比浣熊搶曬啲嘢食，點部署（15日澳洲墨爾本+黃金海岸+塔斯曼尼亞）

班機唔知點解勁多印度人

印度好少機去澳洲，但係澳州又好多印度佬
大部份客都係經香港／星加坡轉機

跟住就揸車去Yarra Valley，
從機場附近揸到去 Yarra 就大約個幾鐘。
去到附近就開始落雨。
唔知係咪香港人特別有錢，
定係真係鐘意飲紅酒，
一入到果區就發現有好多香港人



老實講我都係第一次去酒莊，
所以個體驗感都幾新鮮，
但本人就唔係對紅酒Champagne好有興趣。
去完一次下次都未必再去



其實Yarra Valley有四五間酒莊，
每間都有佢專門釀造既酒款。
今次我只係去其中一間，
專門造 Champagne 既 Domaine Chandon。



成個感覺係壯觀既，
因為整片山谷平原都種滿左提子，
個規模真係比其他地方大好多。
(不過估唔到連呢度都仲係有好多烏蠅...)




去到啱啱好點幾鐘夠鐘食晏，
叫番個 Wine Tasting Menu，
有三款唔同味道同濃度既香檳試飲，
加多份 Main Course 就啱啱好。
個羊肉串燒幾好食，
襯埋啲香檳都幾夾。



之後我買左幾支Champagne帶番香港留念
（最on9係番到香港見到HKTV Mall有得賣，
價錢仲平過直接係酒莊買...)

逗留左大約個半鐘就走左

離開 Yarra valley 之後就去到行程重心，
就係距離墨爾本兩個鐘車程既 Phillip Island。
揸車果陣越睇越唔對路，
越接近 Phillip Island 就越大雨，
Phillip Island 主力係睇企鵝歸巢，
如果矇查查乜都睇唔到就含了。

好彩去到間 Airbnb 度基本上就停雨，
而且見到間屋都 Wow 左一聲，
呢間野成個 Design 都幾靚，
而且成間屋兩層七八百呎得我地住，
正到爆




附送一個可以玩 BBQ Grill 既露台，
都係盛惠一晚 二百幾澳紙左右，
我地都幾滿意呢間 Airbnb。



Settle 完時間都唔早，大約五點鐘，
趁機揸架車出去海邊睇下，
無奈地天氣真係一般般，
搞到啲景色睇落好似好 19 咁。



睇到呢個我當左自己去過 Bay of Fire
因為之後去塔斯既行程是無預到 Bay of Fire 的



澳洲真係周圍都係呢種海鷗，
個數量你可以類比香港既白鴿 + 麻雀。



行左一個鐘左右又係時候食野，
因為Book左睇八點鐘去到睇企鵝歸巢，
所以早少少食野好D。
今次食呢間位於市中心既 Pino's
意大利野，佢啲薄餅同意粉都幾高分，
價錢兩個人食70蚊澳紙左右，
都誠意推薦。

lm，咁似我fd嘅又係啱啱澳洲自駕完

呢間Yeonga韓燒好撚好食
我通常d生日紀念日之類都會黎食
嗌個澳洲和牛餐加個水果米酒
飲飽食醉就一晚

去到Bourke Street有無去hopetown食下午茶+蛋糕

MH 宜家都做多左印度-澳洲轉機客

衰野嚟

食完渣過去 Penguin Parade 都係十五分鐘，
趕得切八點前準時到
開始準備進入 Phillip Island 重點行程，
睇企鵝歸巢！



澳洲同自然風光相關既景點，
個遊客中心都會整到靚一靚
入到去都見到好多唔同國籍遊客。



Check 完飛之後就可以行橋入企鵝棲息地，
其實當時天未黑都見到一兩隻企鵝仔
佢地呢度既企鵝品種係小企鵝，
同大家係海洋公園見到果啲南極企鵝唔同。
佢地企係度都只係大約30cm高，
而且毛茸茸咁好得意。



至於買飛方面分左三種票價，
最平係要坐係沙灘看台，
大約隔成五十米左右望過黎企鵝上岸既位置，
人數好多，但我好懷疑咁遠根本睇唔到 。



沙灘看台上既人群就係買左平飛，
距離真係有少少遠。
所以如果問我會推薦第二個票價，
就係係一個近啲既看台上面睇，
個視野大約係咁：



當然如果再有錢啲可以用最貴票價，
就係我個看台既地下，有玻璃觀景窗，
用地面 eye level 去睇企鵝。
不過我覺得室內開曬暖氣無乜feel

係寒風中等左二十分鐘左右，
就開始見到第一批企鵝上岸
其實個 Tour Guide 都已經講左唔可以影相，
同埋未必晚晚有咁多隻企鵝。
但都係忍唔住偷偷地影左，
Make Sure 自己無開閃光燈就算。



