【 Goalkeeping Master Class - 艾利臣 及 泰法路 】
Alisson Becker (艾利臣) 相信大家都對佢好熟悉,至於 Claudio Taffarel (泰法路) 呢?可能要老一輩嘅球迷先知佢係邊位。其實 Taffarel 係巴西嘅傳奇守門員之一,曾經協助巴西贏得 1994 世界盃冠軍,亦都同 Alisson 一樣曾經效力巴西球會國際體育會,所以順理成章地 Alisson 一直視佢為偶像。
Taffarel 現時唔單止係巴西國家隊嘅守門員教練,佢亦都喺3年前加盟利物浦,喺球會同國家隊層面同時擔任 Alisson 嘅守門員教練,可以同兒時偶像無時無刻見面不得止仲要做埋自己嘅教練,呢件事真心大癲。
而利物浦球會電視早前同佢地兩位做咗個守門員大師班訪問,問下佢地合作上嘅趣事以及對守門員呢個位置嘅睇法,一齊睇睇當中佢地談及過嘅重點:
1. Taffarel 認為每個國家嘅教練都有自己嘅訓練風格,例如西班牙比較著重反應,英國比較著重傳中以及不同角度射門,巴西就集中喺技術上比較多。Taffarel 認為 Alisson 與別不同之處就係佢喺技術上絕對勝人一籌,好多問題落喺佢身上都變得容易解決。
2. Alisson 表示喺英格蘭教練們多數都會叫守門員用 W 手去接波,但當年佢喺巴西教練係叫佢用三角形手去接,當佢慢慢兩樣都接觸過之後,各取優點搵個平衡點,最後搵到一個佢認為最舒服最適合自己接波嘅手勢。
3. 今季作客水晶宮 Alisson 對 Lerma 嘅近門神救,Taffarel 認為全靠 Alisson 無捉路,雖然完全失曬位而且身體全力追緊去遠柱,但 Alisson 好有耐性,等到 Lerma 射門一刻先做反應。如果 Alisson 捉路預先撲向遠柱,就唔會有呢個神救嘅出現。
4. 上季作客愛華頓救出 McNeil 嘅禁區頂內彎射門,兩位同時認為守門員企啱位其實已經提升到 50% 成功撲救嘅機會。而 Alisson 表示平時練波佢地都會練唔少比賽像真嘅情況,令佢地喺位置感上可以進步得更快,唔使再擰向後面望門柱先知自己企緊喺邊。Alisson 亦建議各位門將可以用 12 碼點做參考,令自己更快知道自己嘅位置。
5. 今季作客紐卡素對住 Almiron 嘅神救,Alisson 表示全靠當年喺意大利學返嚟嘅一套概念,就係唔好等個波飛埋手掌,而係雙手向前撲向個波,等個波射中隻手之後都係飛向前而唔係飛入龍門。
6. Alisson 嘅單刀封位哲學就係參考 Ball-Man-Goal 線,自己企喺中間,盡快出迎封窄角度,令自己愈輕鬆愈好。有時唔一定要撲到個波先叫做成功,封到個波令對手射出界都係一個成功嘅封位。Taffarel 補充,射手係射波之前唔會亂咁望,一定會望一望個波,守門員就應該把握對手掛住望波嘅時候出迎,當對手一抬高頭發覺守門員突然同自己咁近,自然埋門質素會受影響。
7. Alisson 認為比賽就係一個比自己成長嘅最佳環境,每次做啱一件事就會令自信心有所提升,特別現今足球速度愈嚟愈快,只要慢咗半秒已經可以由成功變失敗。
8. Taffarel 對年青守門員嘅一個提點,就係千祈唔好擰轉塊面,任何時候都要望住個波。如果你出迎然後因為驚波而唔望波,呢件係一件非常差嘅事,因為勇氣對於守門員太過重要,要望清楚個波飛去邊做反應,而守門員係無驚嘅餘地。如果比人省中塊面,留返入更衣室先好喊。(Alisson 講笑地話所以 Taffarel 個鼻咁大唔係無原因 😂
9. Alisson 最後補充,好多守門員唔記得咗一件最重要嘅事,就係要 HAVE FUN,好好享受踢波嘅過程!
原片 Link 喺留言!
#守門員 #Goalplayer #Goalie #Goalkeeper #GKUnion #AlissonBecker #ClaudioTaffarel
https://www.facebook.com/share/p/crGRYsfYL5m1BwXE/?mibextid=WC7FNe