[多圖多字] 獨遊6日立山黑部、富山、金澤之旅

我見佢係金澤市裏面嘅迴轉壽司評分都好高
都真係值得一試
3300又真係唔貴喎

3件嗰啲最抵食

呢間「はた中」係食壽司，外觀已經好吸引我
但一份Omakase都要成萬Yen

一場黎到我就會試埋佢

10000YEN 而家都只係600蚊唔駛

係車站食壽司都4500YEN 啦

Day 5
29.4.2023

一起身見到個天真係不得了
又無乜雲又夠藍


不過天氣報告話下午3點開始會落雨，我都要把握好時間先得

酒店對面有間「麺屋大河」拉麵店係金澤數一數二出名


琴晚糾結左好耐食唔食拉麵做宵夜，但最後都係為自己個肚著想無食到

返到去金澤車站





先簡單比大家望下搭咩車去咩巴士站，等大家可以根據自己目的地選擇巴士


如果係完全離開金澤去其他城市嘅長途巴士就去1/2號站
市内景點就主要係4/5/6/7號站
其中4/5號站係隸屬JR巴士，而如果好似我咁手持JR Pass係可以免費任搭

另外金澤北陸鐵道都有出一張1日乘車劵「1日フリー乗車券」
價值￥600，可以係交通案內所購買
就可以任搭北鐵企下所有市内巴士，更加方便

好似我呢啲Cheap友就緊係搭JR巴士
乖乖地係5號站等車


同埋JR巴士每逢禮拜六日及公眾假期都會有架巴士まちバス(Machi-bus)
單程只係￥100
環繞金澤市內所有熱門景點(近江町市場、金澤21世紀博物館、「兼六園」等)行駛
班次：https://www.machibus.com/pdf/timetable.pdf


係「兼六園」站落車


一落車就會見到前田利家像


如果大家先去「兼六園」就係巴士站過對面馬路，行上斜路就得

本身第一站係「兼六園」
但落車之後見到條馬路兩旁綠樹林蔭覺得好自在，所以就周圍行下先



金澤城護城河


行到十字路口
一條路仔係上「兼六園」入口

一條係石浦神社方向

《石浦神社》

石浦神社係個比較細規模神社



但呢個神社最出名係保佑/求戀愛，好適合所有人



而且呢度都有個打卡位，就係由101座鳥居連綿而成嘅道路



咁岩呢兩日神社有活動，擺放左幾個booth



如果大家去金澤21世紀博物館/「兼六園」個陣，不妨順便參觀埋石浦神社
求返個愛情比自己

石浦神社隔離有條斜路


行上去分別會見到石川県立美術館、国立工芸館、石川県立歴史博物館




成條路都種滿樹
雖然呢日天氣好熱，但就完全唔會好曬

《兼六園》

兜左個圈會去到「兼六園」7個入口其中1個


入場費￥320


「兼六園」係日本三大名園之一，成個風格係代表江戶時代大名庭園
佔地11萬平方公尺，係歷經多任藩主修建而成

「兼六園」嘅兼六其實係講緊庭院具備六勝：宏大、幽邃、人力、蒼古、水泉和眺望

一入場已經見到有對新人係度影結婚相


「兼六園」係一大個圈，所以無特登路線
我都係跟返我自己沿途所見同大家介紹

呢條係花見橋
花見橋係一條好適合賞花嘅橋，因此先叫花見橋


橋下有條小溪，兩旁種滿樹
櫻花季節個陣呢度都會有好多櫻花



行前少少有棵黑松樹「根上松」
呢棵黑松高15公尺，Total有成40枝樹根露出地面




「明治紀念之標」


「手向けの松」



「鶺鴒島」
呢個所謂島比較特別係具備日本神話，相傳係一對男女係鶺鴒引領下學識扑野......
左邊松樹叫「相生之松」，代表「結合(結婚)」
中間岩石叫「陰陽石」，代表「出生」
右邊石塔叫「五重石塔」，代表「死亡」


呢度超多赤松


初春個陣，「兼六園」更加係個賞梅好去處
種植左品種超過20嘅梅花，total有成200棵有多


有舊石，以前曾經係用作擺放銅像


呢個就真係萬綠從中一點紅



「霞之池」係「兼六園」嘅中央景點，面積有成5800平方公尺
環繞四周都絕對係打卡之選


「徽軫燈籠」係北池個邊，呢個位係最多人影相




「內橋亭」個邊影出去都唔差




但我最鍾意個位其實係「霞之池」東岸嘅「唐崎松」個度影過去「霞之池」
超多綠色，好充實





另外「唐崎松」都係好值得介紹嘅松樹
向外延申得好堅挺，好有力量感，算係「兼六園」最受歡迎樹木
而且「兼六園」好多poster都係取自呢個位，冬天11月開始個陣會綁上雪吊(一隻隻插到變錐體)，令「唐崎松」好似變成一把大雨傘




係「兼六園」望出去市區，雖然樹木比較多
但都睇到少少市景



「雁行橋」


見到呢棵樹2條樹幹互相盤繞


呢個噴水池個名叫「噴水」
但唔好聽個名好似好膠，人地其實係1861年建造，相傳日本最古老噴泉
泉水來自上面「霞之池」


「瓢池、翠滝、海石塔」
「瓢池」原名叫「蓮池庭」，係「兼六園」嘅前身，後來擴充後就變成其中1個景點


「夕顏亭」
係園內最古老建築，由1774年修建，一般用作品茶茶室之用
但我呢日見到屋頂好多蚊同蟲仔......


