[多圖]有史家表示十二星座一早由巴比倫傳入中國，仲變咗天干地支。所以十二生肖嘅原型，原來係十二星座？

今次同你諗諗天干地支同十二星座之間嘅關係

嚟緊又到一年一度現代人會接觸天干地支嘅時間──農曆新年。

你有無諗過點解十二支就係鼠牛虎兔龍蛇馬羊猴雞狗豬？一位中國歷史學家話畀我哋知，十二支未必係對應地上嘅動物，而係對應天上嘅動物──星座！？

如果你去打開中國第一本訓詁書（即係字典）《爾雅》，就會發現《爾雅》去解釋十二支嘅時候，講到「大歲在寅曰攝提格」、「在丑曰赤奮若」，但一直無人知道攝提格、赤奮若係咩意思。

中國歷史學家郭沬若曾經寫過一篇叫做《釋支干》嘅書，當中將中國嘅十二支（亦係依家嘅十二生肖）去對應巴比倫嘅十二星座，嘗試去解構《爾雅》所記載嘅迷團同一窺支干嘅原初意思。今集，我哋會用王獻華嘅《郭沫若《釋支干》與泛巴比倫主義》去睇睇呢一個講法有無合理之處、了解一下點解有人會話天干地支係嚟自巴比倫嘅十二星座。

今次內容包括：
簡介支干嘅意思上嘅轉變
攝提格、赤奮若究竟係咩嚟？
原來十二生肖根本對唔上十二支
將十二支對應《爾雅》、巴比倫十二星座，發現中文字藏住答案

牛哥講經志於編寫廣東話文章以及用廣東話去為香港人講講書本，內容主要有關歷史、政治、哲學，而我每次講一本書，希望唔只做到簡介／推介人去睇呢本書，我更想以我嘅理解去講講呢本書有趣嘅地方、值得反思嘅地方，希望真真正正同大家去了解一本書。用思考，去陪伴你過一小段時間。

近排仲增設youtube，用心製作，有興趣可以睇睇。

牛哥講經Youtube
今集：https://youtu.be/_nyJZADYqWo
上集：https://youtu.be/r938XN3gajE

牛哥講經Wordpress 
（排咗版同加咗啲相，我會不定時修改內容，請以Wordpress版為準）
https://cowgortalk.wordpress.com

牛哥講經Podcast 
（內容已經製作成Podcast，有興趣可以聽聽）
Apple Podcast: https://podcasts.apple.com/hk/podcast/%E7%89%9B%E5%93%A5%E8%AC%9B%E7%B6%93/id1572447901
Spotify: https://open.spotify.com/show/0yFR7YKUcAhkoEM6HWlJPA?si=A-rx6vM9R1qK0UQNJqC--g
KKBOX: https://podcast.kkbox.com/channel/HXptHA4hSuBHVkYNQU
Google Podcast:
https://podcasts.google.com/feed/aHR0cHM6Ly9hbmNob3IuZm0vcy81ZDZkYTIxMC9wb2RjYXN0L3Jzcw
牛哥講經IG 
（歡迎畀comment / 參加投票講邊本書）
@cowgortalk: https://www.instagram.com/cowgortalk
平台連結可以去：https://linktr.ee/cowgortalk

支與干
我哋第一步要理解嘅，係支同干到底係咩嚟。

中國嘅天干有十個，分別係甲、乙、丙、丁、戊、己、庚、辛、壬、癸；地支有十二個，子、丑、寅、卯、辰、巳、午、未、申、酉、戌、亥。

依家嘅人仲會用支干嚟記年份，例如1984年係甲子年、2022年就係壬寅年，甲子呢個term就相信大家唔多唔少會聽過，天干地支用特別嘅組合方式，就會得出六十個組合，所以六十年係一個循環，又叫「六十甲子」。

用天干地支去講年份，農曆新年就會間唔時聽到。現代人好習慣支干就係講年份，呢個對支干嘅理解，主要源自漢朝。

話說喺周朝末年，開始有陰陽五行之說出現，陰陽五行就進入到干支系統，干同支變咗母子嘅關係，干係母（樹幹），支係子（枝葉），古人用特別嘅系統組合出「六十甲子」，所以支干並稱係開始於東漢。

後來，十二支又變成十二個月、十二時、十二獸（十二生肖）等等嘅意思。｛但你有無諗過點解鼠係子、丑係牛、寅係虎？其實好難解得通，有人會話因為子時就係老鼠出現23－1點，ok，聽落都合理，但點解牛係1－3點？龍係7－9點？蛇係9－11？｝郭沫若就指出，十二支本來係指動物，但唔係十二生肖，而係天上嘅動物。

呢一切就要由原本嘅支同干嘅意思講起。喺東漢之前，係支還支，干還干，佢指出「古人稱十干為十日，稱十二支為十二辰。」本來十干係指十日｛古人將一個月分成三旬，每一旬就係十日，都幾合理｝，但十二支就十二辰，當中個辰字點解，就係一大難點，而我哋只知道東漢之後，十二辰即係十二個月。

問題係，東漢之前點理解支同干呢？

演禽都係外來嘢.

