接二連三嘅喪親打擊，感覺好難走返出嚟

或者多d 同人講下你嘅感受會幫到你，有d 事你一講出嚟你會發覺原來身邊有好多人同你一樣/差唔多，未必可以解決到問題，但可能會覺得有人幫你分擔咗d 事會好d

既然慢慢接受左
就慢慢放低啦，唔容易但係人生本來就係要咁走落去
五年唔夠，就用十年
都唔夠就二十年
或者神有個安排比你，係需要你用呢啲年黎磨練
既然控制唔到，慢慢交托比神吧

我都見過啊 我果次親人走左之後係白色既飛蛾 隻野係幾靚架 平時屋企都唔會出現呢啲野
如果咁多人講走左之後會見到飛蛾 可能係個世界某種通知你既機制
我覺得唔洗特別信 只要你搵到幾個人可以驗證到比你睇啲野係存在 咁樣你就會開始意識到個世界背後可能就係咁離奇 太多野我地人類睇唔到了

唔識俾建議你 祝你好運

我好少同人分享，並唔係因為我覺得自己係最慘，而係我覺得每個人都有自己嘅苦惱，每個人生活都一定有困難。正因為咁，所以我先唔想多講自己嘅唔開心 我冇自殺嘅念頭，但有時會想忘記晒過去發生嘅嘢，放低所有嘢重新出發

睇你咁講即係仲未解決到個情緒問題，好認真咁講真係要去睇醫生
我唔知你依一刻算唔算有情緒病，但再惡化你唔係睇醫生就解決到，及早求醫

試吓睇youtube 講佛 蛀蟲米 我都係咁走返出嚟的。 加油bro

我認同你所講嘅需要耐性，但自問真係冇能力去信仰呢個所謂嘅「神」。死去嘅三位家人都係虔誠基督徒，結果到頭來佢哋就係咁樣話走就走，半句說話都冇留低俾大家。關於我媽媽嘅嘢就唔多講，反正死狀就係十分恐怖，我真係冇能力去信仰呢個所謂嘅「神」
但無論如何都多謝你鼓勵我！

確實有諗過搵返嗰位心理學家繼續跟進我嘅情況（感覺佢嘅建議係有幫助），不過佢已經移咗民

如果你去counselling 嘅話
佢其實都係會叫你接納你嘅負面情緒
因為呢啲係你實實在在嘅感覺
你愈排斥反而負面情緒會愈強烈
順其自然，問返自己：諗起又有咩問題呢？
反而有一日如果你開始諗唔起佢、發覺你哋相處過嘅痕跡開始慢慢消失，到時先最傷心

我細個都係爺爺湊大同住埋一齊，雙親早出晚歸，我係佢最細嘅孫女，所以佢好錫我，成日晨早陪佢同啲茶友飲茶，周圍去買餸，接我放學。當Family Dining時，啲親戚拎我嚟開玩笑時，佢會勁大力拍枱，然後鬧晒咁多個佢啲子女。佢嘅願望又係想睇到我畢業、甚至結婚。但我中五嗰年佢就肺癌離開咗我，最記得佢彌留之際，我連喊都比人制止，因為驚眼淚滴到佢身體令到佢唔捨得走。

人生係充滿大量不如意，因為人真係太渺小。但唔知點解望到佢遺體嗰陣，我有好強烈嘅感覺，佢離開咗我嘅只係肉體，而唔係靈魂。反而有啲嘢係一直留起你個心入面，經歷同精神。佢教你嘅嘢、相處嘅經歷只要你一直記得，一日佢起我心入面都無死過。因為，我仲記得佢、我帶著佢嘅一部分生存緊。

之前，我好易一有唔開心嘅事，就去爺爺個骨灰龕位喊同對住佢個碑起心入面同佢傾訴，直到攰、夜先返屋企。因為佢起心入面嘅地位無人代替到，同時間身邊好似無人明白我諗啲咩。但之後生活開始順利返小小，我發現自己可以由只係講唔開心嘅事變到講有咩開心嘅事，雖然佢過咗身係有啲遺憾，但個感覺似係我可以做到我同佢分享嘅動作。

