瘋狂鏡粉大戰食人喪屍

（故事純屬虛構，如有雷同，實屬巧合）


（1）

「鏡」，係當今娛樂圈最紅嘅男子組合。

佢地有一班瘋狂嘅fan屎，人稱「鏡粉」。

只要有「鏡」出現嘅地方，現場就必定有一大班「鏡粉」到場支持，風頭可以話係一時無兩。

只不過，呢隊當紅炸子雞，如今卻面對住一次重大嘅解散危機。

一個唔好彩，佢地甚至有可能永遠退出幕前。

究竟發生咩事？

咁就要由今年度一次音樂頒獎典禮講起。

喺一眾鏡粉嘅大力支持下，「鏡」基本上橫掃曬各大頒獎典禮嘅獎項。

當日喺頒獎典禮上，「鏡」嘅12位成員上台接受獎項，並即場獻唱。

身為偶像派男團，佢地最大嘅賣點並唔係實力，而係努力。

但唔知係咪因為身體抱恙，定抑或係場館當其時嘅冷氣太凍，凍親佢地嘅聲帶，導致到唱歌嘅表現比平時更為失準。

老實講，唱歌走音、跳舞甩beat呢啲其實早就見怪不怪，不過奇怪嘅係，喺同一時候，台下面發生咗一件極唔尋常嘅事。

「鏡」唱歌唱到中途，現場有一部分觀眾突然狂性大發，好似變咗喪屍咁，擘大個口周圍咬人。

開頭大家以為係主辦單位安排嘅特別節目，所以無一下子反應過嚟。

尤其係班鏡粉仲睇得好投入，不停吶喊歡呼，掩蓋曬身邊驚慌痛苦嘅尖叫聲。

直至後來場面越嚟越失控，在場人士先意識到事情嘅嚴重性。

台上嘅十二人立即停止表演，匿去後台暫避，至於台下嘅觀眾以及歌手則紛紛四處躲避。

由於頒獎禮有電台同電視同時轉播，因此除咗會場之外，喺其他地方收聽收睇嘅觀眾之中，亦都有人變成喪屍，到處咁咬人。

面對突發情況，警方即刻調派人手，保護市民，但由於喪屍數量眾多，而且分佈各區，所以一時之間就連差佬都搞唔掂。

正當所有人都以為情況會繼續惡化落去，點知一個鐘之後，嗰班失控亂咬人嘅喪屍，忽然間又恢復返理智，變返做一個正常人。

喪屍喺毫無預兆之下爆發，結果只係爆發咗一個鐘，跟住就喺毫無預兆之下回復正常。

成件事非常之離奇，大家都好想知點解啲人無啦啦會變成喪屍。

後來經幾位專家嘅分析研究，得出咗一個結論。

專家指出，人類大腦喺演化過程中，發展出某種對聲音同音樂嘅特殊感知力。

後來隨住文明嘅演變，呢種特殊嘅感知力會衰退或者退化，不過依然存在喺人嘅大腦之中，當遇到特定嘅情況就會被激發，並會驅使人類做出不尋常嘅行為。

專家嘅結論就係，當日「鏡」嘅歌聲正正就係唔小心觸發到人類退化嘅神經，導致一部分人精神失常，做出極暴力嘅行為。

雖然最後班喪屍自動回復返正常，但難保如果下次再聽到鏡團唱歌，又會觸發大腦嘅潛在基因，而再次變成喪屍。

因此，為免事件重演，坊間就有意見要求鏡團永久退出娛樂圈，以後都唔可以再公開演出。

但喺另一邊廂，鏡粉就極度反對，提出強烈抗議。

對佢地嚟講，喪屍固然可怕，只但係如果無得繼續追捧偶像，咁人生就會徹底失去意義。

正反雙方嘅意見對立，反鏡人士上街拉起橫額反對，一班鏡粉則上街舉起燈牌，表達對偶像嘅支持。

同時間，呢次喪屍事件亦都令一班政府官員好頭痕。

為咗避免同類嘅事情再發生，佢地漏夜召開咗一次特別會議，商討對策。

LM 鏡安法

終於有故事出

呢個故有無甜？

樓主走先 我頂住

無

