醫療保問題（各年齡層嘅人可唔可以講吓你地諗法）

從事醫院行業
我估自己比一般人更警覺自己身體出現嘅癥狀
雖然十之八九都係自己嚇自己嘅多
但返工見得太多唔同嘅病同死法
所以呢類疑神疑鬼都係有殺錯無放過嘅好

呢幾年開始睇緊啲醫療保
講話係幾年，係因為每次有啲癥狀出嚟果吓先去搵資料，
但搵得嚟，忱誤吓，又無咗件事，

如是者呢輪真係覺得唔可以再等啦，
網上睇咗啲資料，
自己又有啲諗法，
唔知大家點睇：

零墊底費 VS 有墊底費
自己做果行除咗政府醫療全免之外，
其實排嘅隊同巿民都一樣，
無大家所謂嘅公司醫療保，
所以自問覺得零墊底費先最適合，

喺有墊底費嘅場合，
每次自己疑神疑鬼，
都要比一萬（墊底費），
先可以CLAIM剩餘嘅支出，
變相好似就多個門檻，
有咩事，都會諗咗：要畀呢一萬先，
就會變咗不如等公立啦，
因為出得一萬嚟診斷唔中個病，
同我喺公立等差唔多
VS
如果我零墊底，
我可以有理無理都去CHECK咗先，
中唔中，都係無額外支出。

依家睇，我年紀，
零墊底FWD尊為你每年要一萬左近，
如果畀一萬墊底嘅話，就五六千一年。

大家嘅醫療保退休係點處理？
我又喺度諗，因為醫療保都係EXPENDITURE 嘅支出，
買有效期內嘅保障，有保就有用，無保就係畀咗，
如果去到退休，自己無收入嘅時候，
每年要畀二三萬保費，
有機會演變成好可觀嘅支出，
大家喺退休計劃裡面，係點看待自己份醫療保咖呢？

上面只係我呢期嘅思路，
可能有啲位我自己鑽咗牛角尖，
或者你地無咁諗過，或者你地有唔同嘅諗法，
歡迎討論。

大家每年洗喺醫療保裡面嘅錢，係收入嘅幾多？
或者有無啲自己買開，有方法平啲去COVER晒啲醫療開支呢？

感謝
利申：有兩份危疾，有咩重病中到CATEGORY都有一筆錢出嚟。

我都好似你咁諗，見到高端醫保年紀大個保費加得好勁
所以買咗唔洗墊底費，賠格仔既醫保。
小病小手術就私家，大病去返公立算

唔保
小病政府醫，大病唔會醫，
見過唔少大病，俾好多錢醫又醫唔好，只係加長痛苦

因為自己做醫院 都見得多唔同花式嘅死法
病佢醫唔醫得好都唔係重點
重點係你疑心以為有病到真係出診斷果段等待時間
喺公立就拖你一頭半個月
本來醫到嘅都變咗太遲

一樣做緊醫院，公立醫療費用全包，本身有份普通全包一份高墊底半私家

而家諗緊點砌個新plan

我覺得要視乎你想要咩服務，咁就付出咩價錢，let say原本我個plan係小事住ward大鑊嘢住semi private，但係我覺得就算私家醫院ward都會好嘈好多人，寧願多d錢全部semi private or private，咁砌plan就有分別㗎啦

同埋要計嘅係幾段，25-45，50-70，70+
三個年齡層嘅保費，唔同公司有分別，有d就後生平老咗貴，有d就幾時都咁貴而家人類壽命越嚟越長，我寧願揀份後生貴d老咗無咁貴嘅

同埋睇你想treatment係邊度做

始終公立係玩分流，私家玩課金，但係如果私家check到d大鑊嘢 let say cancer 公立見到都焗住幫你打尖，所以我覺得一份for diagnosis嘅保險重要d

唔好問我邊個plan好，呢度好多agent揾食，小心d

同埋，就算連登仔點講都好，醫保一定要揾個信得過嘅agent跟，你病緊嗰陣唔好想跟d form。

同埋最好有免找數，幾十萬唔係咁易搬出嚟

又係啲傻鳩agent 冇單開上黎寫故事

你呢段回應十分好！
咁大概每年畀幾錢？

又幾撚有心機 作咁大篇

而家覺得有d唔抵，5500到？每年1000萬樓下全包

你大概係咩年餐range
我38 睇FWD 要九千尾一年

Fresh grad年齡層
尊為其實幾好，前提係要有自付跟住搭份平d去比自付

係咪大部分都係包手術only
如果係長期病 要食藥就唔包

25k 墊

要有自付係因為無自付嘅話佢太貴？？

咁有啲咩保險可以Cover 佢自付果一部分？：）

呢家大部分工都有基本醫療保
買多份自願醫保$50000墊底費就夠
危疾 儲蓄成份醫療 一定唔買

就係做醫院嘅竟然無⋯⋯

做醫院咪有HA
點會無
平時睇傷風感冒
自己睇私家都幾百蚊細數目
保險for大病大數目用
如果買保險for細數目醫療
勸你咪買

有時急切怕自己係咪瀨嘢（重病）
但啲病徵唔係咁明顯果陣
醫局排好耐
私家有錢即刻同你檢查
我志在嘅保障係呢一Part 咁。

小病自己執藥食都得。
大病中咗唔緊要
最緊要係「未知」同「中咗」中間要用幾耐

其實睇你budget 係幾多， 如果唔想咁煩同咁貴既， 可以直接揀50萬果隻易衛您 + 25萬自付費既尊衛您， 咁樣揀個保費會平過你揀0自付既尊衛您

咁嘅組合

例如
我流咗幾日鼻血
怕自己鼻咽出現問題
去私營診所睇耳鼻喉
照咗鼻鏡
佢收我3700。

或

都係流咗幾日鼻血
個醫生安排入私家
照咗鼻鏡
做埋掃描
抽咗血
三日住院
收咗我60000

係咪都claim 得晒？

Claim 到呀， 上面係門診手術，下面係醫院做檢查

如果你想好詳細咁問就隨便tg我😗
https://t.me/wt_dafuq

你喺度講吓咁嘅組合
你當三十八無病史無煙
大概幾錢左右

好懷疑你係富衞agent，咁砌個plan好貴50萬以下又淨係可以住ward