所以我覺得每當你諗起佢
嘗試問返自己：諗起又有咩問題呢？
事實上佢對你嚟講就係咁重要
同時間佢喺天上見到嘅話，我相信佢已經見到你嘅努力同成長，佢雖然親眼睇唔到你畢業，但係睇到你好努力咁想為佢完成佢嘅目標、甚至都已經考到上大學。
我唔覺得佢會點傷心，反而會為你自豪

然後今年我爸爸又係癌症過身，我幾年前同佢嘈大交跟住一個月後我辭哂工就立即離開咗香港，佢發現就已經係末期，我立即飛返去陪佢最後時光，我哋講返開件事，事實佢完全無怪我。所以最近我睇《破地獄》喊到停唔到，類似邊有親人會怪自己子女，同時間我嘅名字都真係佢對我嘅祝福。

共勉之

好多謝你真誠嘅分享！一聽見你分享嘅經歷，就好肯定你所講嘅嘢一定係全部都係真實，因為你嘅感受唔多唔少都反映咗我嘅感受。關於你講嘅記憶與遺忘嘅問題，呢個都係我好糾結嘅地方。細個嘅時候同長輩有好多相處嘅回憶，有好多嘢係得我哋兩個先知道，當然都係一啲好開心嘅回憶。但而家諗起呢一啲開心嘅回憶，感覺就好似一把把刀感覺割去我自己個心度。我好想唔諗，好想忘記，但我又怕如果我唔成日得閒就諗一諗，慢慢整整吓真係會唔記得咗......而家呢個世界就得我一個記得呢啲事情，如果連我都唔記得埋，就真係好似乜都冇晒，乜都冇發生過一樣
所以我久唔久都會諗一諗返以前嘅嘢，確保自己唔會唔記得咗，但呢啲過程通常都係非常虐待自己

無咩鼓唔鼓勵
叫自己放低只需要一個念頭
叫自己放棄向前都只需要一個原因
都係比自己既一個選擇

多口提醒多少少
愛你既人你暫時唔可以再愛，就用時間黎愛自己，再去愛身邊既人
我哋無得㨂身邊人幾時離開，但係有得揀再遇到身邊人離開時不再後悔

我冇放棄過，我只係覺得好攰。當然無論學業定工作，表現好壞其實都係相對。但自問雖然比上不足，但比下絕對綽綽有餘。（我諗如果連學業同工作都頭頭碰黑，我應該真係會崩潰）
過去五年自問都好努力咁做好自己，好努力咁撐起個屋企。唔係冇試過同阿爸分享我嘅痛苦，但佢一句「你唔好講啲咁嘅嘢要我擔心」，我就覺得好似分享自己嘅痛苦都係唔應該，只會令到其他人都唔開心

bro你有冇去睇《破地獄》
建議你未睇嘅話可以入場睇
帶定紙巾大喊一場
尤其宜家入場人次未必有一開頭時咁爆
揀場少人啲嘅
戲院入面黑媽媽咁
盡地一煲喊爆佢嚟宣洩
喊完唔夠就返屋企繼續

主要係想講，戲入面金燕玲同衛詩雅段關係
雖然冇血緣，但絕對情同母女
金燕玲基本上頂咗衛詩雅喺戲入面過咗身先嘅老母嘅位置
但金燕玲身體唔好，又係有一日忽然就去咗
衛詩雅趕到時同佢搏命急救，但都救唔返
正正係你所講嘅一句說話都冇留低就走先
其實生死之事最難接受就係呢一點
如果能夠好好告別，就算真係得一句半句都絕對比無法告別為好

但生死呢樣嘢真係冇人掌握到
有時或者真係過程重於結局 (過程=你同對方本身良好嘅關係同緣份)

