對唔住，我都唔想三分鐘睇一個病人 — 一個公院醫生嘅懺悔

https://www.instagram.com/p/C6d35JeBbfF/

【 圖中係我上星期嘅衝症實錄，78分鐘衝左14個症，我都覺得好恐怖。 】

【 對唔住，我都唔想三分鐘睇一個病人。】

係HA做醫生，聽過病人講過最令我唔開心嘅說話，唔係「我要投訴你」、而係病人同我講「等就三個鐘、睇就睇得三分鐘」。

對唔住，令到你覺得好似得唔到應有嘅醫療照顧。不過事實上，我都好憎衝症、好憎要三分鐘趕病人出去、好好好憎一個朝早要睇廿幾三十個病人。千祈唔好以為我地三分鐘見完你係「hea睇」係偷懶，其實衝症係一件好辛苦嘅事，三分鐘睇一個先最辛苦 — 等我解釋一下。

每一節門診會預約左一定數量病人有一定帷大量醫生，例如四個醫生、一百個病人，總之你地清曬佢先好走。我地可以做耐啲唔食lunch，可以遲收工，但其他現實條件會迫我地嗰個時間內要清曬佢。可能係晏晝要交場比另一個部門、晏晝我地要開會要做手術、夜晚其他服務例如抽血X光會收工，或者就算我地肯遲放工，都無理由迫全部護士、文具、助理、清潔一齊遲兩個鐘完工，又或者我地肯睇到夜晚八點，病人等到八點都會鼓燥投訴。所以症就係咁多，我地幾個醫生就係有責任準時清曬佢。

咁如果我每個症用十幾分鐘慢慢睇、好好同病人傾計咁會點？

坦白講我自己會輕鬆好多，慢慢睇慢慢諗唔使咁大壓力迫得自己咁緊繃，唔使驚會易啲做漏做錯。但係慢慢堆積如山嘅牌板、水洩不通嘅等候大堂、話要投訴嘅病人，就會形成所有同事嘅壓力。我睇得慢，講得白啲，就係free ride緊我其他同事，迫佢地睇得再快啲，再唔係就會變成一齊攬炒，等到最後一個鐘，每人見到仲有十個牌板係枱面，先黎一齊狂衝。

所以，如果我用三分鐘睇完你，好多時候我唔係想懶，而係我燃燒緊自己嘅小宇宙，去追返緊個門診嘅進度，去幫輕一下同事嘅壓力。你千祈唔好以為係我懶，我懶嘅話，我大可以慢慢睇，等其他人幫我睇多啲。

「三分鐘睇一個症」一啲都唔輕鬆過癮，做漏睇漏任何一樣嘢，一樣小則被上司鬧大則比人投訴比人告。呢種壓力永遠唔會消失，只會衝得愈快愈大壓力。

等我分享一下「我的衝症日常」 —

其實我見你三分鐘，前前後後都有工作要做。

係嗌你入黎之前，先要讀曬你嘅病歷背景。人口老化之下，好多病人都有過五六七個重要病歷食緊四五六隻藥做過兩三次手術，我要用一分鐘去理解你嘅前世今生。如果我係一個盡責嘅醫生，仲會用多一分鐘，以摩打手嘅速度去整合更正你嘅病歷史，等下一個見你嘅醫生唔使睇得我咁辛苦。然後再用三十秒去掃視一眼你今日抽嘅血報告，用十秒去理解當中任何異樣同決定下一步點做。

呢個時候，我就可以㩒掣請你入黎。

因為我知道由我㩒掣、到廣播、到你起身行入黎、閂門，有一分鐘嘅時間 — 呢一分鐘時間，啱啱好夠我睇完你上星期照嘅電腦掃瞄報告。

我請你坐低，介紹自己，對你身份證號碼，我知道呢到會用我三十秒。

而呢三十秒，我把口講嘢嘅同時，我隻手就碌緊個掃瞄影像，隻眼碌左幾碌確認完影像，而我同意放射科醫生嘅報告講法。

我知道好多病人覺得我地醫生冇花好多時間問症問病徵、做身體檢查。但坦白講，現代西醫愈黎愈倚重客觀化驗、影像。所以即使未開始「睇你」，我地都大約心中有數，我要做啲乜。接下來嘅三分鐘，我一輪嘴搬出我想同你解釋嘅我嘅方案，同時祈求上天你同我講嘅嘢同我想聽嘅一樣，等我可以準時係三分鐘內完成呢一個回合。

