比浣熊搶曬啲嘢食，點部署（15日澳洲墨爾本+黃金海岸+塔斯曼尼亞）

一個鐘左右行完DFO，
見天氣咁好決定直接行返去CBD。
啲人話墨爾本一日四季，
短短由朝早到依家兩三點，
個氣溫已經由15度變成25度
加埋個熱到溶既太陽，
件外套幾乎全程都係放係手。


經過條橋，發覺近水既地方就好多烏蠅。
係咁意影完張相就快快行過。
15分鐘左右又行番去CBD，
慢慢繼續往東行就去到打卡點：
Flinders Street Railway Station


呢啲火車站放係歐洲周街都係，
但係澳洲都算係一個比較有歷史既地標。
除左擁有超過一百一十年歷史，
係澳洲最古老既火車站之外，
佢亦都係全澳洲最繁忙既車站。


推薦大家過對面馬路影過黎，
個車站同啲Tram同框好似有feel啲。


對面馬路就係呢座 St. Paul's Cathedral，
側面有個草地仔，
好有魔力好想攤落地下曬太陽
呢座聖公會既教堂有一百三十年歷史，
亦都係墨爾本第一座大教堂。
入去教堂入面咁啱撞到當地中學鬼妹團，
係度講緊座教堂入面物品既故仔，
個導遊講緊啲二戰歷史都好有趣。

墨爾本Downtown啲景點都好集中，
行完車站同埋教堂之後，
過兩個街口就到另一個打卡點，
塗鴉巷 Hosier Lane。
呢度本身係一套名不經傳既巷仔，
自從九十年代開始，
有一堆藝術家係呢條巷塗鴉，
隔一輪又會有唔同既藝術主題。
係一個咁急速既市中心入面，
充滿住綠洲呼吸般既特別氣息。


其實巷仔行上去都係五十米左右，
而且好多所謂塗鴉既主題都比較奇葩，
但呢個頹廢既風格，
正正係佢既特別之處。
正如你估唔到原來巷尾，
就見到一堆高樓大廈，
而急速行過既西裝友，
亦都同佢相映成趣。


行到肚餓，
本身bookmark左間牛角包Lune，
但都幾肯定成三點已經無可能食到。
於是去左對角，
另一間出名既fushion菜Supernomal
發覺澳洲三點幾鐘，
好多餐廳仲有好多檯客，
唔知係咪唔洗返工，定係見緊客。




上網話呢間野出名Duck Bun同埋蟹包，
梗係唔執輸要試一試。
燒帶子配脆脆紫菜係有啲驚喜，
不過個調味又未算好驚艷。
蟹肉就好新鮮，
同燒焦左既包邊好夾，推薦！

6日玩曬成個 Tasmania會唔會趕左 d ?

食完又繼續出發，
係CBD行下，
散步去到RMIT隔離既Old Melbourne Gaol
上網見到呢個舊監獄啲相都幾靚，
不過我去到都已經成四點幾，
連個售票員都話唔建議買飛入去，
係外面影張相算數。


澳洲原本係一個流放囚犯既地方，
發覺澳洲好多地方最有歷史既都係監獄。
呢個監獄有接近二百年歷史，
英國人啱啱發現澳洲就興建左佢。


行番前一個街口，
就去到State Library of Victoria，
呢個圖書館都好值得去，
貴為全澳洲最有歷史既圖書館，
佢同墨爾本大學同時開幕，
擁有170年歷史。
門口既草地有好多白鴿，
懷疑長期有人餵養佢地。



入到去最緊要就係去個Dome感受下書卷味，
呢度有好多讀Melbourne U同Monash既學生溫書，
百幾年歷史，接近一百萬本書既加持，
孕育左澳洲好多代名人學者。


呢啲古羅馬圓頂型建築真係買少見少，
而肅靜既氣氛都令人不禁要搵本書睇。


場內見到啲鬼仔鬼妹中學生，
預備緊辯論隊既cue card，
討論capitalism 同 socialism，
係一個咁有歷史既公共空間討論公共哲學，
成件事真係好正。