最遠果啲我已經影唔到，
部相機太廢。
但已經算好好彩，
果晚加埋都有八九次大批量既企鵝上岸，
一批四五十隻計，都已經睇到四五百隻，
所以真係幾壯觀
想像下幾百隻企鵝係水度上黎，
慢慢左右左右咁行上岸，
再去到漫山遍野都係企鵝，
應該唔會係第二度再見到。



個導遊話一晚可以見到幾千隻企鵝，
佢地個size好細隻，
好難想像可以狂風大浪中游咁耐。
啲企鵝上岸之後就會行到山邊，
佢地挖左好多巢穴，
夜晚九點幾就會訓到第二朝日出前再出去大海覓食。



係澳洲有人住之前，
千百年來 Phillip Island 呢個位已經有好多企鵝上岸。
睇完呢個咁治癒既場面，
都唔想因為人類既出現而改變佢地棲息既環境，
所以都希望以後去既遊客，
可以好好尊重同保護呢個咁特別既地方。



同場加影：
離開個tourist center之後就見到呢隻，
疑似係之後係塔斯曼尼亞搶野食既疑兇！
兩者共同點就係都會搶劫垃圾桶

Day 4 (Phillip Island - Mornington - Great Ocean Road)



第二朝一早去做一個叫做Nobbies既地方，
係Phillip Island 盡頭最西部，
佢係Google Maps個評分好高，
所以想一早去睇下。
天氣真係超正！



Nobbies 係一個比人遠眺海獅既地方，
我地去果日就無海獅，
但成個環境，天氣都係好心曠神怡。
去到澳洲見到好多呢啲木造步道，
都幾有特色，感覺係澳洲獨有。



係條步道上面行15-20分鐘左右就去到盡頭，
望到海上面有舊大型礁石，
上面超級多海鷗，
多到有啲密集恐懼



唔知係咪因為個天藍，
啲海水映射得特別藍。
呢個地方有少少天涯海角既感覺，
如果自駕得閒都可以去埋。

笑左 剪完barber 上返去個頭青晒好難唔知

利伸:而家都係melbourne 旅行 睇到樓主個post幾有用

Brisbane留名

d企鵝好得意

留名

唔知點解澳洲個天特別藍咁

我冇車牌...個時join day tour，去咗12門徒石同坐小火車

求airbnb名

點解啲馬蒙哂頭既

Thanks

留明

好似話怕大風叫佢地帶住

去完 Nobbies 就去番小鎮中心，
我地果日係星期六，
竟然有啲local 市集仔，
不過賣啲野就似求其搵左啲淘寶野咁
去左鎮入面一間好多遊客去既咖啡店，
啲早餐都算唔錯。



成個vibe配合埋啲咖啡都是好正
杯咖啡感覺好過melbourne果啲
呢間Tigers算係唔差。
之後就要離開Phillip Island。
其實個島上面仲有少少景點，
有 go karting 玩，
仲有個隱世小島叫做 Churchill Island，
入面有啲農莊表演，但我無時間睇。



半個鐘左右車程就會去到Maru Koala Park，
個動物園唔算大，
但都幾多位比同澳洲動物無障礙 Interact。
一去到就即刻要買親親 Koala 套票同佢影相



佢地都好好摸，
但原來佢地兇起上黎都可以好惡
啲叫聲有啲似馬摟。
我宣布佢地係成個行程第二得意既動物！



有個幾空曠既area比袋鼠同wallaby訓覺，
呢隻好大隻既袋鼠打橫訓係度，
仔細睇原來佢個袋入面有啲野！



佢個仔係佢個袋入面，
真係超級得意
好難想像澳洲啲人竟然可以食袋鼠



仲有隻生招牌既孔雀係度招搖撞騙
呢個動物園可以買野比佢地食，
餵下野食行左大約一個幾鐘就走人

漏左po，
補番動物園 Wallaby 既合照一張，
佢地都好驚人類，
但你一餵野比佢地食就會走埋黎比你摸，
一開始我都以為係袋鼠，
但之後就分到，佢地係細隻啲同溫順啲的



之後就渣個半鐘車左右去到 Mornington。
呢度本身其實都bookmark左d沙灘，
包括一個叫做 Rosebud既海岸，
但鑑於行程緊迫，都係唔去了
Mornington最西邊有個叫做Sorrento既碼頭，
可以揸車上船經水路過去Great Ocean Road，
40分鐘左右船程就去到 Queenscliff，



我大約係咁樣揸車，
可以直接開始 Great Ocean Road 行程。
咁樣過海好處係，
比起揸車兜上Melbourne快足足兩個鐘



咁大個人第一次揸車上船，
都幾好玩下
Off engine之後就可以上甲板上面休息同睇海



記得上網買定飛，預早少少上船，
睇下有幾多架車係度

澳洲版浣熊=possum

一隻raccoon都冇