假設一切順利，冇大問題，三分鐘後請你出去我依然要用多一分鐘整理診症紀綠，確保冇寫漏我想護士跟進嘅嘢，再同你係電腦book你之後要嘅檢查。

即使你覺得我用得三分鐘睇你，我其實係挑戰緊用前後八分鐘去理解你嘅前世今生，然後點幫你嘅未來。

—

我成日都想同病人講，如果我同三分鐘睇你，你應該開心。

我用三分鐘，係因為我跟據知識同經驗判斷，相對地放心你冇嘢，如果唔係，做漏嘢睇漏嘢，比人告嘅都係我。

令一個原因要我衝十個三分鐘嘅症，係為左我可以好好咁睇嗰一個廿分鐘嘅症。信我，你唔想自己係嗰個比我留廿分鐘比你嘅病人。

我永遠唔會知我下一個牌板開出黎，會唔會係大鑊嘢。可能我衝左幾個冇事嘅長期覆診，下一個病人，一開出黎，掃瞄就話我知確診癌症，需要盡快開刀做手術。

呢啲時候，我就知道，我要慢返少少落黎 — 我自己仍然有嘅最少堅持係，就算再忙再趕都好，同一個病人break bad news話你知你生cancer，我點都會拖慢少少黎講，「今日返黎睇報告，都想你地有個心理準備，唔係一個咁好嘅消息。你地睇下呢度有個陰影⋯⋯⋯」

或者都唔係最理想嘅詳細程度，或者我有得揀可能同你傾一個鐘都唔過份。但係公立醫院嘅框架下，相信我，你有需要嘅話，我始終會擺多少少時間落黎。

只係，我希望你唔需要。

—

分享以上呢啲，我唔係想為自己搵藉口，我知咁樣睇症係會miss嘢係會打錯嘢，我知病人依然想得到更多應有嘅照顧同關懷。

只係，醫患關係係好重要，但好多時候病人不滿醫生，可能只係誤會，你唔知道我係見你前後所做嘅事；或者你以為我衝症係hea，你唔知道我衝症只係因為我冇得揀，唔知道我一慢就累其他醫生，唔知道有啲病人情況更慘需要我留返少少時間比佢地。

大家都同一屋簷下，係呢個大家都知道搖搖欲墜嘅公營醫療危樓之中，無論醫生護士病人，都多啲互相了解體諒，針對返制度問題嘅根本，或者就會好少少。

各位病人，委屈左你，對唔住，我地會再努力。

— 一個公院醫生嘅懺悔

tldr

得架喇 明架喇 要加人工係咪？

啲病人日日走黎問等幾奈,我話有70人等緊,兩個醫生,5分鐘一個啊,你都3~4個鐘啦,好似我厄佢咁,登記完又後悔

引入醫生你又點睇

3分鐘咁耐？睇私家醫生1分鐘就趕你走啦

去過一次就知係好辛苦

講真無問題，前提係應該好似私家醫院咁，另外搵個地方係專for大陸醫療專才，咁鐘意私家就搵私家，要搵專才就搵專才

不了 我寧願3分鐘睇一個病人

上面班人係咪痴鳩線？ 咁都屌醫生

睇私家專科，個醫生會夜晚WhatsApp你跟進病情，俾貴咁多係有理由

有班連登仔鍾意屌醫護
因為型D

連登/網上多數乜都屌咗先
仲有帶風向，將政府醫療政策問題歸咎落醫生度，同時吹風加人「引入醫護」，但係大家都心知肚明佢哋係要引入邊度嘅醫護

食屎啦去 講到尾醫委會同大學收生不足做成

又想拎光環 ？ 好撚心啦

Covid 個時，有班醫畜係診所寫住
「發燒唔睇」

香港有難就睇到你班含家產


而加又想光環 ？ 咪咁噁心啦
掟左個牌去英囉

respect

加夠100萬一個月

lm

人地係公立醫生呀
同私家醫生比
跟住屌公立醫生
傻撚左？

收皮啦，咁醫生冇責任？

仲未計吹風引入醫護嘅潛台詞通常都係「為咗要令更多人唻，要放寬(降低)個標準」

問題係濫用嘅太多
有啲明明中產都唔肯自己揞荷包睇私家
霸住啲公共資源

加完就可以三分鐘睇一個
反正加學額就唔得
會考個個30分嘅醫生 三分鐘睇一個一定專業過
會考29分嘅醫生 六分鐘睇一個
總之就係學位唔可以加 醫生唔可以多
病人數目一直增加 按比例加人工就可以醫到
10萬一個月可以10分鐘睇一個病人
100萬一個月就可以一分鍾睇一個病人

建議引入內地醫生同護士，人工減半
睇普通科門診同非緊急／次緊急急症
做夠經驗可以出去做私人普通科門診開檔 ／ 轉去私院做

好多老人家未領教過大陸護士
求仁得仁