會 所以我都係玩左半個tasmania only

為左睇浣熊, 但入到黎咩都無

塔斯篇有大量動物

買多兩包棉花糖請佢食

lm 出年想去澳洲

墨爾本市區啲景點係好方便，
圖書館出黎之後，
搭free tram又去到另一個地標，
就係Carlton Gardens，
140年前呢度被興建做世博會場，
呢個市中心公園亦成為左世界遺產。
一個Carlton Gardens包含幾個景點，
包括Melbourne Museum，
同埋同屬世界遺產既皇家展覽館。



黎到呢度時已經五六點，
但都依然好鬼曬，
南半球夏天日照時間長，
去到夜晚九點先天黑，
好處就係感覺上有多啲時間可以用。



穿過公園中間既林蔭大道，
就可以直望皇家展覽館。
呢度係澳洲第一屆國會產生既地方，
亦都係世界僅存建於19世紀既展覽館。
見到好多鬼妹黎呢度影畢業相，
相信佢係當地人心目中地位都唔低。

係座展覽館後面就有一班街童，
聚集埋一齊玩滑板。
呢度既公共空間真係有好多種詮釋方法。

再向北行就會去到Carlton區，
呢度以Lygon Street為中心，
街道兩邊都係賣Pizza同Pasta既餐廳，
所以被稱為小意大利。
如果大家有時間有興致，
係呢條街食個中午，
慢慢行去Elgin Street飲杯咖啡，
慢節奏咁好快就磨左一日。
而我就去左間出名既雪糕店，
Gelato Messina 嘆番杯兩球雪糕先
無記錯係大約8蚊左右。

留名
叫佢請翻你食

唔經唔覺就到七點幾，
事前睇過Victoria Market夏天會有夜市，
逢星期三，六點鐘開波，
如果夜晚無野做都可以去行下，
有好多唔同國家同地區既特色食物。



唔知係咪墨爾本好少呢類型夜市，
去到發現係好撚多人。
成個 trip 人口最密集應該就係呢個地方。
又有人busking，氣氛正！



其實唔食晚餐留肚係呢度掃街都OK，
食兩檔點都飽，
啲野食份量大到嚇親人，
遠遠唔係二十蚊幾粒魚蛋咁既性價比。



一兜燒肉連埋Chips同Naan都係14蚊，
真係可以食飽一個人。



有間好似好出名既蛋撻，
但老實，蛋撻黎講就真係香港酥皮世一。
呢啲蛋撻都係收番埋先



個夜市都值得黎，
記得空肚！
同埋成個區好多唔同國籍種族既人，
印度，尼泊爾，非洲，日本，韓國野食都有，
一個小小既聯合國，
可以見到墨爾本個文化包容性都好強，
好有百花齊放既感覺。

食到咁上下就番酒店，第一日完

Day 2 (CBD - St. Kilda - Fitzroy)

黎到第二日，
張床太舒服訓訓下唔知醒，
出門口都已經成十一點，
即刻衝去市中心食澳洲野補數！



間野叫Cumulus，
位置係Collins Street近東邊，
成個格局好似中上環邊邊啲西餐，
好多西裝友放lunch黎呢度食飯，
見到隔離成檯鬼佬傾啲M&A野，
估都係啲Big Four佬圍爐飯堂。



大鄉里出城，
見到佢menu又有鹿肉又有袋鼠肉，
都唔係好敢叫。
保守少少叫個鴨胸算，
但點知佢啲醬又比個驚喜我，
raspberry 啲酸梅汁溝埋煎香既鴨胸，
又出奇地幾夾。



食飽飽就繼續行，
市中心有條Bourke Street，
你當係好似百德新街咁，
聚集左好多唔同百貨，商鋪，
好多都做緊Christmas Sale。



值得一提係個交通，
原來Melbourne有個規則叫Hook Turn，
司機係有Tram路軌既十字路口如果想轉右，
就要挨到最左線做一個類似袋口位既預備動作，
好似圖入面架車咁，
綠燈後需要突半個頭出去預備轉彎。
呢個規則我自己覺得係有少少on9，
但如果去Mel自駕一定要識