「兼六園」設計上會有好多亭台、假山或小橋，令人可以周圍穿插
無一個既定路線
好多小路周圍都種滿樹木，行上黎覺得好心曠神怡




大家會見到上面兩棵松樹都有好多木柱承托枝節
係防止松樹不斷伸展好容易支撐唔夠
而且金澤係雪量非常多地區，因此除左雪吊，呢類木托都係必須

兼六園好似幾靚 大約預幾多時間好？

唔算好大 我覺得個半至2個鐘都差唔多
正常一日應該行得晒 兼六園 金澤城公園 近江町市場 東屋 長屋 21世紀

3月都去完金澤
好佩服樓主
兼六園都可以描述得咁詳細

我太口水佬姐
不過兼六園確實對於後生吸引力比較低，我地呢代邊會有閑情雅致欣賞林木

我覺得還可以
起碼唔算好快就行完嘅景點

《金澤城 + 金澤城公園》

係「兼六園」桂坂口出返黎


過對面條橋就已經係金澤城公園


橋底個巴士站就係我今朝落車個巴士站


一過完橋就已經係金澤城入口 - 「石川門」
「石川門」係1788年曾經重建過，係日本國家重要文化財之一



大家都可以入去「石川門」呢座城郭參觀下




「菱櫓・五十間長屋・橋爪門續櫓」
「菱櫓・五十間長屋・橋爪門續櫓」係金澤城公園最中心位置
基本上就係金澤城象徵



如果大家想入去參觀，就要兜去後面進入
呢個要付費架(￥310)，所以對城無乜興趣嘅我就唔特別入去啦


附近有個「鶴の丸休憩館」
最主要係呢度有冷氣...同埋乾淨廁所


成個金澤城公園我最有興趣個部分就係「玉泉院丸庭園」


無論係大至一條小橋定細至一棵松樹一舊石頭，都配合得好細緻
而且松樹本身比人印象就係好典雅好恬靜
令成個庭院都比人覺得好有美感



而且呢度入冬之後都會為松樹加上雪吊，同隔離兼六園一樣都會呈現雨傘效果


對面係「玉泉庵」
而家主要作用都係作為茶室


或者可能係我呢啲大老粗唔識野
我係真心覺得呢個庭院唔輸比隔離兼六園大部分位置

之後就係鼠多門出返去



《尾山神社》

係鼠多門一出就會係「尾山神社」個背脊
行幾步就已經會見到神社


「尾山神社」係由1875年建成，亦都係國家重要文化財
係祭祀N年前豐臣政權五大老之一嘅前田利家

神社隔離有棵菊櫻


前田利家公像


「尾山神社」都係個值得去嘅地方
原因在於係鳥居後嘅神門係採用西方三層樓門設計混合日式技術嘅建築風格


之後我就慢慢沿馬路行去下一個目的地

如果佢好啲出Post，咁我可以睇完遊記先去就正好多

早啲出

3月去個陣剩係知有個玻璃美術館

入到去先知係連埋圖書館

個感覺勁靚好舒服

ps其實隔離連埋好似係銀行嚟

係小弟嘅錯
不過真心 我覺得本身對園木無興趣嘅人 無論點都唔會對兼六園有feel/認真睇

連圖書館個area都可以做到好似一個藝術館咁 好靚

《近江町市場》


講真，成個金澤我最期待就係去「近江町市場」
我係超鍾意去呢類市場可以行下食下，而且價錢起碼叫合理
唔會好似黑門市場開天殺價

「近江町市場」有好多個出入口
基本上出入口位置都係手信店/餐廳為主




亦會有好多類似超市形式，賣一盒盒壽司


而「近江町市場」本身作為金澤人嘅廚房
都會有好多蔬果/牛肉/鮮魚/酒類飲品舖


如果大家想掃街就要行入去中心位置
裏面超多熟食、海鮮舖




好似呢間「もりもり壽司」超多人排隊
而且Tabelog評分都3.54，我有朋友食過都話幾好


我第一間就揾左呢間「みなみ」




叫左2隻真生蠔 (￥700/2)


雖然只係￥350一隻，但質素都好高
會見到size都唔算細，而肉就好飽滿
蠔肉好新鮮肥美又多汁，擺落口個股甘甜味好出

其實在場有好多鋪頭賣嘅蠔size仲大隻好多(當然仲貴)
不過我真係cheap人大老粗，一直都食唔慣大到好似手掌咁大嘅
所以當經過みなみ，就覺得呢間好適合我

第二間我唔記得影個門面
但見到有海膽、扇貝同各種size嘅生蠔



呢間有齊真生蠔同岩生蠔
會見到岩生蠔價錢會貴好多，始終岩生蠔採收難度較大，而且體型都大好多


我買左份海膽(￥800)同扇貝(￥700)


