九州遊記

今次係第二次去九州，因為抽中來回鹿兒島機票，所以行程由南九州開始玩上北九州，最後落返南九州，為期15日，少鐵膠同城膠

由於要就返部分觀光列車嘅時間（好多都星期六、日先有班次），所以有啲位未必做到好順暢，仲有近期九州都不停落雨，部分行程都跟唔到，講吓大致玩法係點

Day 1:鹿兒島
Day 2:鹿兒島>指宿（指宿玉手箱）
Day 3:鹿兒島>熊本
Day 4(sat)：熊本>三角（坐A列車去吧）
Day 5(sun)：熊本>鳥栖>佐賀>博多（SL人吉）
Day 6:博多>長崎（雙星4047）
Day 7:博多>系島、唐津（自駕）
Day 8:博多>太宰府
Day 9:博多>有田、武雄溫泉
Day 10:博多>門司港、下關、小倉
Day 11(sat)：博多>阿蘇（本身plan搭阿蘇男孩，因為大雨取消咗，下面再詳細講）（自駕）
Day 12(sun)：阿蘇>熊本>鹿兒島（自駕）（翡翠 山翡翠&九州橫斷特急）
Day 13:鹿兒島>櫻島
Day 14:鹿兒島>霧島（原定計劃）
Day 15:鹿兒島>香港

分別用咗兩個3日南九州pass同一個7日北九州pass

Day 1
係香港落咗幾日雨，出發嗰日好好天


一到鹿兒島又落雨


出境有4、5個窗口處理我哋班機嘅人，正常速度，拎完行李就搭巴士出市區
雖然天文館通多啲餐廳，但我哋都係住鹿兒島中央，始終成日搭jr
一落車行李都未放就食炸豬扒飯，好好食！啲豬扒好淋好香豬肉味，個炸粉都好鬆化


拎好pass、Check in 之後就去鹿兒島城，道門好大


跟住去照國神社，本身想去埋城山展望台，不過見天氣一般，仲要行斜路就放棄咗


去完神社就行天文館通，試咗當地名物—白熊刨冰，好難食，罐頭水果加煉奶嘅刨冰，食咗幾啖就掉，可能堂食會好食啲？上網見到唔少評論讚好食，我真係唔識欣賞，之後所有同白熊有關嘅手信都冇買


行咗陣就去食晚餐，有幾間想食嘅餐廳唔係冇開就冇位，最後食豬肉shabu shabu ，鹿兒島嘅豬肉真係幾好食，好鍾意食關東煮嘅我都嗌咗份，正常冇特別



Day 1完

im

Day 2
呢日去指宿，本身放喺尾嗰幾日去，好處係可以第一日去到日本先book 指宿玉手箱，慳返預訂嘅錢，不過我哋後尾都想搭咗先就將佢放返第二日，所以俾咗1000羊網上book定。
jr 站會展示呢架車班次同座位空缺情況出嚟，多數第一班車都會full ，如果落機第二日就去最好book定

搭車之前去食麥當勞，鬆餅包


指宿の玉手箱·每日都有·全車指定席



車上嘅甜品好特別，都係兩隻色
列車會沿住海行一段時間，風景好靚


去到指宿見到好多伊貝，之後搭的士去砂樂會館


試完砂浴就行返去指宿站，順便搵唔同嘅伊貝孔蓋




打完卡搭車去日本最南車站，嗰度啲車好疏，記得睇定時間表先



去完返指宿站又見到指宿玉手箱，今次喺另一個角度影


指宿站原來有啲的士plan 會車你去唔同景點，不過我哋去完上面兩個已經好晏，所以就搭車返鹿兒島，下次去可以join

Day 2完

Day 3
由鹿兒島出發去熊本，一去到熊本就有好多熊本熊，好得意


放低行李去咗勝烈亭食炸豬扒，又係超好食，今次個皮更加鬆化，舊豬又好淋好香


食完去水前寺公園，啲繡球花開得好靚



行咗陣就去熊本城，熊本城下都有唔同嘅舖頭行，去咗間餐廳食赤牛丼同燒馬肉(左馬肉，右牛肉），馬肉口感食落有啲似牛肉，食多幾舊有啲滯



熊本城


呢個雪糕好甜好難食


行完熊本城去上下通商店街，有水果舖賣嘅雪糕好正，個蜜瓜好甜好好食！


晏晝食得太飽，夜晚都唔算肚餓就去磯丸水產食少少海鮮


Day 3完

Day 4
由熊本搭A Train 去三角，全車指定席




A列車中途有個站可以買橙汁（唔係幾好飲），不過好快就要上返車


去到三角就搭船去松島睇海豚，車同船嘅班次應該夾好咗，你搭A列車去隔一陣就會有班船出發，睇完海豚返嚟又係可以搭返A列車，不過我哋有其他景點所以回程冇搭



睇海豚前食咗個天婦羅丼


松島原來仲有個水族館，不過時間關係冇去到，睇海豚都係網上預先book定，呢度睇海豚嘅機率係98%，好興幸自己唔係嗰2%，真係有好多海豚




睇完海豚就差唔多要搭船返三角，下一站去咗網田

御輿來海岸，有埋日落應該更加靚



睇完就返熊本食晚餐，行過見到個蜜瓜蛋糕好吸引，買咗個食




Day 4完

留名支持，個豬扒幾吸引

吉豬真係屈機，我係福崗食，肉又軟又香，皮又脆

Day 5
由熊本搭SL 人吉去鳥栖，全車指定席，基本上星期六、日都有開，一至五要睇月份，8月多啲日子有車
https://www.jrkyushu.co.jp/chinese/train/sl.html

