呢度冇教主，冇組長，冇牧師，冇老師，只有幾位同工開下post，寫下分享，接待私下聯絡我地既朋友，歡迎有負擔既巴絲加入
同工名單：黎啦繼續等緊你（黎巴）、水豚君巴拿巴（水巴）、yellow
可以直接email 去我地度
lihkg.church@gmail.com
或者留低聯絡方式：
https://docs.google.com/forms/d/1Ho6ONb3U7uUMEdmTopoabbvE-n0WEZ0QtEgN46IA4Gk/edit?pli=1&authuser=6
我地暫計劃每兩星期會開一次post，聚焦一段經文進行討論
本團契旨在回歸初心，討論聖經，無意取代任何教會/堂會，只係提供一個網上聚腳點，求神使用
歡迎任何信左耶穌既弟兄姊妹或未信既朋友仔參與討論
今次我地個post係開係「講故台」，希望大家「聽故/講故，唔好駁故」
如果覺得有弟兄姊妹解錯經
，可以用愛心指正
，可以挑戰對方想法
，但要基於經文，切勿人身攻擊，最好聚焦核心經文本身，避免離題太多。亦都歡迎各位弟兄姊妹或朋友仔放低禱告事項，我地會為你地禱告，並出公禱文記念。
FAQ————————————
Q: 聖經是甚麼？
聖經分新約聖經和希伯來聖經
A:
客觀地講：
希伯來聖經係古代猶太文獻集，主要由律法書、先知書同智慧寫作組成，亦係耶穌在世上教導既基礎。
新約聖經係指使徒書信（用作牧養教導初期教會）、啟示錄、福音書（由使徒或者他們身邊既人寫既耶穌生平既見證）同使徒行傳，係耶穌在地上事蹟和初期教會發展的第一身見證。
信仰角度：聖經係神既話語
——————————-
Q: 聖經是否無誤？
A:
我地相信聖經真係神既話語，但唔一定全部係百份百歷史記錄。
例如創世記有好多類近神話既記載，就好似爸爸係床前講三國演義俾我聽，教我做人既道理（例如唔好學關羽咁驕傲），咁故事真係由爸爸講既，至於三國演義則不一定記錄左客觀歷史。
而新約福音書等對耶穌同初期教會既見證，就絕大部分都係真確既，雖然四福音書細節各有出入，但主要對耶穌的記載都是一致的。
當然一部分保守派基督徒信聖經一字一句都客觀上真實無誤，不過既然係開放吹水，無必要預設一個咁保守既立場。
所以今次我地開講故台，唔好駁故喇
——————————-
Q: 點解信耶穌係神？
A:
幾肯定係真既係：
1）在歷史上，耶穌被釘死在十架上(呢個係主流歷史學家既共識）
2）在歷史上，大量第一世紀基督徒為見證耶穌的復活自願殉道（冇人會為明知係假既野自願放棄抵抗咁去死，雖然間中有邪教徒痴左線玩恐襲或被誘騙自殺，但明顯係兩個nature)
3） 耶穌宣稱自己係神（上面既1同2，令我地唔相信佢係騙子或瘋子，唯有信佢係真既），並且大量第一世紀基督徒都係咁信
當然都有唔少對呢個推論既挑戰同質疑，但我地相信「耶穌係神」係最合理既推論，並且咁信。
為左避免玩泥漿摔角式辯論「耶穌是不是神」，呢度既討論，以「耶穌是神」為前設，想挑戰呢個命題請另行開post。
——————————-
Q: 聖經係咪俾人篡改過？
A: 冇證據支持聖經俾人有計劃地篡改過，間中有文士抄錯少少間中都可能會有，但由於聖經既傳播度極高，其實好難去收翻晒來改。唯一係邊本書納入正典，邊本唔入，有幾本有點爭議（馬加比一、二書、雅歌、希伯來書等），有幾本幾乎完全冇（四福音書、摩西五經等）
不過，我地都係鼓勵keep住「聽故/講故，唔好駁故」既精神，focus 翻係經文本身。
——————————-
Q: 你地係咩宗派？
A: 我地呢度唔強調宗派，歡迎新教、天主教、東正教既弟兄姊妹同任何有興趣討論聖經既朋友仔
只求大家互相尊重，唔好惡意引戰
對惡意引戰者，我地冇懲罰機制，只建議大家主動忽略佢地，俾佢地自己玩單機，或由佢地自己之間傾。
——————————-
Q: 乜野係團契？
A: 「團契」呢個詞，聽落好似好「教會」，但其實意思好簡單，就係一班人「團結相交」。英文叫 fellowship，而喺聖經原文希臘文入面，呢個字叫 koinonia，意思係 「夥伴關係、共享、相通」。
