話說4月23號開始我見廁所個天花燈滴水
就報咗比業主同管理處
咁管理處上到黎睇
一打開個假天花一大桶水咁倒落黎
搵試水紙試就話咸水
咁業主個陣就打去搵管理處傾話要停咗咸水先
第一日成棟停第二日開始就淨係停我樓上
咁頭幾日係有好咗冇再係咁滴
但4月26開始又再滴過
仲開始不規則係唔同既地方滴(我估天花儲咗好多水)
咁我又搵管理處上黎睇同埋報比業主
睇完都係咁既結果，一開天花一桶水倒落黎
同埋話冇開返上面個水制
業主就話追緊管理處出信叫樓上整
如是者又幾日
我係廁所既野包括未開既廁紙都起鹽
廁所天花就時滴時唔滴
直到5月4號我女朋友一朝起身返工
入書房拎衫換既時候一踩入去就踩到一攤水
就即刻叫醒我問我係咪尋晚倒瀉水
我話冇
大家一齊入去睇個陣發現原來天花出緊水
仲有幾個水泡係到
下面D衫同褸都中哂，因為我係用開放式衣櫃
我地即刻叫管理處上黎check 同take record
同埋影比業主
管理處睇完都係話係咸水
嗰陣已經心諗屌
管理處走咗我地打算拎開D野先
先發現地下原來一早水浸
啲袋、鞋、printer底等等都係濕哂
原來係牆角一直有水keep 住流
跟手又叫管理處上多一次黎睇
都係咸水
我跟手唯有將所有衫掉哂上床先
呢個時候我再通知業主好撚大獲
我會claim 返同埋間屋我已經住唔到，已經冇位行同埋冇位瞓要搵地方暫住
業主覆我叫咗管理處盡快覆點follow up
話管理處工程部係我上面兩層check 緊
同埋叫我等佢兩日去搵律師搞
由呢日開始就係惡夢
我差唔多日日都要返去睇下有冇再擴散
同埋因為D衫已經污糟咗
我只可以不停去著個日咁岩係洗衣機洗完乾埋既衫
屋企晾衫既位都冇
到5月6號
管理處話我上面兩層都係漏水，一個係來水一個係去水
同埋睇到我樓上屎渠不停有水彈出同流落黎
我先知原來一直都唔係咸水咁簡單
當時我又再搵業主
5月7號業主搵咗公證行黎睇
check 到係書房新鮮落黎既係淡水
水泡係咸水
廁所入面新鮮流既係咸水
儲咗係天花既係淡水
同時亦幫我record 低我濕咗既財物
跟住上埋樓上睇佢廁所試色水
樓上都話依家用緊淡水沖廁
呢個時候我就叮一聲
唔怪得又咸又淡
一直都係屎水
我個fd最近搬左都好似話係佢單位流落人地度……
