講，喂！下次你清返啲屎漬啦，好撚核突呀。

「咩呀，乜姐姐唔係會黎清架咩？」
「係呀，但係佢一個星期先黎一次，咁你要人次次都清啲屬於你既野，你都會唔好意思啦，同埋我地真係唔想每次去廁所都要對住你啲屎呀。」
我發誓我果陣真係好心平氣和咁佢講，點知換黎既反應係

「好呀，我會清...但唔係今日囉」
佢講呢句野既時候冷靜到連我都嚇親。
但我發現已經同佢溝通唔到，所以由得佢點就點啦。

到後尾聽返人講，佢同人講係因為之前我地唔清理，所以都覺得自己無責任要去清。我真係屌左出聲，佢根本係果種淨係會顧自己感受而將人地感受擺到最後既人，永遠唔會諗其他人架，仲好意思周圍同人講自己就得人，真係得啖笑。

有時一班人會好興一齊煮飯食，咁你知兩三個人煮都還好，如果煮八至十人份量咁煮果個班人就會好辛苦，所以多數我地都會將啲責任分工，例如兩個買餸、兩個切野準備材料、兩個煮飯最後兩個洗碗。

咁呢個少爺仔呢就出哂名人地煮好最尾就拎個碗出黎收割成果，咁大圍已經屌哂鬼，話下次唔留夠名唔幫手就一定無得食。之後又有一次一齊煮飯食啦，見佢留左名架啦，但係就唔留自己會做咩，之前試過比佢洗碗點知洗到啲碗仲係油既同埋會特登留一堆碗唔洗要人執佢手尾。
當時佢既回應係:「咁多碗點洗呀，你地又唔幫我手。」

我想講果陣已經有三個人一齊洗碗，大家分好工之後分開洗，人地洗撚完，你就拎緊隻碗係到雕花，咁人地緊係話我洗完自己果份所以走先架啦，唔通等你洗埋碗切埋生果比你食完先返房咩。

咁今次亦都唔例外，佢就話唔得閒出現買野，咁佢又唔識煮飯，又唔識切野，洗碗就唔好再搞佢啦，我地都無佢辦法。點知有人發現佢係自己房鎖門打牌都唔出去買野，我地真係嬲到仆街，走入去問佢做咩明明有時間都唔幫手買野。

佢好撚串咁講:「反正我贏錢，我夾多啲囉最多。」

真係一句激嬲哂全世界，自始之後，以後煮飯都唔會有人預佢，有時見佢自己買個雙餸飯返黎食得幾可憐都好都唔會有人再心軟話你下次同我地一齊煮啦。之後佢會柒到見人煮野食就即刻拎對筷子衝出去望下人地煮咩，但係又唔敢開聲，擺對手係後面唔比我地見到對筷子，一有人問佢食唔食，佢就拿拿聲話好呀然後一對筷子叉落去睇到我地眼都突埋。

仲記得最後一晚我地大家坐係common傾計，我終於忍唔住開火鬧佢，講哂佢一路以黎令我地不滿既事出黎，佢聽到好似中左風咁呆左係到木無表情，見佢頭dupdup想喊想喊咁諗左好耐，我地都澄清返其實都係想佢好，因為唔同我地相處都好，之後點都會同其他人相處，咁樣真係唔係路。點知佢神情閃縮咁講左一句:

「其實你地講咁多野我都唔覺我自己有錯，不過我會接受你地意見既。」

跟住就開始一輪嘴咁講究竟佢對我地成班人有咩不滿。又講埋哂啲九唔搭八既歪理，咩佢覺得拍過佢屎忽先真正當佢係兄弟，無拍果啲就成日好似玩鳩佢咁，唔當佢係兄弟。

我要係到澄清，佢所講既拍屎忽純粹係一個動作，無特別意思嫁。


聽到一半有啲火爆既層友開似受唔住剌激屌鳩佢，點解一件事好冷靜咁同佢分析，佢都可以講到仲係我地錯咁，直程有人話:「讀咩書呀你，讀屎片啦去，唔駛聽人講野架。」後尾佢一路喊一路跑左返房，無再出黎。

到走左之後，見到佢IG POST左一段多謝一年以黎，組帶比佢既所有野，但係就隻字不提我地層。我地就知，到最後佢根本無反省過，希望大家出到黎社會唔好遇到佢啦。

第二十三章 青頭仔

講真住到hall或多或少都會比果種謠言吸引住，話咩好容易出pool，好容易食到女，其實實情大把人住左幾年連波皮都未掂過，今次想講既青頭仔可以話係一個精蟲上腦既未來死雞蟲。一黎次次人地講扑野佢就會好興奮，但係完全係果種有色心無色膽果類人，即係條女講到明話比你屌，佢都要嫌呢嫌路叫人驗左身先好同佢扑野果種人。所以話其實做足二十幾年青頭仔唔係無原因既，主要都係性格異常古怪搞到人見人怕果種典型毒撚囉。
利申:青頭毒撚

我地就一早知道青頭仔恨拍拖恨到出哂面架啦，話說佢係ocamp果陣已經係咁同人對啲女評頭品足，又話呢個無波，果個樣衰，搞到成組已經唔係咁鍾意佢。可能同其他組玩game果陣有身體接觸就會欲拒還迎咁出去，玩完又會笑得好賤咁走番黎話邊個邊個好正。見到啲女可能大波少少或者就會眼金金咁望住人，慌死當人地唔知咁。

雖然佢份人係咁咸濕，但係佢既道德標準又會同連登仔一樣咁高，條女有樣有身材有腳好性格有錢就不在話下啦，仲要拍拖就要屌人，結婚就要要求另一半係處喎。邊有咁多處呀講真，有咁既條件仲要係處，仲要比你屌，不如諗下點樣六合彩一注中仲好啦。


有時佢都會有意無意咁開心share下一啲野出黎想我地葡萄下，例如話約食飯佢會無啦啦同你講果日唔得，約左人去睇戲。問佢係咪女仔，佢就會話係，不過就會FF咁講話條女好似對佢有意思，但係佢唔鍾意條女，叫我地唔好諗咁多，其實我地只不過係咁橋問下姐，你唔駛講啲我地唔想知既野出黎架喎。但係睇完戲返黎佢又會同我地講，條女到底係咪鍾意佢，佢地有無機會發展呢，其實無拖拍當佢係水泡都唔錯既其實。真係學農夫話齋，唔係有心就唔好溝人啦。到後尾，佢又會死死氣咁同我地講返話原來條女前排同佢嗌交先揾佢睇戲喎。

後尾佢又會好熱衷一啲同其他層一齊玩既活動，仲會做埋搞手。其他搞手呢，就會做OC唔會落場玩既，係得佢一個咁厚面皮設計啲淫GAME比自己玩既姐，仲要分哂啲靚女比自己。好彩大家都係抱著撐場既心態去支持下自己友，根本唔係諗咩溝唔溝到女。佢總共搞左四五次聯層活動，幾次都差啲出事，搞到啲女都會同佢保持五秒距離，明明隻GAME就要拖住手玩既，條女就玩彈開老遠睇其他人玩完全唔理佢。

有一次仲撚癲，佢完左之後，問條女拎電話，話想更加了解佢，條女唔理佢，話有咩咪呢到講。人地都表到明連朋友都唔想同你交呀。點知佢唔服氣，第二日，直接踩上條女間房，鎖埋門，問佢可唔可以比個電話話佢，痴撚線呢單野搞到全世界都知，差啲搞到報警收場。


有時我地會一大班人係common到飲酒，有一次佢飲飲下酒無啦啦喊，話點解自己拍過兩次拖都無扑過野，但係呀邊個邊個拍左一次拖就走青，明明自己邊分別都好過佢。我地真係百思不得其解，人地拍拖有無屌過閪關你屌事咩，就算真係有呀，都唔輪到你係到指指點點啦。從此之後，我地每次飲酒都好鍾意灌醉佢，次次都有好多野睇。

第一次，佢飲醉酒我地叫佢鼓起勇氣表白，佢比我地氹左兩氹之後真係搭lift上去揾佢話好正果個女仔，然後敲門同佢講，我覺得你好可愛，可摸以同我影張相。個女仔講完句多謝之後即刻關左門仲要卡左一聲。仲要拍哂片，個情況係尷尬到無得再尷尬。到後尾佢酒醒左之後，即刻寫左封道歉信貼左係人地門口，不過比我地發現得早，拎左黎影印周圍貼。

第二次，又係佢飲醉酒之後，我地問佢做乜拍過拖都無扑過野，佢就咦咦哦哦話咩個女仔呀媽好煩，成日出街都要跟埋一齊出，總之唔比獨處空間比佢地。仲話都好後悔有一次佢呀媽去旅行無霸王硬上弓條女。

跟住我地開始水鳩佢，話拿青頭仔你溝女係為左啲咩先？最後你都係想扑野姐，不如正正經經去老處餵雞。佢就話其實都有諗過揾啲PTGF，不過太貴所以最後放棄，之後我地啲人開始大鳩佢，唔駛揾援交啦，直接去叫雞。一場兄弟，我地夾埋錢比你又點話姐，跟住真係有人拎左一舊水出黎，最後夾夾埋埋大家籌左八舊水。佢面帶猶疑，欲言又止咁同我地講，八百蚊一隻雞，好似好污糟......