其實香港有好多，要搵唔難

有冇搵朋友傾過？有冇另一半？

其實只係你未搵到另一個更大既人生目標，當你遇到果陣你就唔會再諗返前面

試下咁諗
所以逝去既人都只係比你行先一步
總有一日你地會再見
現在既你係要好好生活唔好辜負佢地

人生就係咁 ga la
生離死別

依個係人生既本質

試下俾錢搵啲專業人士key，唔使理人點睇，有方法可以令自己好過啲就試下

其實….諗返開心嘅嘢其實唔係應該要開心㗎咩

你經歷好多其他人經歷唔到嘅嘢喎
正如有好多我同我呀爺嘅嘢，我呀哥、老豆老母都係完全唔知
之後講返比啲親戚聽，我係覺得幾sweet同幾自豪
因為我知道你哋唔知道嘅嘢，係我同佢嘅獨家回憶，你哋絕對唔會有

所以你諗真啲，你個腦其實係想你諗啲好嘅嘢，你同你親人嘅回憶應該係開心，難得有個人曾經對你咁好，咁點解你會覺得唔開心嘅？

我覺得你好大機會本身就定義咗諗返起呢個動作就係一件唔開心嘅嘢。所以就會立即怪自己、屌自己做咩又要諗返起，到最後甚至可能想shut down自己（我啫）。過來人嘅經驗，我曾經用記憶宮殿嘅方式，幻想自己將啲唔開心嘅記憶，鎖起一間房入面，鎖起一個櫃入面，鎖起一個箱入面。當你不停咁訓練，你係的確唔會諗起，但只要有人同你講起，你都係會記得返件事同有一堆強烈嘅負面情緒，到時候情況反而會再差啲。

所以我覺得你情緒當然有小小問題，不過而家呢個世界有又有咩咁出奇。同埋好大程度你定義咗好多嘅嘢，你定義自己好難走出嚟、定義自己諗返就係一件唔開心嘅嘢。個情況似你畫咗個圈圈比自己，你所有嘅嘢、思想都只可以起圈圈內進行。

所以我先不停強調話比自己聽諗返起又有咩問題，接受、唔好排斥諗返起呢個動作，因為你根本無辦法唔諗，
。最近聽咗個講座，話人係控制唔到情緒，反而係比情緒控制，心理學有個經典例子，叫做「粉紅色的大象」，有類似有個人具體形容咗隻粉紅色嘅大笨象，然之後叫人唔好諗，但其實愈叫自己唔諗，你就會不停咁諗。

https://www.instagram.com/moodies_care/p/C9cYQRjyRNV/

睇黎呢位長輩對你的成長影響好深

佢無機會睇你戴四方帽
你會覺得遺憾 會對自己失望
係人之常情 呢個亦都唔係你既錯
事實上 你順利完成到你既學業
五年後仍然未有忘記親人
你已經做得足夠好

你唔需要將佢放底
如果你有佢一幅相 或 留比你既物件
你可以試下整成一d 掛飾/擺設品
製成精神寄託物品

形式其實唔係最重要
重要既係你要比自己知道
佢雖然離開左 但你既內心並無放棄佢
只要你記憶仍在 精神上你就與佢同在

你可以籍著精神寄託物
同佢分享你既生活感受
訴說日常面對既困難
回想佢對你既教晦
佢會點樣處理相同既難題

你唔需要忘記傷痛
但仍然可以繼續前行
正正係呢種傷疤
印證佢永遠係你內心最重要既人之一
同時提醒你 佢既精神與你同在
無法取代/抹除

最後想講
每一次既負面情緒湧現
其實都是一種自然療傷
如果可以的話
搵一個寧靜安全既地方
讓佢自然療傷

你好!
在你的文字中感受到你正面對着很大壓力和痛苦。自己一個人承受着，真的不易。如果你不介意，讓我們陪伴你一會，好嗎?
你可以進入網站內的『Chat窿』 https://chatpoint.org.hk/ （星期一至五：下午4時至凌晨1時；星期六、日及公眾假期：晚上８時至凌晨１時），和我們的義工傾傾吧。

我們願意聆聽你的心聲，伴你一起走過這段艱難的時候！