以下內容錄譯於一段2023年12月上載於YouTube嘅訪問(一次訪問分成兩個片段)
係一位好鍾意漫畫《王者天下》嘅日本藝人吉村崇訪問一位日本漢學家
無論你係對歷史有興趣、鍾意睇《王者天下》、睇開日本綜藝識得吉村崇都歡迎睇
純粹分享 並非推銷史觀
係我過去唔知幾多日瞓唔着累積嘅產物 預咗冇咩人理 但畀我將呢龐大嘅積聚
原諒啲文字冇乜點潤飾
首先介紹少少背景資料
《王者天下》(原題:Kingdom)
係日本漫畫家原泰久以戰國末期為舞台 描繪少年時期嘅李信及秦王政嘅故事
並且有改編為動畫同埋真人電影 由山崎賢人、橋本環奈主演
渡邊義治
早稻田大學理事兼文學學術院教授 三國志學會事務局長
專門研究古典中國及儒學
吉村崇
搞笑組合平成野武士古武士成員 活躍於電視界
以出位破格作風走紅 有「破天荒」綽號
呢個訪問係for唔熟知中國歷史嘅日本人 尤其係《王者天下》讀者
所以唔好特別抽秤主持人太初級 畢竟對於人哋嚟講唔係本國史嚟
第一章:用新觀點看中國史的漫畫《王者天下》
吉「其實我係由《王者天下》認識到秦呢個國家當然喺教科書度有學過 要講嘅話係一開始鍾意三國志再返轉頭呢本漫畫作為契機咁鍾意呢段中國最初嘅統一國家歷史
教授請問你有冇睇過《王者天下》?」
渡「有 我好努力咁有睇晒」
吉「真係?咁真係開心喇!我都係第1次同教授世代嘅人傾《王者天下》」
渡「始皇帝嘅秦國係點樣嘅國家其實冇乜點被好好咁描寫過 有都係負面多」
吉「我對佢嘅印象都係咁最後傾盡全力起萬里長城 搞到民不聊生 記憶中喺學校就係咁樣學嘅」
渡「係 之後有一個叫做漢嘅國家持續咗400年喺漢嘅時代去編纂秦嘅歷史 所以無可避免會將秦寫得衰啲
就係咁所以始皇帝都被寫到非常之壞 大多數都係有咁嘅睇法
而《王者天下》呢部漫畫就從另一個角度去描寫 所以我覺得相當之有意思」
第1節:為何「始皇帝」受歡迎有人氣?
吉「請問教授認為點解而家秦始皇帝呢個角色會咁受歡迎嘅?突然間人氣上漲咁」
渡「其實呢 有一個叫做”大一統”嘅思想 以統一狀態為尊呢個係而家中華人民共和國政策嘅基本嚟
即係話不認同西藏、新疆維吾爾、台灣等等獨立 要”維持統一” 喺要講呢樣嘢嗰陣用三國志咁樣嘅分裂時期嘅話就會唔太政確」
吉「原來係咁!」
渡「咁一諗到邊個係第1位統一中國嘅呢 始皇帝呢個人物嘅評價就會提高 呢個大概係現代中國基本嘅睇法」
吉「咪住先即係話秦影響緊現代中國?係唔係咁」
渡「所謂”歷史學”就係指點樣將”現在”放喺咩位置 有句說話講”所有嘅歷史都係現代史”
即係話而家嘅我哋點樣生活緊 就會反映喺對歷史嘅睇法上」
吉「好有意思!」
渡「重有就係日清戰爭(甲午戰爭)嘅清 呢個係最後一個王朝 佢支配住非常廣大嘅領土
呢個清 重有唐等等 有呢啲非常強力嘅國家 對現代中國嚟講往往都好推崇」
吉「咪住先 當然我都有喺教科書度學過唐 即係話今後會有用唐做背景嘅漫畫出現嘅可能性?10年後或者」
渡「都係㗎 唐王朝嘅異民族統治政策非常行之有效 應該會有唔少可借鑑之處」
吉「嘩頭先個咁簡單嘅問題教授已經可以答到咁多嘢實在太犀利!真係令人高漲起嚟!」