「屌，啲雞乾淨過你阿媽呀！」
「係咪玩鳩我地呀，又話想破處又笠水。」
有條友直接掉左張提款卡出黎話，屌你老母唔好煩，你想要幾錢自己攞，條件係我地要睇住你入房。
之後佢好似抵受唔住壓力咁標童上身不停DUM地話「唔好逼我叫雞！唔好逼我叫雞！」，然後自己隊自己飲酒，最後嘔左幾袋之後我地無癮就收左皮嚕。

第三次，應該係最好笑果次，因為佢酒量唔好，其實飲一兩罐就醉，加上佢果日唔知點解玩酒GAME係咁串柒柒話我地，我地真係火都起。話說隻酒GAME我唔記得左叫咩名啦，類似射龍門咁玩啦。總之係啤牌到抽一隻牌出黎先(假設係8)，然後就由第一個開始抽，你可以揀大過8或者細過8，咁如果講唔中就要飲啦，講得中，你就可以選擇加酒或者pass。

咁可能有人會問，如果岩岩好撞中8呢？咁就叫做撞柱，要罰飲枱面所有酒既double。咁青頭仔飲左兩杯之後已經面紅紅有少少神智不清，就開始亂咁屌人，例如人地咁岩撞柱佢就會話，飲啦柒頭。咁岩我係佢上家，換言之我pass完之後就會到佢，我地就夾計撚鳩佢。大家都好有共識唔加酒直接pass，然後到我，我就不停加酒，加到枱面有半打酒左右啦，就揾人換兩隻一樣既牌去面頭，等我PASS完之後佢就即刻撞機。如是者，飲左幾round之後佢不勝酒力，同我地道歉話:
「今日小弟有咩失言，對唔治，我平時唔係咁架，還望大家高抬貴手，放小弟一條生路。」
之後飲完酒之後襯佢仲high high地，

有條友就同佢講話:「青頭仔，我地仲係咪兄弟先？」
「緊係，做咩先。」
「咁你覺得做兄弟最緊要係咩先？」
「義字當頭，忠義一十四，咁先叫兄弟！」
「錯喇，有無聽過君子坦蕩蕩，小人長戚戚。」
「有掛，做咩先？」佢果時已經飲到懵左。
「除褲囉，你除褲你先係兄弟。」跟手已經除左條褲。
「下......你痴撚線嫁...吼我飲醉酒...」佢講野已經開始lur埋一舊唔知佢講乜。
跟住已經有幾條友走左上前除褲
「開黎見我呀，又話兄弟。」
「平時又牙斬斬話有難同當，叫你除條褲啫，又唔係叫你比條女我地玩。」
其他人不停係到叫囂。
最後佢都係抵受唔住群眾壓力而除褲，後尾我地睇返條片真係笑到仆街。
所以後來見到最高學府玩賓周，我地都無太過訝異，只係聽到青頭仔默默講左句
「比著我，一定咬佢條賓周落黎。」
我地成班人一齊望住佢，硬係覺得佢唔抵得人地碌野長。
其實好撚短。

最近好似聽到佢終於識到個女朋友喇，我地緊係出黎食飯果時盤佢啦，
「嘩屌！你咁撚痴線都溝到女既，條女弱視定弱智先。」
「屌左未！屌左未！屌左未！！！」
「天地有正氣，有無拎條正氣比條女睇先。」

淨係見佢嘴角含春，含羞答答咁同我地講：
「我地真愛黎嫁，追左佢好幾個月先追到。佢信基督教架，應該唔會婚前性行為。」

「唔係下話，咁你都信，我表妹升中一都破左處啦。佢夠讀耶撚學校，夠話歡恩心裡感謝神啦，傻鳩！」

「以前你明明話如果識到條女一定當佢肉便器除左食飯訓覺之外就要扑野架喎！」

「你係咪扯左廿幾年旗，依家先用唔到呀。」

「一場兄弟，有咩要幫手，實幫你架，不過阿嫂靚唔靚先」

佢既無奈又笑笑口咁同我地講：「真架，唔駛擔心我，我地puppy love好純潔架>_<」

「同埋依家先發覺，以前谷精上腦，想拍拖都係想試下扑野。依家先發覺原來果種心靈上既滿足係大過你本身有既慾望，愛情真係好偉大。」

見佢越講越唔對路，我終於知道原來愛情既魔力可以咁大，可以將一個潛在強姦犯變成一個溫馴小羊。成餐飯都好驚佢講講下野會變左傳福音同我地講上帝大能過馬路衝紅燈會落地獄。
不過大家都鄧佢開心既，話哂久旱逢甘露，見到佢個人有活力左，大隻左，考試仲一百分。

雖然佢都仲係青頭仔(自稱)，相信第時佢結婚生仔請我地飲果時，我地都依然會叫佢做青頭仔。就好似自己係每一個群組都有特別既稱呼咁。屋企會叫你做啊B，朋友會改你花名，中學同學會叫你中文名，同事會叫你英文名，無論你以前幾唔鍾意呢個名都好，相信到依家你聽返，都會有少少懷念，有少少不捨。

第二十四章 暗湧

時間又要講返轉頭，大約係岩岩開學無耐，我就已經開始要兩邊走黎走去。雖然住HALL係好熱血好青春好開心，但同樣地上莊對我黎講慢慢都變成一種責任，我希望每一次有活動我都可以出現，特別係我覺我我愧對我莊員既時候。往往會令我陷入兩難，究竟去HALL既活動好，定枝莊搞既活動好，因為通常為左就返要返學既同學仔，所以每次都會係星期五晚搞，咁當然炒哂車撞到冚一冚啦。

每一次陷入兩難既時候，我都會問一問ELLA，究竟去邊邊好。但其實本身自己有答案，只不過想揾個人分擔下，想揾個人呻下，因為其實長期兩邊走都好大壓力，每一次都唔想miss左，但無奈每一次都要miss，或者要各走半場，所以最長記錄都有成一個月無返過屋企。

當有壓力既時候，酒精往往係逃避既最好方法。果段時期我真係日日飲，飲到成身酒氣一攤落床就即刻訓著第二日又要好早起身上堂落堂又要處理下啲莊務，哇原來又過左尾班車，不如飲罐酒坐陣搭的士走啦。如是者，我慢慢開始精神崩緊，每日都好緊張點樣平衡所有野。

但慢慢你會發覺其實一切都係出於時間唔夠用既時候，你就知其實根本係一個死結，過左一年之後你會知自己其實輕鬆哂，但係偏偏會所有野一齊揾你，煩你，騷擾你。個道理其實同你SEM頭無野做，但係會發現啲deadline會一次過走哂出黎。會逼到你抖唔到氣，好似比人壓住個心口咁，好辛苦，好大壓力。

呢個時候ELLA就好似我既避風港咁，我唔開心既時候佢會陪我傾電話，但係佢唔開心既時候甚少會同你講，可能仲會收收埋埋唔會同人講。係我最迷惘既時候佢會陪我坐，比意見我，會同我分析好多好多利弊，亦都會鬧我，係我最不知所謂既時候佢都唔會留情地狠狠咁鬧你一餐。漸漸我會發覺原來我既生活依賴左佢，開心唔開心，有趣無趣，都會第一時間同佢分享，好似佢成為左自己生活既一部分咁。

仲記得我地第一次去老地方，果日你好唔開心，好大壓力，我唔識點安慰你，亦都唔知有咩方法可以幫到你。於是我盤算左呢個地方，算係城市入面一個隱蔽既地方。用而家既說法，呢個地方好CHILL，用以前既說法，呢個地方好隱世邪惡差在未拉絲。係現實中我係一個不折不扣既路痴，每一次都會帶錯路，行錯路。你笑過我話我人生行左好多冤枉路。

