六：Irgun與Lehi，勇武派與熱血公民？！
上次講到猶太武裝組織內部開始有路線嘅分歧，咁天下間嘅政治意見同埋行動綱領都係一個光譜，到底分裂出嚟嘅人，抱住乜嘢嘅信仰呢？
1931年成立嘅Irgun嘅主張更為激進，因為約旦王國都應該要納入未來猶太國嘅版圖入邊，手段相比hagana更加凶狠。
由於Irgun想猶太人佔領更多嘅土地，呢啲計劃亦都變成咗Irgun嘅另一個名稱Etzel(Errtz Israel)。
喺二次大戰期間，Irgun針對英國政府機構同埋軍事設施發動咗好多次襲擊，搶奪軍火，摧毁無線電塔同埋警署等等。
比較出名嘅行動，包括著名嘅Acre監獄劫獄事件，英國人喺呢個地方囚禁大部份Irgun同Lehi（稍後會講到呢個組織）嘅成員。所以Irgun組織左一對擁有大量爆炸品同埋自動武器嘅突擊隊強攻，救咗唔少囚犯。
英國人作為報復，處決左大部份剩低嘅囚犯，同埋喺行動中被俘虜嘅Irgun突擊隊員。
當然仲有一個激進武裝組織，Irgun不甘示弱咁綁架咗兩個英軍士官，一聽到囚犯被處決嘅消息，就即刻處決咗呢兩個英軍，將佢地嘅屍體綁上炸藥然後吊係樹上。
就係呢一件事件，令英國民意上下震動，終於都令到執政嘅工黨頂唔順強大嘅猶太武裝組織軍事壓力（英軍係多數戰鬥入面都係處於被動），向聯合國申請終結係巴勒斯坦地區嘅統治。
美國為首嘅其他聯合國成員國於是開始制定巴勒斯坦地區嘅管治方案（亦都係初代嘅猶太-阿拉伯兩國方案）。
Irgun針對阿拉伯平民同埋英國殖民者發動大規模嘅無差別，恐怖襲擊，包括後來喺1946年放炸彈炸死喺大衛王酒店（英國殖民機構總部）嘅英國平民同埋官員，係Deir Yassin大屠殺入邊殺死咗至少107個阿拉伯穆斯林平民。
佢哋嘅行為令英國、美國同埋後來嘅聯合國齊聲譴責，將佢定義為恐怖組織，連愛因斯坦都有寫公開信話Irgun嘅行為係法西斯主義，本質上同納粹一樣咁衰。
佢哋嘅極端程度連Hagana都睇唔過眼，初期係割蓆之餘仲會幫助英國殖民者不遺餘力咁打擊佢哋。
不過Irgun喺以色列立國之後轉化成為咗合法嘅政黨Herut，亦即係今日嘅總理內塔尼亞胡所屬嘅右翼利庫德集團。佢哋係1977年贏得大選，開始經常成為以色列內閣嘅一部份，Irgun嘅領導人仲係以色列政府擔任過領導職務，其中就有總理貝京。
多圖後補，下一篇講埋Lehi，佢嘅領導人係世界上最後一個自稱恐怖分子嘅傳奇