無事嘅

（2）

雖然喪屍爆發嘅時間只有一個鐘，但都已足以造成社會動蕩，期間更有超過二百人傷亡。

因此政府要辦法點樣避免喪屍再次爆發。

凌晨12點，特首叫咗一班官員嚟開會，商討解決辦法。

會議上，最多人提出嘅解決方案，就係直接禁止鏡團以後再出席任何表演活動。

啲人係因為聽到鏡仔喺度唱歌，所以先變喪屍，既然係咁，只要唔俾班鏡仔再唱歌，咁問題就自然解決。

然而呢一個方案，卻遭到一名女高官大力反對。

佢認為咁樣做，會嚴重扼殺香港嘅創意產業。

呢位女高官覺得應該要俾次機會鏡團，俾機會佢地繼續進步，慢慢完善唱功。

「曬氣啦，呢班友仔出咗道成六、七年，要進步一早就進咗啦。」一名男官員出聲反駁。

「咪就係，咁多年無進步不得止，家下仲越唱越衰，咁點搞呀？」另一名男官員表示認同。

「其實佢地比起之前已經進步咗架啦，假如再俾啲時間佢地，一定會越唱越好。」

「進步咗都係咁，咁就死得啦。」

「一係佢地以後表演唔開真聲，全部咪嘴，咁咪唔會出錯。」該名女高官提議。

「咪嘴咪即係對其他歌手唔公平，咁點得呢？」

「咁好多韓國男團、女團都係咪嘴架啦。」女高官反駁。

「韓國還韓國，我地中國香港係絕對唔會造假嘅！」

「呢樣又唔得，嗰樣又唔得，不如咁啦，依家啲人成日話移民，咁不如送曬呢班喪屍移民去英國、加拿大，咁咪一天都光曬囉！」女高官好快又提出另一個提議。

「你都霎憨嘅！你知唔知嗰日有幾多個人變咗喪屍？成二十萬人啊！家下我地政府就猛咁搶人才，你就話送啲人走，咁你分明喺度倒米啫！」

「廿萬好多咩？我地鏡粉嘅人數起碼多佢地三四倍啦！」

「大家不如靜一靜聽我講。」

見大家討論咗成晚都無法取得共識，呢個時候英明決斷嘅特首，提出咗一個折衷嘅辦法：「我建議我地搞一個投票，等全港市民嚟決定呢十二個人應唔應該留低。」

「咦！特首呢個提議好喎！」

「係呀係呀！嗰啲死鬼佬成日話我地唔夠民主，依家我地就搞次全民公投，展示民主精神，剝佢地棚牙！」

「同意呀！一於就全民投票決定啦！」

特首提出嘅idea，個個人都爭住話好，無人有異議。

就係咁，政府決定聯同雙葉電台，搞一次全民公投。

投票會將鏡團十二位成員拆開，得票結果最高嘅兩個人可以繼續留低，剩低嘅十個人，就要永久退出娛樂圈。

今日係7月29號，投票將會喺8月1號展開，為期一個月。

Lm

樓主終於有新故

（3）

全民公投嘅消息公佈後，鏡團內部馬上舉行咗一次會議。

經理人「草草」係今次會議嘅召集人，不過由於佢仲同高層開緊會，所以未到場。

鏡團十二子就全部人已經到齊。

佢地成班人圍埋，睇返當日演出嘅錄影，一邊睇一邊喺度爭論，究竟邊個人唱得最差。

而事實上，有關佢地當日演出嘅所有片段，早就喺網絡上俾人刪除曬，好在佢地及時back up咗先至有得睇返。

「拿你地睇，我開口唱嗰陣，啲人都未開始變喪屍，所以我一定唔係『老鼠屎』。」

身為隊中人氣第四高嘅「雀巢安」，搶住為自己辯解，強調自己並唔係唱得最差嗰個。

「你唱歌唱咗咁多年啲咬字仲係咁柒，咁都唔算『老鼠屎』？」「煙傾」反駁對方。

「咬字差唔代表唱得差喎，同埋你都唔係唱得好好啫，唱歌唱到讀書咁。」

