我自己對上用嗰兩部係直立式無線(印象中無線好似得直立式), 而且用緊有線直立式.
無線吸塵機最多人講既缺點,就係電量.本人覺得呢個缺點係致命性, 亦係到今日都解缺唔到, 如果可以完全解缺呢個問題, 無線吸塵機就接近完美.
用過無線吸塵機既人都知, 佢通常有兩種吸力比你選擇, 一種係正常MODE, 另一種係冇奶力MODE.
如果我用冇奶力MODE去吸, 可以話係冇事搵事來做, 吸一條頭髮, 我係可以睇住條黑色物體慢慢爬入去個吸咀口度,
正常既吸塵機, 吸條頭髮理應係迅雷不及掩耳, 由開始到吸入之間既Frame Rate, 人類肉眼係睇唔到, 咁先叫合格.
用冇奶力MODE既唯一原因,就係怕唔夠電用. 好多品牌列出既所謂最長連續使用時間, 好多時都係按呢個冇奶力MODE計算,望起來幾OK, 但實際係點?
以我用過兩部同樣係D牌既無線吸塵機既經驗, 全新計你可以正常MODE用到45分鐘己經可以當贏, 我係你就即刻打卡上埋小紅書.
以每日吸地一, 兩次來講, 頭半年約莫連續使用30分鐘左右(正常MODE計), 半年後基本已經少過30分鐘 ; 一年幾未到兩年, 隨時可以退化到15到20分鐘甚至更少.
最記得我第一部用到第三年多啲, 充滿電係可以5分鐘都挨唔到, 每次吸地都要同佢比賽鬥快.
而最麻煩係, 仲要等佢充電先可以再用.
我最唔明, 如果冇晒電, 即使我退而求其次, 想插住電線去用都唔可以. 佢唯有只能夠等電池充好電先可以再次使用. 唔知係咪安全問題?
當然, 香港地平均400到800尺豆潤地方, 熟手吸地基本15分鐘內都可以搞掂.
但開做家務既人都知, 吸塵機唔係只用來吸地, 當你打算來個大清潔, 吸下門邊枱邊梳化之類, 仲有啲平時唔會點理既黑點, 你就體會到電量呢個問題.
另一個比較另類既用法, 就係有唔少用來放衣物床舖之類既真空壓縮袋, 需要用吸塵機吸走裡面既空氣, 但至少我用嗰兩部無線吸塵機, 係唔夠力吸到最尾.
另一點, 以同為直立式計, 有線重量都比無線輕
始終無線吸塵機內置電池, 電池容量越大重量就一定越大. 以我而家用緊一個直立式有線吸塵機同之前用既同款無線吸塵機比較, 有線重量係輕左一半.
印像中, 唔少無線吸塵機既廣告, 好多時都會有一段片, 描述一個USER(通常係一個瘦瘦地既鬼妹), 好輕鬆自在咁, 單手攞住部野上吸下吸左吸右吸, 又舉手又扭腰, 仲要環迴轉身好ENJOY.
然而各位師奶大哥你又試下好似條女咁玩,? 就當你做得到, 唔夠一個月你應該都手瓜起墊. 按此推論, 如果換部輕一半既有線直立款, 你甚至可以成套獨孤九劍舞出來.
講返有線既缺點, 其實來來去去得一個, 就係條線.
雖然聽落好似無乜野, 但自己用緊都覺得條線比想像中煩,
其實我唔係好介意吸地過程中, 要搞下條線, 避開啲家具, 甚至有時候要換個另一個插口(雖然佢聲稱條線有六米長)
但有經驗既人應該知道, 條線用得耐係會扭下扭下自己打埋圈, 搞到好難拉直, 需要耐唔耐去放鬆佢.
而放置又係一個問題. 能夠有彈力回收電線功能既吸塵機, 都係有一舊車仔阻住地球轉既傳統款式.
直位式(即係我而家用緊呢部)唔知點解都冇回收電線既功能, 或至少我未搵到. 所以唔用既時候, 條線(仲要成六米)就堆埋一齊, 有潔癖既USER會晚晚發惡夢.
總結, 我之前用過兩部無線吸塵機, 其實都係我老婆主張要用, 我自己係屬於無乜所謂既人(本來), 但用過兩次, 最後連我老婆都過唔到電池一關. 之後換左部有線用到而家.
以價錢計, 兩部無線AROUND 4 -5K一部, 而有線呢部800有找.