如果我過往嘅post幫過你， 歡迎你入嚟推post/like
同以往一樣， 長文， 希望幫到今屆考生。
有部分內容會照抄之前嘅post， 唔使大家撳嚟撳去。
上年個post：
[DSE MATHS 2021] 7年5** + 滿分心得分享， 祈求今年M2爆機
- 分享自 LIHKG 討論區
https://lih.kg/2467982
TLDR：
1. 維持健康生理時鐘， 早睡早起， DSE 係8點半開考， 代表你 8 點半個人要清醒。
2. 長題可以用鉛筆作答， 方便修改。
3. 長題著重表達同埋執step分， 唔建議用out syl方法。
4. MC卷著重速度， 做卷策略非常重要， 確保自己有時間處理所有題目。
背景
HKU MATHS GRAD， 舊制AL， 全職補習。
教學 + 執靚 CV + 追夢， 幾乎每年都去考DSE (連M1/M2)， 考咗 8 次， 16個 5**。
8年嚟MC淨係錯過一條， 喺2016年； 2020 + 2021 年亦好好彩地CORE滿分咗。 M1 初見爆機， 但 M2 未， 所以仍需努力。
唔會用網上身份收客， 識我嘅人都希望你唔好爆我出嚟
呢篇嘢純粹係分享、 積福同chok存在感， 咁啱有寫嘅年份都真係俾我滿分到
希望呢篇嘢唔會太離地。
計數機
計數機跟身， 檢查好係DEG MODE， program完好。
兩部計數機就夠， 枱面多過兩部嗰啲通常都唔會有好下場。
建議program只有三個， 我每年都會用， 至於點用就留俾大家發掘。 詳情喺 2020 年個post有
1. Two equations two unknowns (linear)
2. Cosine rule for angles
3. Intersection of straight line and circle
第四條program可以入你唔擅長嘅嘢， 四心或者spherical law of cosine之類， 不過你預咗考評局會封殺你， 幾乎可以肯定你無得直接篤機。
心態
好多人會標籤自己做文科人、 數學白痴、 戇鳩之類， 然後無咗鬥心， 呢個心態一定要改。
無論你個數底有幾多都好， 問自己兩個問題：
「而家個成績夠唔夠？」、 「想唔想進步？」
當你想放棄嘅時候， 問多次自己呢個問題， 你心入面就會有答案。 進步嘅方法有好多， 好多時只係你俾藉口自己唔去做。
當然每個人嘅能力都有分別， 你係唔需要同其他人比， 你最後攞到嘅分數過到自己嗰關就得。
數學呢科實力可以好懸殊， 實會有啲人唔使點努力就5**， 有啲人好似讀極都唔識咁， 但呢個唔係你放棄嘅理由， 望多次上面紅字， 的起心肝繼續頂埋佢啦。
咁當然每個人都有唔同目標， 會取捨放喺唔同科嘅時間， 但都係嗰句， 問返自己上面兩個問題， 你心入面就會有答案。
試卷難度
我會將啲past paper分成兩組， 2012-2017年一組， 2018-2021年一組。
原因未明， 前者的難度感覺較低。 同一類嘅問題例如四心， 2015 年嘅題目可以直接用program鳩篤， 2018年打後嗰啲全部唔篤得， 所以唔好花太多時間去搜集無謂嘅programs。
2021 年嘅MC有相對多嘅題目都係無得用計數機篤篤篤就完， 真係要學生用下腦解決問題。
我特別建議學生真係學識去計2021年每一條嘅MC， 每個相關嘅概念都要識， 因為考評局好鍾意直接翻炒上一年考得差嘅題目 （正如你會見到2019-2021年都玩緊incentre， 2019&2021係長題， 2020係MC）。
Past paper數量有限， 而考評局係期望學生識以往出過的題目 （因為佢出題都好可能係參考舊卷）， 例如上面講2019年嘅incetre條式， 你會發現可以喺2021年Q19度用得返。 所以學識呢幾年DSE嘅PP， 會係個幾有效嘅溫習模式。
溫書
溫書首先係要記公式， 好嘅老師會話你知邊啲一定要記熟， 邊啲只係為咗做快啲先要記， 可有可無。