「我無話我唱得好，我只係話你唱得柒，啫唔信你問下其他人。」煙傾擰轉面問「教宗」點睇。

教宗係團內人氣第二高嘅成員。佢天生熱愛表演同跳舞，自從得知自己有可能會被踢出娛樂圈，心情就變得非常低落。

佢愁眉深鎖，唉聲嘆氣：「你地唱成點我唔知，我淨係知自己嗰日無論唱歌定跳舞都好落力，基本上樣樣都做足一百分。」

「學雀巢安話齋，唱得落力唔代表唱得好架喎。」呢個時候，隊內人氣最高嘅「薑毛」插嘴。

薑毛咬住兩塊麥樂雞，非常他條咁坐喺度jap jap jap。

教宗聽見對方咁講，好不屑咁笑咗一聲：「總好過有啲人喺度hea唱hea跳，一啲都唔專業。」

「你咪亂噏喎，我幾時有hea跳？」

「我都無話你，你做乜衝出嚟認啫？」

「哼！有咩直接講囉，喺度單單打打成個女人咁！」 薑毛咬住舊麥樂雞，一講嘢個口就係咁噴啲食物渣出嚟。

「喂！你話邊個係女人啊？」

「邊個應咪話邊個囉！」

「死肥仔，夠膽你就講多次！」教宗嬲到企咗起身。

「哈！我係肥呀！我認喎！唔似得你咁小氣，話你兩句就起曬弶。」薑毛再放一舊麥樂雞入口，個樣好得戚。

「明明係你無啦啦搭嗲撩起我先，家下居然話返我轉頭？」教宗俾人激到扎扎跳。

「係係鍾意話你小氣啊！你吹咩！」

坐喺隔籬嘅「何b仔」同「洛克人」，見到佢兩個好似小學雞咁喺度霎氣，忍唔住出聲勸交：

「喂！你地一人少句唔好嘈啦！」

「咪係囉，嘈嚟嘈去有乜為啫！」

薑毛同教宗無理到，繼續你一句我一句喺度爭吵。

反觀「I仁」以及另外幾個隊中無乜人氣嘅成員，就一直坐喺度，無出過聲。

面臨住解散咁大件事，佢地呢刻嘅心情都非常忐忑，完全無興趣理其他人喺度嗌交。

過咗一陣，經理人草草行入嚟會議室，見到薑毛同教宗喺度嗌交，當堂大喝一聲：「嘈乜撚嘢呀你地兩個，即刻同我收聲！」

經理人一開口，薑毛同教宗即刻靜咗，唔敢出聲。

「嘈嘈嘈，你兩個當呢度係街市呀！」草草好勞氣。

「草草唔好嬲，佢兩個一時口痕嗌霎下啫，好小事，唔使咁勞氣啦。」雀巢安好識做，第一時間氹返經理人。

煙傾就好心急咁問草草：「點呀，啱先你同甘生、鹵生開會開成點？諗唔諗到有咩方法拆掂我地呢單嘢？」

草草chur咗口電子煙，然後答：「我地開完會傾完，覺得呢壇嘢無得拆。」

「咩話？無得拆？你地有無認真諗過計架？」教宗情緒激動，對住草草講：「你地幾個高層係咪諗住咩都唔做，睇住我地解散？」

「你咁叻，你嚟話俾我聽，有咩辦法搞得掂呢單嘢？」草草噴咗一啖煙，黑起塊面問教宗。

「……」教宗答唔到。

雀巢安就覺得應該要將責任歸咎於音響問題：「其實嗰日個場啲音響咁差，無理由將啲責任瀨曬落我地度架喎。」

草草就話：「呢啲嘢無得拗，其他嗰啲歌手都係用同樣嘅咪、同樣嘅設備，但係人地唱嗰陣，啲人就唔變喪屍，偏偏我地表演嗰陣先嚟變，咁有咩計啫？」

「唔通我地真係就咁散band？」煙傾露出唔甘心嘅表情。

草草又chur一啖煙同大家講：「依家距離投票日仲有一個月，公司決定喺呢個月內，推出你地最後一首團歌，另外薑毛、教宗、I仁同雀巢安會各自出多首solo，假如政府許可嘅話，公司月尾會幫你地開十場告別演唱會。」