想像下，團契唔係上堂聽書，老師喺上面講，學生喺下面抄筆記。
團契更加似係一班朋友約出嚟打邊爐。大家圍住個爐，有唔同嘅食材（唔同人有唔同嘅經歷同諗法），一齊烚、一齊食、一齊吹水。過程入面有交流、有分享、有聆聽，最重要係有「同在」嘅温暖。
我地希望呢度就係一個網上嘅「電子打邊爐」，一個可以俾大家放低假面具，分享生命高低起跌，一齊喺信仰路上「掙扎求存」嘅地方。
—————————-
Q: 點解要搞「團契」？
A:
• 信仰唔係單打獨鬥： 淨係睇字、聽道，好容易變咗學術研究。但信仰從來都係關於「關係」——我地同神嘅關係，同埋我地同人嘅關係。耶穌都唔係自己一個傳道，佢揀咗十二門徒同佢一齊生活、食飯、周圍去。信仰呢條路，一個人行會好攰好孤單，有一班人一齊行，可以互相扶持，行得遠啲、穩啲。
• 文字辯論嘅樽頸： 我地發現，喺論壇用純文字去「辯論」信仰，好多時會變成泥漿摔角，大家精疲力盡，但生命冇乜得着。我地唔係要「贏」一場辯論，而係希望大家可以真實地經歷信仰。團契就係提供一個空間，超越純粹嘅理性辯論，進入生命嘅交流。
• 聖經都係咁教： 初期教會嘅信徒，佢地唔係各自修行，而係「恆心遵守使徒的教訓，彼此相交，擘餅，祈禱。」（使徒行傳 2:42）佢地係一個生命共同體，一齊學習、一齊分享、互相幫助。聖經又鼓勵我地要「彼此相顧，激發愛心，勉勵行善。」（希伯來書 10:24）呢啲嘢，齋睇post係做唔到嘅。
所以，我地轉變模式，唔係放棄講耶穌，而係想用一個更加真實、更加有血有肉嘅方式，同大家一齊經歷耶穌所講嘅愛同生命。歡迎你加入我地呢個「電子打邊爐」，一齊傾、一齊行！
——————————
Q: 我唔係基督徒，甚至可能係反對基督教，可以入嚟傾偈嗎？
A: 絕對歡迎！ 我地開呢個Post嘅其中一個目的，就係想大家認識一個更真實、更貼地嘅基督信仰，而唔係傳說中嗰個離地、刻板嘅「耶教」。
我地轉型做團契，就係唔想再玩「信/唔信」嘅攻防戰。我地更加想做嘅係：
• 真誠交流： 聽下你點解會反對，你經歷過啲咩令你有咁嘅諗法。
• 打破迷思： 俾你睇下基督徒其實都係普通人，一樣有掙扎、有軟弱、有喜怒哀樂。
• 建立友誼： 就算你最後都唔信，我地都希望可以喺呢度建立一份互相尊重嘅友誼。
唯一要求就係大家對事不對人，可以挑戰觀點，但唔好人身攻擊。我地相信，有你嘅聲音加入，會令我地嘅討論更加豐富同全面。
—————————
Q: 呢度同普通吹水台有咩分別？係咪一定要講聖經？
A: 呢個問題都好好。我地可以繼續用「打邊爐」嚟比喻。
普通吹水台就好似去Food Court，大家各自食自己嘢，冇乜關係。
我地呢個團契Post，就似一班朋友約好圍埋打邊爐。我地有個共同嘅「湯底」，就係「希望透過信仰嘅角度去理解生命」。
• 唔係下下講聖經： 你可以傾返工、返學、感情、打機、睇戲……任何生活大小事都可以。
• 但個心態唔同： 我地鼓勵大家喺分享生活嘅同時，可以試下諗多少少：「喺呢件事上，神嘅角色係邊？」「呢個掙扎，聖經有冇俾到啲咩智慧我？」
• 目標係生命成長： 吹水嘅目的係消磨時間，我地團契嘅目的係希望大家嘅生命可以互相支持、一齊成長，變得更似耶穌想我地成為嘅樣式。
簡單講，呢度係一個有主題、有目標嘅吹水台。個主題就係我地嘅生命，個目標就係一齊行呢條信仰路。
———————————
開始之前我地祈個禱先：我地係天上既父，我地求告你既聖名，你是那位創天造地，命立就立的那一位，感謝你俾我地有網上自由討論既空間。
求你親自牧養我地，我地明白世上除了耶穌，沒有一位完美既好牧者，一些牧者未能張你帶到眾人面前，倒使眾人受傷，求你賜眾牧者智慧去正確教導你的話語。又記念所有曾被教會傷害過既人，醫治眾人，又求你一如以往顯出奇妙既作為，用永不止息既愛感動我地，用忠誠守約既愛維繫我地，成全你既美意，奉耶穌基督既名，Amen!
有咩心事需要代禱，請放心交低，求神應允
是但打開聖經就知
咁你到底喺到討論緊啲咩？
