雖然世界一向公認港男係同「男子氣概 (manhood)」扯唔上任何關係，但經過依位史丹福兼耶鲁畢業嘅律師描述之後，形容到包括自己在內嘅香港人真係唔錯，所以本樓豬認為需要用自己九流嘅語文能力翻譯部份內容出來，黐下金糠都好
請大家順便去下面佢個 twitter 派心心
= = =
......我識有人就係咁，我親眼見證過佢地嘅希望所帶來嘅力量。2019年秋天，喺北京嘅中國共產黨政府，對香港依個一直都獨立於大陸嘅城市之上，策動鎮壓。共產黨領袖對於香港有權自治以及香港人對北京政府嘅批評感到不滿，即使會違反中國自己喺國際條約中列明有責任要確保依座城市嘅特別身份，共產黨領袖仍威脅會停止依座城市嘅自治。對此，示威者走上街頭，但就面對上警察嘅暴力打壓還擊。示威者拒絕退縮，而衝突亦變成流血事件。
當時，我仲係參議院第一年嘅初哥，喺遙遠嘅他方睇住事件嘅發生。我喺唔同嘅渠道得知，香港嘅依啲示威都係非正式發起嘅，好多方面嚟睇都係一場自發嘅起義，由一班非常年輕嘅後生仔女發起。當我得知佢地勇氣可嘉嘅故事，聽到佢哋求助嘅吶喊聲，我就知道我一定要去睇睇。
2019年10月，我去咗香港去拜會佢哋，同第一身見證依啲示威。當地嘅美國領事館對我嘅出訪就唔係非常之高興。領事館職員一早就叫我唔好去。當我去到之後，就強烈建議我留喺酒店入面。但我好禮貌咁無視咗佢哋嘅建議。我想親自去見見依啲示威者，去睇下佢哋嘅勇氣同埋抗爭，可以幫到幾多就幫幾多。
我工作團隊入面嘅其中一位成員同啲示威者有良好嘅溝通。天色一入黑之後，我哋就離開酒店，按佢嘅資料，前往當地政府同香港人啱啱發生衝突嘅地方。我哋截咗架的士，但司機只係肯車我哋幾個街口。最後我哋徒步搵方法行去旺角區。嗰度平日係繁華嘅購物同商業中心，但喺嗰晚係一個戰場。喺我哋到達嗰陣，親北京嘅警察同示威者之間已經演變成武力衝突。街邊有架車著火。封好咗嘅櫥窗就俾示威者噴上「釋放香港(Free Hong Kong)」嘅句子。啲人向住唔同嘅方向四圍奔跑。我哋就喺旁邊睇。一大群香港人開始喺馬路嘅中心和平咁聚集起嚟，手持標語譴責打壓。突然間，成個方陣嘅親北京警察，身穿防暴裝備，全副武裝，出現喺佢哋嘅另一邊。佢哋拎出擴音器，命令人群散去。威脅佢哋，唔散去嘅話就會使用武力。
當國會議員出國嗰陣，美國政府經常都會指派軍事聯絡員陪同。而嗰次，喺嗰刻，我嘅軍事聯絡員靠近我耳邊講：「Sir，我哋應該要退後。如果佢哋開始向人群開火，而我哋又撈埋咗入去嘅話，咁就有可能觸發國際事件。」佢係有道理嘅。但啲示威者冇退縮，而我哋都留咗喺度。我想親眼見證到底會發生啲乜嘢事。啲示威者留守喺佢哋嘅陣地。最後，喺啲防暴警察轉身離開。嗰日成晚，示威持續。爆炸聲同武力交火喺嗰個城市多處出現。
好榮幸，第二日早上我同一啲示威領袖會面。難以想像佢哋都係咁後生，佢哋大部分都只係二十出頭。有啲係以前抗爭運動嘅老手。有啲已經坐過監。我答應，會向美國嘅人講啲人喺度做緊咩，解釋佢哋喺度爭取緊啲咩。
點解你會願意去面對坐監？我問佢哋。而即使我冇提起，大家都清楚佢哋需要面對嘅另一個可能性：死亡。佢哋話，我哋愛香港，我哋想見到佢有自由。我哋相信我哋可以做世界嘅燈塔。佢哋充滿盼望。
但佢哋同一時間都好實際。佢哋知道要等好耐。佢哋知道，只要北京政府想，就可以喺一瞬之間摧毀香港嘅自由。即使佢哋有生之年未能夠見到佢哋嘅遠景成真，但佢哋仍然相信係值得去抵抗。因為佢哋相信佢哋嘅行動會產生共鳴，會累積，假以時日，不論係佢哋在世定係後世，終會勝利。
依個就係希望所帶出嚟嘅勇氣。即係依家都好，佢哋仍然抱有希望。喺我目睹依啲事件之後，北京當局加強壓制。佢哋強行鎮壓示威。好多喺嗰個10月我拜訪過嘅年青人，之後都被判監或者流亡。但係，佢哋嘅盼望仍在。而依份希望所發出嘅光芒，喺公義之上，上帝之前，會永不熄滅。......
= = =
https://twitter.com/HawleyMO/status/1658519856541466633
= = = = = 相關 post = = = = =
【四週年．未敢忘記】一個月之後係6月12號
- 分享自 LIHKG 討論區
https://lih.kg/3387537