你著住套SUIT，踩住對高跟鞋，滴答滴答咁行上條樓梯，一邊問到未呀究竟你要帶我去邊呀，一邊又話，你肯定又行錯路啦。好小心翼翼咁扶住我手臂，面有難色但係都無抱怨咁跟住我行。無錯我又行錯路，就係咁誤打誤撞，我地揾到呢個地方，可以比我地訓係到，靜靜望住棵樹郁下搖下。聽住風聲同埋望住個彎月，播住一首又一首我地鍾意既歌，過左好多個原本好難捱既晚上。

雖然果到好多蚊，又熱，成日都搞到佢呱呱叫，但係我真係好珍惜好珍惜每一次既時光。成日會同你講，唔會再黎架啦，因為下次唔會再唔開心，唔會再需要黎。理性咁講，有邊個想唔開心，有邊個想晚晚帶住個壓力訓覺。感性咁講，都係想揾個人分擔下，同埋好鍾意果種就算大家唔出聲都唔會尷尬，好舒服既感覺。

你曾經講過，唔知十年後我地會點，係咪已經忘記左大家，唔記得呢段青澀既回憶。可能大家各有各生活，會有自己既工作，家庭。唔可以再係咁通宵達旦第二朝食完早餐先返屋企訓覺，亦都唔可以飲到醉醉地係條街到大嗌傻笑，一切既記憶會被時間慢慢沖走，直至到大家都唔再在乎呢段回憶。

我語塞。我唔鍾意影相，因為我唔鍾意望鏡頭。我唔鍾意相機食先，唔鍾意相機睇先，因為我覺得一切美好既野我都會用個腦記住，用個心去感受到。就正如你唔可以將富士山私有，但係我會記住關於富士山既所有野。

記得你笑過我篇文既最後一句，「enjoy your new life」話風格好唔似我，記得寫呢句野既時候我諗左好耐，究竟應唔應該出好。一方面我會唔捨得我地要同枝莊講拜拜，另一方面，我又唔想你係呢個地方困住四年，個世界好大，係時候要見識下啦。同樣地，我唔知點樣處理落莊之後大家既關係，所以我無專登去維繫，可能呢個係對大家最好既結果。

第二十五章 不醉無歸

話說過左開學最忙果排，暫時未有下一個活動住，無喇喇有一日老鬼JJ無啦啦PM我話，
「喂，拉坦，你地暫時都無野搞架啦，不如襯有些少空檔搞壇野出黎，當慶下功搞完OCAMP又好，當我地歷屆莊員出黎食餐飯又好。」
「還掂班老鬼都話想搞個活動飲下酒食下飯出黎聚下，咁我話不如叫埋你地現莊仲開心啦。」

講就咁講姐，鬼唔知係你唔想煩一次過掉哂比我搞咩，有時呢類老鬼活動玩係開心，但係又要煩呢樣煩果樣，又要打點哂一切，最後比哂錢你地又放飛機或者走數。
不過佢拍哂心口話今次一定唔會有人放飛機，我唯有信佢一次咁大把啦。

跟住我就臨危受命搞左個不醉無歸大型飲酒活動。

咁補充返少少資料先啦，班老鬼唔係成日出現，每一次既存在都要我地飲酒，玩酒GAME，所以上左莊以黎我已經練得一身好武功。同埋佢地通常都會以隊死現莊為樂，到你做左老鬼既時候自自然會明白究竟睇住一班唔識飲酒既人狂飲係一件幾滑稽既事。

面對一啲唔飲得既莊員，每一次我都基本上包底飲哂佢地啲酒，雖然話酒量唔算好好，但係都無辦法架，正所謂:「蜀中無大將，拉坦當先鋒」我當然為自己友守尾門，好彩次次都係個別人士臉紅紅要抖一抖之外，基本上都無咩人劏。

但今次我已經好有預謀地反攻老鬼集團，唔理好醜，隊冧一個先收手。因為大家既心態都係各懷鬼胎，睇人仆街最開心。所以我都預左佢地唔會互相頂酒，於是我就開始盤算緊果日要隊死酒量唔係太好既先。其實點樣去鑑定一個人酒量好唔好呢，其實都唔難揾。通常你會係佢既肢體動作，即係睇佢飲酒時既神情，反應，速度，舉手投足，同埋酒後反應可以判斷到佢係老江湖定係初哥。

如果飲大兩杯開始語無倫次或者呆左係到傻笑，通常佢地就開始醉啦，所以大家見到呢類人，通常就唔好再隊佢喇，再飲多幾杯啲撚樣就會開始嘔，通常理智既人都會係呢個迷迷糊糊既階段就會話我唔得啦，醉啦。咁你就真係唔好再逼佢飲，因為佢再飲只會搞返你自己。

為左今次飯局我買左好多唔同類型既酒，有紅白啤烈酒，即係vodka又溝下紅酒又溝下汽水又溝下whisky咁。因為我知溝酒飲一定好快劏，如果有心想醉，你將啲唔同色既酒撈亂黎飲，包你嘔到九彩第二朝起身都唔知發生左乜事。為免大家飲醉左唔知發生咩事，我都好醒目地收哂所有錢先開席，廢時離席先籌旗咁樣衰啦。

一開場未上菜大家已經開始失控，不停大家灌大家飲酒，不停係到猜枚，玩酒GAME，當然我都開始玩到失哂控，完全唔記得當初要隊冧班契弟。

可以講少少大概玩左咩GAME，

第一個:拍七

大家應該玩過類似既遊戲，不過懲罰係多左飲酒呢個環節，其實只要有酒，一個幾唔好玩既遊戲都可以好好玩。

咁眾人圍住一個大圈，順時針開始數「一，二，三......」嗌到有明七/暗七就唔可以嗌出聲，要用拍枱/拍一下手黎代替，咩叫明七暗七呢？前者就係個數有個七字既，例如十七，二十七。後者就係七既倍數，例如二十八，三十五。

開頭大家清醒其實好易玩的，但係隻遊戲變化可以好大，你可以唔只拍七，可以同時拍三七，即係有明三七同暗三七都唔可以講出聲，難度即時增加。

又可以拍七之後由順時針轉做逆時針繼續數，或者直接變做靜音GAME，非七就拍一下，有七就拍兩下。基本上，你飲到咁上下，WINGWING地係極容易計錯數或者唔記得上一個叫到咩。

第二個:疊骰/鐵達尼號

我地會稱呢類GAME叫做失手GAME，故名思義即係好似層層疊既簡化版。咁疊骰就係一班人拎住一堆骰每個人逐粒逐粒疊上去，最後疊冧果條友就要飲，冧幾多粒就要飲幾多啖酒。

而鐵達尼號就係拎住一個大杯，一個細杯，大杯裝半滿啤酒，然後放隻細杯係面浮起。之後其他人就拎住其他酒倒落隻細杯到，總之有加到落去就可以pass，大家會少少咁加，最後會因為個細杯太重而沉左落去。我地稱之為沉船，咁就要成杯飲哂佢。

當然仲有好多唔同種類既酒GAME不能盡錄，但係總之目的都係唔想一班人無野做好似飲悶酒咁，你唔鍾意玩GAME，大可以用TRUE OR DARE模式去玩，咁就既有祕密聽，又可以飲下酒。

講返正題，由於空肚飲左幾杯，同埋開頭大家都飲得幾狼下，所以慢慢開始上左兩三道餸，我已經開始感覺到有少少唔妥，我同隔離講:
「ELLA，我有少少唔得啦，依家先岩岩開始......」
「拉坦，唔好飲喇，我係KAY啊！」(KAY係我其中一個莊員，之後會介紹佢。)
我望一望佢，原來佢真係KAY，好明顯比佢突如其來既一句嚇左一嚇。
但係我又懶係鎮定咁同返佢講:
「嘻嘻，呃你唔到添。」
跟住ELLA擰一擰我個頭同我講:
「真係醉喇你，唔好再飲喇。」
本應該講，好喇我唔飲喇，到唔知邊到黎既英雄氣概，我講左句:
「我大把貨啦，你睇住其他人仲好啦！」
有時男人真係一種逞強既生物，以前就係為左一句你點都唔夠我快架啦。
我用左一年既時間拎走左佢個冠軍，為既就係跑完之後以勝利者姿態咁同佢微笑。
我果晚計過應該飲左前所未有咁多酒，應該係我飲既我飲左，唔應該係我飲既我都飲埋。
最後仲要追酒飲發左癲走黎走去，幾個人都控制唔住我。
當然最後嘔到仆街，仲要斷埋片，過程做過啲咩我緊係唔記得。
但係事後就算問返在場人士都係依然無印象，果晚真係飲得好誇張。

我記得醒返果陣，果時已經五點，第一時間發現自己無著衫，已經嚇到仆街。同TVB飲醉酒劇情係一模一樣架。我記得岩岩上菜我有意識果時先岩岩好九點，仆街了，究竟我做左啲咩......

