[多圖多字] 獨遊6日立山黑部、富山、金澤之旅

講真 3年半無去旅行 真係好身痕
所以相隔5個月我又同大家見面

首先例牌多謝大家支持先
係上次仙台post見到好多老朋友都仲有繼續支持我，小弟先更有動力繼續每日收完工返到屋企繼續打blog

係上次仙台post都做過預告，4月尾會去個4月中打後先有得遊覽嘅熱門地方
都見到有人估中左
無錯，今次目的地就係富山縣立山黑部 + 1日金澤


立山黑部一直都係on my list，本身都book好曬野2020年4月就去
點知一個疫情就變成2023年4月先有得去

今個旅程Total 6日5夜 (2023年4月25 – 30日)
我會有4日係富山縣，1日係金澤市區，最後1日會係大阪衝刺shopping
比埋大家睇行程表：
Day 1 : 凌晨機去Kix --> 鐵路上富山 --> 富山市内
Day 2 : 新凑 --> 雨晴 --> 高岡市區 高岡市區 --> 新凑 --> 雨晴
Day 3 : 立山黑部 --> 富岩運河環水公園
Day 4 : 新川觀光圈 (入善Flower Road / 翡翠海岸 / 魚津市) 雨晴 --> 魚津市
Day 5 : 金澤市内 --> 晚飯後落大阪
Day 6 : 最新門真outlet + 商場 --> 返回香港

自從出左黎做野，想請幾日都覺得難過登天
所以無論上次仙台定今次北陸都得幾日

為左可以爭取到多少少時間，我選擇左凌晨機出發去關西機場，預計到富山都只係中午
雖然名古屋上富山車程會短少少，但出發時間遠比關西機場遲

事不宜遲，即刻開始

lets go，又有高質遊記睇了
可以plan定下年去

早左入

lm 睇雪牆

首先我想為大家介紹下北陸地區

北陸地區大概係包含：福井縣、石川縣、富山縣及新潟縣
當中比較出名景點有大家熟悉嘅金澤車站、立山黑部、白川鄉、高山老街、上高地等

經濟同地區發展上當然同五大都有比較大差距
但就因為地理位置，沿海又多高山，自然景色非常豐富
一年四季都有唔同特色，無論雪景、山景定花草樹木景都係一絕

由於近海同埋富山灣寒暖流交匯流入，富山縣海鮮一向都係超級出名
各類魚類同貝類大家都一定要去食

不過睇地圖，北陸地區好似好遠，而且橫跨幅度都好大
究竟要搭咩車去啊？要講交通就好視乎你目的地去邊

我就無車牌，一向都係搭開鐵路/巴士為主
順便介紹埋去北陸可以用到嘅跨縣交通Pass比大家
(不含蚊型pass / 全國or全西日本pass)


講完呢d背景資料就正式入正題！

科勞左樓主
終於等到你再出post!

LM

LM

25.4.2023
Day 1

就算以前仲係學生哥都好少搭紅眼機
始終本人都係隻豬，訓覺真係太重要
但轉眼間我已經係隻社畜…要兼顧太多，無奈地就踏上呢班CX566航班

係24號11:30pm到達機場先去check in



拿，今次趟CX我都係用miles換咋，UO而家貴到飛起

之後就入lounge求其咬幾啖，費事上到機太肚餓


點都要係閘口前打個卡嘅 Yeah!


上到機順利起飛就開始睇戲

輪到飛機餐，CX紅眼機都已經係呢種飛機餐好多年
That’s why我要入Lounge墊左底先


迷迷糊糊咁就到左關西國際機場
今次呢班超級準時，仲早左15分鐘

趁大家仲未清醒，我一支箭就快步行去入境

由於時間太早無乜航班降落，成個過程都超快
我只係用左10分鐘就完成入境手續，去到行李輸送帶等行李


終於都真係抵達日本啦！
對上一次係關西機場應該都係18年嘅事


快快手過去JR站用指定席售票機換埋事前係Klook買左嘅JR Pass先
再順便換埋今日萬里長征嘅指定席車飛


而家西日本JR pass 無論你經咩途徑買，只要你有QR code都可以直接係綠色機領取
但比較唔方便係無得好似東日本咁係網上預訂埋指定席，要係部機逐個book



搞掂好曬車飛都只係07:05...