「咁…咁我呢？我無得出歌？」何b仔問草草。

「我地今次嘅時間同資源都唔夠，所以無你份。」

「哦…咁好啦。」何b仔對此感到失望。

「最後我要喺度同大家講明，到時投票選出嚟可以留低嗰兩個人，公司會同你地續約，其餘人等一概無得留低。」

其實就算草草唔講，佢地十二個人心入面都好清楚自己依家嘅處境。

基本上佢地呢隊組合一定要解散，至於當中邊個有得留低，邊個要走，一個月後自有分曉。

推

CLS

LM 支持樓主

（4）

面對住全民公投，緊張嘅唔單止係鏡仔，而且仲有一大班鏡粉。

鏡每個成員嘅fans club，已經喺TG group吹大雞，誓要動員全體嘅力量，打贏呢一場生死攸關嘅選戰。

實際上，「鏡粉」只係一個統稱，真正鍾意曬鏡全部十二個成員嘅fan屎，其實只係佔極少數。

事實係超過九成嘅fan屎，都淨係鍾意隊中特定嘅某一位成員。

因此每個成員都有自己獨立嘅fans club，當中以薑毛同教宗嘅fans club實力最雄厚。

除此之外，每個成員嘅歌迷各自都有唔同嘅暱稱。

薑毛嘅fan屎自稱自己為「老薑」，教宗嘅歌迷就叫自己「方濟各」。

「老薑」同「方濟各」之間存在住一種惡性嘅競爭，每次頒獎典禮雙方都會鬥個你死我活。

而接下嚟要介紹嘅人物Amy，佢就係一名「老薑」。

喺頒獎禮出事當日，佢係現場其中一位變成喪屍嘅觀眾。

變成喪屍後嘅佢完全失去理智，一見到人就飛擒大咬。

當時佢有個朋友坐喺隔籬，結果就俾佢咬斷咗三隻手指。

好在過咗一個鐘之後，佢就變返正常人。

恢復返意識之後，Amy知道自己咬傷咗人，感覺到好內疚，同時佢唔明白自己點解會變成喪屍。

根據專家嘅講法，啲人之所以會變成喪屍，觸發點係嚟自鏡仔嘅歌聲

但Amy記得自己變喪屍之前，台上嘅薑毛正開口唱緊歌。

作為薑毛嘅超級死忠fan屎，Amy唔單止好喜歡薑毛嘅歌喉，而且更欣賞對方善良、孝順嘅品德。

所以Amy諗嚟諗去都諗唔明，一個咁善良咁孝順嘅男孩子，唱出嚟嘅歌又咁好聽，試問又點會令人變成可怕嘅喪屍？

佢認為當中一定係有啲咩誤會。

望住貼滿成屋嘅薑毛偶像海報，Amy諗咗三日三夜。

佢飯又唔煮，家務又唔做，連老公同阿仔都唔理，最後左諗右諗，卒之都俾佢諗通咗。

佢記得當其時薑毛唱歌嗰陣，有個人企喺隔籬和音。

而嗰個人正正就係教宗！

Amy心諗，呢一刻終於都真相大白，真正令佢變成喪屍嘅，並唔係心愛嘅薑毛，而係教宗。

本來薑毛唱得好地地，就係因為教宗和音和到成pat屎咁，所以就俾佢搞喎曬成個表演。

千錯萬錯原來都係教宗嘅錯，同薑毛一啲關係都無！

成件事諗通曬之後，Amy嘅心情徹底釋懷。

佢成個人開心返曬，即刻入廚房，煮返餐好嘅俾老公同個仔食。

佢老公同佢個仔就驚Amy會再變成喪屍，於是勸對方唔好再沉迷追星。

不過Amy唔理勸告，堅持要繼續支持偶像，仲話薑毛係無辜，真正衰格嗰個係教宗。