醒左既感覺係非常難受，個頭好痛，個喉嚨好乾，好明顯成身都係散發住一陣嘔味。佢地見我起返身，即刻遞左枝水比我，我咕嚕咕嚕咁飲哂成枝水，佢地見我無事都輕一口氣。淨係見到呀主席嬲嬲地咁同我講左句，你知唔知為左你，我地做左幾多功夫‍。

我一臉茫然，因為斷左片緊係唔知佢嗡乜。聽返口述消息，我飲醉酒除左唔小心整爛酒樓啲杯碟，仲有嘔到周圍都係啦，成個人軟哂攤係條街又有，無啦啦保特上身周圍亂衝亂撞又有，連周街打人都出埋，聽返真係柒到地裂。咁佢地點處理我呢，一黎我講唔到自己電話密碼出黎，佢地揾唔到我屋企人，二黎佢地更加唔知我住邊，想送我返屋企更加無望。

所以最後佢地帶我返SOC房比我訓一晚，想講佢地運送我既方式都幾唔人道，除左我啲衫揾架搬貨車仔就咁推我返去，途中當然唔少跌跌撞撞同佢地鬥力控制唔到我打我一身啦。睇返事後佢地幫我拍果啲片，應該係我呢一世都抹唔走既黑歷史。

佢地講到一半，我突然覺得有啲唔妥，即刻講：等等先，咪住，我立即掩住個口即刻衝入廁所。未走得切我已經好似噴射式水槍咁嘔返哂岩岩飲果枝水，仲附帶左少少食物殘渣。佢地係後面通常笑到仆街，又不忘咁屌柒我。

咁跟住緊係即刻跑去男廁啦，一路跑果時雖然無咁醉，但係都仲係WINGWING地好似就黎要仆街咁，仲要啲嘔吐物一路係個嘴邊滲緊出黎，一路周圍滴。入到廁所一路係咁嘔，終於明白咩叫連黃膽水都嘔埋出黎。明明已經嘔哂啲野出黎，我都唔明仲有咩可以再係個食道到吐出黎。同埋最辛苦唔係嘔果一下，而係想嘔又嘔唔出果時，標哂冷汗，好似個道友咁軟弱無力伏係個洗手盤到，果一刻真係覺得自己好似個廢人咁乜都做唔到，淨係識嘔，頹到坐左係地下。

只係見ELLA係門口莊左兩莊，就走左入黎，拍一拍我背脊，問我死得未。坦白講當時見到佢我已經開始眼濕濕，見佢一路係後面抹返整污糟左既地方，我已經有少少頂唔緊。但係我死忍住無喊出黎，將個頭隊返入洗手盤，用近乎噎咽既聲線同佢講，

「好辛苦呀，一路嘔都唔知嘔咩。希望轉移話題令佢唔好覺得我係到喊。」

佢摸一摸我個頭，用好似責備但又好溫柔既語氣同我講，

「你欠我既真係呢一世都還唔清呀我話你聽，你知唔知我幫你清左成晚嘔吐物呀，依家我聞到你陣味都驚呀。」

我聽到呢句之後，我不停忍住就黎要掉出黎既淚水，但係個身已經不停係到震。
「笑咩呀仲笑，你開心啦依家，一覺訓到依家先起身，飲醉酒都有人照顧你。」

我轉個身攬住佢，同佢講左聲，「對唔住。」

佢似乎比我呢個突如其來既舉動嚇親，沉默左兩秒之後就話，「喂呀你咁污糟，唔好掂我呀！」一路用手當鎚輕輕咁揼我。

我無出聲，淨係將佢攬得更實，我知佢從來都係個口硬心軟既人，特別係飲醉酒之後，你先知邊個真正對你好，邊個其實係把口對你好。時間停頓左咁，好似過左好耐，又好似唔係過左好耐，直至到出面有人細細聲話，你睇下:「拉坦同ELLA攬埋一舊喎！」我先有意識鬆手。

「咳咳，咁大力想焗死人咩！」佢語氣比平時誇張。

「嘔完未呀？嘔完快啲出返去啦，男廁黎架。」佢臉紅紅咁講。

「你係咪第一次入男廁先，益左你啦！」我一路行出去，一路笑住咁同佢開玩笑。

「唔係呀，中學LAST DAY果陣入過去啦，有咩特別姐，咪多個幾個尿兜。」

我地若無其事咁走返出去，好似上一刻既事從未發生過一樣。

最後大家見我無乜事就建議大家散BAND，ELLA就堅持一齊搭的士送左我返去先。途中佢慢慢同我組織返案情，例如我飲醉酒嘰呢咕嚕講左一堆好似有文有路但唔知我講乜既話。同埋點解我無著衫得返件嬲係我自己係街除左無人肯幫我執返。仲有佢地點樣氹我解電話密碼我好正經咁講左幾個數字出黎，但最後發現我9UP部電話仲鎖左一個鐘。

講到呢到我都佩服自己雖然醉，但係都無亂講野，都證明我幾守得祕密架。

落車之前，ELLA細細聲講左句，

「下次唔好飲咁多喇。」

佢好明顯唔係同我講，仲講得有些少落寞。

「好啦，下次唔飲咁多喇。」我好爽快咁講。

「係咪嫁」

「係嫁」

「勾手指尾先」

「小學雞」

「嘻嘻」

「今日...真係好失禮...真係好多...」我雙手合十，好誠懇咁講。

「再講就嬲嫁啦。」佢打斷左我。

「咁...返到去記住講聲。」雖然佢次次都無左回事。

「得啦，長氣。」

到第二朝醒返，我發現原來唔止我一個嘔，都有好幾個嘔到九彩，我打左比一位比我地戲稱為龍蝦既莊員。

因為佢飲多兩杯就會好似龍蝦咁臉紅紅，行動緩慢同埋會呆左係到。

「喂，你今日見點啊？」

「我依家仲係飲水嘔水，食粥嘔粥啊。」

我笑到差啲噴水。

我又打比老鬼JJ

「嘔完仲返唔返到工啊？！」

「無問題啦，我一早就醒左，仲食左個老麥先返工。」

直至知道曬咁多個醉酒buddy無事我先放下心頭大石。

後尾聽返人講，我地除左整塞左幾個洗手盤之外，有條木嘴仲要上吐下瀉整到周圍都係。
利申唔係我。
後尾成班人走左去同清潔姐姐道歉，仲買左罐藍罐曲奇比佢當手信賠罪，件事總算告一段落。

第二十六章 再遇Freeriders(一）

其實大學比Asso係更加多freerider，無他既，大把人讀左咁多年書仲唔夠皮咩。於是好多人會選擇係大學生活放縱自己，啲堂鍾意就上，gpa過2唔駛retake掹車邊畢到業就得。咁當然都係會有認真讀書熱愛學習既人，但係整體黎講都唔會有Asso咁功利，咁絕情。

今次要講既一個人，我都唔知佢叫咩名，因為我淨見過佢兩次咁大把。但係我覺得佢好似唱K歌之王出道既Bosco，姑且就叫佢波士高。

咁大家都知一個Sem有13weeks，見過佢兩次
即係佢出席率係得15.384615251474914183637128%
可能你會問，究竟我見左佢邊兩次呢？相信走開堂既都知，佢係淨係返左分組同present兩堂。由於上果堂無朋友一齊上，所以分組果陣波士高同我眨一眨眼，話想同我一組。加埋後尾三個本身識既同學，所以我地呢個五人組合已經成形。

咁正常分左組，教授就會示意落堂，無組既自己黎搵佢，一切都正常不過，我地填好左學生編號，名就各散東西，話下堂見面再諗做咩題目好。點知就仆街鳥，因為犯左一個大忌，就係太過信任大家，要知道第一堂無拎電話，之後可能你唔會再見得返呢個人。

無錯，最後我地每個禮拜望穿秋水，都搵唔到一個貌似波士高既人，我地仲一度懷疑，係咪佢有返但係我地唔認得佢。眼見要交報告既日子越來越近，我地慢慢先發現我地知得佢既野越多，先知原來我地知既野其實少得可憐，例如我地連佢讀咩，year幾，有無戴眼鏡我地都唔知。

