洛克人Zero 2心得：https://lihkg.com/thread/3066435/page/1
洛克人Zero 3心得：https://lihkg.com/thread/3070144/page/1
今作係Zero最後一作，為左答謝大家的支持，所以今作亦係所有系列中最易的一作。四個鐘頭都唔洗就可以打爆機，由此可見精靈外掛係又幾咁嘔心。
武器方面今作無左以往三作的長矛/棍同盾，而改成為上帝之手，可以好似星之卡比咁複製敵方能力，可惜敵方能力有部分係會有彈藥限制，用完就無，加上呢D複制能力無EX技強化同過關後自動消失，因此玩下就算，大家都係用翻傳統的劍斬開路過關。
裝甲同上作一樣都係分成頭身腳三個部分，我自己就裝左快速儲氣、尖刺熔岩免即死同二段跳。但今次裝甲唔係過關攞，而係靠打怪掉落零件去合成。雖然零件掉落唔係百分百，但掉落率高，加上來回往返可以輕鬆刷怪，因此我好快就集齊曬全裝甲。
至於EX技就唔再係要A Rank過關咁麻煩，今作八大關都有天氣系統，當關卡有黃色邊框時就處於不利天氣，關卡會有更多障礙同強化Boss戰，但我地亦可以拿到EX技。不過Boss有主場優勢都無用啦，咪又係比精靈外掛屈死左。而攞到EX技係非常重要，因為今作無火雷冰屬性晶片，想打出屬性攻擊的話就要依賴EX技。
最後就係最無賴的精靈外掛，加到自己血量一柱擎天，近乎鎖血。以往D精靈外掛要周圍搵，所以要體現到精靈外掛的淫威就要打到第二輪先至得。但今作只要過左Intro關，劇情就會送你一隻精靈，然後只要餵佢食水晶升級，就可以享受到100%的精靈外掛之力。唔洗再出街捉精靈，結果就可以打第一個機械人就已經爆血登場，無腦斬死。
不過精靈外掛幾屈機都搞唔掂劇情殺，強制結束Zero系列，進入NDS ZX時代。
最後任何舊game合集都要提一句：除非你真係對Capcom好有愛，否則直接RetroArch模擬器免費玩洛克人Zero 3好過，起碼可以自己較制，唔洗特登開Autohotkey去Remap D制去。