見到Amy咁硬頸，佢老公同個仔都無佢乎，只能由得佢繼續追捧心愛嘅偶像。

多謝支持

（5）

除咗Amy，事發當日，全香港大概有二十萬人都變咗喪屍。

阿華、志偉同Eric就係其中三隻。

同Amy唔同嘅係，佢地並唔係鏡嘅歌迷，亦都唔係頒獎典禮嘅現場觀眾。

事發嘅當日係星期六，佢地三個參加完公司嘅team building活動，跟住就同成班同事仲有老細去咗酒樓食晚飯。

咁啱嗰間酒樓部電視直播住嗰日嘅頒獎典禮。

食食下飯，見到班鏡仔出場唱歌，阿華、志偉同Eric即場全身抽搐，雙眼反白，隨即三人狂性大發，癲咗咁周圍咬人。

阿華撲埋去佢老細身上，擘大口一啖咬落去對方條頸度，仲一嘢咬中條大動脈。

紅色嘅鮮血好似噴泉咁噴曬出嚟，佢老細當場一命嗚呼。

另外志偉同Eric，就生勾勾咬死咗另外兩個同檯食飯嘅同事。

雖然佢地咬死人，但就並無好似Amy咁感到內疚。

皆因佢地本身就唔鍾意自己個老細以及嗰兩個老屎忽同事。

個仆街老細成日逼人OT但係又無補水，鬼死咁刻薄，嗰兩個老屎忽同事就日日擺起個款俾面色人睇。

咬死曬呢班人，阿華、志偉、Eric佢地三個條氣反而好似仲gur咗。

而且咬死人之後，佢地都唔使坐監。

因為專家判定，喪屍係喺精神失常嘅情況下犯事，屬於特殊情況，所以當局決定網開一面，寬恕所有咬傷人甚至咬死人嘅喪屍。

唯一唔好嘅就係老細釘咗蓋，咁份工自然就保唔住。

變成失業人士，佢地三個無嘢做，得閒就WhatsApp下大家，傾下計。

當佢地傾返自己變成喪屍時嘅情景，大家竟然不約而同都有一種興奮嘅感覺。

雖然變成喪屍之後，佢地嘅精神處於一種瘋狂嘅狀態，但正正就係呢種瘋狂、放肆、不受思想約束嘅狀態，令佢地釋放咗內心壓抑嘅情緒。

作為一個打工仔，佢地每一日返到公司都要戴住面具做人，每一日都要面對工作嘅壓力，每一日坐喺office對住電腦，都有種失去自由嘅感覺。

總之佢地每一日都過得好壓抑。

相反，變成喪屍嘅時候，佢地喪失咗理智，忘記咗呢個世界嘅規則同道德，憑住最原始嘅獸性，盡情咁攻擊同破壞，呢種感覺反而十分痛快。

除此之外，佢地咬死過人，嘗試過人血同人肉嘅味道。

嗰種味道好特別，令佢地三個念念不忘。

好好笑

留名

諗諗下，阿華、志偉同Eric發覺其實做喪屍都幾過癮，心思思想再做一次。

橫掂做人做得咁辛苦，做隻喪屍話唔定係一種解脫。

於是佢地上網想搵返當日鏡嘅表演片段，諗住用鏡嘅歌聲，再刺激一次大腦，令自己再次變成喪屍。

可惜嘅係，相關嘅影片以及鏡過往嘅表演片段一早就俾人ban曬，網上面根本搵唔到。

佢地有啲失望，之後又嘗試上網開po，睇下有無人肯share當日嘅片出嚟，

結果片都係搵唔到，不過就俾佢地誤打誤撞，喺網上面結識到一班志同道合嘅人。

呢班人都係做喪屍做上癮，同樣都係想諗辦法再變成喪屍。