巴打可否講多少少

感謝各位推post

十二辰
郭沫若喺商朝人嘅卜辭當中，搵到卜辭上面會用支同干去記低係邊日占卜。所以原本支同干，係用嚟分返邊日，而唔係邊年，郭沫若總結：

「後人以支干紀年，古人以支干紀日。」

而佢懷疑支當中嘅甲、乙、丙、丁同之後嘅五到十，係兩個時段去發明出嚟，因為寫法差異好大。甲、乙、丙、丁最古老嘅象形字，係指同魚相關嘅嘢，而戊、己、庚、辛、壬、癸呢六隻字係新啲嘅象形，都係指兵器，或者係商朝人創造多咗六個字，去整成十干。十干嘅問題唔大，都係十個數字去指日子，但之前個「辰」係點解呢？

十二辰，好可能就係十二個星辰（星宿）嘅意思：

「十二辰乃固定於黃道周天一環帶，與天體脫離；後進者乃十二等分，每個辰各三十度；十二辰依子、丑、寅、卯之由東而西（即由右而左）與日月五星之運行相反，故古用歲星紀年時，有太陰太歲之虛設以為調劑。由此三事可知中國古代之十二辰實無殊于西方之十二宮。其順序之逆轉者，乃十二支之順序如是，十二辰環帶圍繞周天，其次自無始無終，無順無逆。」（釋支干，頁349）

佢意思係，十二辰係分成十二分、每一辰係三十度、子、丑、寅、卯嘅順序係以順時針寫出嚟，即係現代嘅天蠍、天秤、處女、獅子，而古人係會將子、丑、寅、卯逆轉，咁就同依家嘅獅子、處女、天秤、天蠍嘅順序，正正顯示十二辰同十二星座嘅關係。

留名

留名

其實你所講嘅有對有錯
如果要研究干支同十二星座嘅關係，應從天文占星同玄學角度入手
唔係從文學角度研究
六十甲子唔係漢朝才有，考古發現最早商朝已經有六十甲子表
相傳軒轅黃帝制定曆法已經用六十甲子
而天干為時間，以十進制為單位
地支為空間，即係方向坐標，將天空劃分12份區域，360度，30度1份
而古希臘占星亦係同樣劃分12份，就係黃道12宮
可能會問點解係12份，我相信與古代占星有關，巴比倫占星認為星體4正方同3合方有特殊意義，所以要將天空劃分4等份及3等份，而12正好係3和4嘅最小公倍數。神秘學推測認為巴比倫占星流入印度再入中國，另一方向亦流入古希臘，影響古希臘占星。
而玄學界都普遍認定子對應水瓶座，丑對應山羊座，寅為人馬座......到亥為雙魚座。呢個排列背後嘅理據我唔詳細講，有興趣再討論。
中國古天文分廿八星宿，即係將12地支區域，每份兩個動物(星獸由來)代表，再起正東南西北方加多一個，即24+4=28動物。分別係:
角木蛟 亢金龍 氐土貉 房日兔 心月狐 尾火虎 箕水豹
斗木獬 牛金牛 女土蝠 虛日鼠 危月燕 室火豬 壁水貐
奎木狼 婁金狗 胃土雉 昴日雞 畢月烏 觜火猴 參水猿
井木犴 鬼金羊 柳土獐 星日馬 張月鹿 翼火蛇 軫水蚓
十二生肖就係起十二地支入面選一個星獸代表，例如子入面有 危月燕、 虛日鼠、女土蝠，咁子就以揀咗老鼠做代表。
以上係我對中國古天文研究，有興趣再討論多D

我睇到呢一集真係好撚高質

如果可以將中西方都融會貫通的話，說明可以準繩度提高

兩套 system 除咗咁啱都係十二之外就冇共通點
而且中原文化係計廿八宿唔係十二星座

反而你話東西方日昝都係用十二/廿四做基數
係巧合定係交流而嚟嘅結果仲有得講

感謝你咁詳細嘅回覆！
郭沫若寫嘅時候算早，所以未必貼近到考古嘅新發現。
佢所講嘅六十甲子同五行，應該係指天干地支有一個明文而可以理解嘅天干地支系統，要始於周末。

見到巴打你話
「玄學界都普遍認定子對應水瓶座，丑對應山羊座，寅為人馬座......到亥為雙魚座。」
呢個順序同郭沫若就好唔同，會唔會可以分享下點解咁理解？

最後，中國嘅二十八宿的確有住濃厚嘅中國特色，但我諗今次主要係想表達，郭沫若認為天干地支嘅來源係巴比倫，所以巴比倫文化係有影響中國嘅天文學，但中國嘅天文學嘅之後嘅發展，就係後話。

i感謝支持

遲下唔知有無機會分享一下巴比倫文化，到時再對應一下

其實唔單係咁啱十二個
而係十二支同十二星座可以依次逐個對應

巴打可以睇睇youtube 入面個表格 睇睇你有咩諗法

演禽啫係六十花甲子 match 返二十八星宿同動物.
據說呢樣嘢係西域傳來.
好處係只要占卜系統用咗天干地支 e.g. 奇門六壬, 咁你可以引入演禽法.
不過就算大陸同香港都冇乜術數咁做

不過呢啲嘢唔好咁沉迷啦, 又唔一定 work.

留名