呢架車2024就會引退，所以位都好難bk ，一定要30日前準時撳入去，本身我哋揀二人位都冇晒，然後轉bk 兩次一人位就成功，好開心！之後一路都喺啲公共位置坐，或者周圍行
雖然成功bk 位，不過都好擔心會搭唔到，有時太大雨會停啲車，好彩最後都順利搭到




架車真係好靚，沿途見到啲人都會同架車揮手，喺日本搭列車真係好有氣氛！我地預先book 埋便當喺車上食，仲買咗兩杯野飲



中途會停幾個站，大家都趁呢啲時間出去影架車


終於到鳥栖，由於帶住個喼，我地搭車去新鳥棲放低個喼喺locker 就去佐賀

第一站食烏冬，天婦羅番茄烏冬


食完去佐賀城，個歷史館係免費嘅


下一站去吉野遺跡，因為就嚟閂門同落雨，我地喺吉野ケ里公園站搭的士去嘅




啲雨越嚟越大，好似倒水咁，對鞋喺吉野遺跡淪陷，之後仲要行返去jr站，成隻鞋都係水


返新鳥栖拎喼，順便換拖鞋，隻腳好似重生咁，之後就去博多。酒店check in 完就出發食晚餐，搭七隈線去天神，上年嚟都仲未整好，依家整好就試吓新鐵路


去咗間居酒屋食牛腸鍋，咬咗啖就冇食


Day 5完

Day 6
呢日去長崎，會喺武雄溫泉搭雙星4047去
呢架車來回係行唔同路，以前個印仔來回係唔同色，依家好似係一樣。雙星4047有好多活動，中間有幾個站都會落車俾你喺車站買嘢，車內體驗就有試食紫菜，成程車都好忙碌



第一站係江北，作為日本鐵道迷見到呢啲袋一定要買啦，仲買咗水果三文治，幾好食



上到車就拎預先訂好嘅便當，影完相食咗幾啖又係時候落車




肥前濱站，又係打卡同買野嘅時間




夠鐘上車繼續食便當，去到多良站又落車打卡，係去大魚神社嘅站，上年自駕遊去冇經過呢個站，依家可以睇返



話咁快又上返車，都唔記得個便當食咗幾耐先食完，食完便當就開始紫菜體驗活動，個活動一上車就可以book 定，依家聽佢介紹啲紫菜點嚟


介紹到一半又落車打卡，呢個站冇野買，主要睇架車係海邊，可惜係陰天


上車就開始食紫菜


落車前仲每人派咗粒糖，成個列車體驗好充實


去到長崎已經1點半，準備去食吉宗茶碗蒸，去google睇嘅時候發現佢嗰日冇開，即刻好失望，之後搵到間分店就出發去食，一去到發現佢原來唔係分店，係做外賣，成車送出去嗰啲外賣，又變到好失望。

