pic from: https://zh.m.wikipedia.org/zh-hant/腓尼基
可能你有少少疑惑，地中海第一個海上霸權唔係希臘咩？又真係唔係。
話說，當時地中海國家流行著紅袍，不過唔少國家嘅染色技術一般，所以鮮豔嘅顏色好容易甩色，即係染完都ok，不過著一陣就啞晒色。但係佢哋發現有一班人嚟自地中海東部，身上著住豔麗嘅紫紅長袍，地中海嘅人對呢一種咁獨特嘅顏色同技藝心生羨慕（好似本身睇緊黑白電視見到人哋個mon係彩色咁）。公元前三千年，埃及人已經稱呢班人做「腓尼基」，意思係「紫紅的人」，用奇特嘅顏色去形容呢個海上民族。而希臘人喺公元前1200年仍要處於黑暗嘅文明中斷期。你我今日所知嘅希臘輝煌，係始於公元前五世紀戰勝波斯，及後出咗著名嘅柏拉圖，人人就記住雅典海軍威武同文化先進。
而現實係，腓尼基文明嘅輝煌，要遠早於希臘。換句話講，腓尼基喺海上貿易嘅時候，希臘仍然處於襁褓階段。
腓尼基人靠住獨特嘅工藝同航海技術，以商業稱霸地中海。後來希臘人沿用埃及人嘅稱呼，成為希臘人所記載嘅神秘嘅「腓尼基」，即係「紫紅之國」嘅意思。
之所以話腓尼基係神秘，係因為好長時間以嚟，「腓尼基」嘅遺跡同文化都無被發現、發掘出嚟，只有希臘同羅馬（簡稱希羅文明）單方面對腓尼基嘅記述。不過，希羅文明明顯對腓尼基人無咩好感，著名嘅古希臘歷史學家希羅多德（Herodotus）咁樣形容腓尼基人，佢話：
「根據有學識的波斯人的說法，最初引起爭端的是腓尼基人……」
但希羅文明有無如實描述腓尼基人就令人有唔少懷疑，因為希羅文明同腓尼基文明係貿易上嘅競爭對手、戰場上嘅敵人。對於古代嘅人類歷史嚟講，勝者為王係一個真理。征服者往往都會去抹黑被征服者，所以地中海嘅失敗者──腓尼基人，被希羅文明視為品德低劣嘅民族就一啲都唔意外。
