瘋狂鏡粉大戰食人喪屍

（6）

過往嘅頒獎禮投票係用電話登記投票，嗰班鏡粉為咗催谷自己嘅偶像，每次都動用大量太空卡去投票。

雙葉電台今次決定杜絕呢種情況，於是要求每個投票人登記電話號碼之餘，亦都要登記埋個人姓名以及身份證號碼。

咁理論上，一個人應該只可以投一張票。

不過俗語有話「你有張良計，我有過墻梯」，一班鏡粉好快就發現咗一個漏洞。

佢地搵到一啲過咗身嘅人所留落嚟嘅身份證副本，然後用太空卡再加死者姓名，以及在生時嘅身份證號碼，結果居然可以成功投票。

出到「死人票」呢一招，完全就係copy咗四年前美國大選拜登贏特朗普嗰招。

發現咗呢個方法之後，佢地靜靜雞不斷出錢，去收集嗰啲死人在生時嘅身份證號碼。

假如你搵到阿爺阿嫲生前嗰張身份證嘅資料，隨時有可能賣到六七百甚至一千蚊。

然而除咗出茅招之外，班鏡粉亦都會去擺街站，親自上街幫偶像拉票。

八月份天時暑熱，薑毛嘅fan屎「老薑」呢日就拉大隊，嚟到旺角彌敦道擺街站。

咁啱得咁橋，佢地遇著一班「方濟各」又喺對面街擺檔。

呢兩派人一直都係死對頭，大家都睇大家唔順眼，好在依家隔咗條馬路，佢地先至唔使爭位。

身為老薑嘅Amy，今日都有嚟到拉banner、派傳單。

每一張傳單上面都有個QR Code，只要用電話scan一下，再填上個人資料，咁就會投到票俾薑毛。

Amy一邊派發傳單，一邊拉票：「懇請大家投下薑毛一票！讓我地用行動去支持一個咁善良嘅人，繼續喺舞台上發光發熱！」

同時喺另一邊廂，企喺對面街嘅一班方濟各，手持住大聲公，呼籲大家支持教宗。

「請用你地神聖嘅一票，支持值得支持嘅人！請投我地教宗一票！」

「真正值得支持嘅人係我地嘅薑毛！」

「我地教宗跳舞勁唱歌叻，如果佢退出娛樂圈嘅話，將會係樂壇一大損失！」

「論實力，我地薑毛先係第一！」

「支持教宗！教宗Number One！教宗無得頂！」

兩派嘅支持者隔住成條馬路喺度鬥大聲，呢刻幾乎成條彌敦道都聽到佢地把聲。

酌量酌量

起初雙方都只係嗌下支持口號，後尾嗌下嗌下就變咗隔空對罵。

「死肥嘢，成舊番薯咁，唔好再留喺娛樂圈度獻世啦！」

「肥有咩問題呀！肥得嚟可愛咪得囉！好過嗰啲死乸型，姣屍燉篤，見到就眼冤！」Amy同一眾老薑出言反駁。

「你地插盲自己對眼咪唔使眼冤囉，死八婆！」方濟各反駁對方嘅反駁。

「果然有咩偶像就有咩fan屎，無啦啦話人死八婆，一啲家教都無。」

「話你地八婆咪算好口囉，實際你地只不過係一班臭…」

「臭咩臭！你地想講咩啊！」

「講咩唔得呀八婆！」

「頂你個肺！真係忍撚夠你地啦！」

兩派人馬激動起上嚟，完全唔理馬路上面嘅車，一齊衝出去路中間，準備想開拖咁款。

咁啱喺呢個時候有兩個差佬行咇經過，見到班老薑同方濟各紮恆曬馬咁，即刻上前分開佢地。

但係班老薑同方濟各群情洶湧，擋都擋唔住，成班人摞埋一舊大打出手。

插眼、扯頭髮、掹衫，果然女人打起交上嚟， 真係仲狼過男人。

喺混亂之中，嗰兩個差佬被撞跌落地下，最後警方要出動到成個旺角嘅警察，先至平息到呢次街頭大戰。

呢單嘢即日就上咗熱門新聞，依家基本上成個香港都知道鏡粉內部分裂。

雖然佢地內部不和呢啲其實都唔係咩秘密，但搞到要開片就應該係第一次。

為免再出現同類情況，警方要求呢類拉票活動，事前必須要申請不反對通知書，並且規定要留喺由官方安排嘅指定地方拉票。

儘管拉票活動多咗限制，但並無影響到歌迷支持偶像嘅熱情。

各個fans club依然四周圍拉大隊，走勻十八個區幫自己支持嘅鏡仔拉票。

嗰種動員力同熱鬧程度，可以話比得上當年嘅立法會選舉。

（7）

投票活動進行得如火如荼，與此同時，鏡仔就馬不停蹄出新歌。

錄音唔同唱live，所有嘢一定係tune好曬先出街。