最後逼於無奈死死地氣我地要問教授拎佢學生編號再用內聯網send個電郵比佢叫佢比佢電話佢add佢入group。足足最後我地等左兩個星期，係present前幾日先有幸得到佢既回覆，好冷漠，淨係比左8位數字我地，大佬啊，起碼都比我地知你高姓大名先得架。

不過咁都唔緊要，遲到好過無到，基於我地分好工都做得七七八八，所以淨係交低左個總結比佢做，基本上佢睇完我地份報告打個生粉芡講少少山係石頭海係水阿媽係女人已經可以收工。

見佢係group都無特別出聲，我地以為呢啲手板眼見功夫當然難唔到佢啦，點知原來溝通誠可貴，我地臨present先發現原來佢總結既立場同我地完全相反，即係我地做左幾十版，到最後一個屈尾十講返自己不是。我地已經即刻同佢講，你前面講咩唔緊要，最後一定要同我地立場一致，一致，一致呀！！！！知唔知，收唔收到，明唔明？因為好重要我地真係每人都加重語氣講左三次。只係見佢似懂非懂咁點點頭。

到最後唔知佢係太緊張定特登玩鳩我地啦，佢最尾口疾疾得黎又加重語氣咁講返同我地相反立場既總結，我地已經比佢激撚死，全場亦都鴉雀無聲好似聽到個個都拍拖，唔通個個都拍拖咩既初哥哥咁又好想恥笑但係又唔知自己有無聽錯。最後，教授幫我地打完場知道唔關我地事，亦都其實唔太影響成個報告。我地先總算鬆一口氣。

後尾要交報告仲好笑，用論文形式講返個present內容出黎，佢竟然走去列點仲要整粒死人點(・)出黎，真係唔知嬲好定笑好。最後又係要夾手夾腳幫佢做返好曬啦，因為叫佢做不如快快手大家做完就收工。

其實後來我仲有見佢一次，就係考試我坐佢隔離，見佢係到發呆玩筆沉思就知佢唔係太識做。最後我都唔知佢幾時走左了，總之份卷考完其實時間係岩岩好唔會差太遠，只能講佢真係真係唔識做。

老實咁講，點都好都唔想見到佢F既，我地最後成組成績都好好，淨計考試一般，照道理應該佢都有一個唔錯既成績。所以話其實project呢家野大家好黎好去既姐，唔怕你唔做，最怕你唔合作大家一齊攬炒姐都係。好好醜醜我地都叫做有緣份係埋一組又完滿地解決左呢3cred。

lm

Lm

樓豬我要文呀唔要舊post呀！

已正評 等你岀新文啊

第二十七章 再遇Freeriders(二）

其實之前都講過其實唔係太鍾意標籤人做Freerider，一來自己又唔係特別醒目過人，二來其實讀咁耐書多多少少都受過人恩惠或者比人carry過，所以少少穫利點吐都唔算得係咩。今次呢個case比較特別，相信唔係咁多人會遇過，佢係一種本身係你好朋友但係佢最後會因為project而令你會有少少炆佢既一種人，而呢個人就係我既室友喇。

以前聽過老竇講：「生意免得就避免同朋友夾」，繼我話project其實都一樣，今次呢個室友阿發就係慢慢誘導我差啲一齊變左自由騎士既一個故事。首先佢會開sem同你講，
「喂！拉坦不如一齊REG呢科啦！」
「好啊！」其實唔係好識點拒絕。
睇左一睇，諗左一諗之後，我開始有少少後悔。
「不過，呢科咁早上，我驚我起唔到身喎......」
「唔怕喎，我叫你起身咪得。」
係咪嫁大佬，日日見你三點不露真係好難想像你點樣叫返我起身。
咁開學第一堂既前一晚我已經叫佢早啲訓，聽日要上八半要分組要聽course outline見有伏味就頭也不回咁drop左佢。得到既回覆係，輕鬆啦，食埋個早餐行都仲得！

咁我就叫佢早啲訓，我訓先。同埋較左七點半鬧鐘，因為佢話食早餐呀嘛，本身我都唔諗住食架。於是乎第二朝個鬧鐘就準時響起。我就即刻起身伸前隻手過隔離拍一拍佢叫佢起身。點知佢第一個反應係，訓多陣先，訓多五分鐘，四點先訓。咁我見仲趕得切，就較多次鬧鐘十分鐘後響。十分鐘之後，佢今次就話訓多五分鐘，今次真心。我其實已經醒左，我話我刷完牙再叫醒你啦。佢話okok刷耐啲都唔緊要。咁我就刷完牙洗完臉換好衫再拍醒佢，喂，阿發，起身屌閪喇，屌完再屌喇。再唔起身就食唔切早餐啦。
佢既回覆係，我唔食喇，你落去食先，我八點起身直接去。
我望一望隻錶，其實已經七點五十六分。基本上都食唔切早餐架啦。
係佢極度唔合作既情況下又拉又扯又開住heavy metal轟炸佢佢都係不為所動。如果我地九點先施施然出門口，講真我真係念在一場同房，佢唔起身之餘又要叫我等埋佢，我念在平時佢都對我幾好煮麵食又會煮埋我果份先等埋佢。

返到去當然時間唔會等人一早已經分哂組，淨返一班遲到既烏合之眾係到你眼望我眼心諗唔係同你一組下話。真係莫道你在選擇人人亦能選擇你，最後遲到大軍都總算集合一班貌似唔讀書既廢青一組。但點解我會知大家都係廢青？因爲大家都係笠件頹tee著住拖下短褲fing住去上堂，第一印象真係主導左你對一班人既睇法。見大家都係無乜所謂是是但但隨隨便便求求祈祈，所以大家都無咩話特別緊張有果句講果句。

組員coffee開門見山就講：「其實我睇下呢科伏唔伏架咋，如果伏我可能會drop。」
「+1」
「Metoo」
「英雄所見略同」

當然呢啲老練到仆街既lecturer當然會扭盡六壬令你覺得呢科細workload靚grade而自願留低啦。我地最後開左個去留大會決定一齊留低，真係覺得有時候大學根本就係個呃呃騙騙既地方，大家只係各取所需，我要拎grade順利畢業，你又要保住份工唔可以比人話你派grade之餘又要保住啲學生，更唔講大學與大學之間互相請人返黎寫PAPER做RESEARCH鬥排名拎FUNDING。
大學根本無咩學術氣氛，只係有無用有無出路幫唔到我揾工。

當你知道有啲堂其實唔係點駛上，淨係讀下啲PASTPAPER就可以蒙混過關既時候，你就可以視上足咁多堂，上堂又會問問題期望博表現既人係傻鳩。當然我就係呢種傻鳩，而我室友就好似當我明燈咁堂堂叫我幫佢拎碌士剔個名佢就係張床到安枕無憂。咁其實都無乜所謂，助人為快樂之本，係咪先，但係總要有時間一齊傾下份報告點做，或者你唔上呢堂你就跟唔到份報告內容要人重頭講一次我唔煩你都唔好意思架啦。

於是我一個學期就不斷重重覆覆上堂前一晚叫佢訓教，佢就話：
「得啦，無問題我就訓，你訓先。」

之後臨訓之前又會拍一拍醒我問我：
「拉坦，聽日係咪真係要上架，我落堂先黎傾報告好無。」

起身又會同你講：
「不如，今日一齊唔好上啦，之後我地問返果兩條友點做咪得囉。」

真係扯得郁佢出到門口落堂佢又會講：
「屌！條友仔都唔係路既，早知我唔上啦，下次唔駛叫我起身喇！」

最後下個星期同樣時間佢又會：
「得啦，無問題我就訓，你訓先。」

個教授又係果種話就話好歡迎你問問題，但係啲NOTES又唔知你講乜，就咁聽又唔知你講乜，仲要堂堂播片播埋哂啲陳年舊片，喂大佬，依家仲玩360P睇格仔，我阿媽都睇緊1080P中國好聲音啦。約佢個時間問野，佢就會比個佢自己堂與堂之間既十分鐘係學校長枱聽完你廢嗡一輪就會答你上堂其實佢講左，有咩唔明睇返佢啲NOTES同埋問下魔童。

於是我地就一直處於迷迷糊糊既狀態一路上緊呢堂，所以慢慢地阿發已經叫我唔駛叫佢起身，仲叫我一齊唔好返。

返乜鳩呀，聽條撚樣廢嗡我不如玩多鋪Fifa，痴撚線公司。

人係群體動物，當過馬路有一個人衝紅燈，後面本身奉公守法既良民無啦啦會撒旦上身以身犯險，一個接一個咁亂過馬路，直至到下一個紅燈有人停低。

總之我就比佢迷惑左好幾個星期，完全無去上堂，傾報告都會再約時間，搞到Coffee都問我係咪病左返唔到。
唔係呀，起唔到身之嘛，隔離床叫極都唔醒搞到我都訓埋。

其實我知一切都係藉口，心魔作怪好似人地唔去我都無必要咁勤力，你多粒魚蛋我要拎走你粒魚蛋咁。我痛定思痛決定唔再理阿發，佢鍾意就返，唔鍾意就由佢，佢唔做我做埋佢果份，最多以後唔同朋友一組既姐。

最後真係皇天不負李克勤，我拎左個唔錯既成績仲要高自己室友兩個grade。雖然唔係咩值得自瀆既事
，但係假假地叫做對得人拜得神，無浪費納稅人既栽培.......

