[遊記] [非自駕] 四日三夜快閃沖繩

其實香港冇揸開車，去沖繩自駕應該冇乜難度？

睇下有mud update 先

沖繩未被日本統治之前
一直屬於琉球王國一部分
而首里城就係琉球王國既中心
不過首里城可以話係多災多難
自從幾百年前起好開始
先後幾次因為戰鬥同火災而受損
自從二戰再次被炮火摧毀之後
沖繩人用左三十幾年由零開始重建主體建築
直到1992年先修復完成
重新開放俾大眾參觀
首里城跡亦喺2000年被列為世界文化遺產
點知四年前首里城又因為電線短路引發大火
將辛辛苦苦起好既正殿燒得一乾二淨
於是又開始進行重建工作
預計最快2026年完工
可惜當年用黎興建既檜木
依家已經被禁止斬伐
屋頂所用既傳統琉球赤瓦
亦隨住當時唯一識燒製既瓦匠逝世而失傳
意味住以後應該好難百分百還原當年既首里城

雖然正殿暫時冇左
但係外圍既建築物不受火災影響
依家黎到一樣照行可也

有濃厚中華風既守禮門

作為首里城既門關
門口仲寫上「守禮之邦」四個大字
從前既琉球王國果然深受中華文化熏陶

守禮門附近仲有得著下琉球傳統服飾影相


接住而黎係無盡既樓梯
其實只有幾十級



上到去風景都幾好
可以望見遠方既太平洋


付費區前既空地展示緊受火災影響既大龍柱

兩條大龍柱本身豎立喺正殿前方
雖然燒左十幾個鐘之後依然冇冧低
但係已經周身傷
直到現時仍然進行緊修復工程
順個靚便向世人展示一下燒傷既痕跡

睇完兩條龍就買飛支持下重建工作


原本既正殿依家變左幅畫


依家既首里城變左做修復工場見學
眼前成個大貨倉咁既建築物
就係實際施工既地方



如果平日黎參觀
仲有機會一睹工人點樣依照圖紙切割原木
好有興趣知道點樣先可以做到分毫不差


工場入面仲擺低左條木
介紹點樣將一條原木慢慢磨做圓柱


工場開放既部分就係得咁多
其餘位置都包到實一實


工場外面仲展示左其他燒到面目全非既雕刻


成功逃過一劫既世誇殿
雖然係近幾年先起好

當年係公主既起居室
同時亦係新國王舉行登基儀式既地方
依家就變成休息室

其實沿途仲有好多展板同影片
講解首里城既歷史同受災後既情況
不過大部分都唔比拍攝
呢部分就留返俾大家去到現場慢慢睇啦

睇完一堆資訊
要行上早幾年先開放既展望台睇下景放鬆返



向東會望到住宅區同遠方既知念半島


西面會望返首里城
據說如果天氣好既話可以見到慶間良諸島


close up一下珍貴既赤瓦


行埋展望台就睇完成個付費區


出口有個花園(?)
角落仲有條樓梯


出於好奇踩上去望下
點知原來乜都冇
展望台個view仲靚過佢
完全浪費腳骨力


行完就睇埋紀念品
入面都係賣下手工藝品同野食咁



有冇人話我知另外嗰啲印仔喺邊到


最後沿路行返去搭單軌返國際通



老實講
本來首里城最具觀賞價值既
就係被一把火燒清光既本殿
所以重建中既首里城真心冇乜睇頭
加上交通又唔算稱得上方便
沖繩本來就唔係一個交通方便既地方
除非對重建過程好有興趣
否則個人覺得可以等到本殿起好之後
先一次過慢慢遊覽

轉個頭又返到國際通


行完首里城之後餓到腳軟
第一時間去搵野食

經過屋台村覺得幾有feel
成班仔坐喺出黎飲酒吹水
但覺得唔太抵食就冇留低

中途路過酒鋪
原來沖繩都興用蛇浸酒


行完一輪結果搵左間平民飯堂食沖繩そば
除左麵之外仲有牛丼賣

雖然中文譯做沖繩蕎麥麵
但係入面其實冇蕎麥成分
麵條100%由麵粉製造

水杯係茶記style
證明真係local餐廳


簡簡單單既一碗麵
湯底應該係柴魚高湯為主
面頭有兩舊肥豬肉同魚板


麵係彎彎曲曲既
咬落偏淋，質感有少少似上海麵


豬肉肥瘦相間
口感同東坡肉差唔多
味道似台式滷肉
仲隱隱約約食到有花椒八角味
魚板就......魚蛋啲fd黎

總結係碗麵有fusion菜feel
係中式粉麵 + 台式滷肉 + 日式湯底
同埋好食還好食
但係黎到日本會想食返具日本特色既野多少少
沖繩そば呢啲試過一次就夠

食完餐飯去隔離買杯Starbucks


再啪左杯海鹽雪糕
就返酒店稍事休息了



どん亭 牧志店
https://tabelog.com/okinawa/A4701/A470101/47005006/

個半鐘之後又出門搵野食
沖繩除左出名食麵之外
聽講牛扒都幾好食
襯住最後一晚黎試埋佢

貪就腳去左有好多分店既steakhouse 88

明明上網寫國際通間間分店都要排隊
但係可能夜已深
今次黎到完全唔需要等位，可以直入

裝修好有七八十年代既美國風情

唔只鋪頭有美國情懷
連店員都係American style
用充滿口音既日文幫手落單
可能講返英文仲易明啲

叫牛扒餐可以任食沙律、湯同汽水
都預左係普通野


另外加680円仲可以任食blue seal雪糕
不過岩岩幫襯完就不了

叫左一份菲力牛扒同一份蒜粒牛扒

份菲力牛排唔食猶自可
一食就把幾火
明明叫左半熟
上枱變左七成熟
喺鐵板既餘溫加持下
煎多兩野直頭變左well done
搞到塊扒韌哂不特止
舊牛仲冇乜牛味
淨係聞到另外嗰份牛有好濃既蒜香味
完全唔知自己食緊咩
有蒜嗰份塊扒雖然普通啲
不過有啲味吊下反而仲好食
但係真係要講既話兩舊都好一般
成碟最好食竟然係pat薯蓉

