Twitch有港女死亡直播吊頸 11

咁多位連登網民你地好

我係你哋口中十惡不赦嘅絲絲現實中嘅朋友，本身我都係同絲絲玩RP認識。

本來我無打算回應呢個po，首先聲明呢個po我自己有睇法，我係覺得何秋同其他加把口嘅人無一個係無辜，偏激言論造成女事主自殺身亡係事實。

首先，我本人無接觸RP已經一段時間，但憑住我呢幾日追問相關人士收集到既資訊來龍去脈，提供一個偏向我自己觀點既懶人包。

1.女事主已經喺英國證實死亡（已喺RachelW直播得到證實）（大家無需要再為住呢樣野真確性有任何懷疑）
2.命案發生前，有一堆RP玩家不只一次同女事主發生爭吵，當中語句用詞偏激都係事實（大家唔好爭論啲咩有冇愛過，事主當時有冇男朋友）

喺我眼中，何秋同絲絲就算負唔到任何法律責任，但佢哋內心一定唔好受，甚至受良心責備一世都係抵死同應份，若然未報時辰未到。

我亦都唔會為兩位辯解啲乜，但係有啲網絡流傳嘅嘢同現實不符，但又言之鑿鑿咁「爆料」，我就有少少睇唔過眼。

1.絲絲潛水<-以我所知RachelW直播一完絲絲已經委托其他人向死者哥哥道歉
2.絲絲無出現過喺咩國泰晚會，上一份工更唔係marketing
3.玩櫈玩到工傷<-工傷的確係工傷但唔係因為櫈

呢啲不實既內容都唔難估創作素材喺邊，就係絲絲直播所講嘅一部分再加上揑造。我識咗絲絲一段時間，佢係堅信佢相信嘅嘢就唔經大腦咁講出口，連傷害咗人都唔知。但係我對咁多位連登手足想講，佢唔係潛水，而係唔想重提呢件事傷害死者家人多次，而佢都提供咗證據我睇佢喺有嘗試聯絡到死者哥哥。（道歉證據就建議大家問返死者哥哥拎）


喺度我想講多少少，咁多位連登巴絲嘅正義感我睇到曬，但大家不妨換角度諗下，你地批鬥既對象要點先贖罪到？
真係要一命填一命？
如果佢哋真係自殺咗，你哋嘅謾罵報復係咪又成為咗加害者？
當你哋成為咗加害者嘅時候，呢個會唔會係惡性循環？

我都幾肯定嘅係作為原加害者之一嘅絲絲已經受到良心責備，佢留喺世上苟而殘存已經係最大既痛苦。呢件事上面已經無咗一條人命，巴絲理性去諗係咪真係要有更多人命犧牲先至值得完結。

利申，呢篇文唔係為咗幫絲絲換贖罪券，而只係希望大家理性去睇件事，唔好再因為輿論而傷害更多生命。