十隻手指有長短，一生人無幾多個可以同你完美配合唔會有衝突既人，睇你點樣去發揮大家之間既化學作用，而唔係火星撞地球最後反面絕交收場。

第二十八章 再遇Freeriders(三）

今次遇到既人物已經唔係非一般既級數，我諗應該有36D，無錯就係連登仔成日屌既IG臭雞，仲要係果種識易容術係學校撞到佢係完全認唔到佢果類人。

講明先我從來無因為貪圖過一點美色而一組，因為我根本唔知佢乜水，係後來啲組員講起我先好似有印象好似係啲J圖post見過佢。只能夠讚嘆科技竟然可以神化一個人，不過有時都幾驚佢一有唔順意掉你上網批鬥，一班狗公水泥隊圍屌你都咪話唔過癮。

首先同呢種人一齊共事，你要先接受到佢網絡世界既一套係同真實完全唔同。即係例如佢post個story話傾左成日project真der好攰，其實佢遲左兩個鐘岩岩先到。其次就係影相永遠影完又影影完又影又話唔得呢張影到我好肥要再影過。當然平時閪口閪面無咩禮貌好似成個世界圍住佢轉呢啲不在話下啦。

簡單啲黎講其實係長期以受害者自居，分工永遠都話呢排好忙要拍野屌你我理得你拍野定啪野定扑野，你比人中出我又無錢收，點解奉旨要做埋你果份仲要唔該都無聲先。

不過講開又講，呢種人永遠都唔怕無人同佢同組，就正如有個大波妹係地鐵站問你借啲錢搭車返屋企，都總會有人平時星期六見到學生會兜路，呢日都會孟德拉（好似係）上身帶你去撳錢、比幾舊水佢返屋企、仲問你怕唔怕曬，買埋防曬太陽油蚊怕水比佢。

咁我地歸納一下呢種人一組究竟有咩缺點：
一：遲到或者話遲少少結果唔到

二：唔參與討論或者會講傾快少少因爲要趕住走

三：揀一樣最易既野黎做但最後會掉返出黎話唔識

四：好似做緊社會服務令咁對住個殺父仇人

五：港女格公主病全身營養去哂對波到

都算啦，比個總結你做唔係叫你剪貼將成組啲內容密密麻麻貼哂落你自己果版到呀，一開出黎仲密過本袖珍版聖經，真係耶穌都同你講梁國雄議員。


最奇怪都係總會有人衝出黎護主話你唔好鬧佢啦，我地一齊做埋佢果份咪算，我屌你老母呀，慷他人之慨，你鍾意做英雄，你就用你做埋佢果份，唔好私私縮縮又話我講野太mean又要我地幫返佢轉頭。

不過呢個世界真係落地喊三聲，好醜命生成。聽講佢有科final無去F左呢科要retake最後單拖入左教授間房出黎果陣仲隱隱約約見到佢個嘴角仲痴住條鳩毛，可能教授見佢咁有誠意，最後又有得補考唔駛retake喎。

其實係想講，個世界係咁唔公平架啦，大把人連續三個sem比同一個教授kill，想求情拎住把老牛走入佢房，就算含住督屎出黎喊哂口，咪又係無偈傾要quit u收場。鍾意一個人係可以有好多好多個原因，但係唔鍾意一個人，係可以唔駛有原因架。

講返後尾，我都無意追究啲咩，最多下次打J射落佢啲相到已經當報左仇架啦！不過每一次聽起人講佢，我都笑而不語，因為原來一個人好唔好正唔正要真係相處過先知。

法官大人？有得屌我屌唔屌？


不了！我驚生粒粒。
https://holland.pk/hiqtm573

第二十九章 第三個莊員

係我眼中，原本只係得我同ELLA既一枝莊，竟然容得下第三個人，雖然未有ELLA果種絕對信任，如果要去形容呢種關係，我同ELLA係一個同步，咁我同KAY就係不同步。我從來去鑑辦一個人是否值得交心，基本上三兩句或者一兩次見面已經足夠我去作出決定。

而淫KAY（因為佢真係好似謝安琪），就係我少有後來會對佢改觀的人。情況就好似係OCAMP好流行一隻GAME叫做FIRST IMPRESSION，玩法就係等大家熟絡左一排之後，就會分成男女兩隊，互相提問一啲尖銳既問題：

邊個最似青頭仔？

邊個會叫雞唔比錢？

邊個最似狐狸精？

邊個會中出即飛？

邊個係A380？（A代表available、數字代表拍拖次數）

如果流落荒島你會選擇同邊個扑野？

邊個個閪仲闊過西隧？

總之問題令人越難堪、越賤大家就玩等越開心，個玩法就係用不記名投票，最後公佈結果。
即係到最後你都唔會知邊個投過你，只係知道邊啲問題最多人揀你。我真係見過有過正正常常既女仔比人投曬全部衰野然後即場喊左出黎。

隻GAME其實話比我地聽，好多野我地由第一次見面已經定左，特別係對一個人既感覺，所以話點解話見工interview最重要係第一印象就係咁解，見你污污糟糟樣樣衰衰通常係HR眼中已經大打折扣，基本上唔駛旨意佢會請你。

淫KAY比我第一印象係高傲、冷漠、難以接近，所以識左佢半年都未曾講過一句話。後尾佢同返我講，佢話當初係見我咁COOL所以先唔敢同我講野，但係見我同其他人有講有笑又會諗返到底係咪我唔鍾意佢。

當時我淨係支支吾吾同佢講左句，係咩，我都唔記得嚕。其實有好多好細既事已經可以唔鍾意一個人，例如一班人一齊搞試莊活動果陣，佢有野永遠唔會講，淨係會細聲講大聲笑，其實自己有時都會咁，只不過人有時就係咁雙重標準。

同埋佢比我既印象係一認真就吱都唔笑好似想殺左人既面口，同埋會聽得出言談之間會有啲串串貢既感覺，都係當時我覺得佢難以接近既原因。其實感覺呢樣野幾時都係咁主觀，事後其實我有問返其他莊員，其實大家都覺得淫kay係一個好nice既人，只不過可能口直心快成日得罪人自己唔知。

我又記返起，我地究竟幾時講第一句野，其實大家都係果種永遠都唔會第一個開口果種人。結果成晚我同佢係隔離砌緊deco，我地都無出過一句聲，旁邊人以為我地不和，其實我地做緊自己野，根本唔care邊個開口先，有咪講兩嘴，無咪由得佢。總之我記得第一句係我問佢，較剪係邊？其實我知一直插住係佢口袋。佢冷冷回覆一句：唔知自己搵。
我都無再追問。
就係咁，一切就抹殺於萌芽之中。

所以事情既導火線就在於當初真係對佢感覺唔係太好所以直接忽略左佢，有時覺得自己係一個有性格缺憾既人，因為遇到唔喜歡既人同事，我會逃避，簡單啲黎講其實唔夠面面俱圓，話不投機半句多。但係有左KAY既經驗後，我應承左自己會比多少少時間去睇清楚一個人先再下判斷，因為太倉促去做決定，只會錯過一個又一個值得令你交心既人。

到我真正認識佢其實都比較後期，佢係果種好識開話題既一種人，基本上傾下計無幾耐，慢慢你就會比佢引導去佢真正想講既話題，但係又唔會有一種好尷尬既感覺。如果要我形容，佢都係一個幾sociable既人，同時又可以話佢係一個世界女，好似咩都可以同佢講，又好似咩都唔可以同佢講咁，總之硬係有種距離感。