呢一日，佢地成班人約出嚟party room度唱k。

阿華一嚟就問在座五十個人，邊個自認唱歌唱得最難聽。

跟住有一個M字額四眼哥哥舉手。

佢自告奮勇，聲稱自己五音不全，所以主動拎起支咪，對住大家高歌一曲。

「你當我是浮誇吧~~~誇張只因我很怕~~~」

呢個四眼哥哥忘我演唱，佢嘅歌喉可以話係嚇死人。

然而佢已經唱到喊驚咁，但係在座嘅人，卻並無因為佢嘅歌聲而變成喪屍。

「真係奇怪，明明你已經唱得咁難聽，仲難聽過薑毛佢地，但點解我地都無變成喪屍嘅？」Eric有啲疑惑。

「不如你試下唱一唱鏡佢地嘅歌？」志偉向四眼哥哥提議。

四眼哥哥點一點頭，隨即唱咗一首當日鏡喺台上唱嘅歌曲《焫著》。

「焫著焫著焫著焫著焫焫著著~~~」

佢唱得甩曬beat走曬音，連歌詞都唱到一舊舊，但依然無辦法令自己以及其他人變成喪屍。

隨後佢地在座咁多人輪流唱咗一次，同埋又搵返以前嗰啲歌手嘅走音片出嚟睇，可惜無一樣嘢起到作用。

照咁睇嚟，只有鏡仔獨一無二咁失準嘅歌聲，先至能夠觸發到大腦潛在基因，令佢地變成喪屍。

係咁嘅話就弊啦，因為嚟緊嘅全民投票會投走十個鏡仔，假如投走咗唱得最難聽嗰啲，咁佢地以後咪無機會聽到嗰班人唱歌，繼而再無機會變成喪屍？

有見及此，佢地拿拿臨放低支咪，圍埋一齊，傾下點樣好好運用手頭上嘅選票。

睇嚟佢哋首先要搵翻邊件鏡仔係關鍵了

「我認為我地應該集中票源，投出唱得最難聽嗰個，繼續俾佢留低。」阿華提出建議。

「咁投法都算正路，問題係呢十二個人入面，你地邊個唱得最難聽？」志偉問在座各位。

四眼哥哥同埋佢隔籬一個光頭大叔同時舉手回答：「Alton！」

「Alton？係咪瘦瘦地、耳仔兜兜嗰個？」Eric搲搲頭，一時醒唔起Alton係邊個。

「唔係，你講嗰個係洛克人，呢個先係Alton。」志偉用電話google咗張相俾Eric睇。

「哦~原來係佢~」

「呢個Alton次次唱得幾句，但次次都唱到一舊舊，投佢就啱架啦。」四眼哥哥非常推舉Alton。

「其他人呢？你地點睇呀？」阿華問在座其他嘅人。

「就投佢啦，嗰日我都係聽到佢rap到一舊舊，跟住就變喪屍。」

「我都係喎！佢一開口我就頂唔緊。」

「我個人就認為教宗同薑毛難聽啲，不過佢地有咁多fans，應該夠曬票，所以我地可以集中投Alton。」

「呢條友我都rap得好過佢，投佢就啱架啦…」

大家各自發表自己嘅睇法，而意見似乎都幾一致。

論人氣嘅話，Alton應該算係倒數嗰幾個，實力亦都非常一般。

只不過佢應該估唔到喺今次嘅投票中，自己居然會獲得一班喪屍嘅支持。

阿華佢地特登開咗個TG Group，專門為Alton拉票，希望借此吸引更多同道中人支持Alton。

除此之外，喺連登Alton都有唔少支持者，挽下手話唔定有機會贏埋都未定。

非連登之子莫屬

出住咁多先，故事待續

成個故好痴線