呢餐埋單連加一仲食左差唔多八千羊
當時折返港紙要460蚊
咁既價位咁既質素真心不了

ステーキハウス88 国際通り西口店
https://tabelog.com/okinawa/A4701/A470101/47017672/

塊牛扒衰過香港茶記啲鐵板餐

識食既永遠唔好食依類版，唔係天價都唔會好食，衰撚過大家樂塊扒

呢啲價位都預左係茶記level
點知仲衰過茶記
又貴又難食

食完貴夾唔抵兼難食既一餐
襯住blue seal仲未閂門
即刻買返個可麗餅氹下自己

不過唔知係咪臨收鋪太多order
整餅哥哥俾錯左另一隻雪糕
最後變左雙球雪糕可麗餅
海鹽曲奇味真係好好食

食完甜品去donki做最後衝刺



一袋5kg日本米先60蚊港紙
唔怪得俾人掃哂啲貨


唔知幾時先有機會玩煙花呢


唔知係香港開左donki之後行得多
開始欠缺新鮮感
定係兩次旅行時間相隔唔遠
抑或係沖繩donki真係少野賣
埋單只係買左枝酒同少量日用品就收左皮
連稅都退唔到

國際通有大大個牌寫住m記24小時開放
買完野打算標個尾會食個是靚宵
點知行到去落哂廉
門口仲封住左


最後唯有去便利店買野食


Day 3 完

去得太密就冇左新鮮感

live左
加油

Lm

黎緊月底都想獨遊沖繩

肉之變態集團真心正

我11月頭去d野食睇落都幾啱口味
超期待

Day 4

開心既時間過得特別快
眨下眼已經要準備返歸
由於搭午機既關係
朝早8點左右已經要check out

襯住仲有少少時間
而且咁岩又順路
於是去多次小祿aeon mall做終極衝刺

超市部開朝八晚十一真係無敵
不過時間太早
天橋入口仲未開
要由地下出入

地下入口仲要有位免費鎖行李
只要手持一張ic卡就可以用
對遊客黎講真係100分


一入門口已經見到一堆沖繩菠蘿
價錢係香港既一半
結果忍唔住買左兩個

沖繩菠蘿的確好甜好好食
不過硬係覺得同台灣金鑽菠蘿差唔多
20蚊台灣菠蘿 vs 100蚊日本菠蘿既話
應該會揀返食台灣野

另外仲買左兩包好甜既蕃薯
同埋幾隻沖繩苦瓜
本來諗住孝敬下家母
點知最後大部分都係自己食哂

想問下d生果蔬菜寄倉定手提
我都想帶幾個苦瓜返去

手提拎住
個喼裝唔滿，掉黎掉去實爛哂

thx

行到時間差唔多就搭輕軌入機場


check in counter都幾多人
呢啲時候有買u first就大派用場


慳左既時間可以嘆返個最後早餐


仲有閒情逸致欣賞下悅耳既音樂
細心留意會見到樓下有人彈緊琴


咁岩見到Pokémon飛機，仲要打孖上


大約起飛前一個鐘左右開始排隊過安檢
行到埋去先發現大禍臨頭

條龍目測最少有百幾二百人
年頭喺關西既經驗話我知
呢條龍冇返個幾鐘都消化唔到

正諗緊今鋪大撚獲之際
突然聽到有地勤姐姐叫緊我地班機
話可以排fast track
以當時既情況黎講
嗰位地勤姐姐簡直係救世主
所謂既優先隊其實得十幾廿個人
但係都等左超過二十分鐘
如果排正常隊一定排到架飛機飛走左都未到

安檢條隊中間擺左一堆違禁品
睇黎成日都有人中啫喱同豆腐既伏


過哂安檢、搞埋離境手續
已經係起飛前20分鐘既事
作為成條fast track最後一個過關既人
一出關已經有兩個地勤特別關照
一齊陪我跑去閘口
搞到我勁唔好意思
不過亦都好彩有佢地
我先趕得切上機

一行上登機橋
已經聽到背面傳黎「咔」一聲
意味住個閘已經閂左
唔再放人上機

上到機又食野
回程訂左咖喱飯，係茶記水準


白汁磨菇意粉竟然有芝士
不過相對咖喱飯就失色左少少


適逢嗰陣hk express岩岩轉左logo
要散下有舊logo既貨
咁岩機上面有個空少勁識sell野
好強調舊logo既貨係限定商品，仲半價發售
氹到前面個師奶買左兩個旅行袋同sim卡
聽到自己都差啲想課金


冇乜幾可返到香港都仲係日光日白


買左u first除左可以優先check in之外
另一個好處就係可以優先攞行李
岩岩好趕得切一個鐘一班既A車
終於唔洗飛的返屋企


Day 4 完



全篇完

個豆腐伏伏地 以為係甜點知係咸

鹹既花生味年糕
完全唔知邊忽似豆腐
好彩只係買左一盒返屋企

仲有一個係豉油