但正正就係呢種性格，先可以係佢面前有果句講果句，一齊屌呀邊個邊個老母，成日係GROUP可以好有默契咁串人，呢種感覺其實唔係個個有。有時唔係咁鍾意傾計之間大家好似比人鏈住春袋咁，呢個又話唔開名，果個又話我都係聽人講架咋，其實我對佢無乜特別感覺。言談之間充斥住互相既不信任同埋猜忌。我真係好怕同呢種人打交道，好似下下都要將是非當人情，滿口仁義道德但係實際上一樣都做唔到，我都係鍾意KAY果種有果句講果句，唔怕你嬲最怕你戇鳩。

我地同好多人一樣，會因為前途而迷惘，會因為未來而恐懼，所以今朝有酒今朝醉，希望盡量榨乾大好年華的一點一滴。每一次的筆跡，都彷彿告訴彼此：

「睇下，今次我去左拉薩，我勁過你。」

下次你又會不期然想再去一些渺無人煙的地方，證明給對方看，自己曾經活著。

「浮潛真係好好玩呀，NEMO同我SAY HELLO啊！嘻嘻！」

就是那種會互相分享共同興趣，閒時講講天文地理文學音樂電影電視劇我的志願，在大家身邊找出共鳴，然後就會好開心好似搵到知音人無了期延續各種話題，最後其實離不開一個悶字，發悶發呆百無聊賴你總會想起對方，因為你知道每個人的內心都會有一個配額，當你浪漫到抑鬱到一起惹絕症，你知道其實你的心根本容不下別個。

其實莊員就係一種特別既關係，既唔係朋友，亦唔係同事，但你地閒時會相聚，又會一齊共事。但可以比朋友更加親密，亦可以比同事的感情更薄。與其希望可以搵到一班付託終生既摯友，不如拎得起放得低，落莊之後可以乜野都係，可以乜野都唔係，不如一開始就不如沒有寄望，反而活得更快樂。

好想同謝安琪講，你好似我朋友，雖然真謝安琪又好假謝安琪又好，可能呢世都無機會再見，但係我想祝你幸福快樂！好想好似囍帖街咁，記得我地互相係大家生命裡面出現過，咁就夠。溫馨的光境不過借出到期拿回嗎？終須會時辰到，別怕！

第三十章 踢出我天地

Inter-hall應該係我人生第一場足球比賽，亦係真正對呢個地方開始有歸屬感，真正會開始唔捨得，我開始珍惜，會有一種全身發麻既感覺。

其實都無咩太特別，因為人腳上分左AB兩隊，我呢啲半途出家既盲毛當然踢無咁勁既B隊，大家一開始都知人腳其實完全唔係果皮，我地都係諗住踢兄弟波雖敗猶榮唔緊要啦比賽第二友誼第一嘛！

你都痴撚線，男人比賽邊鳩到有友誼，你見街場成班麻甩佬full gear上陣玩玩具掂下手仔都成日嗌foul，你就知其實只要存在競技元素，鬥屙尿屙得遠都可以打交收場。

特別係hall與hall之間或多或少都會有私怨，兩班球迷之間可以極不理性，當人地惡意犯規既時候：
「屌你老母，死狗公，踢波定踢人呀？」！

當我地球員唔小心茅左少少既時候：
「係咁踢嫁啦，唔撞得咪打乒乓波囉！」
特別住過hall就知，特別會有一兩個hall好著緊呢啲飛機盃，會特登留住啲Uteam幫佢地比賽，當然呢啲就例牌屌到發發聲啦。

「你睇佢，你睇佢，有人唔做學人做狗，熱唔熱呀，熱就伸條脷出黎散下熱啦。」

「喂屌，hand ball都唔吹，黑哨？？？」
「狗邊有手，佢果兩隻叫前足！」
‍「♂️係喎，差啲唔記得，唔巧意書！」

咁個比賽大概係sem2岩岩開始無耐，通常一隊波會由sem break開始夾下波，不過我地呢種雜牌軍，邊識咩專門訓練，咪又係鬥下波、射下龜，然後齊齊食飯。一開始大家都唔為意，各有各忙，基本上砌極兩隊都係岩岩夠開波，話就話快樂足球，有邊個唔想贏先，特別係李斯特城都贏到英超，有咩無可能呀？

其實得罪果句，球品唔好，其實人品都唔好得去邊。特別係有啲球霸又唔係好波，成日指指點點自己推甩波又話無隊友幫、比人偷波就話呢球你包架喎、比球保特都追唔到既直線球就話屌你唔跑、明明射波撻Q就會話傳得咁靚都拎唔到，執柒左佢啦。佢就自稱美斯，因為矮撚過美斯，米六都唔知有無，我地就背後叫佢丙朗，輸波就發脾氣賴呢樣賴果樣，比隊皇馬你做隊友餵到口邊你都炒啦，撚人。

於是其實我地第一個磨擦點就係撚人丙朗，有佢落場完全係要回防無回防，要進攻斷進攻。所以呢個都係我地隊既一大隱憂，其他位置都叫正正常常無咩大問題。其實我地既策略都係拳怕少壯，足球唔同籃波，容錯率非常高，只要守好，就有機會獲勝。

係比賽前一晚我地開左個戰術大會，決定邊幾個做正選，邊啲人下半場會換出黎，最終決定既陣容係：

前鋒樂仔，係好典型既柱躉式前鋒，係隊波到算係比較大份，類似伊巴果種，會走下位、有身位、有射術、有頭鎚、識搶點但係無體力無速度，基本上如果佢比人mark死左，成條進攻線可以玩完。常用招數係搵個身得住你，拎波之後控好轉身即射。

中場丙朗，矮撚之餘仲要無速度、跑得慢、唔夠快，要知道中場可以係進攻既第一步，亦都可以係防守既第一步，基本上要有良好既大局觀、key到波、做到波、肯回防先算係稱職。好多時我地既快攻，做波都會比佢拖慢左個節奏或者直程斷纜。但有陣時都會有神來之筆，例如一球直線湯川教授直入對方心臟地帶，但基本上佢唔失誤我地已經好感恩。

中場羊仔，係我地成隊最好波果個，以前踢過下球會青年軍咁樣，無論key波、突破，都做得好好，甚至會好過樂仔，不過會有少少獨食，同埋經常單打獨鬥。同埋又係衰係身高方面，速度雖然快，但太容易比人食哂身位，加上好快無氣又係一大死症，
但因為我地板凳實力不足，一般黎講都唔會換走佢，同埋個踢法算係進攻中場，而丙朗就偏防中少少。

左閘柏洋，係運動神經比較好既人，優點就係身高速度技術都好平均，同埋球感都唔差2，特別係控第一腳其實控得好好。但整體唔算突出，防守轉攻時會成日推上前助攻。缺點係份人比較暴燥同埋持住球感唔錯佢成日諗住做突破，好容易比人做反推。

中堅Dickson，係一個好豐富經驗既中堅，成個後場都由佢把關同埋指揮，例如有人失位，或者要補位既時候通常都靠佢提點。加上落剷，聯防都好有經驗，十足十街場阿伯咁，靠經驗同大局觀踢波，但係有個缺點就係一落場比賽就會異常緊張，同埋一輸波就會開始好唔理智，好唔定。

差最後一個位置--右閘，大家都討論緊揾我定阿風，因為我地定位差唔多，都係技術唔係咁好，靠不斷補位同粗野攔截去力保不失，但礙於阿風今年GRAD，我都想佢開開心心踢埋今年，所以主動讓左個正選位比佢。但係柏洋就極力推薦我，因為後場如果加埋阿風，佢地踢法都係較為進取，一有波就會上。咁樣其實會唔夠人係後面應付前鋒同埋防守反擊，但Dickson就話，後場唔駛擔心，最多我同阿風一人踢半場。

我地果晚都傾左好幾個戰術，第一場既對手唔算太勁，但唔可以大意，因為如果輸左就會直接淘汰。成套戰術都係圍繞住樂仔同埋羊仔，其他人無咩事都盡量以不失波為宗旨，唔記得講個龍門，佢係臨時拉夫揾個人黎打龍，都好唔穩陣，甩手、屙蛋、斬唔起個波咩都齊。所以我地都有共識，唔可以比人單刀同埋遠射，唔好偷小便宜傳醫院波，猜後場，以防輸啲戇鳩波出局。

終於到左初賽既第一日，因為我地係第二場，所以循例都早到睇下人地比賽同熱下身先。仲記得果時係冬天，個人又特別緊張，我一除低件外套既時候已經凍到牙關不停震。無啦啦阿風同我講:

