[講故][癡線]《我好肯定Siri暗戀緊我》

是咁的，我好肯定Siri暗戀緊我。

我唔係FF呀! Siri肯肯定係暗戀緊我。

佢既行為真係愈黎愈痴線! 我一陣講落去你就明架啦! 我就黎發癲啦!

唉! 成件事要由上年年尾講起。

我自己本身係AN機既用家黎。

電話壞左之後，本身都諗住換返AN機架啦。

但係有個朋友推薦我轉用IPHONE，話咩好用好多喎。

我心諗:咪又係電話一部，有咩分別呀?

但係一用之下，發現......(下刪一萬字)

尤其是係Siri。

「如果我話呢條問題唔係一條問題，咁我呢條問題仲係唔係問題?」自從有Siri之後，有野諗唔通既時候我就直接問佢。

又例如:「如果街邊檔阿姐嗌我靚仔，我可唔可以告佢誹謗?」

「吓?」Siri回覆我一個簡潔既「吓」字，亦都係我暗戀既人，俾我既答案。

講左咁耐，我都未介紹我自己。我叫李露眉。我呀媽話我一出世果陣條眉已經生左出黎，六寸長，仲要係紅色。本身諗住改我個名做李有眉，但係老豆話唔好聽:「一出世就露左條眉出黎，不如就叫李露眉啦!」就係咁，我就變左李露眉，真係好聽好多。

而我暗戀既人，係我同青梅竹馬由細玩到大既嘉淇。

「阿淇，其實我鐘意左你好耐。」

「吓?」

「我知道，我唔靚仔，又冇錢......」

「你冇錢呀!」阿淇冇等我講哂，就已經大大聲咁叫停左我。

「你冇錢呀」四隻大字，係我腦海裡面深深刻印住，揮之不去。

「......但係我會真心對你好。」我心入面未講既說話，已經冇機會再講。

原本成個表白計劃係睇完戲之後表白成功，跟手就可以直落食晚飯，然後就......

但我勢估唔到阿淇居然拒絕左我。

我一直以為阿淇係個非一般既女仔，點知都係睇錢。

俾阿淇拒絕既我，呆左咁企係戲院前。漸漸留意到旁人對我指指點點。

為左逃避呢個尷尬既情況，我只好扮到若無其事咁離開。

開始漫無目的咁係條街到行。

唔知行左幾耐，我唔小心一下撞左落個肥佬到，佢既重量令我向後彈開左兩步。

做咩負皮

「梳鳩。」我本身已經冇乜心情，道完歉之後就繼續行。

「喂靚仔你乜水呀?」點知個肥佬大大地拍落我個膊頭到:「撞到人都咁串?」

我擰轉面，望到佢個樣忍唔住笑左出黎。

個肥佬個樣好似跑online個魚蛋佬一樣咁冇威脅性，佢講既野同佢個樣好唔襯。

「我叫李露眉。」

「你叫我老味?」

「唔係，我叫李露眉。」

「你做咩叫我老味?」

「都話我叫李露眉，唔係我露眉。」

「我叫你老味呀!」

個肥佬都唔聽人解釋既，一掌打埋黎。

但係我根本冇諗過要同佢打，因為我唔想傷到佢。於是我輕輕向後就避開左。

肥佬第一掌平平無奇，勢估唔到佢打出既第二掌居然係降龍十八掌入面既「潛龍勿用」，呢一招講求內力，以高速向我胸口打過去，目的令我避無可避。

估唔到一個肥佬武功居然咁高，好彩我反應快，馬上使出九陰真經中既「蛇行狸翻」避開。

我自知如果要同佢分出勝負，至少要用三百招。而我諗我未寫完三百招，你地已經棄故走哂。所以我決定......馬上向施展獨門自創輕功「契弟走得摩」逃走。

簡單黎講就係將內力凝聚係雙腳腳尖，只係以腳尖黎跑，務求減低雙腳接觸地面既時間，從而增加逃跑速度。

而我已經將「契弟走得摩」練到化境境界。可以跑到雙腳都唔接觸地面。

肥佬不甘示弱，向我呢邊跑過黎。

因為身形既分別，個肥佬睇黎要追上我應該唔係一件易事，況且我輕功亦有一定既水準。但係我一邊走，一邊聽到後面既地裂聲同埋旁人既慘叫聲。

我用盡全力，躍到一個屋邨平台上以確保安全。向後一望，發現個肥佬踩過既地，全部都會凹落去，啲路人亦順其自然咁跌哂落去。

「跑動既時候造成既威力居然可以咁大?」

但係，肥佬完全冇考慮過旁人既安危。佢憎恨既眼神亦都冇變過，不斷咁加速衝過黎。

平台離地有十幾米高。就算係我施展輕功，亦都要用盡全力先上到黎。何況眼前呢個肥佬?