所以絕對唔會出現任何走音、或者唱得唔好嘅情況，於是就唔使擔心聽到啲人變喪屍。

如經理人草草一早計劃嘅，先係十二個鏡仔出團歌，然後就到I仁、雀巢安同教宗出solo，最後輪到薑毛準備出佢嘅個人單曲。

薑毛揸住杯可樂，施施然咁行入錄音室。

負責錄音嘅監製做出OK嘅手勢，示意佢可以開始錄音。

薑毛放低罐可樂，對住支咪，揸住份歌詞開口唱：「蒙著嘴說作品的說話~Dear My friend~」

「Sorry阿毛，你說話個『話』字flat咗，可唔可以高返半個key？」監製提點薑毛。

薑毛點一點頭表示明白，然後再唱一次：「蒙著嘴說作品的說話~~~Dear My friend~」

監製都係唔收貨：「你個『話』都係唱得唔啱，再嚟一次，今次你淨係單獨唱個『話』字就得啦。」

薑毛有啲唔耐煩，但都照樣唱多次。

後來試咗第六七次佢都係唱唔到，監製再叫佢唱多一次，呢個時候佢條氣就好唔順：

「喂！個字唔啱音，你咪tune到佢啱囉，使唔使我唱咁多次？真係麻鬼煩！」

「……」監製無出聲，只係做咗個無奈嘅表情。

咁薑毛其實講得無錯，呢個年代嘅錄音設備非常先進，就算唱嗰個唱得唔好，但只要肯花少少功夫，就可以tune返靚啲聲。

唔知係咪因為tune聲tune得太多，搞到依家好多歌手一唱live就現形。

「我好口渴，我要抖一抖，陣間先再錄。」薑毛揸住罐可樂行出錄音房。

佢攤喺梳化，大大啖咁飲咗兩啖可樂，跟住拎起電話，對住錄音室影咗張相。

之後佢將張相po上IG Story。

Caption寫住：可能是我的最後一胎了（哭哭表情）。

有留意開嘅人應該都知，薑毛每出一首歌都用「一胎」嚟形容，呢種講法係就係有啲奇怪，不過佢啲歌迷就好buy。

原因有可能係佢嘅歌迷大部分都係上咗年紀嘅女性，所以用個「胎」字，就可以喚醒一眾老薑內心強烈嘅母性。

飲完罐可樂，薑毛繼續錄音。

呢次監製好鬆手，薑毛只係唱咗半個鐘就錄曬成首歌，到咗下晝佢就順便去拍埋個MV。

到首歌正式推出，前後都只係用咗三日時間。

首歌好唔好聽，呢啲係好主觀，不過數字就係客觀嘅。

之前I仁、雀巢安同教宗嘅新歌一出，一日之內就過百萬點擊率。

薑毛呢首新歌都唔例外，只係半日時間就霸佔曬各大音樂排行榜嘅首位。

相反，鏡十二人一齊出嘅嗰首團歌，過咗成個禮拜都係得三十萬views，完全比唔上個人嘅單曲。

依家距離投票截止仲有兩個禮拜，經理人草草本來計劃喺月尾，幫十二個鏡仔搞十場告別演唱會。

問題係今次全民投票，令到鏡粉內部四分五裂，成班人面阻阻，到時見到面隨時又打交。

再加上當局暫時仲禁止緊鏡公開表演，於是草草決定唔搞演唱會，改為搞「告別見面會」。

唔唱歌唔表演，淨係影相同握手，不過門票嘅價錢卻唔平。

由最低1088，到最高嘅Vip 8888，場次以日計，每日分早午晚三場，一次見面會為時兩個鐘，反應好再加場。

結果門票一開買，無論平飛定貴飛，全部一下子就被搶購一空。

薑毛同教宗嘅飛賣得最好，本來佢地各自開十場，家下要加到十八場。

其次就係雀巢安同I仁，各自開到九場，何b仔同煙傾分別都有六場。

至於剩低嘅嗰六位無乜人氣嘅成員，每人只係開到兩至三場。

同開演唱會唔同，搞見面會唔需要book亞博、麥花臣呢啲表演場地，只係需要去酒店求其book個宴會廳就得。

對公司嚟講，幕後成本下降咗，得到嘅收益就大幅上升。

其實經理人同兩位公司高層，早就睇得出鏡嘅人氣有下滑嘅跡象。

家陣有單咁嘅嘢俾佢地攞正牌㩒住掠，將十二塊鏡僅餘嘅價值都榨乾榨淨，對佢地嚟講，今次無蝕到之餘，反而仲賺到突。

唯一擔心嘅係，日後唔知仲可唔可以捧多一隊男團出嚟，繼續幫公司搵錢。

不過呢啲都係後話，依家有錢就梗係執咗先，以後嘅嘢以後再算。

推先~

推 好detail

唔好特登為加而加啦
咁加嘅肉戲通常都...