「拉坦，不如呢場你做正選啦，我都踢左咁多年，咩都夠皮啦，下半場換我出黎就夠。」

「頂！咁點解你琴日唔講，依家先講想嚇死人咩，我未有心理準備喎！」

「就係唔想你太早緊張阿嘛，輕鬆踢當平時練波就得架喇！」

之後，阿風就去揾莊員講聲，叫佢係正選名單落我名，自己放住係後備先。原來第一次比賽係咁緊張，平時踢波得自己人，後備都唔多個。今日一個細細既場，竟然有超過一百個人係現場睇，真係或多或少都會有壓力，好怕自己會派膠，踢得唔好，累輸大家。

好快我地就搞掂好哂所有程序，大家循例都會開波前每人射返腳，叫做係咁意搵返啲射門觸角。同埋係踢之前我地會有一個慣例，就係圍堆一齊搭住膊頭唱屬於自己HALL既歌，雖然唔岩音，好似唱緊詩歌咁，但係會有一種莫名既感動。

「WE ARE WE ARE WE ARE CHAMPION…」

寓意落到場大家就要盡全力，輸贏都好，唔可以留低任何遺憾。

樂仔同對面隊長係中圈握完手，再交由球證用銀仔擲公字，決定邊個開波，之後比賽先正式開始。

球證一吹雞，個波一眨眼就傳到我腳前，我毫不猶豫傳返比中堅DICKSON，好像要盡快掉走燙手山芋似的。踢落先發覺，原來比賽既時候同平時踢下街場真係好唔同，淨係旁邊有人望住你已經好大好大壓力。搞到我無波在腳既時候，都不停走位同埋DUM地，保持身體暖和同埋以防對面突破。
踢落就發現原來對面有個金毛MK叫做識識地踢，所以我地都有共識要MARK實佢，封住佢條傳球路線同埋長期揾人跟實佢。

另一方面，見到對面隊後防開始漏洞頻生，傳球準繩度都低左好多，有見及此，樂仔同羊仔決定逼搶，務求令對方後衛犯錯之後偷波。說時遲那時快，對面右閘斬波唔遠，比樂仔截住左，然後好巧妙同羊仔做左個撞牆，撕開左對方後防，再由羊仔一腳勁射破網，領先一比零。

「好似都唔係想像中咁勁啫！」我好似鬆左一口氣咁。

「上半場都未完，打醒十二分精神呀！」DICKSON保持一貫冷靜。

之後雙方都互有攻勢，但係都無法化成入球，最後球證吹雞，上半場結束。

下半場開波，兩邊都依然未有任何調動，但係對方好似睇得出我地進攻好單一，多數由樂仔同羊仔策動，而丙朗長期隱形，可以忽略。由人釘人戰術變成三打二，睇得出樂仔無論在控波同組織都變得更難，好少時間去作出決定，係傳球路線被封既時候，佢好難再同羊仔互傳，通常佢都會選擇個波通常都會傳返去後場先。

後場依然風平浪靜，對面前鋒金毛MK都無刻意去做走位同突破，好似保留氣力等待一個好既機會，我地都無鬆懈，一路都係我地視線範圍。比賽仲有大約十分鐘左右，丙朗同對面中場一個爭頂之後，個波直飛去左路禁區頂柏洋既前面，個波同大概有三個身位，但係柏洋無上前迎波，由得個波彈地，一下、兩下，突然間個金毛MK係一個意想不到既位置衝左出黎，個波滴到第三下既時候已經係柏洋面前搶走左個波，大家一時都未反應得切，只係見到DICKSON大嗌左句:

「唔好比佢攞到個波呀！！！！！！！」

因為係毫無預警之下，柏洋反應唔切，只能夠跟住佢尾，睇住佢推左個波入禁區。

「KEERER要出迎呀！」我同DICKSON同時叫左出聲。

但係已經太遲，金毛MK起腳射遠柱，龍門望塵莫及，我地只能眼白白望住個波直飛死角。球證哨子聲一響，一比一。

友HALL既支持者即時彈起歡呼
「GOAL！！！！！！！！！！！！！！！！！！！！！！！！」

另一邊廂，我地臉如土灰，丙朗忍唔住怒火講左句：

「柏洋你做乜唔迎波呀！彈珠台咩，由得個波彈彈下。」

「仲有十分鐘，我地仲有機會既！」DICKSON拍一拍手鼓勵返我地。

但係入左波之後，對面隊好似成隊都生猛哂，士氣方面此起彼落，我地猜起上黎已經無一開始果種穩定性，我地淨係想快啲入波，成隊波由密集型變做散開唔同角落，無錯係善用左空間容易組織，但防守效能亦都隨之而減弱。眼見對方有空位就射，射完一腳又一腳，僥倖既係唔係射斜就飛機，都未有對我地有直接既威脅。

我暗自盤算，如果繼續咁落去，因為場比賽無加時，會直接射十二碼決勝負，我地士氣又咁差，加上個龍門遠射都甩手，更惶論會識落地飛撲十二碼。所以我細細聲係DCKSON耳邊講左句，我地不如將條防線前進一格，用兩邊閘位作推進，以多打少，反正得返大約三分鐘，係時候放手一搏。

「但係...咁樣後防中空，得返我一個，好容易比人單刀返轉頭。」DICKSON似乎有點猶疑。

「我同你調位，我踢中堅，我相信你既進攻能力」其實我都無信心一個人係後面把關。

對面我地將條線推前左，因為場波就完，佢地想守和，都無意欲同我地對攻，反而將自己條線拉返後，想守和最後兩分鐘。大家都各召其職，樂仔負責背對住對面個中堅，丙朗負責拉開對面隻中場，等羊仔可以有更多空間同時間派牌。而DICKSON同柏洋就等待一個好時機直接爆落底出波。

就係咁，大概僵持左三至四球攻勢之後，對方守衛截住左傳比丙朗既波，準備反推，但係柏洋好快就截住左佢條路，仲順利出腳，搶走左個波，而岩岩丙朗既失誤，反而成為一個優勢，因為左路已經無人，柏洋順勢傳比係無人地帶既丙朗，對方中堅即刻衝上去截住丙朗推進，反而造就左樂仔，丙朗橫傳比樂仔之後，一腳勁射。

但係對方龍門都唔係省油既燈，僅僅救出，

眼見球證將隻哨子放在嘴邊，羊仔無喇喇大嗌:

https://www.youtube.com/watch?v=U7441IJxpig

因為對面一路都唔知樂仔好擅長頂頭鎚，所以我地刻意拉開左啲人，希望唔好所有人都逼係小禁區，對面揾左一個高大右閘MARK住樂仔，其他人就分佈係大禁區唔同角落希望可以搶到波之後即射。

羊仔將個放左係角球旗位，烏低身放定個波，再向球證點頭示意可以開波，全場既條氛都係呢球入面靜止左，靜到連呼吸聲都聽到，羊仔以一個完美既曲線斬左出黎，但係好似略嫌射高左少少，DICKSON馬上跳起，但係唔夠高，個波係佢個頭頂飛過左，正當大家都以為呢球無望既時候，樂仔係遠柱跳起，以一個出乎全場所有人意料既高度，順勢將個波頂左入網。

對面龍門根本反應唔切，只可以目瞪口呆咁望住個波入網。

「GOALLLLLLLLLLLLLLLLLLLLLLLLLLLLLLLLLLLLLLLLL！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！！」
球證隨即哨子聲一響，示意入球有效。
同時再以兩聲長嗚，宣告比賽結束。

我地再抑壓唔住大家既情感，觀眾、後備、同有份落場既隊友一齊衝向樂仔，我地抱起佢拋上天狂呼。大家都好似忘記左疲累，亦都忘記左比賽時大家既憤怒同埋不滿。係呢一刻，我真真確確感受到，咩叫熱血、咩叫激情，亦都親身感受到黃興桂既：
「嘩！！！！！！！！！！！四十多碼！！！！！神奇！頂級！超卓！」
係幾咁激動，幾咁有今生無來世。
https://www.youtube.com/watch?v=KucjH12EyNU

最後當然係暫時擺低對友HALL既敵意，同對方握手、一齊拖住手向對面鞠躬致敬。平心而論，其實對方都踢得好好，到後面啲氣勢真係逼到我地差啲抖唔到氣。特別係個金毛MK，令我重新審視左呢個人，之後仲一齊約過出黎踢下friendly，間唔中撞到都會打聲招呼傾兩句。

總算有驚無險晉級，大家賽後都表示話真係一額冷汗，好擔心逼和最後十二碼比對面淘汰。我地亦都知道，其實我地根本唔駛打得咁辛苦，除左有少少輕敵之外，隊友之間既默契都係其中一個敗筆，距離第二場仲有大約一個星期，相信我地要好好培養默契同埋要針對每個人既弱點黎加操。