喺我哋討論緊食咩嗰陣，吉宗個呀叔行出嚟問我哋去邊，係咪唔識路嗰啲，咁我哋就同佢講想食茶碗蒸，講完一輪佢就話可以賣俾我哋食，最後變咗喺呢間外賣店入面食。

望住啲蒸籠食茶碗蒸，呀叔仲超好人，拎咗啲木板搭張枱俾我哋食，又搬個風扇出嚟，最後仲請我哋飲茶，佢仲話自己都有去過香港

呢度個茶碗蒸同堂食有啲唔同，印象中堂食好似冇魚喺入面，但外賣店就有，可能係自己記錯，不過呢個體驗真係好特別


食完就開始長崎半日遊，去咗之前冇去到嘅景點，平和公園


眼鏡橋，記得上年plan 行程覺得條橋好無聊，得兩個窿冇咩特別就冇去，今年去睇其實都幾靚


之後去咗思案橋食長崎料理，有好多舖都冇開，最後入咗一間食


呢三兜睇落一樣嘅嘢分別係拉麵、脆麵同飯，三個味都差唔多，係個底唔同，味道ok 嘅，不過三兜都係咁就唔ok 唔知嗰陣做咩會咁叫，好on9




Day 6完

真係好好食，以前麻麻地吉豬，會食到個嘴損晒，不過日本啲吉豬食到好舒服又唔會滯，食多幾餐都冇問題

留名

好掛住勝烈亭

lm

Day 7
呢日去系島，我哋喺筑前前原站拎車出發
第一站去咗間好靚嘅麵包舖，不過啲麵包唔係幾好食



之後去睇夫婦岩同鳥居


櫻井神社


一蘭之森，其實我覺得一蘭幾好食




芥屋大門，之前諗住好似龍貓條路咁啲樹會好矮，原來都好高


鳥居行出去係海，好靚



唐津城，天守閣望出去嘅風景都好靚



唐津神社


名護屋城跡，啱啱好趕喺博物館閂門前印印仔同參觀吓，去完博物館再去周圍行吓




喺道の駅買咗個橙啫喱同番薯



之後又趕住去鏡山睇日落



還車之後就返福岡食燒肉，燒肉爐好廢，得中間先熱


Day 7完

Day 8

第一站，福岡城，上網睇好似話會重建返



福岡縣護國神社


中途經過間舖，呢個包都幾好食


櫛田神社



山笠祭祭具，祭典開始嘅前一日已經離開咗福岡，唔知有冇巴絲去咗


炒飯都幾好食



原本今日諗住去志賀島踩單車，不過一直落雨又停雨就取消咗，臨時決定去太宰府，一嚟可以搭旅人，同埋附近又有啲城可以印印仔，所以再去多次


車上面拎


去到太宰府好好天



之後去太宰府展示館印大野城跡嘅印



夜晚食葫蘆壽司，壽司幾好食，不過覺得生嘅鮑魚麻麻地，好硬

鰻魚好正


夜晚去居酒屋


酒店附近有章魚燒車，好得意


Day 8完

樓主有無儲100名城印仔

上網見到話近年搵到封信係證實有呢個天守，所以諗住重建，唔知真唔真

有呀，今年先開始儲
仲有續百大名城

留名支持

Day 9
第一站去篠山神社同埋印久留米城跡印仔


除咗百大名城，今次旅程仲入手咗本九州駅印帳，見行程許可就去咗鳥栖拎埋張駅印，同埋試咗站內立食烏冬


跟住去上有田嘅陶山神社，呢個神社好特別，鳥居係用陶瓷整，神社入面都有唔少擺設係有田燒，呢度嘅御守同繪馬都係有田燒，好靚！就連御朱印帳都係，即刻買咗一本，御朱印都好靚！




呢間神社仲有個特色之處，神社入口出面就係平交道，行緊神社嘅時候咁啱有列車經過


行完神社就去咗有田站，有田站有好多有田燒，去呢度主要想買個特色便當，呢個便當隻碗係有田燒，買完會幫你熱埋個飯，之後仲買咗兩個甜品，都係用有田燒裝住，芝士蛋糕好好味




買完便當搭咗去武雄溫泉站先食，食完就去武雄溫泉，覺得個溫泉似係澡堂多啲，不過行咗半日，有呢個抖下嘅時間係幾好嘅



呢個郵筒好得意


之後去武雄圖書館，入面唔可以隨便影相，有指定嘅影相位，圖書館好靚


夜晚去中州食壽喜燒


食埋屋台


Day 9完

Day 10
呢日去門司港



去到門司港就搭船去下關



傳聞非常伏嘅唐戶市場一路都聽人講唔好食，不過入到去見到啲壽司大大件幾靚就買咗幾舊，諗緊會唔會幾好食，係啲人要求高啫。買完揾個位坐低食，真係中伏，俾佢個外表呃咗，啲壽司飯唔好食，食材都好一般，完全得個樣



都明點解會中伏，啲壽司樣都呃到人


試完伏就去附近行吓
日清講和紀念館


赤間神宮


雞泡魚郵筒


沿住海邊行去關門隧道



呢度嘅印仔好特別，要行晒條隧道先可以變成完整嘅印


跨縣打卡


一出隧道冇幾耐又落大雨，成隻腳又濕晒


電話博物館，真係可以打到電話


香蕉人都入返室內


喺門司港附近入咗間舖食咖哩飯，個薄餅幾好食，咖哩飯都唔錯


Pokemon 孔蓋


好好味嘅水果芭菲杯


九州鐵道紀念館



之後搭車去小倉，旦過市場，去到已經好晏，入面都冇咩好行，不過見到檔關東煮幾吸引就買咗


小倉城，呢個城係少數收好夜嘅城，唔使朝早趕住去，同埋入面都有啲野玩


Pokemon 孔蓋


喺小倉站附加食埋飯就返博多


去到jr 閘口見到大大張紙貼住好多鐵道因為大雨要延遲同停駛，其中一架就係阿蘇男孩，由熊本去阿蘇嘅鐵路都閂晒
由於之前去四國都試過大雨取消鐵路，所以知道應該可以book 高速巴士去阿蘇，確應咗有新幹線去熊本之後就book 定高速巴士，冇得搭阿蘇男孩實在太可惜

Day 10完

指宿去最南係咪靠列車再行過去？
睇得好過癮 九州離開博多之後郊區真係好慢活

指宿搭列車去西大山駅，一落車就係個最南車站
博多真係熱鬧好多，其他地區嘅夜晚都好靜