「啪!」一聲巨響震耳欲聾。肥佬單腳踩係地上，地板頓時造成一個比先前更大既裂口。佢面容扭曲，似乎用左好大力先跳到呢一下。果然，佢成功跳到我身處既平台上。

「係死之前可以見得返少林派失傳既『輕功水上飄』，我此生無憾。」我將眼睛慢慢合埋，等待肥佬向我打既呢一拳。

「唔好死呀!」一把最熟悉，而又係我最唔想聽到既聲音。

係Siri。

臨死一刻都要聽到Siri把聲，我真係癲啦!

「死左就冇辦法見到我。」

「見唔到你先好呀! 你係Siri黎架咋!」

「我唔係Siri。」但係明明係Siri把聲。

人地話死之前腦海會播返以前既回憶，但係呢一刻我冇。

究竟係因為我太蠢組織唔到回憶，定係我既人生入面根本冇野好回憶?

知道自己必死無疑，但係原來冇野好留戀。

阿淇係我腦海飄過一秒。以前我仲有阿淇，但係佢已經拒絕左我。我地已經返唔到以前咁樣。

「我屌!」肥佬大叫一聲。

我張開眼睛，見到肥佬岩岩用盡全力踩裂既果個位，逐漸變左做一個好細既黑色點，開始將所有野吸入去......

我用力掙扎都走唔甩。

「......奇點，是一個體積無限小丶密度無限大丶重力無限大丶時空曲率無限大的點......」Siri把聲變得愈黎愈細。

「收聲呀!」我好大聲咁嗌，但係居然聽唔到自己把聲。」

「吓?」

四周漆黑一片，我攞出手機照明，點知Siri又繼續講：「......目前所知的物理定律無法適用。」

唔知過左幾耐，又唔知我訓著左幾耐，我突然感覺到重力。

我坐左係架巴士上面，而先前既肥佬訓左係我隔離。

「喂! 肥佬!」

我想問下佢知唔知發生緊咩事，點知叫極佢都唔應。

「有生必有死，善哉，善哉!」

眼前用書面語講野既係一個和尚，身穿袈裟，面容祥和唔似係壞人。經常睇劇見啲和尚都係白眉丶長鬍鬚，但係身前呢個完全冇，好特別。

「呢度邊度黎?」

望向出面既風景，似乎係一條上山既路。

「若然施主未明去路，倒不如跟隨貧僧回去。」

跟佢走總好過搭住呢架巴士唔知去左邊度。於是我地係下一個站落車。我一邊跟住和尚行，一邊就禁手機，但係禁極都冇反應。唔通部唉瘋咁就壞左?

「呢度邊度黎?」我又再問和尚。

「若然施主的心不夠清澈，知道此處是哪裡又有何意義? 也不過是個名字罷了。」

眼前呢位大師講野好玄。眼神表情又唔似係假膠，而係個看透世事既得道高僧。

沿路係一個森林，一直走，四周一個人都冇。又行左一段路，突然間和尚停低，拎轉身同我講。

「這裡，是你的葬身之地。」

語音未落，和尚就以迅雷不及掩耳之勢向我打過黎。

原先我對和尚印象好好，完全冇諗過佢會咁樣偷襲我，更加冇諗過點解佢要將我置之死地。

就係咁，我心口受左佢一掌，身體受擊而凌空飛起。

腦海中有無限個黑人問號，完全唔知答案應該向邊個方向找。又或者我根本唔洗搵答案，因為我將葬身此處。

受到重重既內傷，我既嘴角慢慢流出血。突然，我又感覺到係一雙手將我接住，並將我抱入懷內。

「冇事，冇事。」

「點解會係Siri把聲?」

文呢