Q: 預設投資策略(DIS)應唔應該買?
A: DIS由兩隻混合資產基金組成,會根據你嘅年齡決定入面嘅股債比率。
其實DIS本身係一個幾好嘅投資概念,可以令懶人筆錢做到長期增值嘅效果。
但可惜DIS嘅股債比率係根據成員嘅年齡決定而唔係市況決定。
就算你係20歲嘅成員,
並唔代表恒指40,000點或PE25倍嘅時候都應該繼續持有股票。
換句話講,如果你將已經買落嘅iphone由$5,000炒到上$30,000,
你都會識得將一部份嘅iphone套現轉返做現金,再等候另一個timing入貨。
因此,股債比率應該先按照價值高低而唔係年齡而定。
Q: 點樣簡單啲去管理MPF?
A: 目前最簡單嘅管理可以直接將資金轉去china life嘅保證基金,
可以喺任何時間有不少於每年3%嘅淨回報。
或者睇市場嘅PE Ratio (市盈率)去改變自己嘅投資組合:
當股市去到相對較貴或者瘋狂嘅時候持有更多保證基金,
股市去到相對較低甚至股災嘅時候持有更多股票基金。
Q: 點解有啲人話保證基金好貴唔好買?
A: 講呢句說話嘅人係冇研究過保證基金嘅特性。
保證基金會分為硬保證(hard guarantee)同埋軟保證(soft guarantee),
前者唔需要符合任何條件,後者就需要符合一定嘅年期,
兩者嘅目的都係令資產可以保底賺到錢。
Q: 其實我唔想成日轉強積金公司,邊個計劃會好啲?
A: BCT平台上面可以選擇到嘅市場都幾廣泛,入面嘅收費同回報都比平均好。
比較過幾間強積金公司嘅Apps,暫時我認為BCT Apps嘅介面同操作比較方便。
除左透過佢地Apps轉換基金可以T+1內完成,
亦都可以用Apps直接睇到邊一隻基金賺左幾多或者蝕左幾多。
而且每月都會有手機短訊提示返你帳户結餘,提醒返你定期管理自己筆錢。