跟住Bourke Street行其實都發掘到好多小店。
不妨求其搵間咖啡坐下。



仲體驗埋澳洲Barbershop，
一個型到爆既鬼佬barber幫手剪頭髮。
隔離另一個鬼佬客著曬老西，
好似好趕時間唔想等，
原來佢話自己今日番緊工，
但偷偷地蛇落黎打算剪半個鐘頭髮，
再鼠番上去都無人知
真係要同澳洲佬學習啲工作同生活態度。

快d去到Tasmania啦

搵左個動物大師朋友問 原來係叫 brushtail possum

洗費係兩個人加埋？

係CBD hea完就出發去St Kilda，
好多人會去Brighton 果堆彩色屋仔，
但我睇過其實好似無咩特別，
而且又超多烏蠅，
不如近少少去 St Kilda Beach 算。
結果證明好彩做左呢個決定
因為其實澳洲南部啲沙灘全部都係一樣樣

CBD 搭 Tram 可以直接去到 St Kilda，
大約都係40分鐘左右車程，
但都係5蚊澳紙，
即刻覺得搭得長就抵好多



去到個感覺應該同外國人黎香港去西貢一樣，
會好出奇市中心咁近路程就有咁遠離煩囂既沙灘。
香港真係比較少呢種海岸線咁長既沙灘。
呢度有好多好靚同設計感既屋仔，
相信都係一個比較富庶既區域。



天氣都叫做十分比面，
個天又晴又藍，而且又唔係好熱。
岸邊有好多鬼妹跑步，
又有唔少人放狗，
係草地對出又有人busking，
成個氣氛都好chill



見到有對香港人情侶中大伏，
舖曬野餐布想係沙灘野餐，
但未行出海邊幾秒已經比海鷗圍攻，
一開頭都有嘗試趕走佢地，
去到最後都係放棄成盤野食自己走出去影相算，
所以大家唔好以為可以好似香港啲海灘咁
呢度啲沙質地都比較粗粒，
海水亦唔係好清，
絕對唔係東南亞果種水清沙幼。
而且仲要學識同烏蠅共存，
基本上行每一步都會有烏蠅跟住你一齊行，
我去到後期已經無感，
由得啲烏蠅自己飛算

行完 st. Kilda 之後就搭Uber番市中心，
其實都建議如果兩個人或以上搭Uber，
除返開同公共交通差唔多。
夏天去一定要搽防曬，
唔好唔記得耳仔同埋手背，
我一漏搽就曬到甩皮。

今次搭番去個區叫做 Fitzroy，
呢區感覺上貼地少少，
好多三四層得黎舊既樓。
都有唔少工業風既大廈。



我地去食呢間 Easey's 就係呢啲大廈樓上。
佢特別之處係頂樓有三卡舊列車，
可以坐入去食，仲望到夕陽。
係個車廂入面食野都真係未試過，
呢個循環再用又幾有Gimmick。



叫左 Burger 同埋 Mac n Cheese Chips，
都幾好味，但實在太重口，
整體味道比 Five Guys 好少少，
但成個景觀同Feel就贏幾條街，
如果各位無特別野想食都推薦，食個環境。



食完就落番街區散步，
呢區有少少似 Notting Hill 入面果d街道，
生活氣息好濃厚，
好多 Street Art 同埋感覺新潮既地方，
又有好多小商店，
適合鍾意感受民間氣息既人。



行完都夜，
決定番酒店早d抖預備第二日開始road trip

Day 3 (Living Legends - Yarra Valley - Phillip Island)

黎到第三日，
終於開始期待已久既自駕遊！
今日開始就會離開Melbourne，
我決定要比Melbourne咖啡最後一次機會，
一早去到咖啡街Flinders Lane食早餐。