扇貝超厚，雖然唔係爽脆，但口感好實在
咬落去會慢慢一梳一梳化開，然後個甜美會瞬間標出黎


海膽都好甜，無腥味


之後過左黎呢間食能登牛小店
彌補下我前晚無得食「肉匠Jade」


呢間野係用自助售票機
買完飛就直接遞比店員就得


A5能登牛串燒 (￥900)
雖然自稱A5，但咬落去油分似乎唔太重，未做到入口即溶
另外其中2舊直頭係好多筋


炙燒A5能登牛壽司 (￥800/2舊)
炙燒味道唔突出，另外牛肉都有筋，油份亦無因炙燒過而滲透出黎
但靠上面少少照燒醬吊下味


行多幾個圈我又返到みなみ食多2隻生蠔



最後買幾粒士多啤梨食就搞掂


另外「近江町市場」係有2層，樓上主要就係食肆為主


之後就慢慢行去下個景點

其實唔關事，我4月中去立山

兼六園係上年11月

海鮮市場幾點閂門？

近江町市場幾乎所有檔口仔同唔少餐廳通常去到晏晝3-5點就冇
不過都有幾間餐廳係營業到夜晚
但我個人都係推薦唔好遲過晏晝2點嚟

《東茶屋街》

係「近江町市場」行過去東茶屋街都只係10分鐘


係日本傳統文化，「茶屋」其實係作為比藝妓招待有錢人嘅地方
而藝妓同雞分別都好大，屬於賣藝不賣身，專門表演樂器同舞蹈

而「東茶屋街」就係金澤市內其中一個當年聚集唔少藝妓屋嘅特定地區

跟住人流行入去



就會見到最多人打卡個條街




呢張用iphone影


係「東茶屋街」有好多賣金箔成品嘅店鋪
例如金箔餐具、金箔面膜、金箔護膚品等




行呢啲小巷都好正，古色古香


另外會見到好多「茶屋」地下個層嘅外牆都係呢啲一條條一格格
呢種鋪設叫做「KIMUSUKO/木蟲籠」


提提大家好多店鋪內籠都係不准攝影
大家要留意清楚先好舉起相機


「東茶屋街」係一個非常適合打卡嘅地方
周圍建築+成個氛圍都好傳統而又散發住日本味道

講到金箔同打卡，當然唔可以唔提金箔雪糕
最多人排隊係「箔一」


金箔雪糕(￥890)
其實就係正常牛奶雪糕上面鋪一塊金箔
值唔值就因人而異，但對我黎講食1次半次都無壞


「箔一」本身都係賣金箔製品鋪頭，大家有興趣都可以選購
本身想話買幾塊金箔面膜比老母，但老母即刻whatsapp我話金箔面膜麻鬼煩又無用，唔好買


另外附近都間「烏雞庵」
都係食金箔雪糕，不過就係金箔碎+雞蛋味雪糕

もりもり壽司
forus商場果間又係勁多人等位

《長町武家屋敷跡》

金澤曾經係封建時期日本最大地下町之一，人口非常多
從前藩主當然係住係城內
而其他大臣、武將、平民就會按地位居住係城嘅周邊，越高級就越近

而長町區係當年比班高高地level武將居住，所以距離金澤城並唔遠
亦被稱為係武士區

要去「長町武家屋敷跡」最方便就係搭巴士係香林坊落車
然後跟住google map行小路就會到


另外我簡單介紹下香林坊
就係金澤市內購物中心地段，好多名牌e.g. LV呢類都可以係度揾到
不過我就無乜點行


沿路都會見到指示牌指引你去「長町武家屋敷跡」


當見到呢啲景象就知道已經到左「長町武家屋敷跡」


「長町武家屋敷跡」保留左好濃厚江戶時代建築風格
例如狹窄街道、泥黃色土牆、石板小路等
恍如返到去江戶時代




而濃厚江戶時代特色亦都係「長町武家屋敷跡」最大賣點同歷史價值
因為「長町武家屋敷跡」係極少數經歷多次火災同戰爭仍然保留落黎嘅文化


係「長町武家屋敷跡」會有唔少工藝品店同食肆
不過都係要提好多工藝品店都係不准攝影
好似呢間專賣九谷燒，我就只能係門外影下


正如我上面講「長町武家屋敷跡」最大賣點就係個歷史價值
儘管無「東茶屋街」/ 「京都花見小路」咁靚咁值得打卡
但「長町武家屋敷跡」展現出黎風格同感官絕對係唔一樣



而且當你5分鐘前望完個LV包包
行5分鐘就突然返到江戶時代，個反差感其實幾正

我有食到Forus個間
4點幾去都等左超過半個鐘

原來果間燒肉jade係正野，上次行過唔知添