你需要理解每課書的例題， 佢哋點樣用到相關的公式/概念， 而唔係一味死跟， 做到後面條倒模一樣嘅題目就當自己學識咗。 你理解到自己或者書嘅例題寫緊啲咩， 先有可能喺無書嘅情況底下解決到同類型嘅問題。
書的問題當然會比DSE的簡單， 但絕對唔會無用， 基本功做得好， 考試遇難題先有可能會諗得到。
操卷
操卷係訓練你將腦入面嘅知識挖出嚟嘅能力/速度， 如果你溫唔夠書， 甚至個腦入面係吉嘅話， 你操卷只係浪費時間。
舉個例， 你如果連AS/GS嘅公式都未記好， 你點操都係唔會識做， 浪費題目。
例如你腦入面嘅知識大概係5*， 咁操卷係可以幫你將最後個grade拉近5*。 如果你想提升多級， 就一定要注意賽後檢討的過程， 而呢個檢討嘅過程係好可能長過你做一份卷。 （下一節會講）
長題目嚟講基本上只係要識做， 時控相對無咁重要。 當你以為自己溫咗書之後， 操卷的作用在於幫你搵返你的弱項， 對症下藥。 睇返自己有咩唔識唔熟， 溫返好書， 重新出發。
MC就真係要操， 無論你覺得自己有幾熟都要操， 因為考試嘅時限真係相對地短， 你唔練嘅話到時好難做到嗰個速度。
Mock嘅賽後檢討
做完mock exam之後一定要對卷， 重新睇一次自己寫咗啲乜。
長題著重表達， 答案啱唔一定滿分， 你表達出嚟嘅邏輯錯都係會被扣分。 如果自己唔識睇就chur下學校個老師， 咁當然我喺呢度就希望大家學校嗰位真係幫到你先啦。
喺最後呢段時間一定要花時間睇marking scheme答題個模式， 你寫嘅嘢如果同常規表達偏離得太遠嘅話， 改卷嗰個辛苦， 你係絕對唔會有得益。 留意答啲咩有分， 舉個例你take log嗰步係一定要寫清楚， 有1M分。
至於MC， 你做完卷望下自己喺份題目紙上面寫咗幾多字， 喺每題以秒做單位嘅時限下， 寫字越多越大機會做唔晒。 濃縮步驟亦係MC卷入面至關重要嘅能力， 呢個亦係點解MC卷特別需要操嘅原因之一。
卷一
避免用out of syllabus嘅方法， 我改卷見唔少， 最常見都係計angle between two planes條式。
用呢啲課程以外的公式要特別留心， 你嘅結果會係all or nothing， 你寫錯任何一隻角， 都會因為你無寫到marking入面任何一個M分步驟， 而最後攞到0分。
如果你跟返正常答題框架， 呢類問題幾乎可以保證你會攞到超過一半分數， 穩穩陣陣贏到嗰班用課外公式嘅人。
Aim 5**， 切忌急躁， 有呢個底嘅你喺卷一唔會唔夠時間做， 鎮定啲用正常速度寫。 留45分鐘check卷， 由頭check到尾， 你需要好了解自己平時會錯啲咩低能嘢， 記住卷一係拉curve最重要嘅關鍵， 因為係有好多人MC滿分或接近滿分的。
Aim 4 或以上， 盡力做啦， 留唔留時間check卷就睇你平時做數嘅風格。 有啲人鍾意一路做一路對， 驚將個錯嘅答案帶咗落下一部分。 唔識嘅位就試下轉去出題者角度諗， 佢會喺邊啲位俾分， 你就試下寫嗰啲嘢。
Aim 3 或以下， 唔識嘅題目應該會有好多， 時間唔會係大問題。 同上， 都係留意下有咩位可以執到分。
Aim full marks， 一半時間內完卷， 由頭到尾當係做多次份卷咁。 將啲步驟同啲字寫靚啲， 所有嘢盡量 marker friendly啲， 因為你靠佢食糊， 如果唔好彩撞著個手緊瘋狂扣分嘅人就弊。
卷二
Option數量平均分佈， 邊個option出現得太多就check咗先。 SECTION A嘅option平均分配後係7788， SECTION B 就係4443， 呢招對aim high嘅同學好有用， 亦都係呢個原因， top students嘅分數差距唔會好大， 可以好穩定地接近滿分。
呢個分佈係2012-2021年都啱用， 至於 2022 年係點無人會知。 另外點樣去善用呢個分佈去maximize自己嘅分數， 就留返俾你哋自己去諗， 我就唔喺度講太多。
圖形題最嘥時間， 唔識就飛； 最尾一定係離差題目， 通常都淺。
每題兩分鐘無突破就要skip， 確保自己有睇過全部題目。 至於兩分鐘嘅時間感覺， 就係你平時操卷要練嘅嘢之一。
最後祝大家順利考到今次個試。
諗到有啲咩再講