講比大家知，其實我係第一次搭HARUKA列車
見到有Hello Kitty好可愛


以前HARUKA係唔經大阪站(即係梅田)
但今年3月18號起就新增左大阪站
所以我就好蠢咁係大阪站轉車

點解話自己蠢？係我竟然唔記得左大阪站係數一數二複雜嘅JR車站
結果我由HARUKA停車個月台足足行左10分鐘有多先到下個月台搭Thunderbird上北陸
大家唔好好似我咁傻豬啦，直接係新大阪站行過隔離幾個月台轉車就更方便


成程Thunderbird上到金澤都要2個半鐘，都趁有時間即刻補眠
(建議大家選擇右手邊，視野會更開陽)

我座位後面係無人，更加肆無忌憚向後挨
超好訓，訓到成隻豬咁

轉眼就到左金澤站

再去轉新幹線前往富山
所以大家會見到由大阪上富山個唔好處就係要轉2次車
而東京/名古屋就可以直接1程新幹線/特急上到黎


中途醒過1次就補一補相，睇下出面景色



終於都到左富山站
2020年去唔到嘅遺憾今日最終都實踐到

LM

社畜

高質地方 立山係咪今年先開返山

好似係上年重開咗啦

LM

Haruka 大阪站係新翼嚟喺另一邊，係特別遠

搭慣南海電鐵

LM

我呢幾晚住嘅酒店唔近富山站，時間又尚早
就係車站先寄存行李
最多Locker選擇應該就係JR綠色counter同7-11中間入去個條路
而且大locker都只係￥600!!!


《麺家いろは(IROHA)》

擺低完行李一身輕，就緊係要幫自己加返重
第一餐我就去左食拉麵

富山其中1樣名物就係黑拉麵

所謂黑拉麵其實就係用秘製黑豉油熬製而成嘅湯底，鹹度比一般醬油湯底會更咸
原因係從前富山勞動人口多，做苦力為主，黑豉油就可以更好幫到班工人補充鹽分
而一路流傳落黎就成為拉麵界其中1門 – 富山黑拉麵

係富山周圍都可以揾到黑拉麵
就咁車站附近都已經有老字號「西町大喜」同獲獎無數嘅「麺家いろは(IROHA)」
我從網上面評價會見到「西町大喜」會更傳統，而「麺家いろは」就有稍為調整過，會更適合新手嘗試

所以我就揀左位於富山車站對面CiC商場嘅「麺家いろは」


「麺家いろは」有幾款拉麵
1. 黑醬油湯底拉麵
2. 白蝦湯底拉麵
3. 味增湯底拉麵

拉麵大部分都係￥850 - ￥1610 呢個Range，豐儉/分量由人


「麺家いろは」不設自動售賣機，所以大家鼓起勇氣用你把口同手指落Order啦

胃就得1個，黎得富山就當然要試黑拉麵
叫左碗￥980並盛 Basic款
另外再加左碗迷你叉燒飯 (￥300)

麵同飯一齊上
第一眼視覺已經覺得好正，好重口味


黑醬油湯底好濃味，未到過鹹
唔係香港豉油個種死鹹，而係鹹得黎會帶有微甜
清淡人士一定會唔慣，就算我重口味人士都唔可以飲多幾啖
食到中段已經開始覺得鹹



如果大家都開始覺得鹹，我建議可以加胡椒粉 (枱面藍色罐)
加完之後會有少少胡椒辣味中和到鹹味，呢個都係我平時食醬油湯底都好鍾意嘅配搭

拉麵用中太麵 (少少粗身)，係最適合重口味湯底
由於湯底太深色，基本上已經幫拉麵染曬色
麵體比較彈牙有咬口


叉燒肥瘦適中，而且肉已經煮到好淋，用力夾都會少少散


成碗麵我最欣賞就係隻溏心蛋
蛋黃部分仍然呈半固體狀，咬落去配合埋湯汁就好有味


叉燒飯反而麻麻地，主要問題出現係叉燒肉度
叉燒肉應該係用拉麵叉燒頭頭尾尾部分再切粒去炒
肉質外皮有幾舊少少脆，但整體都比較鞋，亦都過鹹
叫做好彩碗飯有蛋黃醬中和左少少