渡「見笑喇我哋世代大多都係睇三國志 三國志其實喺日本都受到廣泛閱讀
如果講唔係專門研究嘅學者 講普通人嘅話 日本人可能更熟悉三國志多啲」
吉「喔乜原來係咁?!」
渡「日本嚟講吉川英治嘅”三國志”、橫山光輝嘅漫畫”三國志”等等嘅作品相當普及
重有就係毛澤東對曹操嘅評價好高 同我同世代大多數人都有睇三國志
曹操嘅人氣幾高 但劉備就麻麻 邁向統一方面嘅積極性上有幾高嘅評價
不過曹操喺赤壁之戰度輸咗統一唔到 而始皇帝就成功統一到 所以而家對秦嘅評價都高啲」
吉川英治嘅《三國志》改編自日本人湖南文山改編自羅貫中《三國演義》嘅《通俗三國志》
橫山光輝嘅漫畫《三國志》改編自吉川英治嘅《三國志》
吉「原來係咁 即係話勁多一籌 因為統一到」
渡「冇錯」
吉「唔好意思呀導演 講講下講咗三國志本來都冇預到咁
橫掂都係我問多樣三國志嘅嘢 喺我嘅世代嘅話係蜀嘅人氣高啲
點講好呢 即係受人民愛戴 雖然國力唔夠 但盡力抗衡曹操
原來而家唔同咗」
渡「主要係強調”忠”同”仁”等等
其實劉備應該係一個好厲害嘅僱傭兵隊長咁嘅人嚟 但喺《三國演義》嘅世界入面幾乎咩都冇做過咁」
吉「乜都冇做過 弱雞一隻」
渡「好似只係負責喊咁
包容部下 並以此嚟扶助自己 呢個係”東亞理想領袖形象”嚟
而家嘅中國 已經變成一個大家唔一直迫向前就會跌落嚟 好似電梯咁嘅社會
所以要不斷前進前進前進進 咁嘅話好似劉備咁”退一步”嘅領袖就會唔受推崇」
吉「原來係咁 所以好似曹操、始皇帝咁樣前進前進前進嘅人就會推
日本歷史嘅觀點咪好多反省嘅」
渡「哈哈哈好多反省」
吉「話唔可以好似信長咁 唔可以好似邊個邊個咁 一得寸進尺就會跌返落嚟等等
好多都係反省」
渡「話唔定呢方面都係民族性嚟」
吉「中國好似比較少呢種觀點」
渡「呢樣嘢都幾有意思」
第2節:為史實「加肉」的樂趣
吉「可能係受《王者天下》或者遊戲等等嘅影響 而家好似有唔少女性都對”中國史”有」
渡「冇錯係 呢方面我好感激
我嘅講座以前幾乎清一色都係男性 而家多咗唔少女性真係好」
吉「女性都開始對歷史有興趣」
渡「其實由吳宇森《赤壁》嗰陣都係咁 製作方都將女性角色放得比以前重
《王者天下》都一樣有好多女性角色作戰 呢啲基本上就唔合史實嘅
不過咁樣增加趣味我認為都唔錯」
吉「 咦即係教授你係唔係全部都知?”呢個武將真實存在過” “冇呢個人喎 係創作嚟”係唔係都會知?」
渡「秦嘅史料其實唔多 比起漢有好多詳盡記錄 所以創作成份都會非常多
會諗”原來喺呢個位可以咁樣加肉” 都係一種樂趣嚟」
吉「喔喔 即係又會有另一種唔同嘅睇法帶嚟嘅樂趣
我就好單純地享受個故事去諗”原來係咁慢慢逐步統一嘅” 而熟悉歷史嘅人就係諗 “原來可以咁樣寫”
因為實際上係唔會知歷史上佢哋個陣佈成點點樣郁」
渡「喔佈陣嗰方面 嗰啲咩咩咩陣法等等」
吉「係囉 嗰啲咩咩咩陣實際係唔係真係咁擺咁郁歷史書唔會寫晒出嚟」
渡「的確唔會每一步都有寫」
吉「所以就呢啲位”加肉” 點呈現點拍個場景 咁嘅話的確又係睇嗰陣嘅樂趣之一嚟」
續