上季港超聯盟主理文，今季新陣容一直備受關注，中場夏馬特的加盟，更惹來大量討論。「伊拉克國腳」、「踢過德甲」、「瑞典青年軍」等銜頭無疑令球迷期待值飆升。憑此亮麗履歷闖蕩港超戰場，夏馬特形容自己準備好迎接新挑戰，勢要助理文開拓「新皇朝」。
聯賽封王的理文，今季除肩負衞冕港超重任，更要出戰「亞冠盃2」。曾效力多間歐洲頂級球會的夏馬特認為，在瑞典效力哈馬比期間，長年視爭標為必然任務，對球隊的爭勝心感到熟悉及理解：「加盟前已經知道理文目標係聯賽冠軍，亦知我哋要踢亞洲賽。雖然今季挑戰幾大，不過以前我喺瑞典踢波同樣以爭冠為目標，心態上冇乜大分別，首要任務係幫球隊衞冕聯賽，至於『亞冠盃2』就梗係想贏波，落力踢好每一場，希望搶到出線資格。」
夏馬特自16歲開始，8度入選瑞典國家隊，回望過去他坦言：「我十幾歲已經入選國家隊，成為職業球員冇幾耐就簽咗瑞典最大嘅球會，開始得幾順利。」雖然夏馬特「贏在起跑線」，但他從未停止挑戰自己，更勇於跳出舒適圈，隻身前往南韓落班，上季加盟泰國球會烏泰他尼，上陣25場交出7個入球。
今季轉戰港超，對夏馬特而言可謂大膽決定，原來早於2019年效力仁川聯期間，夏馬特曾與前港足主帥安達臣共事，及後「安帥」一席話令他決心加盟「黃黑軍團」：
「安達臣係位出色嘅教頭，雖然我哋合作時間唔長，但一直保持聯絡，佢對香港有讚冇彈，又介紹理文嘅背景畀我，讚呢間球會運作極之專業，種種因素加埋畀到我好大信心。」夏馬特笑言自己很滿意將軍澳的環境，非常適合居住和方便：「將軍澳附近環境好靚，我呢排好鍾意喺海傍跑步，真係幾正。」
曾效力德甲賀芬咸、瑞典哈馬比及比利時標準列治等歐洲大球會，夏馬特形容理文踢法接近泰國聯賽風格：「無論天氣同比賽局勢，泰國同香港都幾似，例如喺下半場中段開始入局，攻勢會變得緊湊，同時注重快速反擊同組織，尾段往往出現關鍵入波，呢啲元素令我比較容易適應港超節奏。」
監牢中出世難民變國腳
以外援身分在亞洲打滾多年，夏馬特全靠父母背後的支持，令他敢於追夢：「我5歲開始踢波，17歲就離開屋企打拼。我會珍惜每個機會，足球對我嚟講唔單止係一份職業，仲令我可以報答父母，等佢哋過更好生活，係足球賦予我新生命。」
夏馬特在母親肚裏時，其雙親因戰亂被逼離開故鄉伊拉克，流亡莫斯科後又被關押監獄，令夏馬特在監牢中出世，2歲時再以難民身分移居瑞典，夏馬特才得以實現職業球員的夢想，輾轉成為國腳級球員：「阿爸當年打仗中過子彈，千辛萬苦先去到瑞典，父母一直係我嘅榜樣，希望佢哋會為依家嘅我自豪。」
夏馬特的「非一般經歷」，令他決心回饋社會：「我依家擔任非牟利組織Genaration pep宣傳大使，呢個係由瑞典皇室建立嘅一個組織，鼓勵低收入家庭嘅兒童接觸運動，我自己係過來人，所以都想出分力。」球場內夏馬特不斷迎接挑戰，球場外協助下一代跟上成長路，將足球力量帶到更遠之地。
https://hk.on.cc/hk/bkn/cnt/sport/20240916/mobile/bkn-20240916200529532-0916_00882_001.html?fbclid=IwZXh0bgNhZW0CMTEAAR1_gMyFcU50tmydWjXsvNFs1bqV5sd92xvP_AnKBu9YBJBpgdk__LT11UQ_aem_GPyimOEgPZavdI3cEwas5Q