最後都食到好飽

麺家いろは
https://goo.gl/maps/fQtsgewtTUaZTiFE9

《富岩運河環水公園》

去得富山市，除左立山黑部，就一定會去富岩運河環水公園

由富山站步行過去都只係10分鐘內


沿途都係平路，好好行



呢個位見到少少立山黑部阿爾卑斯山脈
諗起2日後會去就已經好興奮


途中會見到呢舊2人相擁嘅像
個像叫《Lovers 恋人たち》


行到見到呢座啡色建築就可以左轉入去

呢座啡色建築有個大大隻logo寫住Gym college
不過後尾search過應該係一棟野有曬酒店、Gym room、政府辦事處同餐廳


行多2分鐘就會見到富岩運河環水公園個招牌


呢個正門入口定時都有流水環節，強弱有序



最遠個座橋 - 天門橋，就係成個公園嘅其中一大signature



不過今日天陰陰，天氣報告仲話過多1個鐘就落雨
我都即刻加快腳步

公園範圍都好大，只係圍繞座橋同入口位行都要用幾個字
設計上唔係奢華，反而簡約得黎會覺得好空曠好舒服




行前多少少係座橋隔離就係公園另一個signature – Starbucks
呢間Starbucks最出名緊係唔係恆常渣到爆嘅咖啡啦
而係曾經有朵係被選擇全球最靚Starbucks！



齋企係Starbucks隔離係唔會feel到有幾靚
你要行上條天門橋望先會發現個美貌

天門橋兩端可以行上2層會有個展望台
就能夠係更高位置俯瞰成個公園


如果你係地面望Starbucks絕對會覺得只係一般靚
但天氣好個陣當你一上到展望台向Starbucks望就會覺得好靚
因為成大個立山黑部阿爾卑斯山做背景襯托Starbucks


所以大家千祈唔好揀天氣差黎
要天氣好見到成大個景色先值回票價...雖然0入場費


往年4月其實仲可以見到幾乎全白雪山
但今年天氣熱，雪融得好快
連立山黑部大雪牆都由往年大概20米高變得返13米

不過本身成個公園樹木整齊，道路寬敞，又有山脈做背景
已經好夠靚，山頂有幾多白都係bonus




另外提提大家，公園本身都係熱門賞櫻地點
而櫻花樹就更加係Starbucks隔離，所以又為Starbucks加曬分


天門橋另一面都係好開陽


連住湖邊個建築係餐廳，不過都好多人預約黎舉行婚禮
落地玻璃望住成個公園搞婚禮都應該幾happy

而最左下角係遊覽船，比錢就可以坐去唔同目的地
1. 富岩運河環水公園 - 岩瀬カナル会館 (單程￥1,700)
2. 富岩運河環水公園 <-> 中島閘門 (來回￥1,400)
3. 富岩運河環水公園內兜圈 (￥500)
不過我見天氣報告話好快落雨就無坐啦

遠少少會見到富山縣美術館
我本身都有打算係公園hea多陣就過去，但後尾落雨我就放棄左


係公園兜左個圈
唔係話咩好靚，但無論咩方位望都會覺得好工整，所以野配合有序


我呢d死港女見到咁靚打卡位緊係唔執輸
去Starbucks買返杯野懶他條hea下


仲比我霸到個露台位，望住天滿橋慢慢品嘗呢杯新出品 - 蜜瓜哈密瓜沙冰


呢杯野我出發前已經mark左想飲，見網上好評唔少
點知一飲就覺得自己就快糖尿病，甜到爆
而且好濃個d蜜瓜+哈密瓜香精味，好假唔自然

坐多陣就慢慢行返車站


係車站手信店會見到有呢款富山名物之一 - 鱒魚壽司



外表雖然望落好似三文魚壽司，但其實係鱒魚壽司
魚係腌製過，所以有少少咸香
壽司米都會比平常稍為濕潤同酸
但我對呢d腌製過酸酸地野食就興趣不大

繼續lm 抄下行程

又要留名

LM

新手LM