呢種諗法影響後嚟嘅存在主義大師──雅斯培、海德格，亦影響民國以嚟嘅中文世界，例如王國維、魯迅、陳獨秀、李石岑、仲有陳鼓應嘅老師方東美等人……結果，尼采喺晚年嘅預言——「我的時間尚未來到；有些人要死後才出生。」已然成真，尼采死後，不論係從後人嘅指責定係肯定，無可否認嘅係，佢嘅思想仍然深具影響。
點解尼采會掀起一陣風潮呢？咁我哋就要睇返陳鼓應所總結嘅尼采哲學特點——用「生命的眼光觀看藝術」。呢一種生命哲學其實要反思西方傳統哲學，尼采認為從柏拉圖哲學開始，就算去到康德都有以下特徵：
注入過多嘅神學血液（《反基督》（Der Antichrist）
依據邏輯推論作概念鋪陳，缺乏生命嘅活力
所以，佢喺《偶像的黃昏》（Twilight of the Idols）指出：「千年來西方哲學家所從事的思想工作都變成一種概念的木乃伊（Conceptual Mummies）。」而尼采本人，就係想為哲學灌輸生命力。於是，喺尼采嘅第一本著作，《悲劇的誕生》（The Birth of Tragedy）當中，佢喺解釋希臘藝術精神嘅時候，為藝術賦予生命力——靠住賦予意志嘅驅動力到酒神，賦予思維嘅清晰性到太陽神，從此以後，酒神式肯定人生嘅精神就貫穿喺尼采嘅所有著作之中，而讚頌生命亦成為作品當中嘅主調｛主軸？｝，例如喺《愉快的智慧》（Joyful Wisdom）當中講到：「生命是不停地將我們的整體轉化成光與火焰。」喺《查拉圖斯特拉如是說》提到：「生命是歡愉的泉源」、「世界如一座花園，展開在我的面前」（〈經典全新修訂版序〉）……因而，陳鼓應認為尼采哲學偉大嘅地方在於「把人的力量視為一切創造的本源，他歌頌生命、奮進與超越。在經歷傳統哲學唯理的獨斷觀念重壓之後，尼采的精神不啻是一種醒覺的訊號……」（〈前言〉）