入境處職員發大財
會唔會班喪屍入面有人係入境處做

錄音室啲staff根本天選之人，聽咁耐都冇事
定根本係要一齊唱先出事？

應該會加少少喺啲唔覺眼既地方

強烈要求薑毛硬拼教宗

SLS G 持

大大力推下

薑同草草

（8）

眨下眼，時間就嚟到投票結束前嘅一日。

呢日同時係教宗告別見面會嘅最後一日。

現場嚟咗接近一萬名方濟各，佢地全部都好唔捨得教宗。

「嗚嗚~~教宗，我地會全力投票支持你，唔會俾你走架！」

「你一定可以繼續留喺舞台，繼續為我地唱歌跳舞，帶歡樂俾我地！我地呢班方濟各會永遠支持你！」

「呢個唔係你嘅告別會，因為你一定會贏！所以教宗你要撐住啊！」

在場所有歌迷都喊曬口咁，向教宗表達出無比嘅支持。

教宗見到自己嘅歌迷咁支持自己，不禁都流下男兒淚。

「多謝你地咁支持我…我應承大家…無論結果係點…我都會記得每個支持過我嘅人…」佢一路講一路喊，喊到個妝都花曬。

總而言之，呢刻嘅場面非常感動。

同一時間，鏡團另外嘅成員，包括薑毛、雀巢安、I仁佢地都喺其他酒店嘅宴會廳，分別搞緊告別會。

場面同樣都係十分感人。

雖然每個鏡粉都唔希望自己嘅偶像退出娛樂圈，但現實係殘酷嘅，十二個人入面只有兩個可以留低。

亦都有可能一個都不留。

皆因喺一班反鏡人士嘅聲浪之下，投票除咗可以投十二個成員之外，後來亦都加入咗「十二個人全部foul走」呢個選項。

因此投票結果變得更加難預測。

個故好貼地

真名唔係Anthony?

踏正凌晨12點，所有鏡仔嘅告別會正式結束，與此同時，全民公投亦都正式喺呢一刻截止投票。

投票結果將會喺聽日朝早十點公佈。

無論係鏡仔定係鏡粉，佢地嘅心情都係十分之緊張。

佢地所有人都期待住聽日公佈嘅投票結果。

鏡仔喺度諗自己有無機會留低。

鏡粉就諗假如自己嘅偶像落選，咁下一步應該採取咩行動。

所以基本上佢地無人瞓得著，個個都係眼光光等到天光。

第二朝未夠十點，經理人草草就call齊十二個鏡仔，嚟到上環一間酒店嘅會議室，一齊等待投票結果。

雙葉電台將會喺早上十點正，以聲音同視像同步公佈結果。

而各個成員嘅fans club一早已經吹恆雞，號召所有歌迷上街支持，為自己嘅偶像壯大聲勢。

薑毛嘅fan屎唔瞓覺天矇光就嚟到銅鑼灣霸位。

佢地人山人海，逼爆咗成個銅鑼灣。

至於成千上萬嘅方濟各就佔據喺灣仔一帶。

假如從高空望落去，相信會見到成個銅鑼灣至灣仔一帶，每條街都企滿曬密密麻麻嘅鏡粉。

老薑同方濟各呢兩大陣營，再加上雀巢安嘅歌迷，全部聚集喺港島。

另外I仁、煙傾仲有其他成員嘅fan屎，就散佈喺九龍新界各處，例如係尖沙咀、旺角、將軍澳等等。

無論係邊個fans club嘅陣營，佢地全部都係拉起橫額，手持燈牌，大聲高叫口號支持自己嘅偶像。

見到有咁多人走上街頭，警方早有準備，特別加派咗人手喺各區維持秩序。

相信喺呢一個moment，有超過一半香港人都等緊結果公佈。

只不過曾經變成喪屍嘅阿華、志偉同Eric，就未有閒情睇直播。

自從佢地咬死老細之後，就變咗失業人士。

失業嘅初期佢地都有心情嘻嘻哈哈，但到後尾要去搵工嗰陣，佢地先發覺家陣原來係咁難搵工。

今日出住咁多，聽日會有喪屍現身

呢個故癲得嚟有種大人嘅唏噓