我地常用既"酒精" 主要係 乙醇ethanol / ethyl alcohol 或者 異丙醇propan-2-ol / isopropyl alcohol。
毒性：兩隻都有毒（冇毒點殺菌），要計就異丙醇勁少少，所以飲用類酒精都只會係乙醇。正常有通風環境之下，用邊一隻都唔會有大問題（除非你直接飲）。
揮發性：乙醇會快過異丙醇，所以消毒用酒精多數會用異丙醇（亦都因為成本平少少），可以停留喺被消毒位置耐少少。按揮發度，乙醇可以當係快乾thinner，可以用黎開金屬色；異丙醇就係普通thinner，開所有色同洗工具都啱用。
對塑料傷害：兩種基本上係一樣，接近冇傷害。係要留意高濃度（＞80％）加長期接觸（浸泡）就會有基會軟化/溶PVC。因為酒精係會揮發的，用於油漆中的酒精可以話對塑膠係完全無傷害的。
純度百分比：兩隻都一樣，市面上一般都係75％同99％。市面買到既酒精都係溝水（有啲會標榜用靚啲既水
）。由於酒精非常容易揮發，所以就算標75％，其實多數唔足數（唔排除制造商專登畀少啲）。我覺得，多多少少幾個%就無論消毒定係當thinner 用都冇乜大影響的，反正都係水同酒精兩樣野。另外提一提，90％以上既酒精消毒反而唔夠60-80％既酒精好。90-99％一般只係醫療或者科學上用（用黎稀釋）。99％因為叫做唔含水，所以都有金屬色類既"水性油" 會要求用99％乙醇黎做稀釋--AV Metal color。