呢間Dukes Coffee個樣就好適合打卡，
但飲起上黎都係一般般
睇黎Melbourne咖啡去到最後都係與我無緣。
飲完咖啡就出發去Southern Cross租車，
終於有機會係Flinders St Station搭火車過去



第一次搭MTM，雖則都係由MTR營運，
但個感覺始終正好多
搭一個站就到Southern Cross



今次墨爾本附近自駕成千公里，
加埋其實都仲多過塔斯曼尼亞，
所以都想租架穩重啲既SUV。
黎之前已經用VroomVroom比較過唔同公司，
發覺Sixt啲車款都新，性價比OK，
於是就用Sixt租左架Kia SUV
係成程最正確決定，
架車又好渣又夠靜，避震又好。
租一日大概四百蚊，
因為好多人警告我澳洲自駕有機會撞動物，
所以我決定加全保，額外一日二百，
1升油用到大約12公里，
澳洲打爆一缸都係六七百港紙，
實在係抵玩過香港太多

(p.s. 要多謝Sixt個職員，
我唔記得帶國際牌，漏左係酒店，
佢竟然問我睇香港車牌就得，
仲話
"it clearly says you have a valid driving license"
同我印象中鬼佬職員好唔同，
好彩有佢，如果唔係又影響左個行程)

實名讚 Sixt! 下次去澳洲都用佢
（利申真係無收錢）

（溫提：以下呢篇係獻畀Living Legends，
會出現好多匹馬）

車一到手就即刻飛去Living Legends，
佢係一個專門比退役賽馬安享晚年既牧場，
位置係墨爾本機場附近。
我黎之前已經係佢官網訂左Public Tour，
希望可以準時到見到精英大師



澳洲郊區所有景點同地方都有位park車，
絕對方便自駕人士。



市區渣半個鐘左右，
11點鐘去到，啱啱好趕得切Public tour。
個Tour第一匹睇既馬就係精英大師！
原來佢依家同佢當年宿敵牛精福星一齊住，
導遊話佢地兩個好好朋友，
精英大師就靜少少，
牛精福星就好鍾意搶Focus



成功用蘿蔔引到精英大師行過黎
十七連勝，香港歷史最佳短途馬，
時代雜誌最具影響力“人”物，
代表香港贏得日本短途錦標既傳奇
活生生就咁係面前出現，
仲可以任摸任餵，其實真係好癲





附上型仔相片一張，
佢真係好靜好乖，
見完都明白點解佢馬主幫佢改名 Silent Witness



走廊對面就係另一匹馬王美麗傳承，
佢當年仲係香港史上獎金最高馬匹，
依家就已經比金槍六十趕過左。
導遊話小心啲佢，
條衰仔鍾意咬人隻手
講完之後成團鬼婆都唔敢餵佢



大家又估下呢隻咁黑既係邊隻馬？
相信大家都有聽過佢個名，
佢係同美麗傳承同年，
但話題性就高過對方好多



就係巴基之星喇
導遊話佢依家乖到不得了，
仲讚佢其實係一隻十分之聰明既馬，
好識得同其他馬同埋人類相處。
佢只係好憎比人鞭，
所以先咁有性格



跟住係澳洲一代短途馬王阿帕奇貓，
佢最引人注目就一定係個大白鼻樑，
不過好似話佢對眼唔係咁好，
要同其他馬隔離，睇下醫唔醫到。



呢隻馬係澳洲馬，
唔記得叫咩名，
但好有性格，會做鬼臉去引人注意，
一比蘿蔔佢就恢復正常



最後出場既係香港最強灰馬加州萬里
佢同其他三隻馬一齊住最大塊地，
睇個樣都似玩得好開心



個tour大約個半鐘行完，
如果想request的話，
其實仲可以睇更多，
包括爭分奪秒，紅衣醒神，美麗大師
個Tour臨走仲有scone食，
包一杯熱飲，
如果鐘意睇馬既朋友，
真係一定要黎

留名學野

係，但我機票真係好平
同埋我澳紙4.9唱定
宜家你預一人三萬左右（2.5星期）